SSDDC in CM kuoma reminder pek dingin an rel
Oct. 11 chena sukpuitling a ninaw chun Bandh thaw an tum
CCPUR:  Saikot Sub­Division Demand Committee (SSDDC) inrawinain zanikhan HYA Saikot Branch Office­ah Saikot SDO Demand area sunga Lal le Authority fekhawmin meeting nei a nih.  Pu James L. Tova Hmar, Executive Member, SSDDC le Jt. Secy. Saikot Village Authority in tawngtainaa hun a hawng zoin Secretary le Asst. Secretary, SSDDC remchang nawna leiin member fekhawm han Pu Lalrohlun Hrangchal, Secretary, Muolvaiphei V/A chu Acting Secretary dingin lungruol takin an ruot a, hi zo hin Sept. 17, 2016 nia Saikot SDO Gazette Order lak nia hun hmang dan ennawn in hma lak pei dan ding thuah resolution 2 an passed niin SSDC in thusuok an siema chun an ziek.

An resolution pakhatnaa chun,  chun SSDDC hmalakna le inzawmin Public Awareness khaw tina nei ding;  a hun le ni ruotna chungthu chu Executive, SSDDC mawphurnaa sie a nih.

Resolution pahninaa chun, Sept. 17, 2016 nia Manipur CM kuoma Memorandum peka um chu Sept. 23, 2016 hin Demand Committee inrawinain Lal le VA po poin DC, CCPur fethlengin Manipur CM kuoma reminder peklut dingin an rel.

Hi le inzawm hin Oct. 11, 2016 bo hma ngeia Demand Committee ditdana sukpuitling a ninaw chun Oct. 12, 2016 zanrila inthawk CCPur Total Bandh le nuorna chi tum tum, hunger strike, sit­in­ protest le a dang dang thaw ding; Nuorna dang dang nei hnunga khawm ngaisak an ninaw chun Election boycott chen khawm thaw thei dinga biel sunga thalaihai a tul anga lo inbuotsai ding le mipui hai khawm tawngtainaa lo hre seng dingin an ngen.

Saikot SDO area­a harsatna hrethiem a, sawrkar laka an hmalakna leia nuorna dang dang bandh/strike le election boycott thaw a lo ni khawma Churachandpur mipui hai chu hrethiem a, lo thlawp (moral support) pe dingin SSDDC chun a ngen. SSDDC in thusuok an siema hin Timothy Z. Zote, Chairman, SSDC le Lalrohlun Hrangchal, Acting Secy. SSDDC han hming an ziek.

Action la dingin a ngen
CCPUR:  Khamchinpau Zou (K Zou), Advocate & Social Activist chun, Churachandpur sunga Voter Itendity Card, Aadhar Card, BPL, AAY le tar pension le hmeithai (widow) Card hai siemna dinga pawisa la hlak Agent le sawrkar thawktuhai chungah action la dingin September 21, 2016 khan ziek ngeiin DC, CCPur kuomah ngenna lekha a pek Aadhar Card siemna dingin Rs. 500­600/­ le Voter Identity Card siemna dinga Rs. 250­300/­ la hlak an um niin DC, CCPur kuoma a ngenna lekhaah a zieklang. DC, CCPur kuoma ngenna lekha a pek hi CEO, Manipur le Director, Unique Identification Authority of India, New Delhi hai kuoma khawm  copy a pek niin a hril.

AERO/SDO hai briefing an pek ding
CCPUR:  Sept. 23, 2016, 11AM  hin Pu Lunminthang Haokip, IAS, DC, CCPur, S. Thienlaljoy Gangte, AC to DC  and OSD (Election) bakah Dingluai, Asst. Election Supervisor han DC Office­a BRGF Resource Centre­ah AERO/SDOs hai meeting neipui an ta; Election hung um ding le inzawmin briefing peng an tih. Election hung um ding le inzawm hin Sept. 21, 2016 khan ECI full team Manipur a hung inzin hai chun Manipur­a District tina officials hai an lo inhmupui ta, kha huna khan DC, AC to DC & OSD (Election) bakah Asst. Election Supervisor hai hi an va thang a nih.

Rationing Agents han RO lak thei ding
CCPUR: Churachandpur District sunga Natonal Food Security Act (NFSA) hnuoia Rationing Agents, bufai man ding peta hai ta dinga Release Order (RO) lak thei ding hun ruot a ni tah. Hi dungzui hin 55­Tipaimukh A/C le 56­Thanlon A/C hnuoia mi han Sept. 26, 2016 in Release Order hi lak thei ning a ta; 57­Henglep A/C sunga mi han Sept. 27, 2016; 58­Churachandpur A/C sunga mi han Sept. 28, 2016; 59­Saikot A/C sunga mi han September 29, 2016 le 60­Singngat A/C sunga mi han October 1, 2016 in lak thei ning a tih tiin M. Ginzasuan, District Supply Officer (DSO), CCPur chun inhriettirna a siem.

Sept. 26 chen PS Custody­a um nawk dingin
CCPUR: Mr Mang David (38) s/o Jamkholian of New Lamka Vengnuam, CCPur motor hire­a midang kuoma a lo banda (mortgage) leia man Mr Ningthoujam Okendrajit (39) s/o N. Khelemba of New Bazar Bus Parking, CCPur chu  zanikhan Chief Judicial Magistrate (CJM) Court hmaah inlangtir a ni a, Court chun  September 26, 2016 chen Police Custody­a la um nawk phawt dingin a rel.

Thangpuinain Bufai an pek
CCPUR: September 18, 2016 nia ruobahawk sur leia Chiengkon vadung tuilien in a sukbuoi  Pi Nunnem of Sielmat, Vanso colony chu HYA  Tuithaphai JHQ thuoitu han zani hmasa khan thangpuinain Bufai bag khat an va pek. Chun, Sept. 19, 2016 khawm khan  Pu Hmangkhum Songate, Gen. Secy. HYA GHQ le Pu Sanhim Sanate, Secy. Fin. HYA GHQ hai khawmin HYA GHQ hmingin Rs. 1000/­ an lo inhlan ta bawk

HKI in an lawmpui thu 
CCPUR: Hmarram Kohran Inzawmkhawm (HKI) chun, Saikot Sub­Division Demand Committee in  Saikot SDO puitlinga hlangkaina dinga harsatna tam tak an paltlanga hma an lakna hnunga  Sept. 17, 2016  nia Saikot SDO Gazetter Order a hung insuona thuah Saikawt Sub­Division Demand Committee chu an lawmpui thu  an puong a. Hmatieng peiah tha taka  hung function thei ngei dinga ditsakna an inhlan.

SP hlui le thar han emergency in
CCPUR: SP Churachandpur thar dinga ruot Mr Rakesh Balwal, IPS chu zani hmasa zantieng khan emergency thila tulna um leiin CCPur­ah hungin L. Mangkhogin Haokip, IPS, SP, CCPur leh tulna leiin charge inhlanna ding thil iengkim an sukfel vawng a, SP thar ding hi  a la remchang theinaw leiin Official taka charge inhlanna la umnaw sienkhawm charge chu an inhlantuo ta niin ei thu dawngna chun a hril. Official taka charge inhlanna hi Zirtawpni annawleh Inrinni hin an nei ring a nih. Charge inhlanna ding le inzawma thil tul hai chu zani hmasa zan khan an sukfel vawng ta a nih.

Dist. I Division League opening
CCPUR: September 24, 2016, 2:00PM khin Peace Ground, Tuibong­ah (L) Khaikhanlian Memorial District I Division League­2016 opening ceremony um a ta, T. Khaikhomang, MDC & Chairman, Fin. Committee, ADCC khuollienin thang a ta, Thanglal Haokip, President, KKL Thangting Block chu Functional President in thang a tih. Opening match chu New Lamka Youth Club (NLYC) le Zoheisa Football Club (ZOFC) hai inkhel an tih.

Kashmir chungchang chu India le Pakistan han chingfel raw hai seh: UN
NEW YORK: Pakistan Prime Minister Nawaz Sharif chun United Nations General Assembly­ah Kashmir chungchang chingfel pui dingin United Nations (UN) a ngen a, sienkhawm UN chun Nawaz Sharif ngenna chu hnawlpekin, Kashmir chungchang chu India le Pakistan han inbiekna neiin rel fel rawhai seh tiin a rel. UN Seceratary General Ban Ki­moon khawmin zanikhan Pakistan PM Nawaz Sharif ngenna hi a hnawl thu a hril nawn nawk. Kashmir chungchang hi China thangsain rambung dang danghai khawmin rambung pahni inkar thu a ni leiin India le Pakistan sawrakr han inbiekna neia an rel fel  tha an ti seng thu an puonglang.

Un a India First Secretary Eenam Gambhir chun zani hmasa khan Pakistan PM Nawaz Sharif thu hrilhai chu hnesaw le na takin zanikhan UN General Assembly­ah a dawnlet. Pakistan chu terrorist state a ni a, helpawl group tum tum hai chu an ramah a vaingam a, inhumhimna, fak le dawn, training le ralthuom chen a pek a nih tiin a hril. Osama Bin Laden ngei khawm thangpui le thlawpin, an rama ngei an um tir a, hi taka inthawk hin Pakistan chu terrorist hai thangpuitu le thlawptu a nizie a chieng hle a, hi hi khawvel mihai hriet a nih. Uri, J&K a India sipaihai thatna thu hrillang nuom der lovin Kashmir chungthu ngar ngar UN General Assembly­a khawm a hrillang a nih tiin Eenam Gambhir chun a hril. Pakistan chet dan hi indona tan tum a nih tiin Gambhir hin Pakistan chu nasa taka a dem le inthiemnaw thu a hril.

Hun sawt taka inthawk khan Pakistan hin terrorist hai thangpui dinga policy lo neita a ni thu, UN in Terrorist­a a puong hai zalen tak le awlsam takin sawrkar thangpuinain Pakistan ram sungah an che a, ramdang thangpuina dollar tam tak a hmu hai chu indiklo taka hmangin helpawl hai thangpuinain a hmang a nih tiin  Eenam Gambhir chun a hril.

Vuongna fe ding sukhnuk pha
IMPHAL: Zanita Imphal International Airport a inthawka Guwahati pan ding Air Asia flight chun an passenger pakhat thuomhnaw sungah bomb a um anga hrilna thu an hmu leiin security agencies le bomb squad pawlin an enfel a, sienkhawm passenger le an thuomhnawhai po po an check hnung khawma iengkhawm hmu a ni nawh. A thuomhnaw sunga bomb um nia hriltu hi thu indawn chieng dinga hrentang a nih tiin Police chun an hril. Hi thil tlung lei hin Vuongna fe ding hi darkar khat neka sawt sukhnuk pha a nih. Thil enfel zo hnungin Air Asia Vuongna hin Imphal InternationalAirport suoksanin Guwahati a pan.

PWDs Certificate nei mi 20,000
IMPHAL:Manipur­ah Peoples Living With Disabilities (PWDs)  58,000 lai an um a, hienghai laia mi 20,000 hai chain PWDs Certificate (ruolbanlo certificate) an nei tiin Dr Kamlesh Kumar Pandey, Chief Commissioner for the Persons with Disability in zaita Secretariat, South Block, Imphal­a Chanchinbumihai an hmupui huna a hril.


MGNREGA chungah Orientation
IMPHAL: Department of Rural Development and Panchayati Raj (MGNREGA Monitoring Cell), Govt. of Manipur huoihawtnain zanikhan Manipur Press Club, Majorkhul, Imphal­ah State Level Orientation Programme for Journalists on MGNREGA and its Implementation  nei a nih. MGNREGA chungchanga inhrilhreitna thedartu dinga Chanchinbu le Journalist­hai tangkaizie hi huna khuollien J.C. Ramthanga, IAS, Principal Secretary (RD&PR), Govr. of Manipur chun a hril.

7­ Day Basic Course in News Reporting
IMPHAL: Directorate of Information and Public Relations (DIPR) hnuoia State Institute of Journalism huoihawtnain Ukhrul District mihai ta dingin September 26, 2016 a inthawk khin TTA Hall, Hamleikhong, Ukhrul­ah  7­ Day Basic Course in News Reporting nei tan ning a tih.

Chhattisgarh PAC team an hung inzin
IMPHAL: Manipur­a ni 4 sung cham dingin Chhattisgarh Assembly Public Accounts Committee team chu Sept. 21, 2016 khan Imphal an hungtlung a, Manipur Assembly a Public Account Committee Chairman le member­hai an inhmupui. Sept. 24, 2016 khin Imphal suoksanin Chhattisgarh pan nawk an tih. Chun, Sept. 24, 2016 khin Chhattisgarh Legislative Assembly­a Press Gallery Advisory team chu Imphal hungtlung an ta, Manipur Legislative Assembly­a members thenkhat le Chanchinbumihai inhmupui an tih.

Justice Ranjan in Chief Justice sin
IMPHAL: Zanikhan Justice Rakesh Prasad Ranjan chun Raj Bhavan, Imphal­a Durbar Hall­ah Manipur High Court Chief Justice dingin Governor Dr Najma Heptulla hmaah sesamna a nei. Hi hunsera hin Manipur CM O.Ibobi Singh, Dy. CM Gaikhangam, Manipur Assembly Speaker Th. Lokeshwar Singh, Ministers, MLAs, Chief Secretary, DGP le civil le Police high officials hai bakah Court hran hran a Judges le Ukil hai an thang tawl.

Justice Rakesh Ranjan Prasad hi Manipur in High Court Chief Justice pathumna a ni a. Chief Justice hmasatak chu Justice Abhay Manohar Sapre niin a pahnina chu Laxmikant Mohapatra kha a nih.

India Ambassador to US dingin Navtej Sarna
NEW DELHI: UK­a Indian High Commissioner ni lai mek  Navtej Sarna chu US a India ram palai (Ambassador) dinga ruot a nih. Mr Sarna hi 1980 batch Indian Foreign Service (IFS) Officer niin January­a a intahwk London hmuna Ministry of External Affairs a  Secretary (West) lo chel tan a nih.  Kum 2002 ­2008 inkar sung khan MEA­ah spokesperson sin lo chel a nih.  Chun, 1988 batch IFS Officer Taranjit Singh Sandhu chu Sri Lanka­a India ambassador dinga ruot a ni bawk.

Heroin Gram 47 leh mi 2 man
AIZAWL: Mizoram Excise and Narcotics Department­a Anti­Narcotics Squad pawl chun zanikhan Aizawl Tuikual North­ah Heroin grams 47 leh a neithu mi pahni an man. Mana um hai chu Lalthai (40) of Tahan ‘A’ Group, Myanmar le Lalrinchhani (31) of Saron Veng, Aizawl nia inhril hai anni a,  NDPS Act, 1985 hmangin case siemkhum annih.

Tekin putar pakhat a deng hlum
AIZAWL: Zani hmasa zantieng 4:30PM vel khan Mizorama Thingdawl khuoa chun putar kum 80 mi R. Sapchhunga chu Tek tlain a deng hlum. R. Sapchhunga hi an khuoa inthawk hla rak loa an Lo tua ama khat chaua a um laia Tek hin a deng niin ei thu dawngna chun a hril.

VAWISUN THUPUI
Hrattak le huoitakin um unla, ti naw ro, anni chu ti bawk naw ro; in kuoma fe ve chu Lalpa in Pathien a ni sih a; inhlawsamtir naw ni cheu, mak khawm maksan naw tawp a ti cheu,” tiin. ­ Deuteronomy 31:6

Editorial: A thlawna thil hmu

A thlawna thil hmu hi a hlu a, a dawngtu ta ding chun thil lawmum takel a nih. Hi lei hin hnam changkang, ram hausa le hnam var hai chun an uor hle. Hnam var lem le changkang lem hai thaw dan hi a tha a, entawn chiah ei ngai leiin ei ramah ngei khawm a thlawna thil pe thei ding ngirhmuna um hai chun thil thlawnpek hi an hung ching ve ta a, ei changkang vena pakhat a nih. A thlawna thil phal le mi pe hlak hai hi a tlangpuiin Pathien thusawi tha, mani mihriem chanpuihai  hmangaina nei an ni chawk hlak. Mi hausa le mi khawsa thei hai po po hi mi tik phal le a thlawna thil pe  hlak an ni chuong nawh. Mi tiktlai, a thlawna thil pe le sem hlak hai chun vangneina le malsawmna an dawng nge nge hlak.

Ei pi le puhai chun lak nekin pekin lukhawng a nei lem” an lo ti hlak. Hi thu hi thudik a nih. A latu annawleh a dawngtu ni nek chun a pe theitu ngirhmun an sang lem. Tienlai ei pi le puhai khawm khan a thlawna mihai kuoma pek le sem thei ngirhmuna um kha an lo tum hlak.  Hi lei hin fahra le hmeithaihai enkawl le a thlawna thilpeka thangpuina kawngah tulaia thangtharhai nekin an lo thaw tha lem niin an lang. Fahra le hmeithai, sawmdawl ngaihai kha an pawng hmusit el naw a, lungril tak taka hmangaina le lunginsietna neiin an lo sawmdawl hlak.

Do le ral, bawrsawmna le vangduoina lei a ni ngawt naw chun ei pi le puhai kha mihai thangpui le sawmdawl ngaia um kha an nuom naw a, thi rin takin an lo rin  hlak. Hi lei hin kawla Nisa suok zuiin, a sur a sa hnuoia khawm, ka sawl ie, ka kham ie ti lovin taima tak le sawl em emin lo sin an lo thaw hlak. An lungril puitlingna, an taimakna le an tumrunahai kha thangthar hai ta dinga entawntlak le chona thar mi petu hung ni thei sienla nuom a um ngei el. A thlawna thil hmu kha tha an ti naw le an ngaisang naw a ninaw a. Amiruokchu, sawmdawl le thangpui ngaihai thangpuia sawmdawltu ni theina ngirhmuna um kha an ngaihlu lem leia mihai thangpui le sawmdawl theitu, a thlawna mi hai thilpek pe theitu ngirhmuna um lem dinga theitawp suo an lo nih.

A thlawna thil hmu le dawng hi a dawngtu ta ding chun lawm a um khawp el. Amiruokchu, tulaia thangtharhai hin a thlawna thil hmu le dawngtu ni nek chun a thlawna mihai kuoma  pe theitu le sem theitu ngirhmuna um hi inel inla nuom a um. A thlawna thil hmu le dawngtu ni nek chun a thlawna mihai pe theitu annawleh a thlawna mani khuo le venghai kuoma  sem theitu ngirhmuna um chu an sang lem. Hieng a ni lei hin a thlawna thil hmutu ni nek chun a pe theitu ngirhmuna um dingin ei lekha inchukna le sin chi tum tum ei thawna haia hin hma la nasa nawk zuol seng ei tiu. Mihai thaw thei le pek thei ang pe thei dinga siemtu pathien hin a mi siem ve a ni tih hi ei lungril inthuk takah um zing sienla nuom a um.

Tulai khawvel fe dan ei en vang vang chun, a thlawna thil ei hmu le dawnghai hin ei moral a suksiet a, thabona, derdepna, ringumnawna le zawmthawna hai chenin  ei hmang pha an tanaw mani ti theiin a um. Mi thenkhat chun a thlawna thil ei hmu theina ding a ni phawt chun khel hril, thil indik naw thaw a, mihai chan ding lakpek el khawm pawi tina an nei ta nawh. Sum le pai, sawrkar sin le hamthatna ei hmu theina ding a ni phawt chun thil iengkim, a tha le a thanaw, a mawi le a mawinaw ding, an dik le an diknaw hai khawm nisienla thaw ei rin der tanaw niin an lang.

Sawrkara inthawka sanction, grant le hamthatna hmu thei ding hai khawm hi a hmu dinghai le a dawng ding han hmu le dawng phak ta lovin an um a, a fa ding han fa phak ta lovin a bantan thei thei han ei lo bantan el  ni takin anlang. Sawrkarin scheme tha tak tak a siem hai khawm hin thabona a hung intlun pha lem am a ni ding aw ti theiin a um. Hi lei hin a thlawna ei thil hmu hai hin ei moral a suksiet ti naw thei ding a ni nawh. Sawrkara  a thlawna thil hmu thei a um hlak leiin, mi thenkhat lem chun lo sin thaw le huon siem khawm tum ta lovin a thlawna thil hmu thei ding zawngin sawrkar office haiah  an invir an invir kuol el ta a nih.

Post a Comment

Powered by Blogger.