-from LRS Puruolte, Spl. Correspondent, HT Daily

CCPUR: Hun iemani chen kawng hran hran a hmalak a ni hnungin HSA Platinum Jubilee lawmna Dt. 13th Dec. 2014 a Ngurte khuo, Churachandpur a nei a ni tuma Khuollien, Manipur CM Pu O. Ibobi Singh in a thuhrilna ah sawtnawte ah Saikot TD Block chu SDO level a hlangkai a ni ding thu a lo puong tah chu Saikot Sub-Division Demand Committee (SSDC) le a thlawptuhai hmalakna zarin Manipur sawrkar a inthawkin Sept. 17, 2016 khan Saikot TD Block chu SDO level a hlangkaina ding, Saikot SDO Gazette Order chu Collection Team haiin Imphal a la suokin, hi lekha lawmna chu hi ni vek hin Saikot Sub-Division in a huom ding biel le khawsung mipui haiin Saikot Youth Club (SYC) Hall ah fekhawmin chawhnung dar 2:20 pm khan puithu takin hunser SSDC inrawinain an hmang. Hi hma hin M. Ramthar/Khawmawi hmun ah lawmna program nei a ni a. M. Ramthar/Khawmawi, Thingchom, Saidan khuo haia inthawk lal le mipuihaiin an lo tuok a, 1st session program tawite hmang a nih. Chu zoin SYC Hall, Saikot hmun ah 2nd Session vantlang lawmna programme puithu taka hmang a nih.


Hieng Saikot SDO Gazette Order Collection Team hai hi mipuiin an lo lawm hle a, HYA Saikot Branch, Manmasi Section khawmin Saikot khuo an lutin Hmar Ngotekher rawnga cheimawi pat parthi an lo inawrtir. SYC Hall a vantlang lawmna programme hi Khuo tum tum a Chief/VA hai; Pu Joseph Lalrothang President,Pu Francis Songate Gen. Secy., Tv. LRS Puruolte Jt. Secy., (Info & Media), Hmar Inpui, GHQ (Hmar Supreme House); Pu B. Dongzalian Chairman, Zomi Council le Upa K. Lalrinliana President, Mizo People Convention hai khawmin an uop.

Pu Joseph Lalrothang, President, HI GHQ chun a thuhrilna a chun lawmna chibai bukin Sub-Division thar hlawk lawmna inkhawma thang theia a umnaah lawmthu a hril a, SSDC hai le mi hran hran bei tang tangna leia hung hlawtling thei a ni thu le lawmum a ti thu hai a hril a, khuo 30 laia um mipui hai chu hi Sub-Division hung um ding hi a puitling le a function ngeina dingin thangruola hma la tlang dingin a fiel. A hril peinaa chun Manipur ah Sub-Division mumal lo a tam thu hai hrilin, a hrilsiet zawng niloin ADC Pherzawl khawm function lo a la ni thu le Saikot Sub-Division chu a hung hlawtling ngei a nuom thu hai a hril a. SDO khawm IAS Probationary amani MCS qualify deu nihai sienla a nuom thu le Saikot Sub-Division a hung thawk haiin a biel mipuihai an inza a ngai ve thu hai a hril bawk. SSDC hai kuomah lawmpuina thilpekin Rs. 5,000/- a thuhril zoin a'nhlan. Bieltu MDC Pu Lalhrillien khawmin hi huna hin a'nzin lai a ni leiin thang thei naw sienla khawm SSDC Rs. 5,000/- a hung pek bawk.

Pu B. Dongzalian, Chairman, ZC chun Saikot chu Assembly Constituency hming a neitu tak nisi, hun sawttak kum 5 lai deu thaw ama hminga Sub-Division neiloa a um, tuta a hung nei ta chu a lawmpui thu a hril a. Hi biel sunga hnam tum tum hai chu harsatna kara inpumkhatna hung neia, kawng tum tum haia hmasawnna Saikot Sub-Division hin hung intlun dingin a nuom thu hai a hril. Saikot hming ziek dan thu ah 'Saikawt' ti le 'Saikot' ti thu a khawm nakie peia ziek dan ding tak fumkhur a ngai zie hai a hrillangsa bawk.

Upa K. Lalrinliana, President, MPC chun Gazette Collection ringawta function ei nei hi a hrie naw tading chun nuizat a um el thei. Mi dang chun hiengang tak hin an fight naw a, eini chun thei patawpin hma ei lak a, chu leia Saikot Sub-Division hi hung hlawtling a nih tiin a hril. Saikot Sub-Division demand khuo 30 hai hi tuia tla ang a niin ka ngaia, tuta mi nilo khuo dang hung thang ve nuom hai hi vakama inthawkin ei la laksuok ding a nih. Objection mi pe theitu tam tak an um laiin, objection um lo a ei dit ei hmu thei hi lawm a um, Imphal East angin CCPur lai khawm East tienga DC Office chen a la hung um ve thei le harsatna ei tuok hai la sukkieng a la hung ni ngei a beisei thuhai a hril bawk.

Hi Saikot SDO Gazette Order hi Rev. & Dr. Lalnghakthang Khawbung, Gen. Secy., RPC (NEI) in tawngtaina'n Pathien kuoma lawm thuhrilna le inhlanna a nei a, SSDC in Pastor hai hi Saikot Sub-Division piengna dinga hin a ngaina zie suklangnain hi lekha a hin a hming an ziek tir a. Hi a copy hi nakie tieng SDO Office a la siethat ni dingin Chairman, SSDC chun a hril.

Saikot Sub-Division in a huom ding khuo 30 hai chu- 1. Bena Zou Khoken, 2. Bohlui, 3. Dumsaumual, 4. G. Tongjang, 5. Hmuntha, 6. Khopuibung (5 Hamlets/Khawper)- (a) S. Moljol, (b) K. Bungjang, (c) G. Jangnom, (d) H. Khonomphai, (e) Tuileluan; 7. Khuangnung, 8. M. Shimuol, 9. Misao Lhahvom (2 Hmalets/Khawper)- (a) Vengnuomphai, (b) Tuikhamphai; 10. Muolbem, 11. Mualkot, 12. Mualpi, 13. Mualsan, 14. Muolvaiphei, 15. Ngurte, 16. Saidan (1 Hamlet/Khawper)- (a) NS Khojamphai; 17. Saikot, 18. Saikul (2 Hamlets/Khawper)- (a) TM Monaphai, (b) LS Kongjang; 19. Saipum, 20. Sehken (1 Hamlet/Khawper)- (a) M. Saljang; 21. Sumtukphai, 22. Thenmuol, 23. Thingchom, 24. Tolyang Kuki (T. Lhangnom), 25. Tuaitengphai, 26. Tuibul, 27. Tuikham, 28. Tuikham Daijang, 29. Tuithapi, 30. Valpakot (1 hamlet/Khawper)- (a) M. Saheiphai hai an nih.

Lawmna hunpui tak SYC Hall, Saikot a hmangna huna hin Pu John B. Infimate, Asst. Secy, SSDC in hun a keithuoia, Asst. Prof. David L. Lungtau, Execu-Member, SSDC in Welcome Address hun a hmanga, Introductory Speech Pu R. Lalkaisanga, Secy., SSDC in a nei a, Sawrkar tienga hi Saikot Sub-Division a hung puitlingna dinga hmalakna hai chipchiertakin hrilna hun Pu Timothy Z. Zote, Chairman, SSDC in a nei a, Finance Report Pu Thangrohlun, Treasurer, SSDC in a nei a, VA Saikot le Adviser, SSDC a inthawk thuhril tawi ngaithlak a ni a, Vote of Thanks Pu Samuel Darngawn, Vice Chairman, SSDC in a nei a, Hunkhar tawngtaina chu Capt. Laldinmawii, CO, The Salvation Army, Saikot Corps in a nei bawk.

Chun, Hmar Artiste Assn. GHQ a Gen. Secy., le SYC Secy. Tv. Joseph M. Pakhuongte in Pathien inpakna hla-" Ama kutin a mi thuoi pei" ti hlain mipui an awia, mipui na a tlai hle. Hi Saikot Sub-Division ngenna le inzawma Bandh huoihawt a a um hun le hmalakna kawng tum tum haia lo thlawptu hai chungah SSDC chun lawmthu an hril a. An hming hmer seng lo a ni zing laiin mipui le khuo lal/VA hai baka bieltu MLA, MDC, mimal le mi tum tum sum, motor le thil dang dang haia a thangpuituhai, organisation Thingkangphai YC, ZSF, KSO, HSA le organisation tum tum, hnam tum tum a Inpui thuoituhai chunga nasataka an lawmthu hrilin hmatienga hai thangtlang pei dingin an ngen bawk. SSDC hi 13th Nov. 2011 12:30 pm a kha SYC Hall, Saikot ah mi rawnkai le inhnikna nei hai Pu Timothy Z. Zote Convenor nina hnuoia le Saikot lal le TD Block Chief Assn. Chairman remtina a indin tan a nih. Kum 4/5 deu thaw hi Saikot Sub-Division umna ding hin hma lak a nih. A biel mipui chun hienganga Sub-Division a hung ni chun sawrkara an lekha pawimaw patta le certificate chi hran hran hai ni leh awlsam taka an tuolzawl a an siem thei ta ding chu an lawm thu hahipin an lo hril lawk a nih.

Post a Comment

Powered by Blogger.