World Sight Day hmang
CCPur: District Health Society (DHS) hnuoia National Prog. For Control of Blindness (NPCB)/CCPur huoihawtnain zani 7:30AM khan Synod Hall, IB Road, CCPur­ah ‘Universal eye Health, Prevention and Control of Emerging Eye diseases” ti thupui hmangin 17th World Sight Day hmang a ni a, Dr Kim Simte, CMO/CCPur khuollienin a hang. Hi prog. Hmangnaa hin ­Bethesda School of Nursing/CCPur Dist. Disable Union, Malsawm Initiative, Bliss Island (Lanva), PASS (Mata), FCC; NYK/CCPur le Town area ASHA hai  an hang a, an umna chita inthawk rally neiin prog hmangna hmun hi an pan a nih. Dr T. Pumzathang, TB Officer,  H. Doungel, Youth Coordinator NYK,  CMO, Imphal tienga inthawk official thenkhatin an uop bawk.
   
Dr Kim Simte chun, ei taksa organ tum tum laia pawimaw pawl tak chu Mit hi a ni a, mit nauleng var (cataract) leia mit indel a tam tak thu, nutrition tlaksam lei Vitamin tlaksam lei le Dumziel hawp nasat lei khawmin mit an del thei thu a hril a. halai le student han a chuong a liema Computer le Mobile ei hmang nasat lei khawmin mit an del thei leiin fimkhur a ul thu; Diabetis lei khawma mit an del thei leiin a hun taka inenkawl a pawimaw thu le an khat tawka mit check­up thaw hlak ding a ni thu hai a hril.
   
Dr Vumchinpau chun, World Sight Day hi Oct. 13 a hmang hlak nisien khawm fund delay leiin vawisun hmang thei chau a ni thu a hril.

Naupang suolluitu mi 2 hai Jail­a thun
CCPur: Oct. 14, 2016 nia New Lamka JB School a kai nuhmei naupang suolluitu G. Thongliansang (37) s/o G. Kamkhanthang of Zion Veng le Oct. 16, 2016 nia Singngat­a nuhmei naupang suolluitu Nangmuanlal(23)s/o L.Suangchinkhup of Tangnuam hai chu zanikhan Special Judge (POCSO) hmaah inlangtir an ni a, Jail intang dinga an chungthu rel a ni leiin zani ma khan Police hanJ ail­ah an thun. Hieng naupang suolluina hai le inzawm hin Police chun FIR No.4 (10)2016 WPS­CCP U/S 376 IPC&4/8 POCSO Act.2012 le FIR No.5 (10)2016 WPS­CCP U/S 376 IPC&4/8 POCSO Act.2012 an registered a nih.

NFSA Release order lak thei
CCPur: National Food Security Act (NFSA) hnuoia Rationing Agents hai ta dingin Oct. 28 a inthawk office hour sungin  Release order lak thei ning a tih tiin M. Ginzasuan, DSO, CCPur chun inhriettirna a siem. Oct. 28, 2016 in Parbung A/C, Thanlon A/C le Henglep A/C a mi han la thei an ta, Oct. 29, 2016 in Saikot A/C; Singngat A/C le CCPur A/C hnuoia Agents han la thei an tih.

Election official hai CCPur­ah an hung ding
CCPur: Chief Electoral Officer (CEO), Manipur Office­a inthawk Biren Singh, Statistic Officer inrawinain Oct. 27, 2016 hin CCPur­ah hung an ta, 11:00AM in DC Office­ah Election hung um ding le inzawma Data Entry Operator hai meeting neipui an tih. Chun zantieng 1:00PM in AEROs (SDOs/BDOs) hai, ZEO, CMO, Dist. Social Welfare Officer, PO (ICDS) le Election official hai meeting neipui nawk an tih.

MU reservation thuah Students han lam an hraw
CCPur:  KSO/CCPur; HSA Jt. Hqrts. CCPur; ZSF GHQ le MZP (M) hai hmalaknain zani zing dar 10AM a inthawk khan Manipur University admission seat reservation chungthua MUTSU le ATSUM hmalaknaa dodalna fe mek le inzawmin students han CCPur College­a inthawk DC, CCPur Office chenin lampui hrawna an nei. Rally­a hang hai hin placard an chawi tawl a. Rally nei huna hin All Tribal Students Union Manipur (AMSU) President Joseph R. Hmar khawm a hang. Rally huna hin School tum tuma inthawk students sang tel an hang a. DC, CCPur kuomah Memorandum an pek. An memorandum copy ei hmunaw leiin Memorandum a hin ieng ieng am an ziek ti ruok hrietna ei nei nawh.

K.Oil October Quota suktlawm
CCPur:  IOC chun CCPur District­a dinga Kerosine Oil (S.K. Oil) October, 2016 quota chu 152 KL a inthawk 72KL in a hung suktlawm (53% zeta suktlawm). Hi lei hin local arrangement thawin Nov. 16 a inthawk sem ni dingin DC,CCPur chun a hril. Chun, khawnvartui man kaisang leiin Oct. 2016 a inthawk Khawnvartui man chu litre 1 ah Rs. 18/­ a zawr ning a tih.

Deputy Director sin a chel an
CCPur: Ms Lalrawngbawl Hmar, MCS, Deputy Director, Informaton and Public Relations, Govt. of Manipur chu Churachandpur a thawk dinga transfer a ni angin District Information  Officer, CCPur, Tuibong­ah Deputy Director sin a hung chel an tah.

MPSC Mains, 2016 a khan a tling ve
CCPur: Kha hma meta Manipur Public Service Commission (MPSC) Mains, 2016 result suok, Tv. Michael Fimliensang hai ruol khan Nk. Rosny Lalremvel D/o (L) Pi Thanhieng, Parbung, tuta Keithelmanbi, Imphal­Jiribam Road. laia um khawm Mains Exam alo tling ve zing.
   
Mains a tling hi zani lai a hriet cho a nih a. SinlengNews palaiin an pawlpuinaa ama’n a hril dan chun Mains result a suok ti a ruolhaiin an hril chu awi lovin nikuma result ni a a ngai leiin a lo uksak naw a. Formalities hieng interview na a ding Admit Card lak le documents hai sukfel hun a lo pel vang lem tah. E­mail a zuk en le result card a hmu a, Mains a tling a nih ti hi a hung hriet ve chau a nih.
           
Tuhin hmawsarumin interview hmasuon dingin an singsa mek a, interview a vawikhat hmasuonna ding ani leiin technical support a mamaw hle thu a hril. Nk. Rosny hi nu­le­pa nei talo, a U hai leh an theina na a inhlawa khawsa a um an ni a. Ama khawm tuhin Bethel Christian High School, Keithelmanbi a zirtirtu sin thawa inhlaw zing a nih. Inchukna tieng MA (Public Administration), IGNOUa h correspondent a inchuk, kumnawka final exam ding a nih. Interview a khawm hlawtlingna hung chang pei dingin ditsakna ei inhlan.

Football le Volleyball sem
CCPur: Zani chawhnung dar 1:30  khan Nehru Yuva Kendra (NYK), CCPur Office, Tuibong­ah  H. Doungel, District Youth Coordinator, NYK, CCPur huoihawtnain Youth Club tum tum hai kuomah Football le Volleyball+ Net hangsain sem a nih. Pu H. Doungel chun CCPur­ah NYK a affiliated Youth Club umzat chu 675 an ni thu, volunteers 22 an nei thu, Vocational Training Centre 7 an nei thu, District Level Football Tournament an huoihawt hlak thu, Youth Club  Award anpek hlak thu le an hmalak dan chi tum tum hai a hril. Hi hunsera hin tuolsung nitin Chanchinbu Editors le Pu Lalvullien, President, CDSA hai an hang ve a, Youth Club hran hran hai kuomah football le volleyball inhlanna an nei.

PIB huoihawtnain One Day Rural Media Workshop nei
IMPHAL/CCPUR: Press Information Bureau, Ministry of Information & Broadcasting, Govt. of India, Imphal huoihawtnain Conference Hall, Manipur Press Club, Majorkhul, Imphal hmun ah Oct. 26, 2016 sun dar 11:30 AM khan One Day Rural Media Workshop nei a nih.
   
Chief Guest in Pu K. Radhakumar, Commissioner, IPR, Manipur a hang a, Guest of Honour in Pu Manibabu Likmabam, Programme Executive, DDK, Imphal le Functional President in Pu Meghachandra Kongbam, Director, DIPR, Govt. of Manipur hai an hang bawk.
   
Hi Workshop hi Chief Guest, Guest of Honour le Functional President ha’n mombati sitvarna neiin an hawng a, thuhrilna an neina huna chun media pawimaw zie hai hrilin, internet khawvela cheng ei ni tah a, internet hmang angkai dan thiem a pawimaw thu hai hrilin, sawrkar khawmin e­governeance mipui sawr angkai thei dingin an duong tah thu, Facebook, WhatsApps hai chen khawm angkai taka hmang thei a ni zie hai an hril a. Chu ruolruol chun Computer thiem a ngai zie le sawrkar khawmin a thawktuhai officer le police hai khawm computer thiem ngei dingin training hai chen an nei tir hlak thu hai an hril a. Inbiekpawna hmangruo (Communication) hi mihriem haiin tulai 21st Century ah ei pawimaw laia mi a ni a. Taimakna le mani inthunun theina (discipline) le thiltum neiin media hmang a pawimaw zie hai uor takin an hril.
   
Technical Session hun a chun Topic chi tum tum hai hrilin Pu B.B. Sharma, IIS, Retd. Dy. Director, RNU, AIR, Imphal chun “Digital India”; Pu Yambem Laba, Sr. Journalist , Manipur chun “Role of Rural Journalist in Development Communication”; Pu Swamikanta, Addl. Chief Engineer, PHD, Govt. of Manipur chun “Swatch Bharat Mission”; Pu Pradip Phanjoubam, Editor, Imphal Free Press chun “Role of Social Media in Information Dissemination” le Pu L. Iboyaima, Ex. Editor, Janata Daily (Manipur Daily) chun “Skill India” ti thupui hai hmangin thuhrilna hun an hmang a nih.
   
Hi huna hin sawrkar khawmin media a  hmang angkai dan hai, ram le khaw kilkhawr hai hmasawnna dingin chanchinbumi/Chanchinbu a thu ziekmi/Journalist an pawimaw zie, Chanchin/thu thedarna dinga social media pawimaw zie,sawrkar scheme chi hran hran hai le information technology hmang thiem a pawimaw zie hai le a dang dang hril a nih.
           
Hi huna hin Hmasawnna Thar (Hmar awnga suok nitin Chanchinbu) Special Correspondent le Sports Columnist hai khawm an hang a. Anni ti lo hi CCPur Dist. a inthawk Zogam Today a Reporter pakhat a hangsa bawk.

Terrorist­hai do le tukdawlna ding kawngah India le New Zealand han hangruol an remtih
IMPHAL: New Delhi a hung inzin New Zealand Prime Minister John Key le India Prime Minister Narendra Modi han zanikhan New Delhi­ah inbiekna an nei. Cyber Security hangsain Terrorist­hai do le tukdawlna ding kawngah venghimna sin le Intelligence tiengpang haiah hangruol an remti bakah political, economic, insumdawngtuona, sports, tax lakna thil le food safety tiengpang haia an inzawmna le hmalak tlangna hai chu sukhrat zuol sau sau dingin rem an ti ve ve bawk. Rambung pahnihai chun tax chu dabawla laklo ha an ti tlang.
   
Narendra Modi chun India ram UN Security Council Permanent membership le Nuclear Suppliers Group (NSG) membership haia a hang theina dinga New Zealand sawrkarin a thlawpna thuah John Key kuoawmah lawmthu a hril. Kawvelah himna le muongna a um theina ding chun terrorist­hai tukdawl hmak a ul a, khawvel rambung tum tum hai chotu a la ni zing a nih tiin Modi chun a hril. Comprehensive Economic Cooperation Agreement (CECA) chungchangah an hmatienga inremna siem a ni theina ding le sukpuitling a ni vat theina dinga inpaw taka thawtlang thu; An ram pahni hai chun venghimna le intelligence tiengpanga an thawtlangna sukhrat zuol an remti bawk tiin Modi chun a hril.
           
John Key chun India ram UN Security Council ah permanent membership le NSG  member a hung ni ve ngei theina dingin New Zealand chun theitawp suoa hangpuiin le thlawp zawm pei a tih tiin a hril. John Key hi India ramah a cham sungin President Pranab Mukherjee khawm inhmupui a ta, hi zo hin Kochi­ah inzin a ta, New Zealand Company pakhat, Glidepath in Cochin International Terminal thar a bawl mek sin thaw a hmun ngeia va en a tih.

Civil Aviation Minister a hung inzin ding
Imphal: November 3, 2016 khin Union Civil Aviation Minister Ashok Gajapathi Raju chu Imphal­ah hung inzin a tih. Tulai hnai ela Union DoNER Minister Dr Jitendra Singh Imphal­a a hung inzin um khan Mobile Air Dispensary Manipur­ah an a ni ding thu le Imphal­Jiribam inkarah Helicopter Service a um thei dan ding ngaituo a ni ding thu hai a hril a. Hieng thu hai hi Ashok Gajapathi Raju hi Imphal a hung inzin huna Manipur leh an hriltlang ding niin ei thu dawngna chun a hril.

Venghimna sukkhau zuol a nih
Imphal: Kut, Ningol chakkouba le Dewali Kut hai hung um ding leiin Imphal khawpui sungah venghimna sin sukkhau zuol a nih. Thil bawm annawleh bag, suitcase etc. a neitu hrietlo hmu a ni chun tawk der lo ding le Police­ah erport pe nghal dingin N. Herojit Singh, SP, Imphal West chun   inhriettirna le ngenna a siem. Chun, rawpuok, rawek le rawmawi zawr khap a ni thu N. Herojit Singh hin a hril. Hiengang thil hi thaw lo dingin mipui a ngen bawk.

Education ngaipawimaw hmasa tak dingin
Imphal: Tamphasana Girls Higher Secondary School, Imphal in zanita Annual Freshers­cum­Literary and Cultural Meet, 2016 an hmangnaa Manipur Governor Dr Najma Heptullah in thu a hrilnaa chun, “education” hi ngaipawimaw hmasa tak dingin student­hai thurawn a pek. An lekha inchuknaah (subject lakah) thiem hle dingin a ngen tawl bawk. Chun, Education chu tukhawma sukbuoi lo dingin ngenna a siem bawk.

Prez.,VP le Gov. hai hlaw sukpung tum
New Delhi: Union Home Ministry chun India President, Vice President le Governors hai hlaw sukpung tumin tulai hin proposal a siem mek. Hi thil hi 7th Pay Commission hmang an a hung ni le inzawma thaw tum a ni a, tuta inthawk sawtnawte hnunga Union Cabinet pawmpui dinga peklut ni dingin official thusuok chun a hril.
   
India President hlaw chu tuhin thla khatah Rs. 1.50 lakh le Vice President in Rs. 1.25 lakh a ni a, State Governors hai hlaw chu Rs. 1.10 lakh a nih. Proposal thar dungzui hin President  hlaw chu thla khatah Rs. 5 lakh, Vice President in Rs. 3.5 lakh an hung hlaw phak ta ding a nih. 
   
7th Pay Commission sukpuitling a ni hnung khan India rama top bureaucrats Cabinet Secretary han thla khatah Rs. 2.5 lakh an lak phak a, Union Govt. hnuoia Secretary in Rs. 2.25 lakh an hung lak phak ta a nih. Hi thil hi Cabinet in an pawmpui hnunga parliament­ah phar ning a tih. Kum 2008 chen khan President hlaw hi Rs. 50,000,Vice President Rs. 40,000 le Governors Rs. 36,000 a nih.
   
Hi baka hin Presidents hlui hai pension, President lo thi ta hai nuhmei,Vice Presidents le an nuhmei/pasal bakah Governors hlui hai pension khawm sukpung tum a ni bawk.

VAWISUN THUPUI
Thil siem ama mithmua inlang naw hrim hrim a um nawh. Ei chanchin ei intlunna ding mithmua chun iengkim saruok le inhawng sain a um lem a nih.
­ Hebrai 4:13

Editorial
A thawtu le mawphurtu hai hrem ngam ding

Manipur Chief Minister, Deputy Chief Minister, Ministers pahni, Deputy Speaker, Manipur Legislative Assembly le Parliamentary Secretary hai Ukhrul­ah State Sawrkar Office buildings bawlzo thar, power sub­stations pahni le Bank pakhat hawng dinga fe hai hawng nei der lo le hlawsama Imphal tieng an hungkir nawk el hin ngaituona a suksei hle. Manipur State sawrkar ta ding chun inzak a um ang reng bakah a muolphothlak hle niin an lang. Hi thil tlung hi India ram pumpuiah thawklekhatin an dar nghal a, State tum tum le UT dang danga sawrkar le mipui han iengtin am an ngai ve ding chu maw? Mak an ti tlangpui ring a um. Hieng ang thil tlung hi ei la hriet ngai naw a, ei State a ding chun sinsie tlak a nih. CM le a hnungzuituhai khawmin hi thil tlung hi an dam sungin an theinghil thei ring a um nawh.
   
Kawngkhat ngaituo chun Police le Security Forces han an mawphurna an zo naw a, Security a lapse ti thei dingin a um. Ukhrul a hin Police, MR le IRB chau ni lovin Assam Rifles khawm an um a. State pakhat CM meu inzin ding chun security clearance a um thei naw ding chun, CM inzin ding hi hul hri dingin thurawn pe el hai sienla chu CM le a hnungzuituhai ta dingin a ha lem ring a um. Security force­hai hin Ukhrul mipui ngirhmun le an hmalak tum dan hi an hriet ngei ring a um a, chu report indik tak chu State Sawrkar kuomah report pe hai sienla chu hiengang thil hi CM le a rawihai hin an pumpel thei ring a um.
   
Manipur CM le a rawihai inzin boycott­a a um hi thil ni thei, thil um thei le pawm thei a nih. Amiruokchu, bomb sukpuok le silai hmetpuok ti hi chu dan kal, Sawrkar ta ding chun pawm thei lo le mipui tiengpang khawma a taluo deu an ti ring a um. Amiruokchu, mipui thil ngen le mipui thil nawr thlawptuhai lai hin helpawl an lo um sa a ni el thei. Bomb sukpuok le silai kap ti hai hi chu mipuia inthawka suok a ni chu ring a um nawh. Hi thil tlung hi Sawrkar chun thiem tak le fimkhur taka a suizui chu thil ul ni dingin an lang. State Sawrkar chun State sunga Security ngirhmun a ennawn khawm thil ul a nih.
   
Ukhrul­a thil tlung chungchang hi ngaituo chet chet a ul khawp el. Iengpo khawm nisienla, thil fe dan le um dan ei hang suikir chun , Ukhrul mipui hi Manipur CM le State Sawrkar chungah an lawm naw a, an lung a awi nawin an lung a sen hle ti chu hmu le hriet theiin a um. awngbauin hrillang naw hai sienkhawm, May 6, 2010 a NSCM (IM) General Secretary, Th. Muivah in a piengna khuo Somdal, Ukhrul District hung sir a tum dangchata a umna thu le July, 2014 a Ukhrul town sunga hun sawt takel curfew zama a umna hai kha an la theinghil naw a, khang thil hai hangsaa an lungawinawna thil dang dang hai suklangnaa CM le a Ministerial team kha theitawp tak meu suo a an lo dang khawm thil ni thei niin an lang.
   
Hi thil tlung le inzawm hin Police Sub­Inspectors 6 le Police Constables 4, an rengin Police 10 an sin haia inthawk suspended an ni a. An ni hi a mawphurtu tak le a tuortu ding an ni thei am? ti hi ngaituo chet chet a ul hle. Kha thil tlung thawtu le a mawphurtu taka intum le intuortir el chu thil indik a ni dim? Thil ditumlo thawtu le a mawphurtu indik tak zawng suok a, an chunga action Sawrkarin a lak chu thil indik a ni lem naw ding maw? A tuor ding han tuor lova, a tuor lo ding han an tuor chu thil ha a ni thei ding? Sawrkarin thil um dan a ngaituo chet chet nuom a um hle. A chang lem chun pawitawk lo le ieng hrie lo civil mi han an tuor chang a um hlak bawk. A thawtu le a mawphurtuhai hrem ngam a ul a nih. Kha nia silai hmetpuoktu le bomb sukpuoktu chu midang, helpawlhai am, misuolhai ti chu suia hrietchieng le sukfie chu Sawrkar mawphurna a nih. A thawtu le a mawphurtu chu Sawrkarin a suisuok a, dan anga hremna a pek chu a thaw dan ding niawm tak a nih. A tuor lo ding han an tuor pha hlak hi thil pawi tak a nih. Action lakna le hremna pekna kawngah hin ei ram Sawrkar hi a huoisen tawk naw mani ding aw ti theiin a um hlak. Chun, thil a hriet sa khawm hi hriet naw tehlem a thaw chang khawm a um hlak niin an lang. 



Post a Comment

Powered by Blogger.