ATSUM  an bandh thawtum an fethlengpui ding:
ATSUM hmalakna an thlawp thu an puong
Imphal/CCPur: Manipur University admission reservation chungthuah zanikhan University Grants Commission (UGC) chun clarification siem sienkhawm June 2, 2016 a inthawk UGC clarification vawi thum 3 zet MU Academic Council in a lo zawm ta ngainaw leiin hi chungthua ATSUM in October 20, 2016 zingkar dar 1 a inthawk October 21, 2016 zingkar dar 1 chen, darkar 24 sung Total Shutdown an thaw tum chu an fethlengpui ding niin ei thu dawngna chun a hril. UCG in clarification a siem dungzuiin Manipur University a ST Reservation quota MU Academic Council in  7.5 % ­a a sukhnuoi chu ST quota pangngai 31% a ni ding ti le SCs 2% a nih.
   
Zomi Students’ Federation (ZSF); Kuki Students Organisation (KSO), CCPur, Hmar Students Association (HSA) Jt. Hqrts, CCPur le Mizo Zirlai Pawl (Manipur) hai le ATSUM le MUSU palai han Oct. 17, 2016 nia joint meeting an nei huna thu an lo sukthluk ta angin Manipur University admissionre servation chungthua ATSUM le MUTSU in Shutdown/bandh an puong chu an thlawp ding thu zanita ZSF; KSO, CCPur, HSA Jt. Hqrts, CCPur han  joint press release an insuoa chun an zieklang.
           
Bandh hin Medical emergencies, Medias, Air passengers, Water Supply, Telecom duties, le Electricty hai chu a huomsa naw ding thu an thusuok chun an zieklang a, CCPur mipui hai chu  bandh/shutdown hi thlawp seng dingin an ngen bawk.

HYA Conference­cum­Election hul
CCPur:  October 22, 2016 a HYA Tuihaphai Joint Headquarters Conference­cum­Election nei dinga ti chu Hmar Artistes Association Talent Hunt programme leh an tuok leiin hul a ni a. Hi lei hin HYA Tuihaphai Joint Headquarters Conference­cum­Election chu November 1, 2016 a nei lem dinga sawn hlat a nih tiin HYA Tui­haphai Joint Headquarters chun inhriettirna a siem.

Online Scho. form peklut thei hun suksei
CCPur: Ministry of Minority Affairs, New Delhi chun National Scholarship Portal (NSP 2.0) fethlenga Minority students hai ta dinga online Pre­Matric (Class I to X) le Post Matric (Class XI and XII) application peklut thei hun chu October 31, 2016 chena dinga hun keisei a ni thu Mr Suresh, Under Secretary, Govt. of India thusuok chun a hril.

Nodal Teacher nominate dingin
CCPur: State Project Director, SSA/SMA chun Manipur­a Schools 981 haia Principals/Headmasters le Headmistress hai chu SHAALA SIDHI activities enkawltu ding Nodal Teacher (desirably with proficiency in Computer) pakhat seng Nominate a, State Project Office, SSA, Manipur ­a pelut dingin an hriettir. Hi le inzawm hin CCPur District sunga Principals/Headmasters le Headmistress hai chu ZEO Office­ah an rang thei anga hming pelut dingin ZEO CCPur chun an hriettir. Nodal Teacher nominate dinga ti hai lai hin CCPur district­ah Schools 90 a hang. Thu chieng lem ZEO Office­a hriet thei ning a tih.

HYA GHQ President khuollienin a hang
CCPur: Zani zantieng 1:00PM khan Thingchom Playground, CCPur­ah (L) Nk. Grace Ramngaium Memorial Trophy closing ceremony­cum­ 25th HYA Raising Day, 2016 hmang a nih. Hi huna hin Pu Laldawnlien Varte, President, HYA GHQ khuollienin a hang a, Pi T. Lhingneikim, Headmistress, Thingchom Jr. H/S le Pu Judson Vanlalnghaklien hai chu guest of honour le functional president in an hang.
   
Khuollien Pu Laldawnlien Varte in thu a hrilnaa chun, Pathienin mihriem a min duong dan rengah makhata khawsa thei ni lo, inhangpuituoa insawmdawltuo hlak dinga a mi siem ei ni a. Mihriem hin  ei damsunga ei nuom tak chu hlimna le lawmna a ni leiin ei hlimna le lawmna tak chu mihai hangpui nekin mihai hangpuitu ni hi a ni a, chu chu Pathien thuin a min chuktir dan khawm a nih tiin a hril.
   
halai han infiemna tienga hma an sawn pei theina ding beiseiin Football a pek bakah khawtlangin a ul le pawimawnaa an hmang dingin Dekchi bel lien tawk tak a pek bawk.

Agriculture department in a ngaiven
CCPur: Churachandpur district sunga Khawpuibung, Muolbem, Ngurte le Saikawt huom sunga Leilet/tuilo haia Bu hai buhri in nasa taka an suksiet chungthu Chanchinbua zieklanga lo um ta kha Agriculture Department in an ngaiven hle a. Tuta inthawk thawktu henkhatin thil umdan enfelin Department le state sarwkar kuoma report pek an tum niin ei thu dawngna chun a hril.
   
Mipui le loneitu hai harsatna hre a, department in enfel tumna an hung nei hi loneitu hai ta ding chun thil lawmum tak a ni a. An thil hmudan report an pek haia fethlenga sawrkarin loneitu hai sawmdawlna a hung pek ngei nuom a um takzet.
           
Report lakkhawm huna loneitu han bengar insuo a, ha taka an lo thlawp le an harsatna hai chieng le fel taka an lo intlun  thil ha  ni ngei a tih.

Manipur Police Rising Day hmang
CCPur: Zani zingkar 10AM khan SP, CCPur Office, Tuibong hmunah S. David Piaklian, Addl. SP, CCPur inrawinain 125th Manipur Police Rising Day, 2016 hmang a nih. Mr David Piaklian chun hi huna hin Police Flag keipharna a nei. Mr Rakesh Balwal, SP, CCPur chu Imphal­a Manipur Police Rising Day hmang dinga a fe leiin hi huna hin a hang nawh.

MHJU in lawmthu an hril
CCPur:  Manipur Hill Journalists Union (MHJU) ngenna anga Directorate of Information and Public Relations (DIPR), Govt. of Manipur in Zou, Paite, Hmar, Vaiphei, Liangmei le Paomei awnga Nitin Chanchinbu suokhai ta dinga translator sin pakhat seng lak dinga hma a lak mekna chungah MHJU chun Manipur sawrkar chungah lawmthu a hril. Hieng sin lakna haia hin inditsakna, thamna le inditsak bikna um naw sienla, a thiem, a tling le a tlak hai lak ni ngei hai sienla an nuom thu MHJU chun an hril sa bawk.

Block 7 haiah Medical Assessment
CCPur: District Project Office­SSA/RTE, CCPUr chun ALIMCO Guwahati le Centre for Community Initiative (CCI) hai le hangruolin Oct. 21, 2016 a inthawk khin Block Level Assessment Camp buotsai an tih. Oct. 21, 2016, 10AM in Samulamlan Block a Bunglushi  UP School ta, Oct. 22, 2016, 10AM in CCPur block hnuoiah Synod Hall, CCPur;  Nov. 3, 2017, 10AM in Singngat block sunga Singngat Community Hall; Nov. 4, 2016, 10AM in Henglep block hnuia Kukimun JBS; Nov. 7, 2016, 10AM in Thanlon Block sunga Leijangphai H/S le  Nov. 7, 2016, 10AM in Tipaimukh  block sunga Sibapurikhal CC Hall­ah Medical Assessment Camp hi nei ning a tih. Hieng hun haia hin Specialist doctors Chiin Guite, Opthalmologist, Dist. Hospital; Chinggoumuan, Psychiatrist, Dist. Hospital hai bakah ALIMCO a inthawk Orthotis le Audiologist han Disable persons hai en an tih.

Manipur Police Rising day hmang
Imphal: Manipur Police chun zani zingkar khan Manipur Police Parade Ground, Imphal hmunah 125th Manipur Police Rising Day an hmang a, Manipur CM O.Ibobi Singh khuollienin a hang. Ministers, Dy. Speaker, Parliamentary Secretary, MLAs, Chief Secretary, DGP le civil le Police officers dang dang hai khawm an hang. Manipur state ­a law & order ngirhmun chun hat tieng a pan pei a nih tiin CM O.Ibobi Singh chun hi huna thu a hrilnaah a hrilin mipui le an thilnei hai venghimna kawnga Police hai pawimawzie a hril.

ECI Audit team in an hung enfel ding
Imphal:  Manipur Legislative Assembly election, 2017 a hung um ding le inzawma insingsat dan chu Oct. 22­28, 2016 inkar sung khin Election Commission of India (ECI) Audit team in hung  enfel an tih. ECI Audit team hi Manipur state sunga District tin haiah fein polling stations, first level checking of EVMs/EVM storage, BLOs le ALMTS training, SVEEP/NERP etc thawa um ta sa hai enfel an tih.

AMTUC in deadline
Imphal: All Manipur Trade Unions’ Council (AMTUC)  le All Manipur Government Employees’ Organisation (AMGEO) a JAC chun Manipur CM kuoma chartered of Demands 22 an pek hai Oct. 22, 2016   chena  sukpuitling  a ninaw chun nuorna an thaw an ding thu zanikhan an puong.

Framework Agreement an thlawp
Imphal:  Zanikhan UNC huoihawtnain Yaikongpao, Senapati District­ah 1st Conference of the Naga Village Authority nei a nih. Hi Conference a hin thupuong (Declaration) an siem a, an declaration a chun August 31, 2015 a India sawrkar le NSCN(IM) palai han Framework Agreement an ziek chu an thlawp thu an zieklang. Hi Conference hi Nagaland CM, T.R. Zeliang, Nagaland Education Minister Yitachu le Nagaland Rajya Sabha MP K.G. Kenye hai khawma an hung hmangpui. Declaration an siem a hin points 5 a hang a, Framework Agreement an pawmpui le thlawp thu bakah Naga ram (South Nagaland) humhim ding ti le 11th Manipur Legislative Assembly Election hung um dingah NPF candidate­hai thlawp ding tihai a hangsa.

NEC team an hung inzin ding
Imphal: Manipur a ni 3 sung cham dingin North Eastern Council (NEC) team chu vawisun (20­10­2016) hin Imphal hungtlung an tih. NEC team hi Praveen Kumar Hanumant Singh, Adviser, NEC (T&C) le Rajendra Singh, Superintending Engineer, Ministry of DoNER han hung inrawi an tih. NEC (T&C) team hin State PWD official­hai leh October 21 le 22, 2016 haiah Bishnupur­Nungba Road enfel an ta, NEC/DoNER team in Oct. 21, 2016 in Commissioner (works), Govt. of Manipur leh meeting nei an ta, project chi tum tum thawna hai entlangna nei an tih. NEC (T&C) team hin Loktak Lake ngirhmun khawm a hmuna fein enfel an tih. Chun, Oct. 22, 2016 in Moreh ah inzin an ta, Project site­hai en an ta, Oct. 23, 2016 khin Imphal suoksan nawk an tih.

Modi le Suu Kyi han inbiekna an nei; Modi’n Myanmar kuomah power pek a tiem
New delhi: Zanikhan India Prime Minister Narendra Modi le Mynamar State Counsellor Pi Aung San Suu Kyi han Hyderabad House, New Delhi­ah inbiekna an nei. Hi huna hin Power, Agriculture, Banking, Insurance le Security tiengpang haia hangtlang dingin inremna thuthlung an ziek. Chun, rambung pahni huoi­tuhai hin thlai a mu hme thei chi hieng Be, Dailuo, bepui le a dang dang haia insumdawngtuo sa dingin remtina an nei ve ve. Modi le Suu Kyi hai chun ramri zula venghimna sin thawna tiengpang hangruol le uluk a pawimawzie thu khawm an hriltlang.
   
Aung San Suu Kyi chun lekha an chuk laia Delhi khawpui chu a lo umna a ni leia a ngainatzie, India ram chu khawvela Democracy a ro inrelna lien le ropui tak a ni leia a ngaisang zie, India chu tawnhriet hau takel a ni leia an ram chu a harsatna le mamaw thil haiah a hangpui pei a  beisei thu Modi le an titi huna  hin a hril.
           
Narendra Modi chun, Moreh, Chandel District, Manipur (India) a intahwk Myanmar rama Tamu khawpui chu power/electric tamlem pek dingin Suu Kyi hi a tiem. Bihar State a Bodh Gaya hmuna Buddhist temple pahni haia King Mindon le King Bagyidaw hai lim a thil inziek hai chu tuta intahwka hun sawtnawte hnungah Archaeological Survey of India han an ziek hat le an va cheimawi ding thu Modi chun an hohlimtlang huna Suu Kyi kuoma hin a hril.

Assembly Election nei hun ding thuah
New Delhi: India rama States 5­ Manipur, Punjab, Goa, Uttar Pradesh le Uttarakhand haia Election nei hun ding chu Security Forces le Law & Order kengkawtu hai report dungzui bakah sik le sa um dan le school exam hun hai ngaituo saa puong ning a tih tiin Dr Nasim Zaidi, Chief Election Commissioner, ECI chun zanikhan a hril. Chun, Voter­hai tham chu dan kala ngai le hrem thei ning an tih tiin zanita Dr Nasim Zaidi in New Delhi a International Conference on Voter Education neinaah a hril. Assembly election neina ding state haia inbuotsaina tluong taka fepui mek a ni thu, vote nei thei hai a tam thei ang tak electoral roll a zieklut tuma hma lak mek a ni thu a hril bawk.

Thina tuok hai zangnadawmna Rs. 5 seng pek dingin
Bhubaneswar: Odisha Chief Minister Naveen Patnaik chun SUM hospital­a kangmei suok leia thina tuok sungkuo hai kuomah zangnadawmna Rs. 5 lakh seng pek an ni ding thu zanikhan a puong. Hliemna tuok hai khawm an inenkawlnaa sum seng hai sawrkarin a tum pek vawng ding thu (free treatment) Mr Patnaik hin tuta hma khan a lo puong ta bawk a nih.
   
Chun, Institute of Medical Sciences and Sum Hospital enkawltu Siksha O. Anusandhan (SOA) University a Vice Chancellor Amit Banerjee chun thina tuok sungkuo hai zangnadawmna Rs. 5 lakh seng pek  dingin zani hmasa khan a lo pong ta bawk.
           
Hieng laizing hin October 17, 2016 zana Odisha­a SUM Hospital­a kangmei suok leia hliemna tuok enkawl lai mek Janakibla Hui chu zanikhan a thi belsa nawk leiin hi hospital­a kangmei suok leia  mihriem thina tuok chu 21 an tling tah. Kangmei suok a khan mi 100 chuong zetin hliemna an tuok bawk a nih.

Bihar in Intermediate College 68 affiliation a cancelled
Patna: Bihar sawrkar chun Criteria an zui zonaw leiin a state sunga Intermediate colleges 68 hai chu affiliation an nina a cancelled bakah Colleges 19 hai affiliation chu a suspended bawk. Hieng College hai hi Bihar School Examination Board Chairman hlui Lalkeshwar Prasad Singh a ni hun sunga affiliation pek a nih. Mr Lalkeshwar Prasad hi Bihar topper scam a mawphurtu taka intum le tuta Jail­a intang mek a nih. Mr Lalkeshwar Prasad Singh khan Chairman a ni sungin indiklo takin colleges 212 zet affiliation a pek a, tuchena hin colleges 173 hai affiliation chu suspended a ni tah tiin Board Chairman Anand Kishore chun a hril. Hieng college hai hi ni 15 sunga hrilfiena pe dingin show cause notices pek an nih tiin a hril bawk.

VAWISUN THUPUI
Naupanghai, Lalpaa chun in nu le pahai thu zawm ro, chu chu thil indik a ni sih a. “I nu le pa chawimawi rawh,” (Chu chu thupek tiem nei hmasa tak a nih). ­ Ephesi 6:1­2

Editorial: Nuor le nawr hun

Manpur­ah Assembly election a hung hnai a. Chanchinbu, TV le Radio haia khawm election thuin hmun an hluo tam ta bakah Hotel le inhungbumna haia titi tamna tak a hung ni tah. Election tawm hin chu sawrkar, politicians le political party tum tum hai inhawng lai, mipui le mimal thil an ngaipawimaw nuom lai, hat insuo le hminghat an nuom lai a ni leiin thil dit le thil ngen neihai ta ding chun nuor le nawr hun remchang lai tak niin an lang. Thil ngen le dit neihai ta dinga hun remchang a hung inhawng lai hin beipui le beiruol thlak inla umzie a nei ngei ring a um. Hun ha le hun remchang inhawng hun hi a sawt naw ding a ni leiin sawrkar laka dit le ngen nuom neihai ta ding chun nawr le nuor hun chau ni lovin insek hun lai a nih.
   
Manipur a chun chingfel dinga ha em em el, mipui thil (public key issues) iemanzat a um a, chuhai laia an lar zuolhai chu ILPS chungthu, India sawrkar le NSCN(IM) han Framework Agreement an ziek thu, Suspensionof Operation (SoO) chungthu, Manipur Unviersity reservation chungthu, AFSPA hlip ding chungchang, Imphal­Jiribam Road chungthu, ADC­hai 6th Schedule hnuoia sie ding chungthu dam, Sadar Hills le Jiribam Sub­Division han District hran an ngen thu dam, Anti­Tribal Bills chungthu le a dang dang hai an nih.
   
A chunga zieklanga um public issues chi tum tum hai lei hin Manipur mipui han buoina le harsatna tam tak ei tuor pha ta a, chingfel vat a ninaw chun ienganga nasa am harsatna ei la tuok belsa ding ti hi ngaituo tham takel a nih. Election Commission of India in election le inzawma Model Code of Conduct a hung puong hma ngei hin Publi Issues chi tum tum hai chingfel dinga nawrna kawnga hin beipui nasa takin hang thlak nawk inla chu kakhawk le umzie iemani bek a hung nei ring a um.
   
Betsaida dil khawm kha a fawn lai hun a um a, a fawn laia kha tuia inphum hman hai chun damna an chang hlak ti Bible­ah ei hmu. Manipur mipuihai ta dingin tuifawn hun lai a ni a, hi hun sunga ei baw naw chun kum 5 dang liem hnungah tuifawn hi a hung um nawk chau ding a nih. tuifawn hun laia ei baw naw chun a hmaa ei inrimna, ei tuorna, ei tha le zung, sum le pai sengna hai po po kha umzie bovin liem hmang pal a tih ti hi inlau um takel a nih. Ei Bible khawmin thil iengkimin hun a nei thu a mi hril a ni kha. Mipui han a hun lai, a tuifawn hat lai tak hin hma hang la nawk ei tiu. Tuifawn hun laia ei baw naw chun ngaisak lovin ei um nawk ding a nih.
   
Midanghai khawma an nuor a, an nawr a, an hlawtling hlak si chun, nuor le nawr chu a ha hle tina a nih. Suol a ni bawk si naw a, thil thaw thieng a ni si a, a hlawtling pei bawk si chun, lungawinawna nei, dit le ngen nei hai po po chun nuorna le nawrna hi nei vawng el ding a nih. Tulai sana nuorna le nawrna chang hriet chu a var thlak ta em em el a nih ti el ding an tah. A nuor ve lo le a nawr ve naw hai chu an dawk el ding a nih.
           

Ei hriet seng angin ei ram sawrkar le roreltuhai chun nuorna le nawrna nasa tak a um phawt naw chun mipui le pawl chi tum tum hai thil ngen hi an ngaisak ngai meu nawh. Hi leia hi nuorna le nawrna hi a hung tam hle hlak a nih. Nuorna le nawrna neihai hlak chun bandh, general strike, public curfew le economic blockade tihai bak chu a lampui dang ei hriet si naw a, a nuor le nawrna nei taphawtin hmangruo ha takah ei hmang seng el a nih. Kawngkhat ngaituo chun bandh, general strike, total shutdown, public curfew le Economic Blockade hai inumtirtu chu sawrkar a nih ti inla ei hril suol taluo ring a um nawh. Nuor le nawr hi ei dittakpa a ninaw a, nuor le nawr bakah bandh le economic blockade tihai a um nawna ding chun sawrkar a chet vat vat a ul a nih.

Post a Comment

Powered by Blogger.