Aizawl, 5 Dec, 2016, Virthli (OPN): Inremna lampui zawnga inbie mek Mizoram sawrkar le Hmar People’s Convention (Democratic) hai chun hung tlung ding December ni 15 annawleh ni 16 hin inbiek a vawithumna (third round of talks) nei an tum thu ei thu dawngna chun a hril.
Mizoram Home Department a Additional Secretary Pu Lalbiakzama’n a hril danin inbiekna hi December thla lailung velah nei dinga riruong a nia, hi chungchang hi HPC (D) palaihai khawm inhriettir an ni tah thu a hril.
“Inbiek hun dingin December ni 15 annawleh ni 16 kan hei ruot sin phawta, hi hi Mizoram sawrkar thuneituhai kuomah intlun kan ta, an ni’n an pawm chun hi ni ruota um a hin inbiekna chu nei ning a tih”, ti’n Pu Lalbiakzama chun Virthli palai a hril.
Pu Lalbiakzama chun Mizoram sawrkar le HPC (D) inkara inbiekna chu August ni 10 le October ni 5-6 sunga hai khan inpawtak le boruok muongumtak hnuoiah lo nei a ni tah thu a hrila, a tu tieng tieng khawma inbiekna hin ra thatak  ansuo ngei an beisei thu a hril bawk.
October ni 5-6 sunga inbiekna nei tum khan Mizoram sawrkar palaihai le HPC(D) palai hai chun inremna ding ruongam (framework of agreement) an lo pei fel tah a, hi hi HPC(D) hotuhai le Sawrkar thuneituhai kuomah intlun ni tah in, hriltlangna khawm nei a ni tah thu, Pu Biakzama chun a hril.
ADC pek ding le dingnaw chungchanga Virthli pali zawhna (indawna) dawnin Pu Lalbiakzama chun HPC (D) palai hai hin ADC chu phuthai sienkhawm Mizoram sawrkarin pek a rem ti ngang naw leiin framework of agreement ah inchuonsa a ni naw thu a hrila, Sinlung Hills Development Council (SHDC) suk changtlung le thuneina sang lem pek chu an thil chei tak le inremna ding thupui tak ni’n a hril.
Ei thulakna in a tarlang danin kha hma a HPC(D) hai in charter of demands an lo thelut a khan  kum 1994 a Mizoram sawrkar le HPC hai inkara inremna (Memorandum of Settlement (MoS)) chu sukhrat le suk changtlung dingin ngen a nia, inremna hi ziek thei dinga a um chun legislative, executive le financial power nei thei ding Sinlung Hills Autonomous/ Territorial Council (SHAC) a pieng ngei ring a um.
SHAC a hin Chief Executive Councillor (CEC) or Chief Executive Member (CEM), Chairman, Vice Chairman, Executive Councillor 4 bakah Council Member 5 le nominated council member 2 um an tih.

Post a Comment

Powered by Blogger.