ATWU hmalaknain nuhmei naupang chunga nunrawngna dodalnain rally nei a nih
Naupang suolluitu 2 hai Oct. 26 chen PS Custody a um dinga rel
CCPUR: Churachandpur district­a tulai hnaia nuhmei naupang kum tlinglo hai chunga nunrawngna le nuhmei naupang pahni suolluina hiel a tlung dodalna le demnain zanikhan All Tribal Women Union, GHQ, CCPur Manipur hmalaknain District Hospital Morgue­a inthawk DC Office chenin lampui hrawna nei a nih. Tulai hnai ela Auto Rickshow Driver in nuhmei naupang 3 thuoihmang a tum hai laia mi 3 hai khawm lampui hrawna (rally) a hin an thang a, ATWU nuhmei le naupang hai chunga nunrawngna chungthua an thil ngen hai inziekna Memorandum SP, CCPur Mr Rakesh Balwal kuoma an pek bakah DC a lo umnaw leiin Addl. DC W. Ibohal Singh kuomah khawm an memorandum hi an pek a, memorandum hai hi thuoihmang tuma um nuhmei naupang pahni han Addl. DC kutah an inhlan a nih.

An memorandum a chun, nuhmei naupang 2 suolluitu mi pahni hai man an nina thua District Administration hmalakna lawmum an ti thu an hril a, tuta man lova la um nuhmei naupang thuoihmang tumtu khawm man vat a ni theina dinga hma la dingin an ngenna thu, tuta hnung hiengang thil a tlung nawk ta ngai nawna dinga dan anga hremna na tak pe dinga an ngenna thu hai an ziek. Addl. DC W.Ibohal Singh chun, mi thuoihmang tumtu Auto driver man a ni theina dinga District Administration level­a theitawpa hma an lak ding thu, le hi thua hin Police tieng khawmin investigation an thaw mek a ni thu a hril.

Hieng laizing hin Oct. 14, 2016 nia Zion Veng, New Lamka hmuna nuhmei naupang kum 10 mi suolluitu G. Thongliansang (37), s/o T. Kamkhanthang of Zion Veng, New Lamka le Oct. 15, 2016 nia Singngat hmuna nuhmei naupang kum 7 mi suolluitua intum Nangmuanlal (23) s/o L. Suangchinkhup of Tangmual, ZRA in an man hnunga Police kuta an peklut hai chu zanikhan Police han Special Judge (POCSO)/CCPur hmaah an inlangtir a, Special Judge (POCSO) chun October 26, 2016 chen (ni 10 sung) Police Custody­a la um phawt dingin a rel.

Nuhmei naupang pahni hai suolluina le inzawm hin Police chun FIR No. 4 (10) 2016 WPS U/S 376 IPC & 4/8 POCSO Act. 2012 le FIR No.5 (10) 2016 WPS­CCP U/S 376 IPC & 4/8 POCSO Act. 2012 an registered a nih.

HAA Annual Conf.­ cum­ talent Show
CCPUR: Hmar Artist Association (HAA) General HQ. Annual Conference­ cum­ Talent Show (Manipur) chu October 22, 2016, 11:00AM khin (L) Mrs Lalhmasuon Memorial Hall, Rengkai Road, CCPur hmuna nei ning a tih. Hi huna hin Pu Z. Solomon, Joint Director, Tribal Research Institute, Manipur khuollienin thang a ta, Pu Y.Shashi Kumar Singh, Project Director, DRDA, CCPur & Promotor, HAA GHQ le Mrs Mary Lalrengpui, Promoter, HAA Gen. HQ hai chu functional President le Guest of Honour in thang an tih.

Compere in Tv. John L. Varte le Nk. Pricilla Lalliensing hai thang an ta, hun hawngna hla ‘Aw Kan Hmarram” mipuiin sak an ta, hun hawng tawngtaina HD Sanga, Exe. Committee in nei a tih. Welcome Address Pu Lalvullien Hmar in nei a ta, Chief Guest, Functional President le Guest of Honour han thuhrilna hun hmang an ta, Rev. Vanlalhlun Traite in hun khar tawngtaina nei a tih.

Hi prog. hmang sung hin Unit tum tum haia inthawk Special no. & talent Show a um bawk ding a nih. Mipui hai chu hi programme uop le hmangpui dingin HAA GHQ chun ngenna le fielna a siem.

ZRA in nuhmei naupang 2 suolluituhai an man
CCPUR: Oct. 14, 2016 khan Zion veng, New Lamka ah nuhmei naupang kum 10 mi suolui a ni a, a suolluitu G. Thongliansang (37), s/o G. Kamkhanthang of Zion Veng, New Lamka chu Oct. 16, 2016 zing dar 8 vel khan ZRA han an man a, Police kutah an pek. Chun, Oct. 15, 2016 khan nuhmei naupang kum 7 mi suollui nawk a ni a, a suolluitu Nangmuanlal (23) s/o L. Suangchinkhup of Tangmual chu Oct. 16, 2016 zan dar 8:10 vel khan ZRA han an man a, zan dar 9:30 velin Police kutah an inhlan. Nangmuanlal hi Indo Tibetan Border Police Personnel nia hril a nih. G. Thongliansang hin nuhmei naupang hi a suollui ngei thu a puong bakah medical test a khawm suollui a nih ti hmu nia hril a nih. Nuhmei naupang kum 7 mi hi nu nei talo a nih.

MUTSU le ATSUM thlawp dingin
CCPUR: ZSF GHQ; KSO­CCPur, HSA Jt. HQ, CCPur; MZP, HQ, Manipur, MUTSU le ATSUM palai han zani sun dar 11:30 khan ZSF GHQ Office, Salem Veng, CCPur­ah joint meeting an nei a. Manipur University reservation thua an thil ngen Oct. 19, 2016 chena sukpuitling a ninaw chun Oct. 19, 2016 zanrila inthawk darkar 24 sung Total Shutdown thaw an tum le nuorna dang dang nei an tum chu thlawp dingin an rel.

Pawl tum tumin an dem thu an puong
CCPUR: HSA CCPur Jt. Hqrts chun Oct. 13, 2016 nia Elcism High Schol student nuhmei naupang pathum thuoihmang tumna le nuhmei kum tlinglo pahni suollui an nina chu nasa taka an dem thu an puong a, law & order enkaitu le District Administratio hai chu CCPur khawpui sunga security sukkhau zuol dingin a ngen. Hiengang bawk hin KSO khawmin hieng thil tlung hai hi an dem thu an puong.

Chun, SSPP GHQ khawmin Oct. 13 nia Auto driver pakhatin naupang pathum thuoihmang a tumna le Oct. 14 le 15, 2016 haia nuhmei naupang pahni suolluia an umna chu nasa taka an dem thu an puong. Hiengang thil a tlung nawk ta ngainawna dinga mitin fimkhur dinga ngenin, naupang tumani harsatna tuok an um chun iengtiklai khawmin SSPP Ph. No. 9615507846 ah inhriettir nghal dingin a ngen.

Manipur­ah Bandh chi tum tum
IMPHAL/CCPUR: The Liangmei Naga Council, Manipur le Rongmei Naga Council, Manipur hai chun vawisun (18/10/2016) zing dar 6 a inthawk Oct. 19, 2016 sun dar 12 chen, darkar 36 sung Liangmei le Rongmei mihai chengna biel sungah bandh an thaw ding thu an puonglang. Hieng hnam pahnihai hin Liangmei le Rongmei hai hi United Naga Council­ah affiliation thaw dingin an ngen a, sukpuitling pek an ninaw leia UNC thil thaw hrim hrim an lo boycott ta hlak niin an hril. Oct. 19, 2016 a Senapati a UNC hmalaknaa “First Conference of the Naga Village Authority of Southern Nagalim” hung um dinga khawm Liangmei le Rongmei hai po po thang lo dingin LNCM le RNCM hai chun thusuok an siem. Chun, ATSUM kh awmin Manipur University reservation chungchangah October 19, 2016 zanrila inthawk darkar 24 sung total shutdown an thaw ding thu, ni 5 sung Tamenglong District National Project sinthawna hai an sukchawl ding thu le economic blockade tan dingin thutlukna ansiem a hril a nih.

Saikawt Sub­Division Demand Committee chun Oct. 19, 2016 zing dar 6 a inthawk zantieng dar 5 chen CCPur town sungah bandh an thaw ding thu an puonglang. Hieng laizing hin Coordination Committee on Fuel Adulteration (CCoFA) chun zani zing dar 6 a inthawk khan hun tiemchin um lovin Nagland ah Oil Tankers le sawrkar motor hai ta dingin bandh an thaw tan. Manipur a Oil Tanker­hai khawm NH­29, Dimapur le Mao Gate inkarah tlan lo dingin an inhriettir.

MPSC Office Complex suksiet
IMPHAL: Manipur Public Service Commission (MPSC) huoihawtnaa Combined Manipur Civil services Examination, 2016 ah thil fel lo a um tia nuorna nei BJYM volunteers pawl chu zanikhan MPSC complex­ah an va lut a, Office thil an va suksiet niin ei thu dawngna chun a hril. Hi thil tlung le inzawm hin Police han BJYM Volunteers 3 an man. Police chu hi thil tlunga hin an van rawl nghal a, volunteer­hai hi an va hnawthmang vawng nghal.

PS 10 le PO 10 hawng belsa
IMPHAL: Zanita Manipur Cabinet meeting chun Manipur ah Police Station thar 10 le Police Outpost thar 10 hawng belsa ding bakah Manipur Pony policy siema um chu pawm dingin an rel niin Manipur sawrkar spokesman le Rural Development & Panchayati Raj Minister M. Okendro Singh in zanita Cabinet meeting zoa Chanchin thar lakhawmtuhai an hmupui huna a hril.

Biren le Francis han BJP an zawm
IMPHAL: N. Biren le Francis Ngajokpa hai chun official in zanikhan BJP an zawm a, BJP Manipur Pradesh Office­ah zanikhan lawmlut nghal an nih. Hi huna hin BJP Natinal Leaders Ram Madhav, Ajay Janwan, NEDA Convenor le Assam Finance Minister Himanta Biswa Sarma, BJP Manipur thuoituhai, K. Bhabananda, Th. Chaoba, Ashnikumar le Premananda hai khawm an thang.

Irom Sharmila in party thar
IMPHAL: Irom Sharmila Chanu chun regional political party thar an din ding hming le an party candidate ding hai laia mi 3 hming vawisun (19­10­2016) hin a puonglang ding thu a puong. Irom Sharmila Chanu chun Manipur Assembly Election hung um dinga hin Khurai A/C le Thoubal A/C haia a ngir ding thu le an party in candidate 20 vel an nei ding thu a hril.

KUFO cadres 2 man an nih
IMPHAL: Oct. 15, 2016 khan Red Shield Division hnuoia Jawalamukhi Battalion, Senapati Brigade han KUFO cadres pahni, Lalminlen Chongloi (23), s/o Lamthang Chongloi of Lhoikhoveng, Motbung le Lenminchon Lhouvum (20) s/o Shamenlen Lhouvum of Lhoikhoveng, Motbung hai chu 9mm Pistol 1, a mu 4, mobile phone 2 le Airtel SIM Cards 2 leh an man a, Police kutah an peklut niin PIB Defence Wing thusuok chun a hril.

Bomb puokah mi 3 an hliem
IMPHAL: Zani zan 7:10PM vel khan Inter­State Bus Terminal Complex, Khuman Lampak, Imphal hmuna bomb hrat rak lo a puok a, naupang pakhat thangin mi 3 in hliemna an tuok. Bomb puoka hliemna tuok pahni hai chu­ Sunita Jajo (20); Chui Chui of Mawai Village of Ukhrul District, Leiyaro (8) of Chingmeirong hai an ni a, Raj Medicity Hospital panpui an nih. Police chu bomb puokna hmuna hin fein thil umdan an enfel.

Law Commission Member Secy. dingin Sanjay Singh
NEW DELHI: President Pranab Mukherjee chun zanikhan Mr Sanjay Singh Member Secretary, Law Commission of India dingin a ruot. August 31, 2018 chen hi sin hi chel a tih. Mr Singh hi Indian Legal Service officer pension, August, 2014 a kha Legislative secretary dinga ruot a nih.

NE helpawl hai tukdawlna dingin hma lak pei ning a tih:HM
CHANDIGARH: Union Home Minsiter Rajnath Singh chun, India hmarsak biela helpawl hai tukdawlna dingin sawrkar thlungpui chun hma la pei a tih tiin zanita Chandigarh hmuna Regional Editors Conference­a thu a hrilnaah a hril. NE biela Myanmar le ramri zulah surgical strike nei a lo nita a. Helpawl thenkhat hai le inremna thuthlung iemanizat ziek a lo nit a leiin NE biela helna nasa takin helna a tlahnuoi thu a hril. Myanmar le Nepal hai le ramria muongna a um zing theina dingin hma lak pei ning a ta, Bangladesh le Myanmar ramri lem chu tangkai taka hmang a ni a. Sienkhawm Pakistan le China ramri ruok chu a khir deu thu a hril bawk. Pawisa lem le damdawi tawlrukna kawngah Myanmar le Bangladesh han tha taka India sawrkar an thlawp thu; Security tiengpanga inpuochana khawm a tha tawk bakah Cyber crime dona tieng khawm sawrkarin theitawk a suo mek a nih tiin Rajnath Singh chun a hril.

VAWISUN THUPUI
Ama ditzawnga remruot ang peia iengkim thawtu tum anga ruot lawk ni tain, amaa bawk chun a ro dinga siem kan nih. ­ Ephesi 1:11

Editorial: Nuhmei naupang pawngsuol

Churachandpur District hi Kristienhai chengna ram el chau ni lovin Kristien ram tia inko thei ei nih ti inla ei hril suol bek bek ring a um nawh. Kristien ram ni si, kristien mizie neka suolna chi tum tum inlang tamna ram an naw mani ding ti theiin a um. Kristien ram, ei ram le ei societya tlung ngai lo dinga ei ringhai khawm a tlung ta rawp el. Ei pi le pu hai huna thil tlung ngai zen zen lo, pawngsuol, inthuoihmang, tuolthat, invau, mi rawk, motor inruk, fakruk, thamna, inhlem, nuhmei naupang suollui, pawngsuol zo hnunga that, zu ngawl invawi, drugs ngawlvawi, sun var laia nuhmei zurui ngam, mani mihriem chanpui zawr ngam, ei khai a tam taluo a, hril seng le ziek seng a ni nawh.

Tulai hin Churachandpur district sungah nuhmei naupang suollui le thuoihmang ri a hung inlang nawk tah. Tuolsung nitin chanchinbu haia ei hmu danin October 14, 2016 khan sun var laiin nuhmei naupang kum 10 mi chau Zion Veng, New Lamka hmuna pawngsuol a ni a. Hi thil tlunga inthawk ni khat khawm a liem that hmain Singngatah nuhnei naupang kum 7 mi pawngsuol a hung ni nawk nghal. Chun, October 13, 2016 khan Elcism School a kai nuhmei naupang pathum Auto Rickshaw Driver pakhatin thuihmang a tum a, sienkhawm nuhmei naupang pathumhai huoisen leiin an suokdawk thei hram. Hieng thil hai hi zan thimtham ni lo, sun var laia tlung vawng an nih.

Hieng thil hai hi hmun kilkhawr, ram pilril, mihriem um nawna hmuna tlung an ninaw a, mihriem umna le tamna hmun haia tlung an nih. Hi thil umzie chu ei ram, ei khawlai, ei veng le ei kawtthler hai hi a him tanaw tina a nih. Hieng a ni lei hin mitin ei fimkhur zuol a, ei kawl le kienga ieng thil am a tlung a ti hi hriet ngei tuma ei nakawr ei daw le ei na ei sit zing a hun ta a nih. A thei chinah nuhmei le naupang mani khata um fal lo a tha awm ie. Police le Security Forces hai mi umpui le veng seng ding hlak ei ninaw a, mani le mani seng inveng fimkhur hi himna umsun ding niin an lang. Ei ring phak lo thil hi a la hungtlung pei ding niin an lang. Hi lei hin inveng le inralring zinga ei um seng nuom a um.

Pawngsuol hi suol rapthlak takel a nih. Suolin taluo a nei ta naw a, numhmei chau pawngsuol an ni ta naw a, pasal ngei khawm nuhmeiin an pawngsuol hlak. Hi thil hi state dang annawleh rambung dang hai chauva tlung a ni tanaw a, ei ram le ei society sunga ngei khawm a tlung ta hlak nia hril a nih. Inzak a um a, a muolpho thlak a, pangzat le titam a um ta khawp el. Inpawngsuolna hi tawngbau chau ni lova a tak taka ei do a hun ta a nih. A hremna khawm sukkhau le sukrik a tul hle. Ei ram sawrkarin hremna dan a siem hi mipui chun tha tawk le khau tawkah ei ngai naw deu niin an lang. Hi lei hin dan siemtuhai hin mi pawngsuoltuhai hremna dan hi ennawnin siemtha hai sienla nuom a um.

Inpawngsuolna case hi chu pi le pu dan annawleh laibng dana rel a, siel le salam inchawitir annawleh inbiekremna nei hi thaa ngaina le hrietna ei nei hlak. Amiruokchu, inbiekrem le inngaidamtuo ei thaw hi a that nawna chin khawm a um. Inbiekrem le inngaidamtuona hin suolna an ngainep tir am a ni aw ti theiin a um hlak. A san chu suol thaw nawk ngamna an tlun hlak leiin. Suol thawtuhai hi na taka hrem ni hlak hai sienla chu suol thaw nawk ngamna hi a hung re ring a um. Sawrkar khawma dan ang taka a hrem ngei ngei ding a nih. Chuong naw chun dan ngainepna hi an umtir hlak niin an lang.

Naupanghai ngaipawimaw zuol an tulzie hi a thar takin hrie seng inla nuom a um. Pasal khawm ni raw seh, nuhmei khawm ni raw seh, naupang chu iem a thaw a, khawlam a um a, iem an hnik zawng a ni a ti hai hi hriepui ding ei nih. Naupang an la ni an nawm tia ngaitha el ding chi an ni nawh. Milien le milal, mi hausa le khawsa thei tak ni inlakhawm ei nauhai an suol si chun khawvelah ei damsung hin inhawitirna, hlimna le lawmna min tlun ngainaw ni a, ei chan chu beidawngna le harsatna a hung ni ding a nih. Pawngsuola um thei ding khawpa nauapng ngaithana lem hi chu sim nghal tawp ding a nih.


Post a Comment

Powered by Blogger.