HAA GHQ in Annual Conference-cum-Talent Show an hmang
CCPUR: Zani October 22,2016 chawhma dar 11 khan Hmar Artist Association, General Headquarter hmalakna in Mrs. (L) Lalhmasuon Memorial Hall, Rengkai Road­ah Annual Conference cum Talent show hmang a nih.
   
Hi huna hin Hmar hnam sunga hlasakthiem le talent ha tak tak nei hai an fekhawm a. Chief Guest in Shri. Z. Solomon, Joint Director, Tribal Research Institute, Manipur, Functional President in Shri. Y Shashi Kumar Singh, Project Director, DRDA CCPur & Promoter, HAA GHQ le Guest of Honour in Mrs. Mary Lalrengpui, Promoter, HAA GHQ hai hmang an nih.
   
Hun hmasa tieng Pu Lalvullien Hmar, President, HAA GHQ in guest hai lawm lutna hun a hmang. Programme hmang sung hin HAA members le Band hieng Euclase Band, Christina Shakum, HSA Platinum Star, Eljay Ngaite, Mami Sinate, Hossanmawi, Laldinpui, ROYE le Joshua Lalhuolhim han rimawiin inchat lovin mipui fekhawm hai an in­awi zing.
   
Talent Show le kut themthiem thil hai pholangna le an umzie hai hrilna nei a ni a. Tv. Lalneisang­in theihle mutin ‘Kannan Rammawi’ ti hla a sak a; Pu Rodik , Tv. Stephan le Tv. Buolthangsang haiin perkhuong zut­na neiin, Tv. Nobby in lam inentirna a nei a, Tv. Isaac Lalthlawnpek in milim ziek (pencil sketching) nal le mawi tak el ziekna a nei a, Pu Lalsanlien in Perkhuong nawt, flute mut le perkhuong zut­na a nei.
   
Tv. Lalneisang, Pu Hmangnei le Pu Lalringum haiainthawk hmar hnam culture le inzawma pawimaw a an ihriet hai lung le thing hmanga an lo ker suok mawi le nal tak takhai suklangna le a umzie hai hrilna hun hmang a nih. Chief Guest, Functional President le Guest of Honour thilpek inhlana um hai khawm hmar hnam sunga talent ha tak tak neihai kutsuok vawng a nih. Guest of Honour hi thinga ker nga lim le Functional President lunga ker Mupui lim inhlan an ni a, a pahni hin Tv. Lalneisang a kutsuok ve ve an nih. Chief Guest Shri. Z. Solomon a lim nal em ema Mawia Arts in a lo ziek chu inhlan a nih.
   
Chief Guest Shri. Z. Solomon, Joint Director, Tribal Research Institute, Manipur in thuhrilna a nei hunah, Custom, Culture le Traditions hai vawng hring zing a pawimaw thu a hril a. Tribal Research Institute­ah Arts & Crafts le trade dang dang inchuk thei ani thu hai hrilin, an chuk dan lampui le a kalhmang hai hrilna a nei bawk.
   
Guest of Honour Mrs. Mary Lalrengpui, Promoter, HAA GHQ in Hlaro milo sersuok pektu hai Ram le Hnam chawimawitu an ni zie thu hrilin, Kut thiem thil le talent ei nei hai phawrsuok a pawimaw zie thu a hril a. Hi kawnga hin mipui hai khawma support inpektawna hang tlang a pawimaw zie thu a hrilsa bawk.

Medical Assessment Camp nei
CCPur: SSA/SMA, Artificial Limbs Manufacturing Co­operation of India(ALIMCO), NGO, Dist.Health Society, CCPur hai hangruolin zanikhan CCPur Block­a dingin Synod Hall, IB Road­ah piengphunga ruolbanlo hai ta dingin Medical Assessment camp nei a nih. Medical Assessment camp hi CCPur district­a block 7 haiah a dawt dawta nei pei dinga ti a nih. Medical assessment huna hin Dr Chiin Guite, Opthalmologist, Dist.Hospital; Dr.Chinggouman, Dist. Hospital le ALIMCO a inthawk Orthotist le Audiologist han Disable Person hai an en.

TKSU member 50 in thisen unit 1 seng an pek
CCPur: Thadou­Kuki Students Union (TKSU) GHQ le Blood Bank, District Hospital hangruolin zani zingkar 10AM khan KIC Office, Tuibong­ah Blood Donation­cum­awareness nei a ni a, hi huna hin Dr Vijayanta, Blood Bank Office, District Hospital, CCPur chu resource person in a hang a. Thisen pek hi mi hringna sanhimna ding a ni thu, thisen hi thlathum dan peia inthlakthleng a ni leiin thisen pek i a umnaw thu hai a hril.
   
Awareness prog. Hmang zo hin TKSU member mi 50 hai chun District Hospital­a thisen mamaw hai hmang thei dingin thisen Unit khat seng an pek a, a ul le pawimaw huna thisen an la pek nawk pei ding thu TKSU chun an hril.

RISING Campus Rock Fest
CCPur: November 5, 2016 (Inrini) 11AM  khin Happy Heart Junior College huoihawtnain Happy Heart School Open Air Theatre, Bethel Churachandpur hmunah RISING Campus Rock Fest um a tih. Hi campus rock fest­a inlang ding hai chu Daniel Tryte & the Rock Opera, Lawrinda Varte, III­The Band le Vincent Hekte Hmar hai ning an tih.
           
Hi Rock Fest sîm ve nuom hai ta dingin Ticket Rs. 50/­ chau pein Bata, Tiddim Road; Grace Tiles & Sanitarywares, Opp. DTO Office, Happy Heart School le Rock fest hmang huna hin a hmuna hmu thei ni bawk a tih. A nuom taphawt hang dinga fiel an nih.

Dr Kim Simte in CMO a chel an
CCPur:  CMO, CCPur dinga ruot thar Dr Kim Simte chun zani hmasa khan CMO, CCPur  charge lain zanikhan Office a kai an. Hi le inzawm hin zani 11AM khan Rev Soichinthang, local pastor, NTBC, New Bazar chun Office inhlanna le Dr Kim Simte ta dinga awngaipekna a nei. Hi huna hin Dr Kim Simte sunghai bakah Dr Liankhawjam Guite, DMO le Dr Phirthanglien Buhril, DAO le CMO staff hai khawm an hang.
   
Dr Kim Simte chun Grade­II senior Medical Officer a inthawk promotion hmu peia CMO –a hung kaisang ta a ni thu a hril a. A sinthawnaah ama khata thaw thei a neinaw thu hrilin CMO hnuoia department le staff hai chu a hmalakna thlawp seng dingin a ngen.

Pu Jimmy khawm 2­IC in a kaisang ve
CCPur:  Tuta Koirengei, Imphal­a Deputy Commandant, BSF sin thaw lai mek Pu Jimmy Hrangate, s/o (L) Chawilien Hrangate of Rengkai khawm Second­in­Command (2­IC) in a kaisang ve.  Pu Jimmy hi kum 2001 a Assistant Commandant zawm, kum 2007 a Dy. Commandant a lo kaisang ta a nih. A kaisangna hi ei chanchinbu chun a lawmpui hle.

PTC CWC in members suspend­na an revoke
CCPur: Zani 11AM khan Paite Tribe Council (PTC) GHQ Central working Committee chun PTC GHQ Conference Hall, Hiangtam Lamka hmuna meeting an nei. Hi huna hin PTC GHQ CWC in Oct. 23, 2015 nia PTC member henkhat kum khat sunga dinga suspend a puong hai chungchang le thu pawimaw dang dang hai an hriltlang a. PTC/GHQ CWC member fekhawm hai chun suspended­a um hai suspend an nina kumkhat a tling ta leia hlip an remti dungzuiin suspended­a an umna chu revoke nghal a nih. Suspended­a um member pahni LB Sona le G. Vungsuanthang hai chu PTC Constitution (11 amendment, 2013) Bung 4, Article ­IX clause 38 (residuary power) dungzuia suspended anni a, suspended­a an umna revoke a nita leiin PTC/CWC member ni nawk ta dingin member han lungruol takin an remtih.
   
Chun, kum 2017 MLA election ding le inzawma Zomi Council sunga hnam tum tum han hnambinga support nei lo dinga pawl puiin thupek a lo siem chu ha tiin an pawmpui nghal bawk niin ei thu dawngna chun a hril.

Oct. 23&30 haiah dawr hawng dingin
Imphal: Ningol chakkouba, Kut le Diwali (Deepavali) Kut hmang dinghai hmakuo ngainain Oct. 23 & 30, 2016 hai khin Imphal khawpui sunga dawrhai hawng ning a tih. Dawr neituhai chu Pathienni khawm nisienla an dawrhai hawng seng dingin Labour Department, Govt. of Manipur chun inhriettirna a siem.

MHA in a ngaimaw hle
Imphal: Manipur State sunga Districts 9 um hai laia District 5, Imphal East, Chandel, Ukhrul, Senapati le CCPUr district haia Ganja nasa taka chinga um chu Union Ministry of Home Affairs (MHA) chun a ngaimaw thu a hril a, hi thil hi khap le Ganja bilhai po po sukse vawng dingin Manipur Chief Secretary a hung inhriettir.

MU Admission Thawanni a inthawk
Imphal: Manipur  University reservation thua MUTSU le ATSUM in dodalna nasa tak neiin bandh chen huoihawt hai sienkhawm Academic Council resolution dungzuiin Manipur University Admission chu Oct. 24, 2016 a inthawk an ni dinga hril a nih. MU Deans le departmental heads han zanita VC in­charge thar Prof. Amar Yumnam inrawinaa meeting nei hunah Oct. 8, 2016 nia Academic Council resolution inzaa, admission reservation chungthuah tukuma dingin SC 15%, ST 7.5% le OBC 27% chu hmang dingin an rel niin ei thu dawngna chun a hril.

Oct. 25 in CM Jiribam­a inzin a tum
Imphal: Manipur CM O.Ibobi Singh chu October 25, 2016 khin Jiribam­ah inzin a tum. Jiribam Sub­Division huop sunga sawrkar building bawlzo thara um hai a hawng ding nia hril a nih. An mamaw le harsatna tuok chi tum tum hai an hril theina hun ha ni dinga an hriet leiin CM Jiribam inzin ding hi an lo phurin an lawm hle niin Jiribam District Demand Committee thusuok chun a hril.

Harni Airport, Vadodara-ah PM Modi in International Terminal a hawng
Vadodara: Zanikhan PM Narendra Modi  in Harni Airport, Vadodara­ah International Terminal a hawng. Hi terminal hi Rs. 160 crore zet senga bawl, Square metres 18,000 zeta lien, passengers 700 inlengna, check­in counters 18 (domestic) umna le International fliers umna a nih. Kum 7 sung zet a bawlnaa hun hmang a nih. Hi terminal bawlna ding lungphumna hi kum 2009, kha hun laia Union Civil Aviation Minister Praful Patel in a lo nei ta a nih. A runway khawm  metres 8,100 a sei, Airbus 320, Boeing 737, National Carrier Air India, Private Airlines IndiGo le Jet Airways hai um le service theina a nih.
   
Harni Airport hi India rama green airport a pahnina a ni a. A pakhatna  chu Kochi­ah tuta hma khan hawng a lo ni tah. NDA sawrkar hnuoia green airport pahnina ding hawng theia ka um hi ka lawm hle a, India ram mipui han hlawk tak le angkai taka an hung hmang ngei ka beisei. Ei rama dinga top­class airport a ni ka ring tiin PM Narendra Modi in thu a hril huna a hril. Chun, Vadodara khawpuiah India rama dinga Railway University hmasa tak hawng a ni thu Modi hin a hril bawk.
   
Harni Airport­a International Terminal hawng zo hin Vadodara khawpui huom sunga Navlakhi Ground­ah Modi hin ruolbanlohai kuomah ke lem, kut lemle cycle ke 3 nei hangsain, hmangruo chi tum tum 8000 vel a sem. Hieng thil hai hi Ministry of Social Justice & Empowerment, Artificial Limb Manufacturing Corporation of India (ALIMA),Kanpur le Vadodara Administration hai hangruola an thawlawm a nih.

Odisha Health minister thar dingin  Amat
Bhubaneswar: October 17, 2016 nia Bhubaneswar khawpuia SUM Hospital­a inthawk kangmei suok leia damaw enkawla um mek 25 in thina an tuok le mi 100 chuong zetin hliemna an tuokna thua khan Odisha Health Minister Atanu Sabyasachi Nayak chun ama thiemnaw le mawphurnaa ngaiin an ban a.  Hi le inzawm hin Odisha Chief Minister Naveen Patnaik chun Finance Minister Pradeep Amat chu Health minister porfolio chelsa dingin a peksa. Chun Forest Minister Bikram Keshari Arukh chu Mr Atanu Sabyasachi Nayak in a lo chelsa Department of Information & PR (I&PR) chu enkawlsa dingin portfolio a pek belsa bawk. 
   
Opposition BJP in hi thil tlung le inzawma nasa taka an sawisel leia Health minister hi inban a ni a, sienkhawm BJP chun Chief Minister Mr Patnaik khawm inban dingin an la phut sa zing tho a nih.
   
Hieng laizing hin state sawrkar chun SUM Hospital chu Rashtriya Swasthya Bima Yojana hnuoia empaneled hospital list a inthawk a thaibo tah.

Cabinet meeting­ah Mobile phone ban
New Delhi: Union Cabinet meeting­a hang hai chun tuta inthawk meeting­na hmuna mobile phone an chawilut khap a ni ta thu tulai hnai el khan Cabinet secretariat chun minister hai chu an private secretaries hai fethlengin an hriettir. Hi thil hi information a putsuok (leakage) ding laka invengnaa thaw tum a nih tiin official thusuok chun a hril. Hi dungzui hin Cabinet/Cabinet Committee neina hmun haia chun smartphones/mobile phones hai chawilut khap a ni ta ding a nih. Hiengang inhriettirna hi sawrkarin an suo vawikhatna a nih. Tuta hma khan meeting­a hang ministers hai chu an phone chawilut phal pek an ni a, sienkhawm silent mode annawleh switch off­a sie hlak a nih.

Dengue a damnaw in Nurse 3 a vuok hliem
Kolkata: October 19, 2016, 10PM vel khan Gariahat hmuna private nursing home All Asia Medical Institute­a Dengue a damnaw leia enkawl Subir Saha (27) chun a enkawltu Nurse pathum hai chu IV drops khaina thirban in a vuok a, nurse pahni Victoria le Shipra Mondal hai chu nasa taka an hliem leiin Institute of Neurosciences Kolkata (INK) ah admit an ni a, pakhat chu a hliem inrik taluo naw leiin a thawkna hospital­a hin enkawl a nih. Nurse pakhatin Subir Saha hi damdawi kap (jection) a tum laiin hung tho thuta nurse hai hi a bei el nia hril a ni a, a ruol a thawkpui nurse dang han an va san tum huna Subir hin a lo vuok ve  baka a suok malama a lampui lo dangtu hai khawm a bei pei el nia hril a nih. Subir Saha hi Platelet count an hnuoi leia ICU ward­a admit a ni a, Nurse 3 hai a vuok hliem hnung hin a tlanhmang leiin man a la ni nawh. CCTV ah hieng thil tlung hai hi record a um vawng a, Gariahat Police chun an suizui mek.




Post a Comment

Powered by Blogger.