Transgender/nuhmeia insiem/inthlakdanglam ani thu huoisen taka India rama Television program inlar tak el MTV Roadies a inpuong Lels Lalhmangai Infimate chu Virthli in hun remchang zawngin a hnuoia angin hohlimpuina a nei.

Virthli: Tulai chu mipui hohlimna pakhat i ni vea, mi tamtakin hrietchieng le belchieng che an nuom a, tawite hohlimna hun i mi pek thei ding am aw?
Lels: Aw, thei e, sienkhawm mihai natna ding le buoina intluntu ni hi ka thil nuomnaw zawng a nia chun, Pathien nauhai eini leiin thiltha niin ka hriet nawh.

Virthli: Lawm a um! Aw leh Lels, a tira i hming indiktak i mi hril thei ding?
Lels: Ka hming hlui hi chu hril kher a ngaiin ka hriet naw ie. Mi hrethiem el ro.

Virthli: Inthlakdanglam hnunga i hming?
Lels: Lels Lalhmangai Infimate.


Virthli: In veng/i piengna khuo i mi hril thei ding?
Lels: Parbung khuo suok ka ni a, amiruokchu ka Pa hi mission thawktu a ni leiin hmun dang dang ah insawnin kan um a, Parbung le Pherzawl hi kan khuo tak ah ka ngai a, Pherzawl ah umhmun kan khuor. Ka piengna khuo chu Damdiei a nih.

Virthli: Tuta i umna?
Lels: New Delhi.

Virthli: I sin thawna i mi hril thei ding?
Lels: The landmark Group Citymax ah Sr. Supervisor Operation in Audit sin ka thaw mek.

Virthli: Hieng anga nuhmei lungril hi iengtik hun vela inthawka i put tan am?
Lels: Aw, nuhmei lungril hi ka pieng hlima ka put tan niin kan hriet. Ka chinlai ka hriet china inthawkin Christmas thuomhnaw thar kan inchawk ding huna dam hin kan buoi thei em em a, tap pumin Damdiei a Pu Laldar a dawr a zakuofuol ngenin ka nu le pa ka sukbeidawng thei em em hlak. Ka nuorin ka Pu Thangvung hai Ina ka thuomhnaw hai bag a paiin, zakuo hak pumin ka zu zam hiel hlak. Ka hung inthang lien peia inzakna chang ka hung hriet khan pasal thuom in ka hung inthuom a sienkhawm ka nuhmei nina a bo chuong nawh.

Virthli: Ei society ah hiengang transgender hi ei la um hriet a ni nawa, hiengang lungril i put tan hlimin, iengtin am khawtlang in an en ding che ti hai dam i ngaituo ve tho am?
Lels: Ka ngaituo taluo! Transition ka tan hma hin counselling hai chen khawm vawitam tak thangin, ka hmatienga thil la hung tlung pei ding hrie pum zingin Pathien kuoma tawngtai ti chauh naw chu thaw ding a um nawh. Zanmu hmu lo beidawng ngawi ngawia medication ka thaw lai chun beiseina insangtak pumin Lalpa iengpo khawm nisienla mi umpui in mi thuoi pei rawh tiin ka tawngtai hlak a, ka roul le pai, sung le kuo, u le nau hai kuoma hin mi tawngtaipui mawl mawl ding le hrietthiemna iengkim nei thei dingin ka lo ngen hlak. Iengpo khawm nisien society le khawtlang hai mi rel dan dan chu lungawitaka pawn dinga insiem sa vawng ka ni a, la hung tlung pei ding a hai khawm kan huom. Khawtlang/society a ngaidan a pawimaw lai zingin kei ka mimal hringnun a ni ve tlat!

Virthli: Pasal anga in ngaina i nei ve tho am?
Lels: Pasal anga inngaina hi ka nei naw eh. ka tawng suol rawp hlak, pasal hai tiin. Hehe! Nikhat chu ka pa le nu kawla hin ka hrila kei chu damsunga nuhmei nei lo ding ka na pawi hi in ti am tiin kan dawn a. Ka pa chun ka hrietthiem che, i hril hmaa kan hriet a nih tiin a mi dawn a, ka nu ruok chun ka lungril ding hi a veng deu ning a tih, a pawinaw bawi nei nei a ngai nawh a mi ti pek a. Ka fuknawna thu a hin iengkim an hriet vawng a, iengkim hi a sie, a tha thaw lang khawm ka sunghai kuoma hin hril naw ka nei ngai nawh.

Virthli: Inthlakthlengna ding thu a hin i sunghai hin an thlawp tho che in i hriet am?
Lels: A phut chun ka Nu chun ka sam hai ka hung hla tan khan chu harsa chu a ti met, an lungril ding ka hrietthiem em em a nih. Ka leiin ka sung le kuo haiin harsatna iengzat am an tuok ding ti chauh nilo in hmaimawk deua an um chang khawm a tam. Chuleiin ka nu hin awl loin ka ta ding hin tawngtaina a nei zing hlak. Ka transition na thu a hin iengkhawm tawng an nei nawh.

Ahmasatakin pasal hormones fak in ka tha thei tak duoi am tiin ka doctor hai leh thang kan laka iengkhawm that tieng ka pan chuong naw a. Chu phing leh ka doctor pa chun female hormones fak tan dingin ami tia, ka hang fak chun ka problem ka harsatna thenkhat hai chu that tieng a hung pan pei a. Chun Nuhmei pangai ang hin body changes (taksa bung hung inthlakdanglam) ka hung nei a, ka nu kuoma nu iengpo khawm nisien hrietthiem ding aw ka tia, ka unau hai le khawm kan hriltlang bawk a nih.

Virthli: Ei Bible/Thuring le tuta i umdan hi an kal in i hriet am? Vanram i kai i ring am?
Lels: Ka chintea inthawka ka suong le kuo haiin Pathienthu in an mi keihruoi ka ni leiin Pathienthu tak le Pathien lekhabu le kei chu intekhi naw top ka tih. Pathien hin mi dit naw a nei nawa nang transgender i nih ka dit naw che ami ti naw a. Ka tlin nawna le ka tlak nawna hai hre nuom loa ka ni ang taka mi pawm tu Lalpa Pathien ka suol hai min tlantu ani lem. Khawvel a um ei na famkim lo na ram a leng ei ni hi.              

Varam kai ding chungchang thu a hin ring chau nilo in Pathiena inthawka piengtharna thatak nei ka nih. Ka taksa hai hi danglam sienkhawm ka thlarau le ka ringna hai hi a danglam chuong nawh.                        
Virthli: Nuhmeia inthlakthlengna hi iengtika i tan am?
Lels: Kum nga liem ta khan.

Virthli: Inthlengna ding hin ieng ieng am i thaw-treatment ti el inla, a process a dawt dawtin imi hril thei ding? Entirnan damdawi, surgery ti dam.
Lels: A hmasatakin Hormones Therapy, chun Physiological Test chun Sex Reassignment Surgery ti hai hi ani tlangpui. Chidang dang hi a uma, a mihriem i zirin a dang pei hlak (person to person). Hi inthlakthlengna hi Male to Female a uma chun Female to Male a um bawka, kei chu male to female a nih. Transition hin biological female le trans female hi an dangna iengkhawm a um nawa chun umdan/intemacy feeling hai khawm a danglam sawt chuong nawh.

Virthli: Nau i nei thei ding am?
Lels: Nuhmeia insiem/ Transgender man or trans girls tamtak hai hi an chi ngeia nau nei an tam, ei hriet vawng ka ring tho a, kei ruok chu infuk nawna leiin nau nei thei ding ngirhmun a hin ka um nawh. Chun a mihriema innghat khawm a nih.

Virthli: Pasal i nei tum am?
Lels: Aw, nei ka tum.

Virthli: TV program le Promotional/Commercial thila i lo thang tah na hai imi hril thei ding am?
Lels: MTV Roadies ah Event Director hai ditsakna leiin Show pahni ah ka thang taa chun, Saavdhan India, Voot App Commercial, Asian Designer Week Gourmet Couture le Times of India Show Case Week hai ah kalo thang taa shooting thawlai mek khawm a um.

Virthli: Rajiv Gandhi Foundation ah sin i lo thaw ti dâm kan lo hriet a, thudik ani am? Hi Foundation a sin thaw ding hin iengang thiemna nei am a ngaiin a tul a? Hi Foundation a hin sin i la thaw zing
ani?                    
Lels: Aw, Rajiv Gandhi Foundation nilo in Gandhi Smriti and Darshan an ti hnuoi ah Program Co-ordinator ka nih. Hi taka lut ding hin State tin ah Kasturba Gandhi Institute for Development Trust a um a, State nominee niin field work thaw a ngai, chu field work dungzui chun State Representative niin National Level ah chu dungzui chun selection an thaw hlak a nih.

Sin iemachen ka thawa ka thawlai zing hin business studies ah inhnikna lientak ka nei leiin inchuk malam zinga sin thaw pumin MONAD University hnuoiah Campus Offer ka hung hmu ta thut a, The
Landmark Group ahin sum a tam lem el bakah khawsakna tieng mawrphurna insangtak nei ka ni leiin ka zawm lem tah a nih. Chubakah Social Services chi dang dang Gandhi Trust hnuoi tho ah Advocacy in Human Rights ka thaw sa bawk a nih. Iem ka ang pei ding chu Pathien thu thu ni lem tang a tih.

Virthli: Hienga i ngirhmun i hung pholang hnung hin social media khawvel chu i chanchin in a sipa, demna le inpakna thu inkal nukin hmu dingin a uma, hi kawnga hin nang ah lunghnuolna le thlasietna
dam i nei am?
Lels: Hienga mi in an mi hung hriet lar hin lunghnuolna iengkhawm ka nei nawa. Khawvela um ei na hrilsietna hai hi chu ei tuok ding reng a ni a. Chuelkhel ah ka tuok ding renga ka ngai sa hrim a nih. A tha po ei laka, a thanaw po ei hriet nuom nawa an zo der. Hieng thil hai hin ami chawkbuoi nawa, nitina mi suk hrattu anni lem.

Ka tuok ang le ka tawng ang tawng ding hin ka hmelma nisien khawm phal naw ning ah. Chuounglai zing chun mani le mani inngaisieta thil thanaw an naw leh lungril thanaw hai put lo a, ei hringnun hi
malsawna a nih ti a lungawitaka pawm lem ding hi a nih. Mi haiin iengpo khawm hril hai sien ienga khawm ngai ding an nawa Pathien le inkar suk fel phawt hi a tha. Iengkim Lalpaa innghat la ama in
thaw vawng el a tih ti hai hi ka ringsan a nih.

Virthli: Kan lawm takzet che i hun hlutak imi peka.
Lels: Aw, kei khawm ka lawm takzet, Virthli dam zing raw se!

Disclaimer: Hi interview hi Transgender tha ti le suklar (Promote) tumna leia thaw ani nawa, hiengang thil hi ei hnam sunga ding chun hril ding ei la um ngai naw bawk leiin hril a hlaw em ema, mipui in a mimal ngaidan ramtin hai le ama hrietchieng nuomna lungril an nei leia Virthli chun hiengang hohlimpuina hi a hung nei lem chauh a nih.

Post a Comment

Powered by Blogger.