~ By. VL Khawbung

Vân khuphnuoi khawvel ram a hin hnam chi tum tum hai umin trawng chi tum tum hai ei nei a, chuong hnam hai chun parvul tum le kau ra nuom um tak ni tumin thrang ei lak seng a. Chuong hnam hai laia chun eini HMAR hnam khawm ei ralbang chuong nawh. Tienlaia ei hung suokna hang hril chun khi khivah um ding chu ni ta awm tak ei nih a; sienkhawm, ei hnung daia kawlphai le tiu vadung hung kân hai khawm ei hnawt phak ta naw chu ani hi. Ei thenwam unauhai politics ah eiin tang laklawa thil hang thaw rak ding khawma ei harsa thret chu a ang hle. Tuipuisen kaia inngaiin inhawi ei chena, ei maksana ei ngai hai khan Jordan vadung an mi ralkai sana; vadung rala inthawkin mihai hmasawnna ei thlir el chu an ta hi. Hmelma doral khawm ngam theilo a ei um hi ienglei am nieng a ta? Berampu hai leh thrang ei hang laka ei hang thaw ngil khawma Aikhuo rûn ang tho ei ni ta el hi ngaituo tham tak anìh. Ei hnam sunga hin AKAN ang ela Lalpa ditnaw zawng thaw ei um el aman ta ding? Eiin sút ngun met chu a tul an tah.

Chanchintha ei dawnga ei thenawm unauhaiin artiel var an thawa "lushei trawng lo chuan hla phuah awi loh" an ti a, sienkhawm Rev. Thangngur'n huoisen takin anina HMAR hnam chu tanin ama trawng ngeiin " Saron parmawi ila mawi zo nawh hmartlangpui inthim sunga hin chu; sumpui a la zing i parmawi hlie dingin nisa angin hung var la i hmel hungin lang sien, a chun i mawizie lo hre tang an tih" a lo ti a. Chu zara chun vawisunni hin thangthar ha'n malsawmna ei dawng anih ka ti naw thei nawh.


Ei hnam politics hi ieng hunlai char khan am alo intan ti chu ka hrietnaw a; sienkhawm, ei bul tanna ngaituo chun step khat beka hmasawn chu ei awm tak vei leh Horeb tlang tak ngil khawm kai theilo a ei um el hi chu ngaituona a sawlin eiin ruom tak meu chu ani hi. Tlangval tam takin an u le sang, an nu le pa hai, an khuo le veng an maksan el khawm ni lovin; an iengkim hnam ta dinga an inhlan zo hnung khawma mihai khabe liema pawisa nawi inchuo in eila buoi char char el chu ani hi. Tu chena ei ngirhmuna a lungawi zo lo hnam tlangval ha'n beiseina khamhrui ang de hlet hlet neia an beilai zing khawma trawngsi inphur pawl hlak ei ralbang si nawh lu in haiin ei tlu nawk el hlak chu ani hi. Eiin naupanghai eiin chuktir dan hlak chu hril inzapui um khawpa inzapui um hlak chu ei ni tawl bawk si. Nang tiemtu ditum tak i ngaituo ve hlak am? Hieng anga ei fe zing chun ei hnam hi thlang tieng kawlrawnah la liem a ta, chu huna chun darkar24 sung hi iengtin am hmang tang ei ta? Ka zan zal hmuna lungril taka ka ngaituo chang hin IENGTIN AM THAWNG KA TI HLAK.

Post a Comment

Powered by Blogger.