Aizawl, 21 September, 2016, Virthli (ONP) :Mizoram sawrkar le Hmar People's Convention (Democratic) hai inbiek a vel hnina (2nd round of talks), September thla lailunga nei nawk ding ti chu vawisun chen hin sukchieng a la ni nawa, September kar tawp an nawleh October kar hmasatak hin nei a ni el thei thu, Mizoram Home Department-a senior official pakhat chun a hril.
Senior Home Department official chun inbiek hun ding suk khawtlai chu lo theilo thil a ni thu a hrila, Home Minister in HPC(D) hai Charter of Demand chungchangah Chief Minister la rawn a ta chu zova inbiek hun ding sukchieng ning a tih, tiin a hril.
Mizoram Home Department officials hai chu September 20 khan Home Minister R. Lalzirliana keihruoina hnuoiah inrawn khawmna neiin Charter of Demand chungchang ah Chief Minister Lal Thanhawla la rawn phawt nisien tiin thu thlukna an siem.
Ei thulakna in a tarlang danin HPC(D) hai hin an charter of demands ah kum 1994 a Mizoram sawrkar le HPC in Memorandum of Settlement (MoS) an lo ziek tah chu sukhrat le suk changtlung dingin an ngena, legislative, executive le financial power nei thei ding Sinlung Hills Autonomous/ Territorial Council (SHAC) siem an phut bawk a nih.
