~ Hmasawnna Thar, Editorial, April 26, 2017

Board of Secondary Education, Manipur hnuoia Class X le Council of Higher Secondary Education, Manipur hnuoia Class XII Examination, 2017 hai chu zo fel a ni ta a. 11th Manipur Legislative Assembly Election, 2017 leiin Class X le Class XII exam hai hi tu kum chu an hnu deu a. Nisienlakhawm Board le Council chun student-hai hmakhuo ngaina leiin result chu May thla sung ngeia insuo hman dingin hma a lak mek a, a tum angin result hi a hung insuo thei ngei khawm ring a um. Hieng a ni lei hin student han Class X le class XII pasi zo hnungah iem inchuk zawm pei ka ta ti hi chik taka an lo ngaituo a, an lekha inchuk zawm pei ding hi iemana ti an lo sukfel diem thiltha a ni ngei ring a um. Hi thu hi nu le pahai khawma chik taka ei lo ngaituopui thiltha ni bawk a tih.

Lekha inchukhai chun tum bik nei hi ei ta dinga thiltha a nih ti hi theinghil der lo ding a nih. Lekha hrie le thiem thei hai ta ding chun a tha naw le a tha bik tia hril ding a um chuong nawh. General Line khawm a tha a, technical line khawm a tha. Class XII zo char hin chu ei fena line ding thlang fel ding a nih. College kai naran el chu tulai khawvela ding chun an thaw chi ta naw a nih. Tum bik nei tei tei ding a nih. Tum bik ei nei naw a ni chun sin zawng hunah harsatna ei tuok ding a nih. |halai lekhathiema ngai, Bachelor degree le master degree nei, sin mumal nei lova um ei tamna san pakhat chu tum bik neia lekha ei lo inchuk naw lei niin an lang.

Tulai khawvela ding chun technical line a fe a, lekha inchuk chu a tha lema ngai a nih. Ei ni rawi chu ei beisei tak chu sawrkar sin hi a la ni a, hi lei hin sawrkar sin dita la zawng nuomhai ta ding chun general line a fe nek chun technical line a fe le inchuk chu a that lemna a hung um hlak. Competitive exam haiah science le Mathematics subject thiem a hung tulsa ta leiin Science subject lak chu a tha a, mi thangpuitu a nih. Hi lei hin Class XII china bek hin chu Science lak ngei tum hram hram ding a nih. Hmatienga thil hungtlung ding hi hrelawk naw inlakhawm ngaituo sa a tul. Hmatienga ei lekha inchukna le sin zawngna ding haiah a la tangkai ding a ni leiin Science le Mathematics subject hai chu thiem ngei ngei tum ding a nih.

Manipur state puotienga college le University tha haiah ei kai ve theinaw a lo ni khawma lunghnuol le beidawng ding ei ni der nawh. State sung ngeiah khawm Medical College/Institute, Nursing College, Dental Collge, Engineering College, National Institute of Technology, Agricultural University, Industrial Training Institute le Manipur University hnuoiah Course chi tum tum inchuk theina ei nei tah. Hieng College le Institute a inchuk hi hnuoisie bik nawng ei tiu. Tum tak takna ei nei a ni phawt chun state danga inchuk hai thiem thei le hriet thei hai chu ei hriet thei a, ei inchuk ve thei a nih. A tul le pawimaw tak chu thiltum bik nei le tumruna nei hi a nih. Tum tak takna ei nei chun ei inchuk nuom hi ei inchuk thei a nih. Pasietna hi suonlam tling loah sie ding a nih. Lekha tiem taima, lekhathiem lo an um ngai nawh. A thiem thei ei tihai hi lekha tiem taima, mihai neka taima bik zuol an ni hlak.

Class X chau ei pasi khawma beidawng el ding ei ni nawh. Takyelpat, Imphal-a khun Government Poytechnic ei nei a. Hi hmuna hin Class X pasihai ta dingin Diploma Courses in Civil, Electrical, Electronics & Communication le a dang dang inchuk thei a nih. Diploma Course zo chun Bachelor Degree le a chungtieng khawm inchuk thei pei a nih. Class X chau ka pasi tia beidawng el ding a ni naw a, Diploma course zo khawma an sang lem inchuk pei a, engineering line a khawm Gazetted Officer ni thei a nih. Tum hi suksang ding a nih. Ei tum an sang po leh ei invawr sang el ding a nih. Churachandpur District a Saikawtah khawm Industrial Training Institute (ITI) ei nei a, Class X zo chun Trade tum tum inchuk thei a nih. Sawrkar le company dang dang haia khawm ITI Certificate neihai ta ding chun sin hmu an hawi bik a nih. Sin hmu awlsamna ding chun training hi nei ding a nih. Private Institution, Govt. Recognised khawm tam tak ei nei. Hieng haia khawm hin training rin der lo ding a nih. Sin hmu theina Certificate pe thei an nih. BA naran inchuk el nek chun Technical Institute hran hran haia Diploma Course khawm zo inla ei ta ding chun ei hmakhuo a hung eng lem ring a um. Chun, tulai khawvel changkang taka ding hin chu Computer thiem chu makmaw a ni tah. Ieng sin khawm thaw ding ni inla computer thiem a tul ta a nih. Computer thiem lo chu mimawl le mi hmangthlak lo eini ta a nih.

Post a Comment

Powered by Blogger.