CCPUR, Changer (Oct.) 30, 2016; Virthli (ONP): Kum 2014 a khawvel pum huopa HSA Platinum Star le 2014 a Manipur Board (BoSEM) hnuoia HSLC (Class-10) Exam a Hmar (MIL) Topper lo ni tah, Miss Christina Shakum chun Oct. 29, 2016 khan Judges Round fethlengin Manipur Idol thlangna nei mek a chun Top 18 a lo kai nawk phawt tah a, Nov. 5 hin Gandhi Memorial Hall (GM Hall tia hrietlar), Imphal hmun ah next round um nawk a tih.


Oct. 30, 2016 zingkar a ei hohlimpuina huna chun ieng am i fans hai kuom ah hril nuom i nei a? tia indawnna ei siem chu hieng ang hin a dawn, "A mi lo țawngțai pektuhai popo kuomah lawmthu ka hril a. Chun, a nawk tieng peia hai khawm mi lo țawngțai pek nawk pei hai sien ka nuom. Kei khawm ka thei tawpin țhang ka lak ding a nih. Ka lawm hle a nih," tiin a hril.

Mi tam tak lo ngaiven Vote pek thei hun/Voting line hawng hun ding chu la hriet thei a ni nawh. Miss Christina a sunghai hrie nuom tam tak ei um leiin la hei hrillangsa inla. A pa Songlawmthang Shakum, a nu Lalnunmawi, a unauhai- a u Joshua L. Shakum le a sang Elvis an nih. Tuhin Khawmawi, CCPur ah an khawsa mek.

Manipur Idol Inruolsiekna hun haia hin English hla vawng sak a ni a, English țawng vawng an hmang bawk. Naupang kum 4 vel mi a ni a inthawka kha hla hi Christina hin a lo sak țan ta a nih.
-LRS Puruolte

Post a Comment

Powered by Blogger.