Aizawl, 15 September, 2016 Virthli (ONP): Mizorama selkaltu pawl lientak Mizo National Front (MNF) chun vawisun chawhma dar 11 khan Aizawl ah zu zawr dodalna inentirn’n lam hrawna a huoihawt. Aizawl baka zu zawr dodalna lamhraw hi Mizoram district headquarters a hai khawm nei a ni bawk.

Aizawl-a lam hrawna hi Chanmari traffic point anthawka tanin Vanapa Hall chen nei a nia, MNF workers 700 chuong an thang a nih. Hi huna hin Congress sawrkar chu zu zawr leiin peithlak an nuom thu le Christian state a zu zawr an ditnaw thu mipuiin an khek suok puia, “Congress sawrkar zu zawr thla raw seh”, “Mi tamtak hringna latu Congress sawrkar bang raw seh”, “Kristien rama zu zawr Congress sawrkar kan dit nawh”, tiin mipui an khek a nih.



Hi huna thuhril tu MNF president Zoramthanga a chun Vai hai i din Congress party chu Mizoram anthawka hnawt hmang a tul tah thu a hrila. Zu leiin mi tamtakin hringna an chana, fahra le hmeithai tamtak an umpha a ni a tih.

Zoramthanga chun Kristien sawrkar khawm nilo Bihar le Kerala sawrkar hai hmana mipuiin an tuor em leiin sie (tax) tam tak laklut theina khawm nisien zu zawr an khap laia, Mizoram Kristien state in zu a zawr chu a rapthlak takzet a nih a tia, Zu dawn leiin tukum sung ringawt khawm Aizawl khawpuiah mi 500 chuongin hringna an chanpha a nih a tih. “Congress thlipui a hranga mi tam tak an thi zawi zawi a nih”, a ti bawk.

Mizoram sawrkarin sie (tax) dit leiin kohran le mipui phalnaw chungin zu a zawra, police tam tak khawmin hringna an chanpha nghe nghe a nih a tia, Mizoram sawrkarin zu anthawkin Rs 80-100 crore a lak lut lai zu manin Rs 500 crore choung Mizoram puotieng a pei hmang a nih a ti bawk. Lam hrawna a hin MNF senior vice president Tawnluia, MNF vice president Dr. Lalthangliana le MNF General Secretary Lalruatkima hai khawmin thuhrilin Congress sawrkar chu zu zawr leiin na takin an dem bawk.

Congress keihruoi Mizoram sawrkarin Mizoram Liquor Prohibition and Control (MLPC) Act chu January 15, 2015 anthawk khan hmang tanin MNF sawrkarin kum 18 lai Mizoram Liquor Total Prohibition Act a fepui hnungin tukum March thla kan Mizoramah zu zawr tan nawk a nih.
 

Post a Comment

Powered by Blogger.