CCPUR, March 26, 2017 (HT): Sinlung Academy of Letters (SAL) huoihawtnain  March 25, 2017, 12:00Noon khan  H.L. Daka Memorial Hall, HSA Campus, Rengkai, CCPur -ah Pherzawl -Thlirvelna ti thupui hmangin Dawntlang (inrawntlangna) hun hlawtling taka hmang a nih. Hnam sunga Pawl tum tuma thuoitu le student thahnemtawk takin an uop.

Rev. Dr Lalkhawlien Pulamte in tawngtainaa hun a hawng zoin prog. tan a ni a, Hun vawngtu in Pu David Buhril a thang a, Pherzawl (District) le inzawma thuhmahruoi a hril a, Resource Person Dr Lal Dena in Pherzawl District hmatieng thlirlawkna ti thupui hmangin paper a present a, Pu L. Keivom chun Pherzawl District a dam chie am? ti thupui hmangin paper a present a, resource person le inzawmin mipui fekhawm hai a inthawk ngaidan hrilna hun hawng a ni bawk.


Dr Lal Dena chun, Manipur-a District thar 7 siem thar hai chungthuah, hieng district thar haia a ni ding ang taka a function theina dingin Infrastructure suk bukim na dingin hun (window period) kum 2 hun a um a, chu sung chun a bikin Pherzawl district thuah sukpuitling zo a ni hman dim? A puitling theina dingin iengtia hma lak dim ti tiengpang awnin thu a hril.

A hril peinaah, District thar 7 siem hai hi a composition iengang am ning a ta, member iengzat am an um ding, Constituency iengzam a um ding, hieng a ni chun tuta kum 2 sung ngei hin delimitation committee indin a, chu committee chun a siemfel a tul a. Hieng laizinga titthawngna ding um chu UNC in district pahni siem tum dodalna leiin Blockade an thaw a, a thungletnain Manipur sawrkar chun district thar 2 siem dingah 5 belsain district 7 a hung siem a, Manipur hi deficit state a ni a, hieng district 7 a ni ding ang taka infrastructure bukim sie a ni theina dingin state sawrkar chun sum crore tel a mamaw ding a ni a, chu chu state sawrkar khatin a phursuok zo lo thil a nih. Chu laizing chun UNC thil phut ei hriet seng a, a la tawp naw a, la ennawn ding ti a nih. Hi chungthua hin tuta Manipur a BJP sawrkar-a ngirhmun pawimaw tak nei Naga Peoples Front (NPF) an thang leiin hmatieng iengtin am a ni pei ding; Central le Manipur Governor hai kuomah khawm District 7 hai keikir dingin ngenna an lo siem ta a nih. Hienglaizing hin ei ni tiengpangah iengtin am hma ei lo lak ve ding, a tul huna Central thuoitu hai bie pawp dinga ei insiem le hma ei lak a tul naw manih ti le thu dang dang hai Dr Lal Dena chun a hril.

Pu L. Keivom chun, India hmarsak  biela tlangmi cheng haiin India danpui hnuoia inhumhimna an nei vawng laiin Maniura tlangmi hai ruok chun 6th Schedule amanih 5th Schedule hnuoia inhumhimna an nei ve naw thu a hril a. Tlangmi hai ngrhmun hi siemfel a ni hma chun iengpo khawm thaw inla, district thar iengzat khawm mi pe hai sien, umzie a nei nawh tiin a hril. Pherzawl District le inzawmin blue print induongtu ding Committee fel tak nei a tul zie le hmathlir zau tak neia Pherzawl le a sevela khuo hai huopa ruohmanna fel tak nei a tul makmaw thu Pu L. Keivom chun a hril bawk.

Post a Comment

Powered by Blogger.