Electric Prepaid Counter tamlem a \ul
CCPur:  Manipur State Power Distribution Company Ltd in electric prepaid system a hung hmang china inthawkin khaw tinah prepaid system hmang pei a nih lai zingin electric fee pêkna ding counter New Lamka ah pakhat chauh a um leiin mi an tam thei em em a. Counter dang a \ul hle niin chanchin ei dawng. Customer tamtak chun Central Lamka or Lower Lamka tieng khawm pakhat um sa sienla customer han awlsam lemin electric fee an pek vat vat thei ding a nih, tiin an hril. Prepaid a nia inthawkin veranda sit var ngam khawm an tam ta naw leiin zânah khawlai an thim a, street light inbûk seng a pawimaw thu an hril. Power save a tama chu inhma nekin khawlai an thim tah lem niin an hril bawk.
    
Hieng laizing hin Churachandpur Police station campus­a tuta hmaa electric fee peknaa hmuna hmang hlak, September 1, 2015 a raw sieta um ta chu tulai hin Electricity Department chun a chung rangva inkhum tharin siem\hatna sin an thaw mek a, siem zo a ni hunah hi hmun hi Pre­paid electric fee pekna (Vending strore) a hmang ni dingin Dept. official hai chun an hril.

Tribal Areas sungah darkar 12 bandh
CCPur:  Sept. 30, 2016 a Outer Manipur Tribal Forum (OMTF) le Joint Action Committee Against Anti­Tribal Bills (JACAATB) joint meeting chun October 7, 2016 zing dar 6 a inthawk darkar 12 sung Manipur State a tribal­hai chengna bielah (tribal areas) bandh thaw dingin an rel. Hi bandh hin zantieng dar 6 chen a aw ding a nih. State sawrkarin Bill a draft thar “Non­Local People of Manipur Bill” le Coordinating Body of Scheduled Tribe Demand Committee of Manipur in Scheduled Tribe status an ngen an dodal le ditnaw zie suklangnaa bandh hi thaw an tum niin OMTF le JACAATB joint meeting  thusuok chun a hril.

Oct. 8­ah Lok Adalat le Traffic Mobile Court
CCPur: National Legal Services Authority le Manipur State Legal Service Authority enkainain Churachandpur District Legal Services Authority chun October 8, 2016 khin Chief Judicial Magistrate Court, CCPur hmunah  One Day National Lok  Adalat le CCPur khawpui sung hmun hran hran haiah sun dar 11AM a inthawk  Traffic Mobile Court thawng an tih.
    
Thubuoi dang dang relfel ding nei hai chun October 6, 2016, 12Noon chen khin Chairman/ Secretary, Churachandpur Legal Services Authority, CJM, CCPur kuomah ziekin hnina peklut thei ning a tih.
            
Chun, hi ni 11AM a inthawk hmun hran hran haia Traffic Mobile Court  buotsai a ni huna Traffic Rule and Motor Vehicle Act. bawsetu hai chu man le fine inchawitir pei ning an tih tiin  Secretary, CCPur Dist. Legal Services Authority, CCPur  hun inhriettirna a siem.

HI Hmarbiel Region election
CCPur:  September 28, 2016 nia HKI Office Bearer EAC Office, Parbung meeting huna rel ang le HI HQ in thuneina a pek angin hungtlung ding October 28, 2016 khin HI Hmarbiel Region \huoitu dinghai thlangna nei ning a tih. Vote nei thei ding hai chu Hmarbiel huop sunga Organisation \huoituhai le khuo tina Organisation umhaia Chairman & Secretary hai ning an tih tiin Secy. Inf. & Media, HKI chun inhriettirna a siem a.  

Durga Puja sung silai an kap ding
CCPur: Assam Rifles (AR) hai chun  Oct. 1­12, inkar sung hin Battalion Headquarters­ah Durga Puja an hmang ding a ni a, hi le inzawm hin Assam Rifles sipai hai chun Battallion Hqrts. Headquarter veng­ah silai an kappuok hlak ding a ni a, hi le inzawm hin mipui hai chu lo chiai lo dingin  CO chun inhriettirna a siem.

Tleirawl pakhat an vuok hliem
CCPur: Oct. 2, 2016 zan dar 7 vel khan Tv. Isaac Nungate s/o Lalfellien Nungate of Sielmat, CCPur chu Bata store tuol, Tiddim Road lai pasal hawn khatin an vuok hrawn a, Sielmat khuo a tlung hnungin khaw hre lova a tluk leiin inrang takin Sielmat Hospital panpui a ni a. Sienkhawm a hnungin  District Hospital panpui nawk a ni a. District Hospital­a doctor han an enkai hnungin Imphal tieng enkawl dinga tir (refer) a nih. Zanikhan CT Scan le MRI hai lak a ni a, CT Scan result dungzui chun   a bek lai a luru a kak met  nia hril a nih. Tuhin Shija Hospital, Imphal­ah enkawl mek a nih.
     
A vawtu hai hi Mualveng (Hiangtam Lamka) tlangval hai nia hriet an ni a, hi le inzawm hin   Pathienni zan dar 11 hnung khan mi vawtu sunghai le hnam \huoitu han inbiekna an nei a, sienkhawm inbiekremna iengkhawm a um theinaw leiin zanikhan inbiekna nei nawk a ni  a. Chu taka chun, Hospital­a inenkawlna dingin kutthlaktu han  Rs. 1 lakh zani zantieng 3PM chen khan an hung pek ding tia an rel angin pawisa hi zani zantieng khan hung pek a nih.  Vuok hliema um pa ngirhmun a la chiengkuongnaw bawk leiin inbiekremna le thutawp ruok chu siem a la ninaw niin ei thu dawngna chun a hril.
            
Mi vawtuhai \awngkam hmangah Hnam hming hmerna um nia hril leiin hnam \huoituhai chun an ngaimaw hle leiin inbiekremna hi a la zuk um el theinaw nia hril a ni a, sienkhawm inremna a hung um vat thei ngei beisei a nih.

Social Welfare­ah welfare scheme hran hran
CCPur: District Social Welfare Office (DSWO), CCPur a chun kum 2016­17 sunga dingin piengphunga ruolbanlo (disable) hai ta dingin Welfare scheme hran hran hni thei a nih. Welfare scheme hni thei hai chu Scholarship, Financial Assistance, Un employment Allowance, disabilities  registered organisation/Assn. etc. hai ta dingin Grant­in­Aid hai an nih. October 5, 2016 a inthawk   disability cartificate chawiin Social Welfare Office­ah application form lak thei ning a ta, fill up zoin October 15, 2016 chenin DSWO Office­ah peklut thei ning a tih tiin DSWO, CCPur chun inhriettirna a siem. Tuta unemployment Allowance beneficiaries hai khawm apply dinga inhriettir le a hnunga sawisel thei a ni tanaw ding thu DSWO thusuok chun a hril.

Inbieknaa \hang dingin Aizawl pan an tih
CCPur:  Mizoram sawrkar le HPC(D) palai hai chun October 5, 2016 hin State Guest House, Chaltlang, Aizawl­ah inbiekna a thawkhnina sunzawm nawk an tih. Hi inbieknaa hin  HPC(D) aiaw­a \hang ding hai chu Pu Malsawm Darngawn; Pu Thangliensung le Lalthlamuana Hmar; Pu  Lal\halien;  Dr John Pulamte le  Pu David Buhril hai ning an ta, Mizoram sawrkar tieng chu inbiekna hmasaa mi hai bawk kha \hang nawk an tih. Manipur­a inthawk hi inbieknaa \hang ding  hai chun vawisun hin CCPur/Imphal suoksanin  Aizawl pan an tih.

Hmun tum tuma HSA Day hmang; ditsakna an inhlan
CCPur: Hmar Students’ Association (HSA) chun October 3, 2016 (zani) kha HSA kum 77 a tlingna le inzawmin India rama state hran hran haia HSA umna haiah HSA Day hmangin hmun \henkhat haiah zingkar huna HSA Flag keipharna an nei.
     
Hmar Inpui President Pu Joseph Lalrothang chun HSA in Pathien \huoina zara kum 77­na zet hmang theia an umna thuah  lawmum a ti thu hrilin hmun tin le ram tina  HSA Day hmangtuhai popo hlawk taka hmang dingin Hmar Inpui GHQ  aiawin ditsakna an hlan.
            
HSA GHQ President Pu Rothanglien Khawbung khawmin HSA Day Chibai a buk a, HSA Day le inzawm hin JHQ tin, Branch tin le Unit tin hai chu Pathien tieng tlulut nawk dinga \awng\aina hun hmang seng dingin a ngen. “Sinin, Hrilin, Sanin, |huoiin – Serve the Nation” ti changchawia ei umna hmun senga ei insung, ei khawtlang ei ram le hnam suk mawitu le suk vultu ni seng dingin ditsakna insangtak an hlan.

ECI a inthawk TC Kom a hung ding
CCPur:  Election Commission of India (ECI), New Delhi­a inthawk Under Secretary, Regulatory Audit Division T.C. Kom chu Oct. 4&5, 2016 hin Churachandpur­ah a hung inzin ding a ni a. Hi le inzawm hin Mr Lunminthang Haokip, IAS, DEO/DC, CCPur chun Mr Shashi Kumar, PO/DRDA  CCPur District chu a cham sunga lo dawngsawngtu Liaison Officer dingin a ruot a. Oct. 4, 2016, 2:00PM hin ECI team hi Imphal hmuna lo va tuok dingin an hriettir bawk.

Oct. 9­ah HMARTOB meeting ko
CCPur:  Hungtlung ding October 9, 2016, 1:30PM khin Hmar Martyrs’ Trophy Organising Board (HMARTOB) Board meeting Pu Samson Hrangchal, President, HYA Rengkai Branch chengnain­a nei dingin ko a nih. Meeting huna hin OB le Advisers hai chu kim taka \hang seng dinga inhriettir an nih.
Prepaid 1300 activate tah
CCPur: Electricity Department, CCPur chun October 3, 2016 chen khan CCPur khawpui sungah pre­paid metre box 1,500 an inbuk ta a, hi laia 1,300 an activate ta bawk. Tuibong area­a chun P. Kamdouveng chen  zo a nitah.

Tuibong­ah Chavang Kut 2016
CCPur:  October 31, 2016 le November 1, 2016 hai khin  Peace Ground, Tuibong, CCPur, Manipur hmunah“Bigger, Better, Stronger” ti thupuia hmangin Chavang Kut 2016 (Celebration of Brotherhood) hmang ning a tih. Hi Kut hmangna dinga Celebration Committee Chairman chu Dr Chinkholal Thangsing niin,  George Guite le  Samuel Haokip hai chu Secretary le Treasurer an nih.  Anni baka hin Sub­committee members 70 umna ruot an ni thu Chavang Kut Committee 2016 in thusuok an siema chun an zieklang.

Inspection an zo hnungin an kir nawk tah
CCPur:  Ministry of Rural Development  a inthawk  Dr Ambuj Mahopatra inrawinaa National Level Monitoring Team mi 5  CCPur district­a Central Sponsored scheme hnuoia sinthawna hai inspection thaw dinga hung hai chu an sin ding an thaw zo hnungin zanikhan CCPur suoksanin Delhi an pan nawk tah. Monitoring team hin Sept. 29, 2016 a inthawk Block tum tum haia khuo 10 haia  Central schemes hieng­ MGNREGS,IAY, IWMP, PMGSY, NSAP(Social Welfare) le NRDWP(drinking water) sinthawna hai an enfel a, an thil hmu dan tuolsungah iengkhawm report an peknaw leiin hrietna ei nei nawh. Monitoring team in inspection an thaw hai chun Thanlon block­ah khuo 4, Henglep Block­ah khuo 3 le Tuibong blockh­ah khuo 3 an nih.

Sawrkar thlungpuiin iem a thaw ti le State sawrkarin iem a thaw suol tihai la puonglang ning a tih: Prakash Javadekar
Imphal:  Sawrkar thlungpuiin iem a thaw ti le State sarwkarin iem a thaw suola tihai chu hun la hungtlung dingah sawrkar thlungpuiin la puonglang a tih tiin Union Human Resource Development Minister  Prakash Javadekar in zanita BJP Manipur Pradesh Office, Nityapat Chuthek, Imphal a Press Conference huna a hril. Sarwkar thar siem hun a ni a, sawrkar thar vote neihai siem ding a ni a, sawrkar thar (BJP sawrkar) a hung sawrkar ngei ka beisei. BJP an sawrkar phawt chun an thutiem hai sukpuitling vawng an tih. Sawrkar thlungpui  hmalakna lein Manipur­ah LPG harsatna a hung inkieng tah. A hmaa LPG bur khat Rs. 2,000/­ a inchawk hlak kha a um tanaw a, LPG thuah chun mipui an hadam tah. National Food Security Act hnuoiah bufai kg. 1 ah Rs. 2 a pek \an a ni ta a, sienkhawm \ha takin state sawrkarin a la sukpuitling zo naw a nih tiin Javadekar chun a hril.
    
Javadekar in a hril peinaa chun, RUSA hnuoiah Manipur­a Higher Technical Education dawmsang ning a tih. Hi thila ding hin fund khawm a um sa a nih tiin a hril. Imphal­Jiribam Road le NSCN(IM) pawlin Ceasefire ground rule an bawsiet ti thu haia Chanchinbumi han indawnna an siem hai ruok chu Javadekar hin a pehel zawngin a dawn. Imphal­Jiribam Road thua chau tender insuo a ni ta thu a hril. Terrorism chungthua sawrkar hmalak dan hai a hrillang a. Pakistan in terrorist­hai hmanga India sukbuoi a tumna chu PM Modi hmalaknain hnesaw taka hneban a nih tiin a hril.
            
Javadekar le Prahlad Singh Patel hai chun zanikhan Imphal Hotel­ah BJP Manipur \huoituhai an inhmupui a, Manipur Assembly Election hung um dinga an hmalak dan dinghai an hriltlangpui. Javadekar hi October 2, 2016 a Imphal hungtlung a ni a, zani chawhnungtieng khan Imphal suoksanin New Delhi a pan nawk tah.

1­Day Knowledge and Experience Exchange prog. hmang
Imphal/CCPur: October 1, 2016 khan Springfield School, Wangkhei, Imphal hmunah 1­day knowledge and experience exchange in teaching and child foundation of Springfield Infant School, Imphal & Arcadia School, CCPur ti prog. hlawtling taka hmang a ni a; Springfield le Arcadia Schools haia inthawk hotu 30 vel bakah midang dang \hahnem tak an \hang.
    
Hi huna hin  Khuol\ha Pi Selina Thounaojam le Pi Gabriella Golmei  han thu \ha tak tak an hrill.
    
Pi Gabriella Golmei, Member, Manipur Commission for Protection of Child Rights chun India danpui naupang ta dinga induong bik hieng “Protection of Children from Sexual Offences Act (POCSO Act) 2012”, “Right to Education”, “Juvenile Justice Act” le a dang dang hai pawimaw zie le nu le pa, mipuiin hriet a \ul zie hai a hril.
   
Pi Selina Thounaojam, SDO, Porompat khawmin naupang hai chan ding Sawrkar pa’n scheme le program dang dang a siem hai ngaiven thei a ni zie hai a hrila. Private schools hai ta dingin sum le pai seminar le program neu neu huoihawtna ding tamtak a um thu hrilin, ama ngei khawm iengtiklai khawma a thei dan dan a Springfield le Arcadia school hai \hangpui an huom thu a hril.
    
Pu Santosh, Principal, Springfield School le Pi Debori, Headmistress, Arcadia School han naupang enkawlna kawng le subject inchuktir dan hai an experience hlu tak tak le \ha tak tak hrilna an nei bawk.
    
Hohlimna \huoitu Dr. Asha Sougaijam, Dr. Thuanchuiliu Dangmei, Dr. Immanuel Zarzosang Varte, Mr. Seiminlun Chongloi haiin subject dang dang hieng Classroom Teaching Versus Tuition Culture, Teacher­Student Relationship hai hnesaw taka hrilin Arcadia School le Springfield School hotuhai an school naupang hai an inchuktir dan, an syllabus hai le naupang duot tak le hmangai taka \huoihruoi dan lam hriltlang le inhrilhriettuona hun nei a nih.
            
A tawp taka Dr. Immanuel Zarzosang Varte in hohlimna le khaikhawmna neiin hun tawng khawplo taka khar a nih.

Dengue natna invawi mi 4
Imphal: Thangmeiband Purel Leikai area sungah Dengue natna invawi mi 4 hmusuok a nih tiin Dr Shashikumar, District Malaria Officer, Imphal West chun a hril. Dengue natna invawi hmusuok leia \ithawng le inlau ding a ninaw thu Dr Shashikumar chun a hril. Hiengang natna invawi hai chu JNIMS le RIMS haiah a thlawna enkawl an nih tiin a hril bawk.

A ruolin Casual leave
Imphal: RIMS, Imphal hnuoia Contract Basis a thawktuhai chun vawisuna inthawk Oct. 6, 2016 chen khin a ruola Casual Leave an lak ding thu an hril. RIMS, Imphal hnuoia hin Contract basis a thawk mi 245 an um a, an sin suknghet dinga ngennaa mass Casual leave  hi lak an tum niin an hril.

Moreh ah bomb a puok
Imphal: Zani hmasa zan dar 7:50 vel khan Moreh a Muslim Nagar an ti hmuna bomb a puok a,  mihriem thi le hliem ruok chu an um nawh. Bomb hi tu pawl sukpuok am ti hriet a ni nawh.

Rural Media Workshop hun ding sawn
Imphal: Press Information Bureau (PIB), Imphal huoihawtna le Ministry of I&B sponsored­naa October 6, 2016 nia Manipur Pres Club, Majorkhul, Imphal hmuna Rural Media Workshop nei dinga ti chu October 26, 2016 nia nei lem dinga sawn a nih tiin  PIB, Govt. of India, Imphal thusuok chun a hril. Hi workshop­a \hang dinga Director General, PIB, New Delhi in approved a thaw hai hming list chu PIB, Imphal, Babupara, Opposite M/R Main Gate­ah en thei dinga tar a nih.

Nitish in  Bihar Student  Credit Card Scheme
Patna: Bihar Chief Minister Nitish Kumar chun zani hmasa khan Bihar student Credit Card Scheme a hawng. Hi baka hin Mr Nitish Kumar chun Mukhyamantri Nischay Self­help Allowance Scheme le Skilled Youth Programme hai khawm a hawng bawk.
    
Hi huna Nitish Kumar in thu a hrilnaa chun, PM Narendra Modi chu Lok Sabha le State Assembly election campaign huna mipui kuoma thutiem a nei hai theinghil le sukpuitling zo lovin an tum a.  Bihar­a Grand Alliance sawrkar ruok chun mipui hai kuoma thu a lo tiem hai a dawt dawtin a hung sukpuitling pei a nih tiin a hril.  Nitish Kumar hin district 38 haia District Registration­cum­counselling Centre (DRCC) remote hmangin a hawng bawk.

Nitish Katara thina thuah kum 25 jail intang dingin
New Delhi: Kum 2002­a  business executive Nitish Katara that a nina le inzawmin pasal pahni Vikash Yadav le  Vishal Yadav hai chu zanikhan Supreme Court in kum 25 sung jail intang dingin an chungthu a rel bakah hi thina thua inrawlna nei vea intum Sukhdev Pehalwan chu kum 20 sung jail intang dinga a chungthu rel a ni bawk. Vikash Yadav hi criminal politician DP Yadav naupa a nih. Nitish Katara kha February 17, 2002 nia Ghaziabad­a molawmna hmuna inthawk \huoihmanga an that a nih. Mr Vikash Yadav farnu Bharti le Katara hai hi an inngaizawng a, hi thil hi an ditnaw leia  Katara kha \huoihmanga an that a nih. 

VAWISUN THUPUI
Tukhawm Dan nei loa thil suksuol chu Dan boin  bohmang a ta; chun, tukhawm Dan nei zinga suksuol chu, Dana relpekin um a tih.         ­ Rom 2:12

Editorial: Kum upahai inza thiem

October 1, 2016 khan khawvel pumpuiah “International Day of Older persons” hmang a nih. Hi ni  hin mithiem le tawnhriet hau hai chun mi upa hai inza thiem an \ulzie, duot taka enkawl an ngai thu le ngaipawimaw an \ulzie hai thiem takin an hril tawl. Mi upahai hi United Nations Organisation (UNO) khawmin a ngaipawimaw hle leiin October 1, 1991 a UN General Assembly chun kum tin  October 1 chu khawvel pumpui huopa Upahai Ni (International Day of Older Persons) a hmang dingin a lo rel a nih. India sawrkar khawmin mi upahai hi a ngaipawimaw a, tarhai ta dingin Scheme chi tum tum an duong a, chu hailai chun old Aged Home, Day Care Centre le Old Age Pension scheme hai a \hangsa.
    
Ei state Manipur a chun Old Age Pension scheme hi ei hrietlar tak a, a dawngtu khawm ei \hahnem ta hle. Tuchena Manipur­a Tar pension sum hmu hi 68160 an tling tiin Manipur Social Welfare  Minister AK Mirabai chun Community Hall, Patsoi Part­II, Imphal West­a International DAy of Older Persons, 2016 hmangna huna a hril. Chun, Manipur ah Old Aged Home khawm 20 lai zet a umin a hril a, hienghai lai hin Churachandpur District a khawm pahni a um tiin a hril. Mi upa annawleh tar enkawltu ding \ha  nei lo hai ta ding chun Old Aged Home hi ngaiven chi ning a tih.
    
Ei Bible a chun mihriem dam chen ding kum zat, siemtu Pathienin a bitukna thu hi hmun khatah chau ei hmu a, chu chu Mosie lekhabu pakhatna, Genesis 6:3 ah a ni a, hiengang hin felfai takin an ziek; “Lalpa chun,  mihriem hi an dam kumkhuo ka remti nawh a, an tisa mi em el, kum 120 ruok chu dam tlung rawhai seh,” tiin. A tir chun Pathienin ama angpuia a siem mihriem kha dam kumkhuo el ding a nizie ei hmu a; sienkhawm siemtu thupek an bawsiet lei khan ansedawng an hung ni ta a; sin inrimna dam, natna dam, thina chenin an hmasuon a lo \ul ta a nih.
    
Hieng sa sa khawm hin mihriem hmasa hai kha an damsawt thei hle. Entirna dingin Adam ngei khawm kum 930 lai zet a dam a, Bible a mi damsawt taka ei hmu Mathusel  kha kum 960 a dam a, khang hun laia mi fel umsun Nova kha hi thu Genesis 6:1­3 a hril lai vel huna khan kum 500 vel mi a ni a, mihriem suolna kha a pung nasa  pei lei khan an damsawt chun  siemtu Pathien lungril an sukna sawt ting el ding a ni leiin Pathien chun tuta hma anga damsawt tlakah ruot le ngai lovin kum 120 chen chau dam thei dingin a ti ta a nih ti ei hmu a, sukdanglam nawk a nina ei hmu nawh. Amiruokchu, Mosie \awng\aina bawk Sam 9:10 ah chun mihriem damsung chu kum 70/80 a mani chau a ni thu ei hmu nawk lawi si a nih.
    
Zohnathlakhai lai khawm kum 100 le a chungtieng dam khawm tuhin an la um nia hril a ni a, kum 80/90 dam lem chu ei tam ve hle. Khawvel lien lem ei thlir khawmin kum 100 le a chungtieng mi tling ta, dam le hrisel taka um khawm an bo bik nawh. Damsawt ding hin chu vangnei le hrisel a ngai a, mi hrisel ni ding chun kawng iengkimah insum thei a ngai a, a bik takin fak le dawn, hawp le hmuom haiah a ngai zuol bik.

            
Hnam var le changkang taphawtin upa le naupanghai an ngaisangin an enkawl \ha a, hnam mawl ruok chun an ngainep a, an ngaisak ngai der nawh. China thuvar chun, “Tar kawlhai chu rangkachak tlang kawl an nih” an lo ti hiel a nih. Vawisuna nang le kei tuta ngirhmuna ei um theina chu ei nu le pahai, mi upahai ei ta dinga an lo inpumpekna lei a nih. Mi upahai tawnhriet a inthawka ei hmu, varna le remhrietna hai hi ram le hnam ta dinga hmang \angkai a ni theina dingin sawrkar roreltuhai khawmin an kuoma inthawk thurawn anlak rawp hlak. Hi lei hin kum tienga upahai hi ngaisang a, ei inza thiem pei a \ul a nih.



Post a Comment

Powered by Blogger.