Car in pasal pakhat a baw hlum
CCPur: Zani zan khan Singngat tieng pana Car hrat taka tlan chun Mata khuo ah a eksiden a, Culvert­a inhung hai a baw a, Culvert­a inhung pasal pakhat a baw hlum a, pathum in hliemna an tuok. Thina tuok chu Tongbram Premjit (35) s/o Khamba of Mata a ni a, a baw hliem hai chu Naocha (23) s/o Goudhon of Uripok (refer), Y. Anand (30) s/o Shanti of Mata (refer) le Brojen (35) s/o Oinam Jugin of Ningthoukhong (refer) hai an nih.
   
Chun, hi mi bawtu Car a chuong Khupngaihsuan @ Suasuan (22) s/o (L) Lamkhenthang of Siloam Veng, Bungmual (driver) (a nakawr­a thisen suok, a dar le a lu na a tih), Vanlalpieng (27) @ Pienga s/o Chawihrang of Bethlehem Veng, Rengkai (a vawitieng dar ru hliem) le Jangminsang (22) of Saipum hai an nih.
           
Car neitu hi Khanzam h/o Hmuaki of Bungmual Opp. SSPP Complex nia hril a ni a, sienkhawm hi thil tlung huna hin Car neitu hai tukhawm an chuong naw a, a driver in a khalsuok a niin ei thu dawngna chun a hril.

ST Reservation dodalnain VC lim an raw
CCPur: MUTSU, KSO, ZSF, HSA CCPur Jt. HQ le MZP chun zani zantieng 2:30PM vel khan Tiddim Road, Bijang Leilak bula NERCOMP office tuol lai Manipur University Vice Chancellor Aman Yumnam lim an rawh. Manipur University admission reservation chungthua Council resolution dungzuia Schedule Tribe (ST) hai ta dinga seats 7.5% chau hmang dinga University in fepui al a tum dodalna leia MU Vice Chancellor lim (effigy) hi an raw a ni thu an hril.

HI Executive Council Nov. 22 in Rengkai ah
CCPur: Hmar Inpui Assembly Secretary, Mr. Lalthalien le Speaker Prof. Vanlalnghak chun Hmar Inpui, GHQ 5th Executive Meeting date 4/10/2016 vide Resolution No.2na dungzuiin hung tlung ding November 22, 2016 (Tuesday) sun dar 11:00 AM hin Hmar Inpui Executive Council chu VTI Rengkai, CCPur, Manipur hmun a an kona October 21, 2016 ni khan thusuok le inhriettirna an siem.
   
Hi hun hi ngaipawimawa thang ngei dingin inhriettirna siemin, Region tin le Hmar Inpui hnuoia inkhai pawl tin hai chu Executive Council huna Agenda ding le Council Palai ding hming list chu Hmar Inpui, GHQ Office Assistant kuoma pek annawleh hmarinpui@yahoo.com a thawn dingin an inhriettir a. Palai in tir dan ding ruokchu Hmar Inpui Inawpdan (Constitution) Article 10: Clause –i­vii a mi ang in a ni ding thu le an kalman hai khawm an umna region tinin a tum pek ding ning a tih, tiin inhriettirna an siem a chun an zieklang bawk.
   
Hi Inhriettirna hi Region tin le Hmar Inpui hnuoia inkhai pawl tin hai chu email a thawn le lekha pek awm hai chu pek mek an nih tiin Mr. LRS Puruolte Jt. Secy. (Information & Media), HI GHQ (Hmar Supreme House) chun a hril. Hnam mipui hai chu hi Hmar Inpui Executive Council um ding hi Pathien kuoma tawngtaina haia lo hrie a, lo san dingin ngenna a siem bakah Hmar Inpui Office Asst. chu Monday to Friday haiah Office hmun ah zing dar 10:00 AM –2:00 PM inkar sung hmu thei le Mob. Ph 9612510400 a biekpaw thei le Hmar Inpui Inawpdan (Constitution) chu copy khat ah Rs. 50/­ a inchawk thei zing a nih tiin a hril bawk.

Bandh/Strike thaw lo dingin an ngen
CCPur: October 30­ November 1, 2016 inkar sunga Peace Ground, Tuibong, CCPur hmuna Chavang Kut hmang ding leiin Organisations le pawl tum tum hai chu hi festival sukbuoi thei dinga tukhawma bandh/strike thaw lo dingin Media & Publicity Committee,Chavang Kut Celebration, 2016 chun ngenna an siem.

KZP in lawmpuina an nei
CCPur: Khangthah Zuun Pawl (KZP) GHQ Executive member han zani zingkar 10:30AM khan CMO/CCPur thar Dr Kimngaihching Simte @ Dr Kim Simte, w/o H. Nehzasoi Simte lawmpuina CMO Office­ah an nei a, hi huna hin an lawmpuinain KZP General Secretary S. Soimuansiam le Miss Judy han Khangthah Puan an insiltir.
   
Chun, zani 11:30AM khan KZP GHQ Executive member han 54 Bn. HQ. Gangpimual a um T. Mangkhanthang Simte @ MKT Simte, h/o Dr Ching Simte, second in Command ( 2­IC) a promotion a hmu lawmpuina an nei a, lawmpuinain Simte Puanlaisah insiltirna an nei.

Oct. 26 in World Sight Day, 2016
CCPur:  District Health Society (DHS), CCPur hmalaknain October 26, 2016, 7:30AM khin Synod Hall, IB Road, CCPur hmunah “Universal Eye Health” and  call to action: “Prevention and Control of Emerging Eye Diseases” ti thupui hmangin 17th World Sight Day, 2016 hmang ning a tih. Hi huna hin Chief Medical Officer, CMO CCPUr khuollienin hang a ta, NYK, CCPur le Bliss Island Centre han hla sak an ta, TMI in Special Show nei bawk an tih.

Mipuiin an lo dang leiin Manipur CM le a zuituhai hlawsamin an hungkir
Imphal: Manipur CM O.Ibobi Singh le a hnungzuituhai chu zanikhan Helicopter a chuongin Ukhrul­ah an inzin a, sienkhawm mipui han an lo dang a, security forces han a lo dangtu mipuihai an thunun zonaw leiin CM le a hnungzuituhai chu sawrkar building hawng nei lo le hlawsamin Imphal an hung kir. CM hi Deputy CM Gaikhangam, I. Hemochandra Singh, Minister (Revenue, Law & Legislative Affairs, Forest & Environment), D. Korungthang, Minister (Health & Family Welfare, GAD & CADA), Govindas Konthoujam, Minister (Commerce & Industries, Sericulture, Veterinary & Animal Husbandary), M.K. Preshow Shimray, Deputy Speaker, Manipur Legislative Assembly le Victor Keishing, MLA han an zui.
   
CM, O.Ibobi Singh le a zuituhai hi zani zingkar dar 9:340 vel khan Bakshi Ground, Hunphung, Ukhrul an tlung a, sienkhawm an fena ding lampui mipuiin an dang tlat leiin Bakshi Ground a hin an um a, fe luina chia hriet a ninaw leiin sun dar 11 velin an chuongna Helicopter bawkin Ukhrul suoksanin Imphal tieng an hung kir nawk niin ei thu dawngna chun a hril. Bakshi Ground­a hin darkar khat lai boruok um dan an nghak a nih.
   
Bakshi Ground­a an um lai hin silai hmanga kap an ni a, CM le a zuituhai an him seng a, sienkhawm 6th Manipur Rifles a Rifleman William Tarao a hliem a, Army Hospital, Ukhrul panpui a nih.  CM le a zuituhai hi damnaw khum 100 umna District Hospital, Ukhrul building bawl thar, 132/33 KV Power Sub­Station, 33/11KV power Sub­Station, Chingai hmuna SDO/BDO office building bawl thar, LM SDO/BDO office building bawl thara um hai hawng dinga inzin an nih.
   
Chun, zani zingkar inhmatak dar 1 vel khan District Hospital Complex, Ukhrul/Hundung sunga IRB post tharah Lethod bombs 2 a puok a, bomb hlekin IRB Rifleman Milan Maring a ban changtieng a deng hliem bakah Hospital building banghai a suksiet nuol niin ei thu dawngna chun a hril. Zanita mipuiin lampui an dangnaa motor tyres le thil dang dang an raw bakah Police­hai leh nasa takin an inbeituo a, Police motor 2 an raw siet.
     
Dy. CM Gaikhangam chun, Silai kaptuo le bomb sukpuoktuhai hi NSCN(IM)  pawl ni dinga ringhla an nih tiin Imphal an hungtlung hnunga a office­a Chanchinthar lakhawmtuhai an hmupui huna a hril. Chanchin thar lakhawmtu han tulai hnai el khan Senapati District­ah NSCN(IM) hotu hangsain mi 3 silai leh man an ni a, iengleia insuo nawk am an nia, tia indawnna an siem chu, hi thu hi ka hriet ve nawh tiin Gaikhangam chun a dawn.
   
CM in sawrkar building a hawng tum dangnain Tangkhul Nagalong (An apex body of  Tangkhul bodies) chun Oct. 23, 2016 zantieng dar 4 a inthawk khan darkar 24 sung aw dingin Ukhrul town le a sevel haiah  public curfew  an lo thaw an ta bawk a nih. Tangkhul Nga Long (TNL) hin bang haiah poster an tar a, poster haia chun ‘Yes to real development, No cheap politics”, “No empty political campaign” ti  le a dang dang hai an ziek.
           
CM chun Imphal a hungtlung hnungin Cabinet meeting a ko a, thil um dan hai a minister hai kuoma a hril tawl niin ei thu dawngna chun a hril.

Union DoNER Minister a hung inzin
Imphal: Union Minsiter for Development of North Eastern Region (DoNER) Dr Jitendra Singh chu zanikhan Imphal­ah a hung inzin a, Conference Hall, Secretariat South Block, Imphal­ah Chanchinthar lakhawmtuhai an hmupui. Hi huna hin Chief Secretary O. Nabakishore, Ram Muivah, Secretary, NEC le Shambu Singh, Additional Chief Secretary hai khawm an hang. Dr Singh chun project thar le projects fe mek haia sawrkar hmalak dan, Imphal­Jiribam Road chungthu, National Sports University chungthu le a dang dang hai a hril. Chun, Ukhrul a inzin CM le a hnungzuituhai helpawl han an lo bei chu pawi a tizie thu Dr Singh hin a hril. Dr Jitendra chun India hmarsakbiel hmun kilkhawr haiah “Mobile Air Dispensary” service thaw nisien tiin rawtna a siem. 

Police han tear gas an kap khum
Imphal: Manipur University thaw an tum dodalnain zanikhan ATSUM inrawinain Student organisation tum tum han University hmuna dodalna le dangna an nei. Police han student nuorna neihai hnawtdarna dinga tear gas an kap khum leiin mi iemanizatin hliemna an tuok. Hun iemanichen University bula National Highway hai dang le dawr hai khar an ni bakah Senapati le CCPur district haiah chun motor inlawn vel hai dang an nih tiin ei thu dawngna chun a hril. Chun, nuorna neitu hai laia mi iemanizat Police han a an huoi niin ei thu dawngna chun a hril bawk.

Dipu Gangmei gate­ah grenade hmu
Imphal: October 23, 2016 zing dar 7:15 vel khan Dipu Gangmei (45), s/o Thangjekpou Gangmei of Langol Tarung village in Gate bulah hand grenade hmu a ni a, Police han an va lak a, pawi tawk nawna ding hmuna an sukpuok. Dipu Gangmei hi ADM, Ukhrul sin thaw lai a nih. Pawisa demand­na le inzawma Grenade hi helpawl han an va sie ni dinga ring a nih.

HSA Imphal JHQ Prez. Dingin Malsawmthang Ralsun
Imphal: Oct. 22, 2016 khan Hmar Community Hall, Imphal­ah HSA Imphal Jt. HQ huoihawtnain Annual meet­cum­Felicitation prog. hmang a ni a, HSA GHQ  inrawinain HSA Imphal Jt. HQ huoitu thar ding thlangna nei nghal a ni bawk. President dingin Tv. Malsawmmthang Ralsun, Secretary dingin Tv Lalbelsang Infimate le Fin. Secy. in Tv. Michael Songate hai thlangtling an nih. Inthlangna hi Dy. Assembly Speaker HSA GHQ  E. Lalumpui Pulamte le Nk. L. Margreth Tryte, Fin. Secy. HSA GHQ hai inrawinaa nei a nih.
   
Freshers meet le Felicitation huna hin Chief Guest in Pu C Thuoilien, Adviser HSA Imphal Jt. Hqtr.; Chief Host in Pu Joseph R Hmar, President ATSUM/Adviser HSA GHQ; Functional President in Pu Dr. John H Pulamte, Adviser HSA GHQ hai an hang bàkah HYA Gen HQ President Upa Laldawnlien Varte; Pi Thangthatling, President HYA Imphal Jt. HQ; Pu Lalbuotsai Zote, Vice President HYA Imphal Jt. HQ; Pu Emmanuel Lalumpui Pulamte, Dy Speaker HSA GHQ; Nk Margreth Tryte le nu le pa tamtak in an uop bawk.

KPLT le sawrkarin ceasefire thla 6 sung
Guwahati: Assam­a Karbi helpawl Karbi People’s Liberation Tigers (KPLT) le Assam sawrkar hai chun thla 6 sunga dingin inkapchawl (ceasefire) an puong. Terms and condition chu KPLT leaders hai le Police han an la hriltlang ding thu senior police official thusuok chun a hril. 

Inkaptuonaah Maoist 23 kap hlum an nih
Bhubaneswar/: Zani zingkar khan elite­anti Maoist force ‘Greyhounds’,Andhra Pradesh le Odisha Police hangruolhai le Maoist hai Malkangiri ramhnuoi Andhra­Odisha ramri lai nasa takin an inkaptuo a, inkaptuonaa hin Moaist cadres 23 kap hlum an ni a, Greyhounds constable 2 in hliemna an tuok. Hliemna tuok constables pahni hai hi Helicopter a phurin Visakhapatnam hmuna enkawl an nih tiin official thusuok chun a hril. Inkaptuona hmuna hin security forces chun AK­47 rifles 4 an dapdawk.Inkaptuona hmuna hin security forces chun dappui nasa takin an sunzawm zing. Inkaptuona tlungna hmuna hin Moaist hotu Gajarla Rafvi @ Uday, Bengal Sudhir, Anil, RK alias Saketh naupa Munna, Bakuri Venkata Ramana @ Ganesh le midang dang khawm an um nia hril a nih.

Lt. Colonel in a hnuoia officer rek hlum a tum
Agra: Mathura Military Hospital­a Anaesthetist kum 2 sung zet lo thawk tah Lt. Col. T. Jadhav (40) chun a ngaizawngnu a hnuoia officer Lieutenant pakhat  a ringa rek hlum a tum hnungin ama le ama tur inkaplutin an that niin Army thusuok chun a hril. October 21, 2016 khan Baldeo road, Yamunapar area hmunah a ngaizawngnu (nursing assistant) le hin hospital­ah an va fe a, chu huna hi thil hi tlung nia hril a nih. Jadhav hi Maharashtra mi, nuhmei neia nau pahni nei ta a ni a, an ngaizawngpui a hnuoia officer hi Dehradun mi a ni a.  Lieutenant nu hin a pasal nei ding ni sukfel a nita leiin an inkar thu suktawp a nuom thu a hril leia hieng thil hi tlung nia hril a nih.  

UP CM in a minister 4 a ban
Lucknow: Zani hmasa khan Uttar Pradesh Chief Minister Akhilesh Yadav chun a pate bakah state party Chief Shivpal Singh hangsain a  minister 4 a ban. Minister bana um danghai chu Shadab Fatima, Narad Rai le Om Prakash Singh hai an nih. Akhilesh Yadav chun an party MP Amar Singh mi ringzo em em el le film actor Jaya Prada khawm Vice­Chairperson,UP Film Development Corporation Vice Chairperson a ninaa inthawk a ban. Samajwadi Party (SP) sunga buoina um hi thla khat lai a ni tah. Amar Singh hi Akhilesh Yadav pa Mulayam Singh Yadav mi ringzo a nih. Mulayam Singh Yadav le Amar Singh hai chun an party an suksiet a, an ni antuhai taphawt chu UP Cabinet­ah hang thei naw nihai tiin Akhilesh Singh Yadav chun a hril.
   
Hieng laizing hin Uttar Pradesh­a sawrkarna siemtu Samajwadi party sunga buoina um le inzawmin party chief  Mulayam Singh Yadav hmalaknain zanikhan Lucknow khawpuia  party headquarters­ah  meeting nei a ni a, sienkhawm inbiekremna um thei lovin inbiekna hi suktawp a nih. Meeting­na hmuna hin Akhilesh Yadav a pate Shivpal Yadav khawm a hang.
           
Meeting huna hin Mr Akhilesh Yadav chun  party thar an din naw ding thu hrilin Samajwadi Party Chief le a pa ni bawk Mulayam Singh Yadav in inban dinga a ti a ni chun Chief Minister a ninaa inthawk an ban ding thu a hril. 

Congress an sawrkar hmakhat a khakhmul vaw a tum nawh
Hyderabad: Telangana Congress Chief N. Uttam Kumar Reddy chun, Telangana state­ah Congress in sawrkarna an siem hmakhat a khakhmul vaw loa a hla ding thu a hril. Tulai hnaia  chanchinbumi henkhat, Indian Air Force officer hlui ni sia iengtiziea i khakhmul i hla am tia indawnna an siem huna hi thu hi N. Uttam Kumar Reddy in a hril a nih. Mr Reddy (54) hi ADC le Comptroller to the President lo ni hlak le Indian Air Force­a MIG­21 le MIG­23 vuongna hai lo khal hlak niin, Air Force­a a hang lai chun fai taka invaw nam hlak a ni a, tuhin Nalgonda district MLA ni lai mek a nih. Kum 2014 a Telangana Assembly election a khan Telangana Assembly seats 119 umah Congress in seat 21 chau an lak a, election an nei nawkna ding chu kum 2019 a nih.  

VAWISUN THUPUI
Unauhai, nangni ruok chun thil ha thaw  hi nghawk naw ro.
­ 2 Thessalonika 3:13

Editorial
Manipur Politics

Manipur politics fe dan hi a awngbau thiem han an hril beidawng thiem a, an sawrkar ve phat naw chun Manipur hi hmasawn thei naw ding khawpin an hril thiem  em em vawng a ni deu tak. Manipur chu Assembly election boruokah ei um a, Poitical party tum tum han indemtuo le inhrilsiettuo chu an vote campaign­na hla takah an hmang a, tu party thu hril tak am an dik ti mipui ta ding chun hrietthiem a harsa hle. Ngun taka hang ngaituo chun tu party khawm hi hung sawrkar hai sienla an hril thiem anga thil thaw hi an um ring a um bek bek nawh. Hieng a ni lei hin mipui han politician­hai thu hril a fak dan ei thiem a, ei fimkhur hle a ul. Chuong a ninaw chun hlemin ei um nawk pei ding a nih.
   
Manipur­ah thu pawimaw, major issues chi tum tum a um a,hieng major issue­hai chingfel thei ding, ei dit, ei mamaw le ei thil ngen hai sukpuitling theitu ding sawrkar ei mamaw a, chuongang sawrkar siem theitu ding chu mipui han ei thlang thiem nuom a um. Politicians le political party tum tum hai khawmin indem le inhrilsiet tiengpang nekin major issue­hai an chingfel tum dan hril uor lem hai sienla,an hung sawrkar huna khawm major issue­hai ngaipawimaw takah nei ngei hai sienla nuom a um.
   
TV le nitin Chanchinbu haia Political party tum tuma politician­hai inbeina le inhril mawina le inhril mamna haia inthawk hin mi tam tak party awn bik nei ve lo le hlawkna intel tum lemlo, ram inbelrawlna (governance) khawm ngaituo lemlo hai chun, Politics an “hmu pawrche” a, an mi ringzawng tak khawm ieng Political party­ah amani a um chun an hmu “sakhi’ nghal el hlak a ni awm ie; inthiem an um tho el, ei politics khel danin zir mawl lo chu! An ta ding chun inthlangnaa vote thlak khawm phur um naw hleng a tih. Mihriem hi ei inang naw a, Politics a inrawl nuom der lo hi an um hlak. Dem el thei chu ni bik naw nihai.
   
Politics a hin neutral tak tak a um thei nawh  an  ti hlak a. Amiruokchu, a chunga ei hril hai hi chu neutral tak tak an ni a, a san chu an nitin nun le ram inrelbawlna inthlungzawm dan an ngaituo ngai naw leiin Political party le politics hrim hrim hi an nitin nun a inthawk an sie hran tawp a ni deu tak; chu le inruolin, political party a um lo, sienkhawm politics hrim hrim le ram inrelbawlna ngaituo pei mi an um tho a, chuong mihai ruok chun an sie le ha hrietna hmangin “ieng party am a ha, tu am vote ding” ti kawngah thutlukna fel tak an siem thei a, inthlang zatin vote an pekna khawm a danglam rawp hlak.
   
A chunga ei hril mi chi hni, infinkhawmhai hi Manipur­ah chun ‘Neutral’ angin ei hril el a, vote an pek tamna tiengpang khawmin an hlawkpui pei hlak. An pahni lai hin nitin nun le ram inrelbawlna inthlungzawm dan an ngaituo ngai naw leiin Political party le politics hrim hrim hi an nitin nun a inthawk an sie hran tawp a, hlem le huoi suol an awl tak thung.
           

Tuta sawrkarna chel mektu Congress sawrkar dittawk nawna (anti­ incumbency wave) hi a nasa hle a. CM O.Ibobi Singh ngei khawma hi thil hi Congress party sukbeidawngtu a nih tiin tuta hma meta All India Radio in interview a thawna huna khan a hril a nih. Amiruokchu, hi thil hi sawrkarna insiemtir nawk theitu a hung ni thei ti thu khawm CM hin a hrillang sa. Iengpo khawm nisienla tuchena Manipur a politics fe dan enin Manipur Assembly Election hung um dinga inbeituo tak ding chu Congress le BJP an ni ding a nih. Tu party khawm hung hrat hai sienla ram inrelbawlna ha hung ngaipawimaw hai sienla nuom a um.

Post a Comment

Powered by Blogger.