Ruobawhawk sur lei leiin In 10 chuong-ah tui a lut
CCPUR: September 18, 2016 chawhnungtienga ruobawhawk  hung sur khan CCPur khawpui sung le a sevel haia nulla le vadungte hai an luongliem leiin mi tam takin harsatna an tuok pha a, In tam tak haiah tuihawk le chirdiek a luonglut leiin zani hmasa zan chen khan tlawmngai pawi  nunghak­tlangval han thangpuina le sawmdawlna sin an thaw.

Ruobawhawk sur khan Chiengkon vadung tui nasa takin a luongliem  bakah Sielmat vadung tui luongliem leiin  Sielmat khaw sunga hmun inhnuoina hmun deua um haia chun tui a luonglut.  Chiengkon vadung tui luongliem leia tui lutna In neitu hai chu Pi Nunnem; Pu Neilal Gangte; Pu Sanglor Hrangchal; Pu Lalruotlien Vanso (Carpentry);  Pu Darlienthang; Pu Lalmalsawm Songate; Pu K Lalthanglian (TL Electronics); Pu Johnte; Pu Lalringum Songate le  Pu Ronal hai chengna in hai an ni a, Sielmat Vadung tuiletin a sukbuoi phak hai chu Rev. C.C. Rema, Pu Tlangdanglien le Pu Lalramlien Zoute, Hebron le Pu Lalthlanglien,  Pu Engzam le Zou Colony­ah Dr Rosiem Pudaite hai in an nih. Chun, ICI Centenary building  sawng hnuoi le  ICI Secretariat building hlui sawng hnuoi (basement) haia khawm tui a lut bawk.  Sielmat khawsunga hi tuiletin a sukbuoi nasa zuol deu hai chu Vanso Leikai­a um hai an nih.  Chun, Sielmat­a PMS Bungalow fencing khawm sei takel a tlu bawk.

Ruobawhawk sur hin Sielmat chau ni loin khawpui sunga Vadung bul hnaia cheng hmun  inhnuoina deua mi hai khawm a sukbuoi phak a, Chiengkon vadung tuilet hin Pu Sanglur, Ex­MLA in bula  building sung hai lutthlengin Tiddim Road­ah  tui a hung luongsuok tawl hiel a nih.  Tuilien leia thi le hliemna tuok ruok chu an um thu hriet a ni nawh.

Sielmat vadung tuilet hin  Hmarveng khawm a zuk hrut a, in iemanizat­ah tui a lut bakah  pucca road a fen khawk bawk. Chun Tuibuong area­a khawm tuihawk a luongliem nasa hle niin ei thu dawngna chun a hril bawk.

Mi 9 han thisen Unit khat seng an pek
CCPUR: Damnaw thisen mamaw ngawi ngawi mi 3 hai ta dingin mi tlawmngai 9 (nupui 2, nunghak 2 le tlangval 5) han zanikhan District Hospital, CCPur­ah thisen Unit khat seng an pek. Zanita thisen petuhai chu­ Mrs Zarzokim, Saikot (Acts Community a’nthawk) a vawikhat pekna; Ms Pui Khawbung, Muolvaiphei a vawi 2 pekna; Nk Moinu Saibung, Rengkai, a vawi­1 pekna; Nk Editha Lalthlawnpek, Khawpuibung (HYA V&K)a vawi 1 pekna; Tv Immanuel Lalneisang, Rengkai a vawi 7 pekna; Pu Nick Darngawn, Khawpuibung, a vawi 1 pekna; Tv Alfred Songate, Rengkai a vawi 3 pekna; Tv TC Donny, Saikot (Acts Community) a vawi 3 pekna le Tv Immanuel, Rengkai a vawi 1 pekna hai an nih. HYA tlawmngaina indiktak neia thisen petu hai inpak an um hle.

EVMs hai hmang thei dingin an enfel zo
CCPUR: Bharat Electronics Limited (BEL), Bengalore­a inthawk Engineers pahni Narasimhamurthy H Janakamma BR le Thirunavukarasu A Vijayakrishna  han September 14, 2016 a inthawk DC Office, CCPur­a EVMs hai enfelna sin an thaw chu September 18, 2016 khan an zo ta a,  Election um hun huna hmang thei  dingin  an siem tha vawng tah. EVMs hai hi a battery hai thleng a ni bakah  a sietna um hai khawm an siemtha vawng a nih.

Bolero inrukhmang
CCPUR:  September 19, 2016, zingkar 3AM vel khan Khupzaton of Zion Veng, New Lamka in a nuhmei Vungzakim hminga Bolero an chawk MN02A­3594 (black) Chasis No. MAIPS2GAKASE03845, Engine No. GAA4E48380 an Garage­a a sie chu rukru han an inrukhmang. Hi thua hin Police­ah report a pek a, Police han an suizui mek.

Amazing Home thilpek an inhlan
CCPUR: Acts Community, Saikot chun Sept. 18, 2016 khan naufahra enkawlna Amazing Home, Bungmuol, CCPur kuomah thangpuina thilpek bufai bag khat an inhlan. Acts Community hi kohran le pawl bik um lo voluntary­a sin thaw niin tuta hma khawmin Saikot, Khawpuibung, Hmuntha, Rengkai le a sevel haia khawm bufai le thuomhnaw an lo sem ta hlak bawk a nih.

JACAATB kuomah Rs. 7,000/­ a pek
CCPUR: Ms Chiinkhovung of Lamphelpat chun zanikhan Bungmual­ah JACAATB thuoituhai an hmupui a, Tribal Movement le an hmalaknaa an hmang dingin Rs. 7,000/­ a pek.  Hi thua hin JAC Chief Convenor Mangchinkhup chun  lawmthu a hril.

Seiminlien Lengen in CEO/ADCC
CCPUR: Mr Seiminlien Lengen, MCS chun zani (Sept. 19, 2016) khan Ms Mannuamching, IAS a inthawk CEO, ADCC, CCPur charge a lak. Ms Mannuamching chun zani ma khan Director Tribal Development sin charge la dingin Imphal a pan nghal.

Police Officer thenkhat  sawnkuol
CCPUR: L. Mangkhogin Haokip, IPS, SP, CCPur in Sept. 17, 2016 khan CCPur district sunga SI le W/SI Police Officer thenkhat a sawnkuol. Hi dungzui hin James Lianzagou Vaiphei chu CCP­PS a inthawk TLN­PS; Thangpu Tonsing chu CCP­PS a inthawk SGT­PS; Khamchinpau  Tunglut chu CCP­PS a inthawk SGT­PS; H. Thanglyanmang Paite CCP­PS a inthawk  RL­CCP; P. Lalmalsawm Zou CCP­PS a inthawk PBG­PS; Hauginlian Tonsing chu CCP­PS a inthawk RL­CCP; H. Lalbiakmuan CCP­PS a inthawk RL­CCP; Kamei Gaikhangam R RL­CCP a inthawk CCP­PS; Chinzasiam RL­CCP a inthawk CCP­PS; Paoremsang Neihsial chu TLN­PS (attached to RL­CCP­PS chu CP­PS; Tungnung Ignatius Zou SGT­PS (attached to RL­CCP) chu CCP­PS; Haolensang Singson HLP­PS (attached to RL­CCP) chu CCP­PS; Sandy Lalhmingsangi Tonsing i/c W/PS­CCP chu AHTU­CCP le Nianghoikim W/PS­CCP chu AHTU­CCP dinga sawn an nih.

Suma thangpuina hni thei
IMPHAL:  Nga vaihai ta dingin Suma thangpuina (Financial Assistance) hni thei a nih. Inhnikna neihai chun Rs. 100/­ pein District Fisheries Offices le Chief Executive Officer, FFDA Office haiah Sept. 24, 2016 chenin lak thei le hnina lekha peklut theina hun tawpna tak chu Sept. 30, 2016 a nih tiin Director of Fisheries, Manipur chun inhriettirna a siem.

AITC MLAs 4 han Congress an zawm
IMPHAL: Manipur a All India Trinamool Congress (AITC) MLAs 4, Thounaojam Shyamkumar (Andro A/C), Dr Irengbam Ibohalbi (Oinam A/C), Konthoujam Sarat (Konthoujam A/C) le Oinam Lukhoi (Wangoi A/C) hai chun an party suoksanin September 18, 2016 khan Congress an zawm tawl. Sept. 18, 2016 khan Congress Bhavan, Imphal­ah lawmlutna nei a nih.  Hi huna hin C.P. Joshi, AICC General Secretary, Avinash Panda, AICC Secretary in­charge Manipur le AICC Secretary Vijaylaxmi Sadhoo hai khawm an thang. Hieng MLAs 4 hai hin Congress an zawm ding hi Central leaders­hai an hril naw leiin  harsatna an tuok el thei tiin M.I. Khan, Vice President, AITC, Manipur State Unit chun a hril.

To tawkin lampui an hraw
IMPHAL:  Bandh, General Strike, Public Curfew le Economic Blockade inzing uta a um dodalnain zanikhan Imphal ah All Manipur Bar Association (AMBA) huoihawtnain  to tawka lampui hraw a ni bakah AMBA members han an sin thaw an chawlsan. Lampui  hrawna hi Cheirap Court Complex, Uripok a inthawk  Khwairamband Bazar  chen an nei.

PET la thang lo hai ta dinga PET hun
IMPHAL: Manipur police Department hnuoia Constable (Male/Civil­2013) lakna dinga Physical Efficiency Test­ neia um meka la thang hman lo hai ta dingin  Sept. 24, 2016 a inthawk khin MPTC Pangei hmunah PET nei nawk ning a tih. Hi dungzui hin Sept. 24& 25, 2016 in CCPur District a mi hai; Sept. 26, 2016 in Senapati le Tamenglong; Sept. 27 in Chandel le Ukhrul district, Sept. 28 & 29, 2016 haiah Bishnupur district; Sept. 30, 2016 le Oct. 1 le 2, 2016 haiah Thoubal District; Oct. 3&4, 2016 haiah Imphal East & Jiribam le Oct. 5, 6&7, 2016 haiah Imphal West District a mi han PET hi nei an tih. PET hi zing dar 8 a inthawk tan ni hlak a tih tiin Dr S. Ibocha Singh, IGP (Adm) chun Sept. 17, 2016 khan inhriettirna a siem.

PREPAK cadre 2 man
IMPHAL: Zanikhan Imphal East District­a Nonbmeibung hmunah Imphal East Police Commando han PREPAK cadre Laikhuram Dinachandra @ Dina Meitei (27) s/o  L. Mathang of Nongmeibung Chakpram Leikai, Imphal East an man. Mana um pa hi Urikhinbam Budhichandra @ Poirei of Sekmaijin s/s Majour, Publicity Secy., PREPAK hnuoia thawk  niin ei thu dawngna chun a hril.

HPC (D) le inbiek hun sawn
AIZAWL: Mizoram sawrkar le HPC (D) palai hai inbiekna September thla lailunga sunzawm nawk dinga ti chu a hun sawn a nih. HI thil hi inbiekna nei ding hai inkarah harsatna um lei a ninaw a, Tripura State a Bru raltlanhai thuoikir nawkna ding thuah sawrkar palaihai sin an hau lei a nih. Mizoram Home Minister R. Lalzirliana le senior Home Department officials han vawisun hin meeting nei an ta, chu huna chun inbiekna a tum hnina nei ding ni an rel fel beisei a nih tiin official thusuok chun a hril.

Heroin le Ganja man
AIZAWL: Zani hmasa khan Excise & Narcotics Department, Govt. of Mizoram hnuoia Anti­ Narcotics Squad han New Market le Bung Bangla inkarah Lalpekthuama, Lalthasanga le Lalhnunliana hai chu Heroin grams 7 leh an man. Chun, zani zingkar khan Rangvamualah Kimneineng of Saikulphai, CCPur district nia inhril chu Ganja kg. 5 le grams 300 leh an man bawk niin Excise & Narcotics Department thusuok chun a hril.

Winter Session nei inhmat el thei
NEW DELHI: April 1, 2017 a inthawk Good and Services Tax (GST) hmang hman a ni ngei theina ding ditnain sawrkar thlungpui chun CGST le IGST bills Parliament­a pass vat a ni theina dingin Parliament Winter Session a hma neka inhmaa nei tumin hma a lak. A tlangpuiin Parliament Winter Session hi November chawlkhar thumna/ lina vela nei hlak a ni a, sienkhawm sawrkar chun festival season zo charin hi hmaa nei tum a nih tiin Parliamentary Affairs Minister Ananth Kumar chun a hril. Thutlukna ruok chu siem a la ni nawh.

Pakistan chu Terrorist state a nih: Rajnath Singh
NEW DELHI: Zanikhan PM Narendra Modi inrawinain New Delhi hmunah high level meeting nei a nih. High level meeting a hin Union Home Minister Rajnath Singh, Union  Defence Minister Manohar Parrikar, Union Finance Minister Arun Jaitley, National Security Addisor Ajit Doval, Army Chieg General Dalbir Singh Suhaq le Senior officials hai an thang. Hi meeting a hin J&K state a Security ngirhmun ennawnna an nei a, Security tiengpanga officer lien han Kashmir phairuom ngirhmun kimchang takin PM kuomah report an pek.

Union Home Minister Rajnath Singh chun Pakistan chu terrorist state a nih tiin meeting zoa Chanchinbumihai an hmupui huna a hril. Helpawl han Uri hmuna Army base camp an va runna le inzawm khan Union Home Minister Rajnath Singh le Army Chief Dalbir Singh Suhaq hai chu Uri hmuna an van zin a, thil umdan an va en. Army base camp runnaa khan Army 18 an thi a, sipai dang 30 an hliem.

UN Secretary General, US, UK le khawvel rambung tum tuma thuoitu han terrorist hai chetna hi an do thu an puonglang tawl. UK chun terrorist­hai dona kawngah India le an thangruol ding thu a hril.

Uri hmuna thil tlunga khan terrorist 4 kap hlum an ni a,  security forces han uluk taka dappui  an thaw chu zani zantieng khan an zo. Dappui an thaw huna hin AK serirs Rifle 4, grenade launchers 4, UBGL grenades 39, hand grenades 5, radio set 2 le global positioning systems 2 le thil dang dang an dapdawk thu DGMO Lt. General Ranbir Singh chun zanita New Delhi hmuna chanchinbumihai an hmupui huna a hril. Pakistan ti inziekna bu le damdawi packet tam tak hmu a ni thu a hril bawk.

Schemes 147 haiah DBT suklien tum
NEW DELHI: Sawrkar thlungpui chun  March, 2017 chena khin  Schemes hran hran 147 haiah Direct Benefit Transfer (DBT) suklien (inhuomsatir) a tum tiin Finance Secretary Ashok Lavasa chun a hril. Tuhin government departmes 17 le ministries haia schemes 74 haiah DBT hi hmang mek a nih.

UP­ah Tekin mi 13 zet a deng hlum
LUCKNOW: Uttar Pradesh a chun September 18, 2016 khan hmun hran hranah Tekin mi 13 zet a deng hlum bakah midang iemanizatin hliemna an tuok.  Tekin mi a deng hlum hai laia 8 hai chu Chitrakut district a mi an ni a, hi lai hin nuhmei 4 an thangsa a, mi 6 in hliemna an tuok bawk. Chun, Rajapur police station area­ah nuhmei 4 Tekin a denghlum bakah Kaushambi district­ah nuhmei pakhat Tekin a denghlum bakah mi 10 chuongin hliemna an tuok.

Mimkei leia thi hai Rs. 4 lakh seng 
AIZAWL: September 16, 2016 zana Mizoram­a Tlungvel khuoa  Mimkeiin In 3 a sukchim hai leia mi 5 thina tuok hai chu Mizoram sawrkarin zangnadawmna Rs. 4,00,000 seng pek dingin a puong. Hi baka hin Mimkeiin in a sukchim neituhai kuomah Rs. 1,01,900 seng le rangva bundle 4 seng pek dingin a puong bawk.

1st Joint Sikpui Ruoi Central Committee meeting nei
DIPHU: December 5, 2016 nia Diphu hmuna Sikpui Ruoi puithu taka hmangna ding le inzawmin September 16, 2016 khan Hebron Campus­ah 1st Joint Sikpui Ruoi Central Committee meeting nei a nih.  Hi meeting a hin Manipur thangin hmun dang danga inthawk palai/members mi 30 an fekhawm a, Joint Sikpui Ruoi Central Committee body indin nghal a ni bawk. Chairman dingin Pu L. Hrangchal; Vice Chairman dingin Vice Chairmans dingin Upa Laldawmlien Varte (Manipur); Pu. S.Thiek (Diphu K/A); Pu R.H. Hminglien (Delhi); Pu Thanghlun Hmar (Guwahati); Pu. Vanlallien Pulamte (Barak Valley).

Secretary dingin  Pu Rokunglien Songate; Joint Secretaries dingin ­Pi. Thangthatling Sinate (Imphal); Pu. Rth. Varte (Shillong); Pu Bula Hmar (Barak Valley); Tv. Lalnunthar Zate (Germany); Dr. Paul B. Chonzik (Diphu K/A); F/Secretary ­ Pu. Timothy Infimate; Treasurer ­ Upa Lalrawnvel Khawbung.; Excutive Commitee Members in HYA Diphu, President/Secy.; HSA Diphu, President/Secy.; HCF Diphu, Chairman/Secy.; Hmar Cultural Society, Diphu, President/Secy.; Hmarveng Goanbura/Secy.; Val Upa Diphu.; Pu. S. Para Inbuon. Inspector, Food & Civil supply; Rev. Moody Inbuon. Principal (Redeemer English School, Diphu); Rev. F.L.Sawnga. (Retired); Pu Thangtinsuo Intoate. Gaonbura, Langparpan. K/A.; Pu. R. Hrangchal. Social leader.; Upa. D. Faihriem. (Retired); E. R. Ruolngul. (Area Manager Hebron Home, Diphu.); Rev. Sanga Keivom. Gen. Secy. AGNEI.; Rev. R. Hmar. IAS.; Pu. L.K. Thiek. DAEO.; Upa. N. Ngente Goanbura, Hebron Area.; Pu. Thangchunghnung Faihriem. S.A PHE Dept. K/A.; Pu. Dominic Sumlal. Asst Principal Covenant High School, Diphu.; Upa. Henry L. Varte. Principal, Li’l Kids School, Diphu K/A.; John L. Varte. Principal Covenant High School, Diphu, K/A hai bakah Advisers dingin mi 13­Pu. L. Keivom. IFS (Retired). Delhi.; Pu. Vanlalding Keivom. Mahajon. Guwahati; Dr. Zawlthanglien Changsan, Scientist. Shillong.; Dr. L. Infimate. (Retired); Pu. Ngamrothang Hmar. Ex. Chairman DHSC.; Pu. David Neitham. DIGP, Assam Police.; Pu. Chawngkhawlien Joute. Chief of Rengkai.; Pu. Lalthawmlien Neitham. Chairman Barak Valley.; Pu. Romeo Hmar. MPSD Convener. Delhi; Rev. Hrilrokhum Thiek. Hmar Literature Forum.; Pu. Rohminglien Buhril, IFS, (President HYA Shillong); Pu. Challienkhum Songate, IRS, Delhi.; Pu. Darzakhum, IRS, Shillong..

Information & media incharge dingin Pu Robert Varte, Diphu HYA Secy/President Diphu Cultural Society hai ruot an nih. Lottery zawr chungchanga a mawphurna  dingin Pu Robert Varte le Pu Timothi Infimate hai ruot  an ni a, Joint Bank A/C hawng ding;  Core office thil pawimaw­ Receipt Book,Writing Pad, Approved Voucher, Debit Voucher, Seal, File, Minute book, le thil tul dang hai inchawk  nghal ding ti hai  committee chun an hril.

Chun, Upa. Laldawnlien Varte, President (HYA) GHQ le Pi. Thangthatling Sinate, President (HYA) Jt.Hq Imphal han  Sikpui Ruoi hmangna ding Hall hmang man tum dingin an intiem a,  hmalak tanna dingin Rs. 10,000/­  Committee Chairman kutah an inhlan nghal bawk.


VAWISUN THUPUI
Nisienlakhawm, aw Lalpa, nang chu ka velin ka phaw i na, Ka ropuina le ka lu dawmkangtu i nih.  ­ Sam  3:3

EDITORIAL: Print versus Digital media

Information Tehnology Age­a um ei nita leiin internet le social media hai chu ei nitin nun a hung ni ta a, khawvel ramkilkhawr taka thil tlung khawm a hun le darkar la lain ei hung hriet thei ta pei  leiin  khawvel lien tak kha chite chau a hung nita a, thangthar hai ei vangnei hle a nih. Ei vangneina hi ei hmang thiem ruok chu a tul hle awm ie.

Print media hai nekin social media hai hi a awlsamin chanchin thedar khawm nasa takin an rang bakah a awlsam lem leiin tulai ei hmang lar tak, a bikin thalai hai lem chu internet bo chun mitdel ang hlawla um ei nitah ti inla ei hril suol taluo ring a um nawh. Hienganga social media ei hmang inrim lei in thalai tam tak chun print media hi ei ngaithain print nekin internet le social media hai hi information lakna takin ei hmang ta hrim a nih.

Hieng laizing hin Print media le Social media hlutna le tangkaina hi ei thlierhran thiem a pawimaw hlein an lang. Mi thenkhat chun social media haia chanchin thedara um hai namdettuin print media ei hmang a, thenkhat ruok chun print media iengma lova ngaia tawngkam mawilo taka deusaw le tawng khum ei um zing bawk. An hlutna le tangkaina a hran ve ve a nih ti ei hrietnaw lei a ni a, a pawi hle. Ei hriet dinga pawimaw chu printed hi documents a ni a, social media hi document a la tling thei tak tak nawh. Chu chu awlsam le mawl taka print le social media danglamna a nih.    Chun, print media hi ei tawng sukhring le humhaltu pawimaw tak pakhat an ni el khelah ei hnam hmel a ni ve a nih ti hi ei hriet tlat nuom a um bawk.

Eini rawiin social media/internet communication hai butak khuka ei khukpui, ei invetchil a,  network tawite umnaw khawma mit hung indel thut leia beidawng taka ei um el hlak laiin  ram changkang le ram hmasawn haia chun eini angin an khukpui em em nawh, a tamlemin electronic device nekin paper­a print ngei hi an la thlang lem zing a nih. US le UK haia  survey thawnaa chun 88% zetin chanchinbu chau ni lovin advertisement (hrilmawina) dang dang hai digital nekin paper a print ngei an la thlang lem a, electronic devices thlawp zawnga vote petu chu 60% hnuoitieng a nih. Eini ei changkang ta lem am an changkang lem ruok chu hrietna ei nei nawh.

Electronics devices neka print an thlang lemna san hai chu hadam le tiem inhawi an ti lem lei; him lem/ringtlak lema an ngai lei; hun danga enkir nawk dinga siethat a remchang le him lema an ngai lei; ringzo thlaka an la ngai lem lei hai an nih.  Digital media hai hi awlsam lemin seng lo tlawm lem sienkhawm tawk theia um ngei hin mi ringzo a hlaw lem bakah an lungril a hnein  an hrietzingna a sukdet lem ti chu survey thawtu hai   hmudan a nih.

Digital/social media hai hi ei sawiselin ei dem der nawh. a tha taluo, hmang thiem a tul ti thu chau a nih. Information a hrat a, thil hriet zung zung theina a ni lai zingin print/physical ngeia um leh  ei nia impact  a nei dan chu an dang dai a nih. Entirna dingin tulai hin information technology hmang tangkaiin social media ei hmang nasa hle a, social media haia thu inziek  hai popo hi a print/physical­a hmu thei dingin hang um chie sien chu a bikin eini lai chu buoina namenlo suok ngei a tih. Sienkhawm boruoka inleng a ni angin boruoka a thamral nawk el hlak. Hi hi print le social media danglamna a nih.

Eini Zohnathlak population khawm tlawmte chau um hai hin social media/internet hi ei hmang tangkai thiem chun tuta ei ngirhmun neka invawrsang thei ding ei ni ruol ruolin ei hmang thiemnaw ruok chun bak inhrieu raka mi hnung ei hnawtna ding thil a nih ti hi thalai han a thar taka ei hriet thar nuom a um hle. Tulai hnaia Assam­a APS tling thar Pu James A. Songate khawmin Tv. LRS Puruolte in interview a thawna HT a ei insuo a khan, Google­ah information le sin zawngnaa tangkaipui ding notes tam tak hmu thei a ni a, e­books form a internet haia ei hmu thei hai print­out ngeia tiem  a pawimaw thu a hril a, kha kha a pawimaw hle hrim a nih. Online nekin print a mi ngei tiem khan mitah a chamsawt lem el chau ni lovin hrietna a tudet lem ti chu scientist hai khawmin an hmu dan a nih.

Social site/internet­a chun awlsam le tlawmte senga thaw thei khawm a lo ni laizingin print ngeia hmu le tawk theia um hin impact a nei lien lem a nih ti hi sumdawngtu le company hai khawmin an hriet leiin online­a awlsam taka thaw thei ni si khan sum tam tak sengin print media haia an product hrilmawina hai an lan suo ur ur zing a nih.

Chun, ei hriet ding chu, a bikin eini lai Chanchinbu insuo hi thil awlsam a ni naw a, thil inhawi a ni bawk naw a, taima, sun le zan ang khata sinthaw tul niin mi hrisel tak ni khawm a tul a. Media rawl hi mipui rawl a ni angin Media han zalenna an nei lien na rama chun corruption hi a tlawm hlak. Manipur a chun media han zalenna an nei tlawm leiin corruption hi a hluor a nih, ti inla ei hril suol ring a um nawh. Ei thenum Mizoram khin media zalenna a lien deu leiin  Manipur nek chun corruption khawm a tlawm deu niin an lang.

Indik le ringum taka sinthaw a, tan le ditsak bik nei  der lova thudik puongdar  le mipui hai thudik inhriettir kha a sin  pawimaw tak pakhat a ni leiin a chang chun ‘A journalist has no friend” an lo ti hlak bawk a nih. Hi lei hin journalist ni hi kawngkhat ngaituo chun thil inhawi a ni naw a, mi popo lawmzawng ziek zing thei a ninaw a,  thudik an lang theina dingin a chang chun mi theida zawng tak khawm ziek a tul chang a um hlak. Hi kawnga hin mipui tieng khawma thil indik ei dit chun media zalenna hi ei dang ding a ni naw a, lungril zau tak ei put naw chun Chanchinbu hai hin thudik an puonglang thei ngainaw ding a nih ti hi ei hriet tlat a pawimaw bawk.



Post a Comment

Powered by Blogger.