~ Ramthienghlim Varte
           

Pathienin Abraham kuomah ‘Hi ka thuthlung inzawm ding chu a nih. Pasal taphawt chun an ser tan an ta, chu nang le eiin kara ei thuthlung inchikna ning a tih. Chuongchun nangni laia nau pasal pieng a ni riet nia sertan lo an um chun chu ngei chuh I chipuia inthawk pei thlaka suk boral ding chu a nih’ tiin (Gen.17:10-14).Chu thuthlung khau takel chuh Abraham tading chun zawmlo ngam ruol an nawh. Chuleiin kum 99 mi a ni hnunga naupa Ismael kum 13 mi le a siehlawhai po po chun an ser an tan tah a.
             
Baibula thu mak le thuthlung danglam takel a sama sam ringawt khawma zamaw thila ngai chun inzak um khawp rak el a ni awm. A umzie chuh ‘tan biel pawp’ a ni el a, chuleiin sertan ei ti chun pasal mazute hmawr vun iemani chen tan biel pawp a nih. Naupang laia tan chu a awlsam a, puitling hnung ruok chun ana nuom a, enkawl that naw lem chun huoisuol (septic) inlau a um. Naupang  pieng hlim ni rietni khera tan ding ti hi umzie nei tak a nih ti Doctor le mithiem haiin kum tamtak research thawa an suisuok dan chun,  taksaa inthawk thisen suokhai lo dang chat tu, annawleh, khuopde tlat tu Vitamin K ei ti hi naute hrim hrim an hung pienga inthawk ni sari sunghin an siem tanve chauva, chubakah thisen dangchatna siemtu ve tho prothrombin hi naute hung pieng ni thuma inthawk ni sawmthum(30) sung hin an siem tan bawk a. A ni rietni hi a tlangpuiin an siem tam lai tak 110% vel a ni a, chu hnungtieng chun a hung insiem tlawm tiel tiel hlak. Hi lei hin a ni riet nia tan chun thisen a chat awl a, sukdam awlsam lai tak a ni bawk. Ni riet hmaa tan ruok chun thisen suok kha tawp thei lovin naute chun a thipui naw leh phingpui le thluokhai a suksiet thei leiin  piengsuol, pieng kimlo, lungril kimlo le baksam nei damin an um pha thei a nih.

Ei pu Abraham thalbea pieng le  a thisen zungzama hungsuok hrim hrim sertan lo an um chun hi thlaa inthawk sukbohmang le peithlak a ni tawp el. Chuleiin, ABRAHAM kuoma sertan dinga pathien thutlung hi Isrealhai pathien hnam thlang an nina inchikna, hnamdanghai laka an danglam bikna, taksa thienghlim le hriselna tha nei dinga alo sie tumna a nih. Amiruokchu, sertan hi Pathien thuthlung a nina le a pawimawna hril ding tamtak um sienkhawm chutieng nekin hriselna ding khawma a lo pawimaw zie ei hrietve a tha a, hei suklang lem inla ei nuom chu a nih.    

Kum 1900-a New York khawpuia Mount Sinai Hospital-a damnaw record dungzuiin nuhmei natna tlanglawn takel sul cancer (Cervix cancer) ei ti hi pasal sertan hnam Juda nupui hai chu an fihlim tlat a ni ti Dr Hiram N.Wine Berg chun a hmu suokve tlat a; Chu thil hmusuok chuh chieng lem le belchieng dawl a ni zie Dr Ira I. Kaplen le a rawi haiin New York khawpuia Belleveu Hospital-a damnaw record bu enin Juda nupuihai chuh sul cancer an invawi ngai naw zie an hmusuok bawk. Chun, kum 1949 khan Mayo Clinic,  New York-a  Sul cancer-a damnaw nu 568 hai lai Juda nupui an um der naw a, hi Clinic-a nu damnaw in ena fe hai lai hin 7% ( za peia pasari) hi Juda nupui an ni bawk si a, chuleiin sul cancer-a an fihlim ti thei a nih. Chubakah, sakhuo lien deu India rama Hindu sertan lo le Mosalman sertan hnamhai ngirhmun hei tlir nawk inla. Himachal Pradesh ( Hindu State) hi nuhmei natna 78% (za peia sawm sari le pariet)  hi  sul cancer invawi an na, sul cancer tamna tak a nih. Chuonglai zing chun hi state le inmat zing Jamu & Kashmir Mosalman bubitna hmuna ruok chun hril tham an um nawk der nawh ti Dr Devinder Sharma chun a hril ve. American Journal of absterics and Cynaecology (1955)-a chun Fiji thlierkara sertanhai lai nu sul cancer nei an tlawm hle leiin sul cancer-a inthawk invenghimna ding chun naute hung pieng hlim a ni riet nia sertan vawng ding a nih tiin a ram sawrkarin thusuok a siem hiel. Australia-a Ngatarjara hnamhai chun pasal tleirawlte an hungni pha ser an tan pek hlak a. Tuolzawla lam huolin ser tanna chemte siemin an tan a, chu zova lawmna an siem hlak. Zambia ( Africa) rama Ndembu, Madagascar-a Merina-hai khawm sertan hnam vawng an nih. ( cf- B&S, Megh.Gurd.etc)
    
Iengleia pasal sertanin sul cancer-a venghim thei am? Hi hi zawna pawimaw tak sang ngai chuh a hung ni ta. Hiengang hin hei sang ei tih -Pasal mazute a hmawra vun chuongliem nei hai chun nuom angin an sukfai zing thei ngai naw a, a vun thuo kara thil rimsie tak tak an tlingkhawl hlak a, chuh taksa lum, pang tli le thilhnawng haiin an chiezawp sawt pha taksa rim a sie a, hri thanaw mit lawng khawma ei hmu theilo hrang hrangin an hung bawm a, thil hrik ti um a hung hringsuok hlak, chuongchuh cancer tlungthei natna chi hrang hrangin tlasawng thei a nih. Chuongang natna ti um pasal sera um chuh nuhmei an pawl pha nuhmei ser sungah an talfai hlak a, a lo dawng sawngtu nuhmei khan a tuor ta hlak a nih. Nuhmei ser hliem khawp rak a ni lem chun ti a um zuol. Chuleiin, sertan lo nuhmei sul cancer le nuhmei natna chi hrang hrang nu in an nei nuom bik a lo nih. Ei rama khawm nu tamtak nuhmei natna invawi pasal kuoma hril ngam lova tuor tlawk tlawk an um hlak a, hril suok an inzak bakah pasalhai mitmei veng lei dama rinum taka nun hmang a, tuorzo naw hun a tlungpha a lo inhnu ta hlak si a, an hnuk hnungin damna beiseiin damdawi hmun lien le tha ei pana pawisa tamtak sengin ei sansuok zo ta ngai si nawh. A pawi em em a nih. Nuhmei natna sul cancer ( Cervix Canver) ei ti tlanglawn tak leiin nu vanglai a bikin 31-50 yrs. vel hin an thi pha hlak a. Dr Mc Millena chun nuhmei cancer natna invawi ( ser tienga cancer neihai hrim hrim ) 80% (100 pei a 80) hi sul cancer an ni a tih. World Health Organisation (WHO) 2002  record dan chun kum tin khawvela  nuhmei sul cancer a damnaw lei thi 4-4.5 lakhs an tlingphak tiin a ziek bawk a. Chuleiin, insung enkawltu tak nuhai hi sawt tak  dam vawng vawng dingin ei dit a, hriselna tha an nei theina dinga pawimaw chu sertan hi a ni ve awm.

NU HRISELNA :
Nu a hrisel chun insung nun an hawi a, pa  le nauhai an lawm a, khawtlang a suk inhawi a, nu hrisel vek vawk, hmelfel le tlai sieuva insunga a hei invilik kuolvel hin chuh thil reng reng hi a tha’n an fuk vawng el hlak. Nu’n khawvel a siem ei ti a, ni e, nau tha le fel, siemna dinga  institution annawleh industry pawimaw, hmun thienghlim le inhawi chu NU ANGSUNG  a ni reng a nih. Chuleiin khawvel a bik takin ei ram siemthat ei nuom tak tak chun NU hriselna rama siem phawt ding a nih. Chun pasal thienghlim le insukfai tawk naw leia hieng  nuhmei natna ti um tamtak hai hih  a hungsuok vawng  a ni ei ti naw a, a san pakhatve chu a lo ni ngei awma an lang leiin ei hei tarlang a ni a. Hi nu hriselna dinga sertan pawimaw zie khawvel mithiem haiin an lo hmusuok mimawl khawma ei hriet thei dinga zieksuok a um hai hi mipui khawma ngai pawimaw inla nuom a um khawpel. 

Nu haiin hriselna tha an nei theina ding ei zawnga ei dit tak tak a ni bawk chun Fiji rama an thaw angin ei ni khawm, ‘pasal ta phawt/nau pasal hungpieng taphawt ni riet nia sertan ding’ ti inla iem a pawi a. Mihriem ei changkang ta a, Doctor thiem tak tak le hmangruo tha a um ta an nawm. Chun, sertan ti hi ei insuk Juda nuom leia thaw a ni tlat naw chun Juda mi nina a ni chuong der nawh. Asan kha a nih a pawimaw. Bible tukvera bi ding khawma pathien thu le inkalna a um nawh. Krista zarin sandamna mitin reng tadingin hawngin a um ta a; chutaka chun Jentel le tel naw, Pharisai le sai naw, Samari mi le mi naw, Rom mi le mi naw le dang danghai pindan kha suk chim vawng a hung ni tah. Chu zara  chun sertan le tanlo in umzie a nei naw zie chu Jerusalem Temple a puonzar intler suok khan iengkim a sukfel vawng tah ti Tirko Pawlin vawi duoilo a hril kha tie. Ei tan hrim hrim leia Pathienin Juda sungkuoa a mi lo sie palh a ni leh a tha bek bek, THIK HE SAP a ni el an nawm. Chuleiin, sertan hi taksa sukthienghlimna dinga pawimaw em em pasalhai thaw dinga um chu a nih. Ei tan naw khawmin ei nuhmeihai hriselna tha an neina ding lampui a ni tiin thil hova ngai a, ngai tha el lovin fai taka invawng thienghlim ava tha de.
 2 July 2008 

Post a Comment

Powered by Blogger.