CCPur, November 01, 2016, Virthli (ONP): Peace Ground, Tuibong, CCPur hmuna Chavang Kut 2016 "Celebration of Brotherhood, Bigger-Better- Stronger " ti thupui hmanga nei chu vawisun a ni thumna le ni tawpni chu ropui taka hmang a ni a, hi huna hin Mizoram Chief Minister Pu Lalthanhawla chu khuollien in hmang a nih. Hi huna a thuhrilna a chun Zohnathlakhai hi sulkhat suok an ni zie hai a hril a, inpumkhatna lungril Zohnathlak haiin ei put a tul zie, Kut 2016 hmang dinga a hung chu an suk mikuol naw zie le Mizoram state chu Zohnathlak hai Jerusalem ani thu hrilin, Mizoram sawrkar chu Nu-le-Pa chan an chang thu, tlinnaw hle hai sien khawm tlin an tum thu hai a hril. A hril peina a chun KNO le UPF in Central sawrkar an inbiekna chu a hrietpui thu hrilin, a hma neka nasa nawk zuola sukhrat a tulzie thu hai le Manipura Zohnathlak ha'n an chanvo an chang thei ngei na dingin lungruol taka hma la tlang ding le ngaituona siem tlang a pawimaw thu a hril.

Mizoram CM chun Zohnathlakhai chu Chin-Kuki-Lushai-Mizo group tiin British hun lai thehranin lo um hai sien khawm, inpumkhatna lungril nei dingin an fui a, Zohnathlak hai an renga rorelna pakhata an umkhawm hun la tlung naw sien khawm, hmatieng beisei taka unaua insiemtharin thang la tlang pei dingin a hril bawk a nih.

A hril peina a chun Mizoram puotienga um Zohnathlak hai chu an taimakna, an tumruna le mani ke-a ngir an ni zie hai a hmuin lawmum a ti thu a hril a. Zohnathlak hai chu ringtu an lo ni hih thilmak a ni thu le Pathien hrietfuk an ni zie le Chanchintha hril chu ngaipawipaw nawk zuol dingin a fiel tawl. Chavang Kut hmang dinga fiela a um le a phulo chawimawina a dawng chu lawmum a ti hle thu hrilin hi KUT hin Zohnathlak hai pumkhata siemtu ni dingin a nuom thu a hril bawk.



Hi Chavang Kut hmang dinga mipui fekhawm hi an tam hlea, Tuibuong Peace Ground khawm'n a keng naw tieng a nih. Hi huna hin hnam tum tuma thuoitu han thuhrilna hun an hmang bakah Kaipeng Cultural Troupe, Karbi Cultural Troupe, Bodo Cultural Troupe, Zeliangrong le Singpho-Kachin Cultural Troupe; Simte Cultural Troupe han hnam lam inentirna an nei a, ei hlasakthiem Nk. Lawmnakim Hrangate khawmin hla mawitakin sakna a nei bawk a nih.

Post a Comment

Powered by Blogger.