Muolhoi, December 2, 2016, Virthli (ONP): India International Friendship Society hai hawihawtna hnuoia hung tlung ding December ni 21, 2016 hin Pi Lalnunmawi Gangte, Muolhoi chun “RASHTRIYA GAURAV AWARD 2016 le CERTIFICATE OF EXCELLENCE” New Delhi hmunah dawng a tih. Ama Pi Lalnunmawi Gangte hi Pu Lalbieklien Gangte nuhmei ani a, Tv. Elvis Gangte (HSA Guwahati JHQ a General Secretary lo ni hlak le tuta HSA NCH & KA JHQ a Statistics Secretary chellai zing) le Oil India Football Club a inkhel mek Tv. William Gangte hai Nu a nih.
Pi Lalnunmawi Gangte hin Kum 2015 khan Ministry of Textiles, Gov. of India hnuoia NATIONAL MERIT CERTIFICATE 2015, Hmar Handloom Product suk hmasawnna leiin Uttar Pradesh hmunah hi Certificate hi alo dawng ta bawk a nih. Chun 2015 kum vek hin Assam Sawrkarin a ipek Independence Day Guwahati hmunah hmangna a MAHATMA GANDHI AWARD alo dawng ta bawk.
Pi Lalnunmawi Gangte hi puon khawng tieng le cheimawi (design) tieng thiemtak el ani a, abikin Hmar hnam Puon hai mawi tak taka chei le khawngna a hin nasa takin ei hnam ta dingin a thawhlawk (contribution) ve a nih. Guwahati, Haryana, Delhi le UP a hai ama product hai suklang dingin exhibition ah alo fe hlak bawk. Rashtria Gaurav Award a dawng hnungin a chanchin kumchang tak ei insuo nawk ei beisei.
