YLS Silver Jubilee ropui taka hmang a nih
CCPur:  Young Learners’ School (YLS) chun Oct. 8, 2016, 10:30 AM a inthawk khan an School Campus­ah Silver Jubilee lawmna puithu takin an hmang. Hi huna hin Dr Lal Dena, (retd) Professor, Manipur University & Former Senior Fellow Indian Council of Social Science & Research (ICSSR) Chief Guest in a \hang a, Special Guest in Ms Yesudasi, Foundation Year School a \hang a; Kohran \huoitu,  Organisation tum tuma \huoituhai bakah MDCs \henkhat le nu le pa mipui tam takin an uop.
   
Hun hmasa tieng responsive Bible reading and Invocation Rev. Lalrosiem Songate, M.A., M.Th. in a nei a, Plague hawngna Dr Lalzakung F. Tusing, Retd. Additional Director (Health), Govt. of Manipur in a nei a, Placing of Time Capsule Dr Lal Dena, Retd. Professor, Manipur University in a nei bakah Mr Haulienhlu F. Tusing, Chairman, Managing Board, YLS le Mrs Ramsiemzo Tusing, Principal, YLS han Jubilee Tree phunna an nei a, Jubilee darkhuong vuok a ni a, Students han item chi tum tum inentirna an nei bakah prize semna  hun hmang a ni a, Lawmlutna thucha Mr Laldatlien  F. Tusing, Member Managing Board in a nei a, Mrs Ramsiemzo Tusing in  Principal’s adress a hril a, hun tawp \awng\aina Rev. B.L. Sandam, Local pastor, Lamka ICI in a nei.
   
Chief Guest Dr Lal Dena in thu a hrilnaa chun, a kum tam ta sienkhawm inchuklai anga a lan ngai zing thu; a lan chuk zing a, a thi hma khat a lan chuk pei ding thu a hril. Student hai chu san neia lekha inchuk dingin an fui a. Students hai chu an thluok Computer thar hlawk ang a ni thu, a tam thei ang tak thluok hmang dingin an fui. Khawvela scientist inlar takel Albert Einstein khawm kha scientist thawkrim em em el a ni a, zan sawt tak tak chen laboratory­a hun hmang hlak a ni a, chu khawm chun a thluok 25% chau a hmang niin hril a ni a, mi pangngai chin hin ei thluok 10% chau ei hmang niin an hril a, hlawtlingna dingin thawkrimna chau naw chu hlawtlingna kawitan a um naw thu hrilin student hai chu nasa taka thaw dingin an fui.
   
Mrs Ramsiemzo chun YLS in tu ngirhmun a tlung theina le inzawmin Teacher lo nitahai le teacher nimek hai bakah Managing Board members le nu le pa hai chunga lawmthu a hril a. Kum 1991 a students 37 chau uma bul \an nisienkhawm tuhin 1935 students umin staff le support staff 70 an um mek ta a, nasa taka hung in\hanglien peiin tuhin school building extension thaw mek a ni a, hi building­a hin Science laboratory, library, Computer science room, audio visuol room, music room etc. hai a um ding thu le a sawng chung tak chu school auditorium a hmang a ni ding thu a hril bawk.
             
Guest of honuor Ms Yesudasi (foundation year teacher) khawmin thuhrilna hun hmangin hla a sak bawk. Ms Yesudasi hi YLS Anthem phuoktu a ni nghe nghe bawk a nih.

GNM le FHW inchuk nuom hai ta dingin
CCPur: Directorate of Health Services and Directoate of  Family Welfare Services, Govt. of Manipur hnuoia academic session 2016­17 sunga General Nursing & Midwifery (GNM) le Female Health Worker (FHW) inchuk nuom hai ta dingin Application peklut thei hun a nih.  Churachandpur­a Nursing College a dingin GNM 30 le FHW a dingin seat 40 a um. Inhnikna nei han website: www.manipurhealthdirectorate.in ah application download thei le thu chienglem hriet thei ning a tih. Application form hi Oct. 10, 2017 a inthawk Oct. 13, 2016  chenin peklut thei ning a tih.

HMARTOB meeting
CCpur: October 9, 2016 (Sunday) 1:30PM hin Hmar Martyrs’ Trophy Organising Board (HMARTOB) chun Board Meeting a ko a, OB le Advisers hai khawm \hang seng dinga inhriettir le ngên an nih. Meeting neina hmun ding Pu Samson Hrangchal, President HYA Rengkai Branch chengna In a nih.

Lok Adalat le Traffic Court­ah Rs. 31,050/­
CCPur: National Legal Services Authority le Manipur State Legal Services Authority hai enkaina hnuoiah Churachandpur District Legal Services Authority chun zanikhan Chief Judicial Magistrate (CJM) Court hmunah One Day National Lok Adalat le CCPur khawpui sung hmun hran hranah Traffic Mobile Court an buotsai. Traffic Mobile Court thawnaa Motor Vehicle Act bawsietu mi 108 man an ni a, mana um haia inthawk fine Rs. 14,250/­ an hmu. Lok Adalat­a chun case pakhat chau relfel a ni a, hi taka hin Rs. 16,800/­ recovered a ni a, a pahnia belkhawm chu Rs. 31,050/­ a nih.

SDDC inrawinain Public Awareness nei
CCPur: Zani zingkar 7:00AM khan SYC Hall, Saikot­ah Saikot Sub­Division Demand Committee (SDDC) hmalaknain public awareness nei a ni a, hi huna hin mipui 500 chuong an fekhawm. Fekhawm hai lai hin fiela an um angin VA, HSA, HYA, HWA,YMA, MZP, MWA, Val Upa, SDP le SLA hai khawm an \hang. Hi huna mipui fekhawm hai chun SDDC hmalakna full support an pek thu vawi thum an khekpui a; hmatieng peiah SSDC hmalakna an thlawp pei ding thu le inrawntlangna nei zawm pei \ha an ti thu an hril. Thutlukna chu siem a ninaw a, Division sunga khaw tum tum haia Public Awareness neizo a ni huna thutlukna siem chau dinga remti a nih tiin zanita SSDC in thusuok a siema chun an ziek. Sub­Division chungthua Govt. process fe mek chungthu Pu Timothy Z. Zote, Chairman, SSDC­in mipui fekhawm hai hmaah hrilin report a pek. 

SSDC in Sept. 23, 2016 nia Manipur CM le Dy. CM hai kuoma DC, CCPur fethlenga  Memorandum an peka an thil phut hai sukpuitling dinga dateline an siem chu Oct. 15, 2016 a ni a. Hi hun chena an thil ngen sukpuitling pek an ninaw chun Committee hmalaknain Bandh le nuorna chi hran hran an \an ding thu an lo puonglang ta a nih.

Tribal Martyrs hai kuong lem zalna b<k a kang
CCPur:  Zani zingkar dar 3 vel khan Hiangtam Lamka, CCPur­a Tribal Martyrs hai inzana le s<nna programme hmang na hlak Tribal martyrs hai kuong (coffin) lem inzalna chu meiin a kang a, kuong hai le a siena hmun chu a kangsiet vawng a, mipui in\hungkhawmna \hungna le hall chung hai ruok chu a kang nawh. Kangmei suok nasan le ienganga hung kang el am a nih ti hriet a ni nawh.
   
Hi thiltlung le inzawm hin JAC Against Anti­Tribal Bills (JACAATB) chun zanikhan emergency meeting neiin, zantieng 1­6PM inkar sung a dodalnaa bandh thaw dinga an rel angin zani zantieng  dar 1 a inthawk dar 6 chen khan bandh thaw a nih.
   
Police chun hi kangmei suok le inzawm hin FIR No.49 (10) 2016 CCP­PS U/S 435/436/34 IPC an registered bakah SDPO Thanlon le SDPO/CCPur hai inrawinain Police han zanikhan a hmuna fein thil umdan an enfel.

Acts Community in bufai an pek
CCPur: Hun iemanichen liemtaa inthawk natna in a tlakbuok leia tuolsuok thei loa khumbeta zal Mr Lalhmangai of Rengkai chu zani hmasa khan Acts Community pawlin an va kan a. Inkhawmna an neipui zoin an fakfawm dingin \hangpuina thil Bufai iemanizat an pek. Tv. Lalhmangai hi natna leia sin khawm zawng thei talo, a pu putar in a umpui le enkawl a nih.

Congress Party sungah inlungruolnawna a um nawh, Congress zawm nuomhai ta dingin kawt lien taka hawng zing a nih: Gaikhangam
Imphal: First State Level Sub­Junior Swiming Competition, 2016 chu zanikhan Modern College Swimming Pool, Porompat, Imphal East­ah khuollien ni pumin Gaikhangam, Deputy Chief Minister in a hawng.
   
Hi Swimming Competiton hi Modern College Swimming Development Committee in Manipur Swimming Association leh inhrietpawa an huoihawt a nih. Soram Sunil, Mayor, Imphal Municipal Corporation,K. Radhakumar Singh, Commissioner (Revenue, Works, Information & Public Relatins le Dr Laishram Deben, Director, JNIMS hai Guest of Honour in an \hang a, Dr K. Biren Singh, Principal, Modern  College and Chairman, Modern College Development  Committee functional President in an \hang.

Gaikhangam in hi huna thu a hrilnaa chun, tui inhlieu hi Game el chau a ninaw a, health education pakhat a ni bakah hnungzang na ta dinga therapy \ha tak le inthuokna tienga harsatna neihai ta dinga \ha em em el a nih tiin a hril. A hril peinaa chun, Cognress Party sungah inlungruolnawna a um naw a, Congress party a lut nuomhai ta dingin kawt lien taka hawng zing a nih. Nongthombam Biren in Congress party a suoksan hin kakhawk nei naw nih. O.Ibobi Singh CM nina hnuoia Congress MLA­hai inkarah in\hena, inremnawna le lungawinawna a um naw a, inthuruol tak le pumkhatin an um a, tuta hnung chu Congress MLA­hai lai inban le party suoksan um tanaw nihai tiin a hril.

Driver le Peon sin
Imphal:  Directorate of AYUUSH, Govt. of Manipur hnuoiah Contract basis in Driver post 3 le Peon post 4 a ruok. Application form October 10­15, 2016 inkar sungin Directorate of AYUSH, Lamphelpat­ah lak thei le fill up zovin hi Directorate a hin Oct. 13­17, 2016 inkar sungin peklut thei ning a tih.

MLA pahni In an khekkhum
Imphal: Zanikhan JCILPS Women Wing Volunteers han Wangkhei A/C MLA Elangbam Chand le Khurai A/C MLA Ng. Bijoy chengnain hai ILPS le inzawmin an va khekkhum nawk. Volunteers han hieng MLA pahnihai hi ILPS le inzawma bill pasi a ni theina dinga an hmalakna nasa lema thaw dingin an ngen. CM, O.Ibobi Singh chun Bill chungthua hin JCILPS \huoituhai an hmupui tawl a, an ngaidan le dit dan hai a hriltlangpui.

Non­local 36 an man
Imphal: Zani hmasa zan dar 9:30 vel khan JCILPS Volunteers han Non­local  mi 36 an man nawk. Mana um hai hi Kamrup District, Assam mi, Churachandpur a In bawla sin thaw dinga contractor C.C. Kanto in a hung \huoi an nih. NH­2 (Imphal­Dimapur Road) a Sangakpam hmuna an chuongna Winger motor pahni sukchawla an lo man niin ei thu dawngna chun a hril.

Police ASI a thisaa hmu
Imphal: Manipur Police Department hnuoia Assistant Sub­Inspector (ASI) sin thaw lai Helmang Helminlun Gangte, s/o Kaikholal Gangte (36) of Monglianphai, Churachandpur district chu October 7, 2016 khan Royal Lodge, North AOC, Imphal­ah a thisaa hmu a ni a, a ruong RIMS Morgue­ah postmortem thaw zo a ni hnungin a sunghai kutah pek a nih.

HYA Shillong JHQ \huoitu thar
Shillong: Zanikhan Hmar Inpui Meghalaya region inrawinain  kum 2016­18 sunga HYA  Joint Hqrts \huoitu thar ding thlang an ni a. Hi huna hin Branch tina inthawk le Organisation hran hrana inthawk palai an fekhawm. Thlang hai chu­ President: Pu Ramhninglo Inbuon Shillong; Vice President: Pu Khawlien Nampui, Jowai; Secretary: Pu Simeon Sungte, Shillong; Assistant Secy: Pu Lalruotkim Pangamte, Khaddum; Finance Secy: Nk Angelyn Ramneichieng Songate Shillong; Treasurer: Nk MaryJones Lalhmunsiem Buongpui, Shillong; Secy Info&Pub: Pu L Parlien; Secy Arts & Culture: Tv. RC Khawbung le Secy Games & Sports: Tv. Joel Zodinglien hai an nih. Inthlang zo hin intiemkamna inneitir nghal an nih.

Ni 68 zet bu a nghei hnungin a thi
Hyderabad: Andhra Pradesh­a  nuhmei tleirawl kum 13 mi Aradhana an ti chun an  sungkuoin malsawmna an dawng theina dinga ni 68 zet bu a nghei ‘Chaturmas’ a nei hnungin a thi. Rangkachak le incheina thila sumdawngtu a pa Laxmichand Sansadiya chu tulai hnai khan a sumdawngna kawnga nasa takin a tlase a,  Chennai­a um thiempui (priest) pakhatin an inhmangna po po hmu let nawk le  malsawmna/vangneina an dawng theina dingin an naunu chu ‘Chaturmas’ inthawtir dingin thurawn a pek a. An thiempu in a ti angin  Aradhana hin  chawlkar 10 sung  bu ngheia ‘Chaturmas’ a thaw hnungin a bunghei hi Oct. 3, 2016 khan a chawlsan a, Chaturmas hlawtling taka neizo a ni lawmna ‘Paarana’ khawm ursun takin an hmang nghe nghe a, hi huna hin Telangana minister Padma Rao khawm a \hang nia hril a nih.
   
Amiruokchu Aradhana hi a taksa chau taluo (dehydration) leiin inrang takin hospital panpui a ni a, sienkhawm ni tam tak bu a nghei lei hin a Kal pahni hai chu a suksiet vawng leiin damzo lovin a thi ta a nih. Aradhana thina thua hin Child Rights Association chun Police­ah case siemin a nu le pa hai chunga action la dingin an ngen.

VAWISUN THUPUI
Pathien chu buoina Pathien a ni nawh a, inremna Pathien a ni lem sih a. Mi inthieng kohranhai po poa ang hin.
                                                ­ I Korinth 14:33
EditorialNatna hri

Khawvelah natna hri chi tum tum nasa takin an leng a. Hieng natna hri chi tum tum hai laia \henkhat hi chu ei ramah inleng ve dingin ei ring ngai nawh. Amiruokchu, mihriemhai changkangna, hmasawnna, in\hanglienna le hausakna hai leiin rambung tum tuma chenghai chu Vuongna, Rel, motor le Lawng hai hmangin ei infepaw ta zing leiin natna hri inkaisawng thei chi hai chu ei inkaisawng zung zung el ta a nih. Ramsa le vate, thilhring, industry, factory, sik le sa, global warming ei tihai lei khawmin natna hri chi tum tum hai hi a hung suok thar pei bakah; fak le dawn, hawp le hmuom insum zo naw leiin natna hri chi tum tum a hung suok pei bawk niin an lang. Natna hri hi dovin na lo dingin lo inveng hlak inlakhawm ei dang zo tak tak naw a, ei inveng hne naw bawk leiin natna hri suok thar hai khawm hi ei lan vawi ve pei ding a nih.
   
Ieng rak lova ei ngai hritlang natna hri tak ngiel lakah khawm ei inveng hne naw a, a kum tluonin hritlang natna khawm hi ei invawi tawl el ta chu a nih. Ei taksa, ei sil le fen, ei bur le bel, ei puonthuo le ei insung hai sukfai inlakhawm ei in huongsung, ei kawtthler, ei nullah le ei  lamlien hai \awp taka a um sung hin chu hriltlang natna hri el chau ni lovin natna hri dang dang ei invawi zing el ding chu niin an lang. Tulak tak lem hin chu ei  Churachandpur  town sung a \awp zuol a, hriselna ruol an kuo nawh.
   
Thokang, ran, ramsa, bal le \awp leia natna hri hung inleng hlak Dengue, Japanese Encephalitis, Chinkungunya, Malaria,  bird Flu le Swine Flu natna hri hai khawmin ei ram hi an kiengsan thei tanaw a, ei ni lai an cham zing el ta a nih. Churachandpur district ngei khawm khawsik natna hri Malaria le Japanese Encephalitis natna hri han a min kiengsan ta naw a, a natna hri ei invawi chau ni lovin ei thipui ta a nih. Mihriem hringna chen a lak tlat leiin ei ta ding chun hieng natna hrihai khawm hi natna \ium an ni leiin ei inveng fimkhur chu ei thaw ding makmaw a nih. Inveng a pawimaw ang bawkin insukfai a \ul leiin faina tiengpang hi uor zuol thei seng inla nuom a um.
   
Tulai hin khawsik natna hri chikhat Dengue natna hri an leng mek a. Imphal West District huop sunga Thangmeibandbiel huop sungah Dengue natna invawi mi 19 an um ta ti hrietchieng a ni bakah hi natna hri pai ni dinga ringhla kai khawm an la um. Chun, Tamenglong district a khawm Dengue natna invawi mi pahni an um ti hmusuok a ni ta bawk. Hi lei hin tuchena Manipur a Dengue natnahri invawi hmusuoka um chu 21 an tling tah. Hi natna hri invawi ni dinga ringhla \henkhat thisen test dinga hmalak mek a ni a, hienghai lai hin Dengue natna hri pai an la um ngei ring a ni leiin Dengue natna invawi hi an la hung pung belsa ngei ring a um.
   
Dengue natna hri hi kum 2007 khan Chandel district sunga Moreh ah hmusuok \an a ni a, kum 2008 khan Churachandpur district­ah Dengue natna invawi hmusuok a hung ni nawk a, Japanese Encephalitis natna hri hi hung inleng naw nih ti thei a ninaw leiin ei thei dan ang anga Dengue natna hri lakah hin ei lo inveng ve thil\ha ning a tih. Tu kum ngei khawm Japanese Encephalitis natna hri leia thi mi 4/5  lai ei um a ni kha!
           
Ei state sawrkar khawmin dengue, Japanese Encephalitis le Chinkungunya natna hri inleng hi a ngaipawimaw leiin a natna hri hung inlang dan le inenkawl dan ding tuolsung nitin Chanchinbu haia khawm a hung insuo a, advertisement mei mei tia ngaitha el lova tiem ngei ngei hlak ding a nih. Hieng natna hri hai hung inlang dan \henkhat chu, khawsik, mitkho na, taksa na \hem\hum, ru inchuktuona na le kham, vun natna hung inlang hai bakah hnara thisen suok le hani inthi tihai chen an umtir thei. Thokang in se tir lo, Paracetamol fak, Aspirin, Brufen etc hai fak lo ding a nih.


Post a Comment

Powered by Blogger.