Senvon/CCPur, April 13, 2017; Virthli (ONP): Tuhin Airtel le BSNL inbiekremna angin Airtel haiin Tower phuna sin Senvon ah an thaw mek a. Hi zova hin Parbung ah sin țan ni nawk ni dingin chanchin ei dawng.

Hmarbiel le Vangaitlâng mipui hai ta dingin Tower umnaw leiin inbiekpawna hi a harsa hle a. India sawrkar thlungpuiin E-governance a fepui mup mup laiin Hmarbiel le Vangaitlang chu mobile signal tak ngiel khawmin alan zâm khum tak tak naw hi ngaimaw aum hlea. Emergency thil ah mi tamtakin an sung-le-kuo hai biek nuom chang nei hlak hai sienlakhawm Mizoram tienga signal a man naw chun biek thei an ni ngai naw a. HI lei hin harsatna an tuok rawp hlak a nih.

Hi harsatna hi hriein tuta hma khan Pu Vanlallien Pulamte le Hmarram Kohran Inzawmkhawm pawl (HKI) hai leh Pu Kabindra Purkayastha, Hon’ble former Union Minister of State for Telecom, Government of India, Assam rama BJP phuntu tia tuta India sawrkar femêkin a ko hiel chu a chengna In ngeiah inhmupuina an nei a. Tipaimukh biel ah BSNL Tower siepek dingin an hni a, an hnina chu inhawktakin a țul ang anga thawpek dingin hma a lo lakpui nghal a. Pu Purkayastha hin General Manager, GMTD, Manipur, SSA, BSNL Telephone Bhawan, Babupara, Imphal chu Central sawrkar leh inhriepawin a țul anga hma la dingin thupek insuoin. BSNL tienga thuneitu haiin țul le țha an ti angin Tower phuna ding hi an enfel zo hnungin tulai hin Senvon khuo ah Tower bawl mek a nih. Hun sawtnawte ah sawr thei vat ni ta dingin chanchin ei dawng.


Pu Kabindra Purkayastha an inhmupui huna rawtna an siem dan chun Tinsuong, Pherzawl, Damdiei, Taithu, Parbung, Lungthulien/Khuochung Senvon, Patpuihmun, Ngampabung, Kangreng, Khangbawr, Kangrengdawr, Ankhasuo le Kharkhuplien Khuochung haiah BSNL Tower hi ințhut dingin an ngen a nih. Kha an in biek hun a khan tower ințhutna ding hi BSNL thuneitu haiin survey an ta, Tipaimukh biel le a sevela Hmarkhuo popo haiin network an man thei ngeina ding hmun hmuna ințhut ding le sukpuitling a nina ding hin hun chu a la laksawt deu met dinga hril a nih.
Hieng an thil hni hai hi dawnin a um a October 24 khan Executive Survey Team fe in Tower phunna ding enfelna an nei nghal a, chu karthar nawk chun engineer hai le contractor hai fe in sin an țan a. BSNL haiin vawikhat sukpuitling lovin an lo thaw tah leiin Pu Vanlallien Pulamte in Minister kuomah BSNL a ringzo naw thu le Airtel Company ni hai sien tiin rawtna a peka. Chu ang dungzui chun Airtel le BSNL inbierema an thaw dinga hril a ni a, Airtel in hma an lak mek tah a nih. Mipui harsatna hrie a taima tak le mani sum le pai senga mipui hmakhuo ngaia hieng ang a hung um theina dinga hmalatu Pu Vanlallien Pulamte le HKI hai hmalakna hi inpak an um tak zet.


Post a Comment

Powered by Blogger.