Aizawl, October 6, 2016, Virthli (ONP): Mizoram sawrkar le Hmar People’s Convention (Democratic) hai inkara inremna lampui dapa inbiekna chu vawisun khan tluongtaka zo fel a nia, inremna ding 'framework of agreement' duong fel nghal a nih.

Ni hni sung aw inbiek vawihnina (2nd round of talks) chu vawisun chawhma dar 11 khan State Guest House, Chaltlang, Aizawl ah boruok muongum tak hnuoiah sunzawm ani a, hi huna hin framework of agreement siem nghal niin, inbiek nawk hun dingin December chawlkar thumna ruot a ni thu ei thulakna chun a tarlang.


A tu tieng tieng khawmin inbiekna hin ra thatak insuo sien ti beiseina insangtak neiin, inremna a um thei ngeina dingin HPC (D) thil phut hai chu chik taka hriltlang a ni hnungin framework of agreement chu lungruol takin ziek fel a lo ni tah.

Framework of Agreement zieka um hi Mizoram palai ha'n Mizoram sawrkar hmaa intlun an ta, chuongang bawkin HPC (D) palai hai khawmin HPC (D) kuomah intlun an tih, ti'n Mizoram Home Department a Additional Secretary Pu Lalbiakzama chun a hril.

December thla a karthumna vela inbiekna hi nei nawk dingin thutlukna an siema, Memorandum of Settlement (MoS) hai chen khawm ziek thei a ni an ring thu HPC (D) palai hai chun Virthli an hril.

Virthli palai leh an inbiekna ah HPC (D) palai hotu Pu Lalțhalien chun sawrkar khawm an hawng hlea, iemanichena chu ei (HPC(D)) thilphut hai khawm suk hlawtling an tum niin an lang a tia, framework of agreement a point zieka um hai chu pholang nghal a ni chun hmatieng peia inbiekna dingah harsatna an tlun thei lei le sawrkar in rem a la tinaw leiin la pholang hri naw phawt a nih, a tih.

December thlaa inbiek nawk ding chungchang hrilin Pu Lalțhalien chun Mizoram Sawrkarin framework of agreement hai hi a la enfel a ngai bakah thaw ding tam tak a la nei lei le November thla ah Assembly session um ding leiin inbiekna hun ding hi pawtfan met niin December thla ding ti a nih, a tia, inbiekna chun ra țha (positive) ansuo ngei a beisei thu a hril bawk.

Post a Comment

Powered by Blogger.