Responsive Ad Slot

Pherzawl District Lawmna le Inrawntlangna hun hmang

Friday, December 23, 2016

/ Published by VIRTHLI
CCpur, December 23,2016, Virthli (ONP): December 22 dar 11;00AM khan Pherzawl District Demand Committee (PDDC) huoihawtna in VET, Muolhlum, Rengkai ah Pherzawl District lawmman le inrawntlangna hun hmang a nih. Hi hun hi Pu Timothy Z. Zote, Public Relations, PDDC chu hunvawngtu niin Rev. Dr. Lalnghakthang, Secretary,HCLF in hunhawng tawngtaina a nei a. Pu H.K. Joute, Chairman, PDDC in lawmlutna thucha hrilna hun neiin Upa L. Thanzam Pulamte, Secretary, PDDC in inhmelhriettuona le an hmalak dan hai report pekna a nei. Pherzawl District lawmman le inrawntlangna hmang ani huna hin hnam sunga organisation tum tum a thuoituhai - Hmar Inpui, HCLF, HYA,HWA,HSA, HAA, HPC (D) le HNU ha’n thuhrilna hun an hmang a,anni baka hin hi huna fekhawm mimal a’nthawk khawmin thu tha tak tak hai hrilna an nei tawl.


Dr. Chaltonlien Amo, MLA Tipaimukh A/C, Chairman, Hill Area Committee (HAC) in thu a hrilna a chun Pherzawl District mi petu Pathien kuomah lawmthu a hril a. Pherzawl ADC chungchang le Pherzawl ADC-  District puitlinga hlangkai a ni theina dinga hma a lo lak dan hai chipchier takin a hril a. Pherzawl District hmu a ni theina dinga Manipur CM le a Cabinet Minister hai kawng tinrenga a lo suklawm hlak thu, Pherzawl District a puitlingna dinga hma nasataka lo latuhai  po po kuoma le iengkima moral support pea lo thlawp hlaktu -Cabinet Minister thenkhat le Manipur CM hai chungah lawmum a ti thu a hril bawk a nih. A hril peina a chun ei thang tlang a pawimawzie, a siemthatu ding le a sukvultu ding chu a sunga cheng hai an ni thu a hril a. Pherzawl district sunga sawrkar department hran hran pakuo sukfel a ni thu, a dang hai khawm an hma tienga bawizui le sukfel pei ani ding thu,sawrkar thawktu lak belsa a la ni pei ding thu hai a hril a. Hma tieng peia khawm Pherzawl District sunga department hran hrana la hung thawk ding mek hai khawm tlangram kilkhawr ti loa ram le hnam hmangaina neia thawk rin lo dingin a fiel bawk a nih. Hi huna hin Pu Dr. Chaltonlien Amo chun thiemthu a hril tum naw thu, tuta hmaa a In suksieta um chungchang a chun Pathien hmingin ka ngaidam tiin a puong bawk a nih.

Hi huna hin Pu Lalzar B. Sinate, Dr. Saidokhum Joute, Pu Lalrothang Infimate le Pi Lalramsang Amo hai khawma thuhrilna an nei a. Pu John Pulamte a’nthawk Mizoram sawrkar le HPC(D) ha’n political talks an neina report ngaithlak a nih.
Don't Miss
© all rights reserved
made with by Simon L Infimate