Hmasawnna Thar | 30 October, 2016

EFCI le ICI KṬP han khawmpui an nei mekCCPur:  EFCI Saikawt Presbytery Kristien Ṭhalai Pawl chun Oct. 28, 2016 a inthawk Oct. 30, 2016 chen aw dingin “Krista tadinga thi chena ringum” ti thupuia hmangin Thingchawm khuo ah khawmpui a vawi 45­na an hmang mek. Vawituk zing inkhawm hunah Rev. Jessai L. Neitham, Presbytery Secretary in Pathien thucha hril a ta, chawhnung1:30PM in Seminar um a ta, zan inkhawm huna Upa Dr Phirthanglien Buhril, Chairman, CKṬP in Pathien thucha hril a tih.
   Chun,  ICI Tuiṭhaphai Presbytery Kristien Ṭhalai Pawl khawmin Oct. 30, 2016 chen aw dingin Oct. 28, 2016 a inthawk khan “Krista Ta dinga Ṭhalai” ti thupuia hmangin Ngurte, CCPur hmuna khawmpui a vawi 56­na an hmang mek. Vawituk zing inkhawm huna thuhriltu ding Rev. Rorelfel, Child Coordinator, ICI ning a ta, sun inkhawm huna Pro­Pastor Solomon Tuolor, Saikawt N. in sharing (15 minutes) le item dang dang hmang an ta, Zan inkhawm huna Rev. H.P. Runremthang, YCO & EAL, ICI in Pathien thucha hril a tih.

HI Hmarbiel Region ṭhuoitu ding haiParbung: October 28, 2016, 11:30AM­2:30PM inkar sung khan ICI South Chapel, Parbung, CCPur hmunah Hmarram Kohran Inzawmkhawm (HKI) inrawinain Hmar Inpui, Hmarbiel Region ṭhuoitu ding thlangna nei a ni a. Chairman dingin Pu Lallienthang, Parbung; Secretary in Pu Ramchuoilo, Pherzawl, Fin. Secretary dingin Upa Ramthlenglien, Damdiei le Treasurer dingin Nk. Lalzarzo, Pherzawl hai thlangtling an nih. Thlangtlinga um hai charge inhlanna chu Hmar Inpui GHQ mawphurnaa sie a nih. (Lalnunthang Songate)

Chavang Kut 2016 hmang ṭan dingCCPur: October 30, 2016 a inthawk hin Peace Ground, Tuibong, CCPur hmuna “Bigger, Better, Stronger ti thupuia hmangin Chavang Kut 2016 hmang ning a tih. Vawisun 9:30AM a programme hmang hunah Meghalaya Lok Sabha MP Conrad Sangma khuollienin ṭhang a ta; Oct. 31, 2016 in item hran hran neia hun hmang ning a ta, November 1, 2016 nia Chavang Kut nipui tak hmang huna Mizoram Chief Minister Lal Than Hawla khuollienin ṭhang a tih.

BJP ṭhuoituhai CCPur­ah an hung:Congress in ‘C’ pathum hmanga ro an rel leiin harsatna nasa tak an tlun: AsnikumarCCPur: BJP Manipur State Election Management Committee­a Convenor Th. Chaoba Singh le State Vice President, incharge CCPur M. Asnikumar hai chu zani chawhnungtieng khan CCPur­a hungin Lighthouse Lane­a District BJP Office ah District BJP member hai inhmupuiin hmatieng peia hmalak dan ding hai an hriltlangpui.
   Hi zo hin Press/Media hai an inhmupui hunah Th. Chaota chun, CCPur district hi Manipur state a dinga khawpui pahnina nisienkhawm O.Ibobi inrawinaa Congress sawrkarin kum 15 rorelna an chel sungin hmasawnna hmu ding hrim hrim a um naw a, district headquarters le Sub­Division Hqrts infepawna lampui hai a ram mipui hai ta dinga innghatna tling lo a ni thu, Sub­Division hqrts infepawna lampui hai siem ṭhat lova um chu pawi a ti thu a hril.
   Congress sawrkarin tlangram bielah sin a thawnaw leiin  nasa takin a tlahnuoi a, ei hmaa state Assembly election um dinga seats 60 umah single digit (10/1) chau an hmu ding thu, BJP in CCPur District­a A/C 6 um  laia 5  bekah hratna an chang  ngei an tum leiin mipui hai thlawp dingin a ngen. Ukhrul thiltlung thuah Manipur Govt. in state­a a lien tak Chief Minister meu khawm venghim zo  lo tiin an tum bawk. Manipur a BJP in sawrkarna an siem hunah pawisa seng ṭul lovin ṭhalai han sin hmu thei tang an ta, thubuoi um hai khawm sukfel vawng ning a tih tiin a hril a, kum 2017 kum bula election um  dinga insingsatna  ding ni 86 vel chau a um ta thu a hril bawk.
   Mr M. Asnikumar chun, kum 15 liemta sungin Congress sawrkarin ‘C’ pathum­ Corruption (fakrukna), Commission (thuneina) le Cruelty (nunrawngna) hmangin ro a rel a, ‘C’ pathum hai leiin Manipur­ah harsatna nasa tak  an tlun a, tlangmi han an tuor nasa bik tiin a hril. Hiengang thil hai sukbona dinga hun remchang a ni leiin mipiu hai chun ngaituona fim tak neia ei hmaa election hung um dinga hin fimkhur taka hma la dingin a ngen. BJP ticket chungthua chun, CCPur district­a inthawk ticket dit an tam lein ngaituo mek a ni a, sawtnawte hnunga puonglang ni tang a tih tiin a hril.

Manipur Idol Judge top 18 a lutCCPur: Manipur Idol thlangna fe mekah Nk. Christina Shakum chun zanikhan Judge round fethlengin, top 18 ah an vawrkai tah. November 5, 2016 vel khin top 18 competition an nei nawk ding niin ei thu dawngna chun a hril.
Chanchinbu inruk hmangCCPur: Zou ṭawnga suok nitin Chanchinbu “Zogam Today” copies semsuok dinga sie hai chu Oct. 28&29, 2016 hai khan inruk hmang a ni leiin semsuok thei lovin a um pha. Hi thu hi DGP, Manipur kuomah intlun a ni tah. Iengleia inruk am ti le an rutu hi hriet an la ni nawh. Zogam Today office hi Hmarveng, CCPur­a um a nih.

SDO/CCPur le staff hai an insawnCCPur: Anti Tribal Bills le inzawma SDO/CCPur Office raw a ni leia DC official residence saka Guest house hmuna temporary­a um SDO/CCPur le staff hai chun remchang lem dinga hriet leiin SDO/CCPur office compound ma, Chiengkonpang a Govt. Quarter pakhat le Settlement Office hluo dingin zanikhan an thuomhnaw hai an sawnlut. SDO/CCPur Office­a thaw ding  nei, Certificate le thil dang dang la ding hai chun Guest house ni lovin an insawn tharna hmun tieng hi pan lem ta ding a nih.

UNC in Oct. 30 zanril­a inthawk 48 hrs. ShutdownSenapati:  United Naga Council (UNC) chun October 30, 2016 zanrila inthawk  darkar 48 sung Total Shut down an puong bakah Naga mi hai chengna biel sunga Trans Asian Railways, Jiribam to Tupul le National Projects hai sinthaw hai ṭhangin indefinite blockade an thaw ding thu an puong. Sadar Hills district puitling le Jiribam district puitlinga hlangkai tum dodalnaa hi an thaw tum a niin ei thu dawngna chun a hril.

Imphal­ah bomb a puokImphal: Ningol Chakkouba le Diwali Kut ding le inzawma bazar kai mipui tam tak an inphu nuoi nuoi lain zani zingkar dar 7:30 vel khan Thangal Bazar, Imphal­ah bomb a puok a, mihriem thi le hliem an um naw a, a bul hnaia dawr tukver darthlalanghai a dengkawi bakah Zubair Alam (30) of Muthihari District, Bihar, tuta MG Avenue, Imphal­a cheng  Verna motor (Red colour) MN01G­0999 a sukseit nasa hle. Bomb hi M.G. Avenue, Majorkhul gate bul, Gupta Auto corporation le Jaiswal store inkara puok a nih.

Union MoS(Home) a hung inzin dingImphal: Union minister of State for Home Affairs Kiren Rijiju chu vawisun hin Imphal­ah hung inzin a tih. Mr Rijiju hi Imphal­ah zankhat riek a ta, Diwali Kut hmangnaah a ṭhang ve ding nia hril a nih.

Inspector post 10 a ruokImphal: Directorate of Consumer Affairs Food and Public Distribution, Govt. of Manipur hnuoiah Inspector post 10 a ruok. Hi sin ruok hni nuomhai chun Nov. 4, 2016 khin Vacancy Assistant, Room No. 15­ah inhmupui ding a nih tiin Employment Exchange, Imphal West thusuok chun a hril.

Forest Dept. hnuoiah sin ruokImphal: Principal Conservator of Forest, Govt. of Manipur hnuoiah Assistant Cinema Operator Post 1, Veterinary Field Assistant Post 1, Draftman Grade­III post 1, Storekeeper post 1, Office Assistant­cum­Computer Operator post 11 (ST) le Driver post 8 (ST­7) a ruok. Hieng sin ruokhai hi Employment Exchange fe thlenga hnina peklut ding le application form peklut theina hun nuhnung tak chu 15­11­2016 a nih tiin Principal Chief Conservator of  Forest, Govt.of Manipur chun inhriettirna a siem.

Project Consultant post 3 a ruokImphal: Manipur Science & Technology Council (MASTEC), Imphal hnuoia thla 6 sunga ding contract basis in Project Consultants post 3 a ruok. Thiemna Post Graduate ni a ṭul. Hlaw Rs. 40,000/­per month (fixed) a nih. Inhnikna nei han November 15, 2016 chenin MASTEC Office, Central Jail Road, Imphal hmuna Resume peklut thei ning a tih.

India sawrkarin indona Vuongna 200-300 inkar inchawk a nuomNew Delhi: India rama siem an ni phawt chun ramdang kutsuok khawm nisienla India sawrkar chun indona Vuongna 200­300 inkar inchawk a nuom. Indona Vuongna 200­300 inkar inchawkna dinga sum sum sengzat dinga riruong chu dollar 13­15 billion (Rs. 1 lakh crore approximately) lai zet a nih tiin Indian Air Force (IAF) official thusuok chun a hril.
   India chun France rama Dassault siem Indona vuongna Rafale Plane 126 inchawk a tum a, sienkhawm India rama siem  ding ti thuah inremna an siem thei naw leiin 36 chau inchawk dingin thla liemta khan  inremna an lo siem ta a nih.   China le Pakistan inbeipui ding lo ni ta sienla, India Indona vuongna nei chu a huntawk naw a, hi lei hin Indian Air Force chun indona Vuongna inchawk belsa hi a ngaimaw hle a nih. Amiruokchu, sawrkar thlungpui chun ramdang kutsuok khawm India ram sunga siem chu a dit dan a ni a. Hi lei hin a nuom ding a zawng a, sweeden rama indona Vuongna siemtu Saab chun a nuom thu a hung hril.   PM Narendra Modi chun India sipaihai chu thuom ṭhat a nuom a, chu ding chun dollars 250 billion lai zet  hmang a nuom bakah India sipaihai hmang lai INSAS Rifle thlakthlengna dingin silai ṭha chi 1,85,000 lai zet inchawk a remtipui lai zet inchawk a remtipui niin ei thu dawngna chun a hril.
           Tulai hnaia dinga India rama ralthuom hung pe dinga inphal tak rambung chu US a nih. Tuta hma deu khawm khan Boeing chun engine pahni nei F/A­18 Hornets chu hung pek a nuom a, sienkhawm  technology transfer la sukfel lo a nih.

Heroin Grams 70 leh man
imphal: Oct. 27, 2017 khan Inter State Bus Terminal (SBT) bula Khuman Lampak hmuna Nenglemkim Haokip (30), w/o Lamlen Haokip of Monglianphai, Churachandpur district chu Imphal West District Police han heroin grams 70 leh an man a, case an siem khum niin Police thusuok chun a hril.

Parliamentary Secretary a inthawk a banKohima: Nagaland Chief Minister T.R. Zeliang chun BJP MLA, Mmhonlumo Kikon chu Parliamentary Secretary (Labour Employment, Skill Development and Border Affairs) a inthawk a ban. Parliamentary Secretary­a inthawk ban a nina san hi hrillang ninaw sienkhawm Nagaland­a NPF inrawinaa DAN sawrkar kal zawnga thil a thaw leia ban ni dinga ring a nih. Nagaland­a hin BJP MLA 4 an um a, an reng hin Naga Peoples’ Front (NPF) inrawi Democratic Alliance of Nagaland (DAN) sawrkar­ah an um vawng a nih.

Nunghak pakhatin a thi phaAizawl: Zani chawhnung dar 2 vel khan Lawipu Vadunga tui hung lien thutin nunghak pahni a fen a, pakhat a thi a, pakhat dang himin a suokdawk. Nunghak thina tuok hi T.C. Lalhmachhawni (24) of Upper Republic, Aizawl a nih. Upper Republic YMA Branch an hnatlang a, chu taka inthawk an nih. An hnatlang an zo a in tieng pana an hungna lampuia Lawipu Vadung an kan lai vadung tui hi a hung lien thut a nih. Nunghak dama suokdawk hi Zonunsangi (24) a nih.

Helpawl han Army jawan thatin a lu an tanbawngNew Delhi: Zani hmasa zantieng khan Jammu and Kashmir­a Kupwara district a Macchil sector, Line of Control a chun terrorist hai le inkaptuonah terrorist han Army Jawan pakhat an that a, a lu an tanbawng hnungin Pakistan Occupied Kashmir (PoK) sungah an tlanlut nawk.  Army Jawan an that le a lu an tanbawng hi 17­ Sikh Light Infantry –a Manjeet Singh a nih. Kum 2013 khawm khan J&K a Mendhar sector ah India sipai pakhat terrorist han thatin  a lu an lo tanbawng ta bawk a nih.


VAWISUN THUPUINisienlakhawm, thil sukṭhat le tiktlai hi theinghil naw ro; chuong ang inthawina chunga chun Pathien a lungni bek bek sih a.
­ Hebrai 13:16

EditorialMani thu hril le thutiem bawzui ngam ram ṭhuoitu


Manipur chu inthlang boruokah ei um mek a, 11th Manipur Legislative Assembly election hung um dinga ngir tum (candidate) ṭhenkhat chun an thiltum le an thilthaw dinghai (manifesto) hai an puonglang ṭan mek. Election Commission of India (ECI) khawmin States 5, Manipur, Goa, Punjab, Uttar Pradesh le Uttarakhand haia Assembly election hun ding hi thla thar November thla sung khin a puonglang hman ring a um. Hi lei hin Election a ngir tum hai chau ni lovin Political party tum tum hai khawma an party election manifesto hai an la hung puonglang pei ding a nih. Electin manifesto ṭha lo hi a um ngai nawh. Nisienlakhawm, tu chena harsatna ei nei chu, tu party khawm sawrkar hai sienla, inthlang huna thaw dinga an hril ang le an party election manifesto ngaisak ta lo le an sukpuitling nawk ta ngai si naw hi a nih.
   Hi thil a chiengna em em chu, tlangmi han ADC­hai Sixth Schedule hnuoia sie dingin nawrna le ngenna ei  lo nei ta hlak a. Political party po po deuthawin ei thil ngen hi an election manifesto haiah an inchuon sa a, sienkhawm sawrkarna an hung chel pha chun an ngaitha a, a hril khawm an hril ri ta ngai nawh. Tlangram biela inthawka thlangtlinga um hai khawmin ngaipawimawna an nei ta bik ngai bawk nawh. Hi lei hn mani manifesto (thu hril le thutiem) bawzui ding mi ei dit a, ei mamaw a nih.   Tu khawm hin KNO le UPF chun state hran an ngen ti ei hriet seng a. Hi thu election Manifesto a sie ngam ding party le candidate ei nei thei dim ti chu ngaituo um takel a nih. India rama state thar le state hran hmu tharlam tak chu Telangana state a nih. State hran an ngen laia an ram mipui, an MLA, an MLC le an MP hai hmalak dan kha ei la theinghil ring aum nawh. An ṭhangruol ṭha hle a nih. A ṭula an hriet leiin an MLA, an MLC le an MP hai chen an inban ngam bakah mani le mani inthat hiel khawm an um a ni kha!
   Ram ṭhuoituhai hin thudik le thu ṭha tak tak, beisei um tak tak le thil ni thei awm tak tak hi an hril nasa hle a, an hril le thutiem ang zaah sawmkhat bek sukpuitling hlak hai sienla chu, tuta ang hin chu hnufuol zing ta nawng ei ta, ei thil dit le ngen hai khawm hmua muol muol chu nei ta rawi naw mei nim! Hi lei hin ei ram ṭhuoituhai hin an thu hril le an thutiem an bawzui a, an sukpuitling ngam nuom a um. Ei ram le ei hnam hin mani thu hril le thutiem bawzuia sukpuitling ngam ram ṭhuoitu ei mamaw ngawi ngawi el a nih.
   Ram ṭhuoituhai le ram ṭhuoitu ni dinga insingsa thar mek hai hin an thu hril le an thutiem hai hi a hrila hril liem mei mei lovin, an  thu hril le an thutiemin a ngaithlatuhaiah umzie a nei am tihai khawm bawzuiin enthla zui ngei hai sienla nuom a um. An hnuoia sin thawtu ṭhenkhat chun an hotuhai thu hril le an thutiem hi an ngaipawimaw pek ngai naw leia mipui lakah an muolpho chang khawm a bo bik nawh. Hi lei hin ram ṭhuoituhai chun thil enzui hi an ngaipawimaw a ṭul a nih.
           
Assembly Election boruokin a min chie mek a, tu ham sawrkar siem ding ti nekin tuhai him sawrkar thar siem dinga ṭha ning an ta ti le tuhai him ram ṭhuoitu, mani thu hril le thutiem bawzui a, sukpuitling ngam ning an ta tiah hin mipui han ei sie le ṭha hrietna thienghlim taka ei ngaituo a pawimaw bek bek el a nih. Tuhai amani mi hril lei mei mei ni lovin, mani ngeiin thlir ve inla, huoisen taka mani thutlukna hi ei fepui ngam  a hun ta a nih. A hrila hril thiem chau ni lovin, a taka mani thu hril le thutiem sukpuitling ngam hi ei ramin a mamaw ta a nih.