Responsive Ad Slot

Hmasawnna Thar | 14 September, 2016

Wednesday, September 14, 2016

/ Published by VIRTHLI
Hmun hran hranah Kuki Black Day ursun taka hmang
CCPUR: Kuki Inpi Manipur in September 2, 2016 nia meeting nei huna a lo rel ta angin zanikhan Kuki hnam hai chengna hmun tinah SAH­NIT (Black Day) hmang a nih.

CCPur District­a hunpui tak chu Indoor Stadium, Peace Ground­ah zani 10:30AM a intahwk khan hmang tan a ni a, Rev. Dr Thangboi Chongloi, Pastor, KBC Centre Church Tuibong in hun hawng tawngtaina a nei a, hi zo hin Pu Thangjang Haokip, President, KIC inrawinain fam lo chang ta hai inzana le tourpuinain darkhuong vuok a ni bakah Kuki Women Union inrawinain candle sitvarna hun hmang a ni a, Rev. L.B. Angam, Director, ECA inrawinain tawngtairuolna hun hmang a ni a. Pu Thangkhosei Haokip, President, KIM le Ms Dr Tara Manching Hangzo, Chairperson, Women Affairs, KIM han Black Day message an hril bakah M. Songel ECA Church Choir le T. Champhai Church Choir han hlaa rawngbawlna an nei.



Manipur­ state sunga  Black day hmangna hmun dan hai chu­ Kuki Inn, Imphal;  Sangaikot, CCPur; Moreh, Chandel District; Tengnoupal/Sugnu, Chandel Dist; Tuisomjang, Ukhrul; Saikul Sadar Hills; Kangpokpi, Sadar Hills; New Keithelmanbi, Molbam Lhang, Sadar Hills le Phaitol Jiri/Tamenglong haia khawm hmang a nih.

Kum 1992­1993 inkara Naga le buoina suok huna thina tuokhai sunna nia Black Day hi hmang hlak a ni a, buoi hun sung khan mi 900 chuongin Kuki 900 chung an thi a hril a nih.

Mi motor an hire 10 zet   midang dang kuomah an banda
CCPUR:  Mr Mang David (38) s/o Jamkholian of New Lamka Vengnuam, CCPur chun Mr Ningthoujam Okendrajit (39) s/o N. Khelemba of New Bazar Bus Parking, CCPur le Thaonaojam Ningthem Singh s/o Th. Ibohal Singh of Luwangsangbam Mamang Leikai, Imphal East hai kuomah nikhatah hire man Rs. 3,000/­  dingin motor dang dang 10 an hmang tir a. Hun iemanichen a hire­man tha taka an pek hnungin an hire tir mi pahni hai hin midang dang kuomah motor hai hi an lo banda (Mortgage) pek niin ei thu dawngna chun a hril.

Ei thu dawngnain a hril danin Mr Mang David hin March & April, 2016 thla haia inthawk khan Ningthoujam Okendrajit kuoma hin a motor 3­ Scorpio S10, MN02B­1902, Bolero MN01S­1910 le Safari Storm MN01S­0933 hai chu nikhat hmang man Rs. 3,000/­ dingin an hmangtir a. A hmang man tha taka a pek leiin Mr Mang David chun laina hnai hai motor 7 zet­ Duster MN02A­8332; Verna MN01X­4718; Swift ML05J­4874; Bolero MN01S­2765; Maruti Car MN02A­5472, Bolero SLX ML05K­4978; Bolero A/F (a thar) hai chu a chunga ang bawk hin Thonaojam Ningthem Singh kuomah a hmang man Rs. 3,000/­ pei dingin an hmangtir nawk a. Sienkhawm tulai hnai el khan motor hai hi midang dang kuomah an lo banda vawng (mortgage) ti Mang David hin a hung hrietsuok niin a hril.

Hi thil le inzawm hin Mr Mang David chun CJM, CCPur Court­ah a khing a, CJM CCPur chun CJM/.CCP Vide Memo No. CJM/CCP/2016/197 dated 6/9/2016 dungzuiin CCPur Police Station­ah a forward a, Police chun FIR No. 45(9) 2016 CCP­PS U/S 420/406/34 IPC an registered a, case hi an suizui mek.

Mang David hin motor hmang man pawisa a hmu haia inthawk a thilthaw hi hlawk le tha a ti leiin a chunga ama mimal motor 3 hai baka khin motor dang 1 inchaw belsain a laina hnai hai motor hai lakhawma Thaonaojam Ningthem Singh hi an hmanghaw  (hired)  tir nawk a nih.

In kang thangpuina an va pek
CCPUR:September 12, 2016 zan khan Pu Lalzarlien of Thenmuol chengna in chu kangmei suokin a kangsiet vawng a, zanikhan Thenmuol khawnawtin tlangsin thawin in kang hi siemthatna sin thaw a nih. Hi vangduoina tlung  le inzawm hin HYA GHQ thuoitu Pu hai Upa Laldawnlien Varte, President, HYA GHQ; Tv. Alan Famhoite, AGS HYA GHQ; Mahajon Samson, President, HYA Rengkai Branch le Executive Member HYA GHQ han a hmuna fein an va kan a, HYA GHQ  President  Upa  Laldawnlien Varte in bufai Bag 1, Tv. Alan Famhoite in Khawnvartui litres 5 le Mahajon Samson in Chini Kg. 5  an va pek.

Pa hme leia thina tuok hai thangpuina Rs. 35,980 an inhlan
CCPUR: April, 2016 thla sunga Parvachawm khuoa Pu Benjoy Hrangchal nuhmei le a nauhai pahni zetin Pa hme leia thina an tuokna le inzawma HYA GHQ hmalaknaa Rengkai, Saidan, le Saikawt khuo haia thangpuina bawm an daw huna intlingkhawm Rs. 35,980/­ chu zanikhan Pu Remsang Hrangchal, Parvachawm Headmaster i/c kutah Upa Laldawnlien Varte, Prez. HYA GHQ in an hlan.

Pawisa inhlan huna hin Upa Laldawnlien Varte, Prez HYA GHQ; Pu Hmangkhum Songate, General Secy.; Tv Alan Famhoite Asst.Gen Secy.; Pu Sanhim, Secy Finance; Pu Samson Mahajan, exe Member le Prez HYA Rengkai Branch le Tv Roland, Secy HYA Rengkai Branch le Secy. Infl. HYA GHQ hai an thang.

Pu Benjoy a aia sum dawngtu Pu Ramsang chun, “Keini, khawkhata mi i hrietphak lo le khawtlang le hnam ta dinga thawsuok reng neilo, HYA fethlenga kan beisei phaklo malsawmna tamtaka inmi vur hi lawmum kan ti takzeta, petu le kan vangduoina chunga kut rawl thei dinga hma mi la pektu HYA GHQ chunga lungril takin lawmthu kan hrila, Pathien malsawmna tamtak dawng pei dingin ditsakna an hlan.

“Thangpuina ei pek hi lo inhnu ta deu sienkhawm, a suma hin indiknawna le inhrietthiem nawna iengkhawm a um nawh, hun thalem le remchang ei nghak leia a hunlai khan pesuok lo a nih tiin Upa Laldawnlien Varte, Prez HYA GHQ chun sum inhlan huna thuhrilna a nei huna chun a hril.

HYA Lamka branch in Sound system thar
CCPUR: Hmar Youth Association (HYA) Lamka Branch chun khawtlang thil le mipui pungkhawm ni haia pawimaw em em Soundbox/speaker 2, Amplifyer le Microphone hai thangin Sound system an inchawk thar. Hieng sound system hai hi zani zingkar 7:00AM khan Rev. B.L. Sandam in Pathien kuoma tawng­tainaa inhlanna a nei.

BJP National President le Central BJP thuoituhan Public meeting­ah thu an hril ding
IMPHAL: BJP National President Amit Shah thangsain Central BJP thuoituhai chu Imphal­a ni 2 sung cham dingin vawisun hin Imphal suoksanin Imphal hungtlung an tih. Central BJP thuoitu Imphal­a hung inzin dinghailai hin Union Human Resource Development Minister Prakash Javadekar, Ajay Jambal, BJP NE in­Charge, Ram Madhav, BJP National Secretary, Prahar Patel, BJP Manipur in­charge le Assam Finance minister le North East Democratic Alliance (NEDA) Convenor Himanta Biswa Sarma hai an thang ding niin BJP Manipur thusuok chun a hril.

Amit Shah le Central BJP thuoituhai hi Imphal an hungtlung hnungin BJP Manipur Office, Keishampat­ah Manipur BJP thuoituhai inhmupui an ta, uluk takin Manipur Assembly election hung um dinga an hmalak dan ding (strategy)  hriltlang an tih.

Central BJP thuoitu han BJP Manipur thuoituhai an inhmupui zova Polo Ground, Imphal­ah public meeting puithu taka nei ning a ta, hi huna hin Central BJP thuoituhan mipui pungkhawmhai hmaah thu hril an tih. Polo Ground a public meeting le Central BJP thuoituhai hung inzin ding lei hin Imphal khawpui sungah venghimna khau le uluk taka thaw a nih.

September 15, 2016 in Amit Shah le Central BJP thuoitu han  Manipur­a BJP worker­hai  meeting neipui an ta, Election huna an hmalak dan ding chungchang hriltlangpui an tih. Hi huna hin Booth level worker­hai khawm thang an tih. Hi meeting zova hin Central BJP thuoitu han Imphal suoksanin New Delhi le Guwahati pan  nawk tawl an tih.

CM tawngtairuolnaah a va thang
IMPHAL: Zanita Sangai Yumpham, Thoubal District a Idul­ Zuha Kut le inzawma Muslim sakhuo zuitu han tawngtairuolna anneinaah CM O.Ibobi Singh khawm a va thang. Hi hmuna Chanchinbumi han Y. Erabot Congress Party le MLA a ninaa intahwka an banna le inzawma thu an indawnna huna iengkhawm a hril nuom nawh. Politics thila hung ka ninaw a, sakhaw thila hung ka nih tiin Y. Erabot chungthuah comment iengkhawm a pek nawh.

Class­VIII pasihai khawm thang thei
IMPHAL: October 16­20, 2016 inkar sunga Senapati hmuna Army lakna um dingah hin Class­VIII pasihai khawm thang thei an tih tiin ARO, Rangapahar thusuok chun a hril. Thu chieng lem ARO, Rangapahar or Contact No. 8729987931 le 9862877598 ah kan thei ning a tih. Online Application chu Sept. 30, 2016 chenin thaw thei ning a tih. House Keeper/Mess/Tradesman category khawm laksa ding a ni leiin Class­VIII pasihai khawm (Manipur mi) an thang phal a ni ding bakah October 1, 2016 chena kum 32 tling chin hai khawm an thang phal ni bawk a tih tiin PIB, Defence Wing thusuok chun a hril.

Written Test Sept. 18 ah
IMPHAL: Revenue Department, Govt. of Manipur hnuoia LDC le Mandol sin lakna dinga Written test chu Sept. 18, 2016, 10AM a inthawk khin tan ning a ta, Exam Centres chu Imphal ning a ta, Exam centre dinghai chu 15­09­2016 in puonglang ning a tih tiin Under Secretary (Revenue), Govt. of Manipur chun inhriettirna a siem.

ZUF cadre 1 kap hlum
IMPHAL: September 12, 2016 zan khan Tamenglong district sunga Khoupum Taodaijang village­ah NSCN(IM) pawl le Zeliangrong United Front (ZUF) hai an inkaptuo a, ZUF cadre pakhat Pauguanglung kap hlum le a kuta inthawk AK­56 Rifle pakhat lakpek niin ei thu dawngna chun a hril.

Opium 2.6 kg leh Manipur mi 2 man
IMPHAL: Panaji Police han Sept. 12, 2016 zan khan Patto, Panaji hmuna Manipur mi pahni, Michael Thokchom (26) le Angon Meitei (20) inti hai chu Opium 2.6 kg leh an man. Opium mana um hi Rs. 5,50,000 manhu vel nia hril a nih. Mana um hai hi zanikhan Court hmaah inlangtir an nih.

PR ka recommend nawh: Rajkhowa
ITANAGAR: J.P. Rajkhowa chu Arunachal Pradesh Governor a inthawka ban a ni hnungin Arunachal Pradesh a President Rule um kha ama recommend lei a ninaw a, Prime Minister le Union Cabinet recommendation dungzuia puong niin a hril. Hieng laizing hin V. Shanmuganathan chun vawisun hin Arunachal Pradesh Governor 20­na dingin sesamna nei a tih. V. Shanmuganathan chu zanikhan Helicopter­a chuongin Naharlogun a tlung tah.

HPC(D) le inbiek nawkna ding la sukfel lo
AIZAWL:  August 10, 2016 nia Tourist Lodge, Chaltlang­a Mizoram sawrkar le HPC (D) han inbiekna an nei huna khan September, 2016 thla sunga inbiekna sunzawm nawk dinga remti a ni a. Inbiek nawkna ding le inzawm hin HPC(D) chun a thil ngen le thil phut hai  Mizoram sawrkar kuomah an peklut ta a. HPC(D) thil ngen le phut hai hi  Mizoram sawrkar chun a enfel mek a, a  enfel zo hnungah inbiekna hi sunzawm nawk ni dingin ei thu dawngna chun a hril. September, 2016 thla sung ngeia inbiekna hi sunzawm nawk tum a nih.

AAP in MLA fund 250% a sukpung a tum
NEW DELHI: Delhi­a Aam Aadmi party (AAP) sawrkar chun MLA hai local area development (LAD) fund tuta Rs. 4 crore chu  Rs. 14  crore ( 250%) a sukpung dingin rawtna a siem. Hi thil hi MLA han an constituencies haia hmasawnna sin thawna sum indaitawk taka an thaw theina ding ditna leia thaw tum a nih tiin official thusuok chun a hril. Rawtna hi sawrkar thlungpui kuomah a pawmpui dinga thawn a nih. Hi baka hin tuta financial year sung hin MLA tin hai kuomah one­time additional allocation pek dingin rawtna a siem bawk. Kum 2011 a Ms Sheila Dikshit CM nina hnuoia Delhi sawrkar khan MLA LAD fund hi Rs. 2 crore a inthawk Rs. 4 crore­a a lo sukpung a nih.

Khawmuol hre lova kum 9 a um hnungin a thi
KOCHI: A damdawi siem a ensin (test)  leia  kum 9 zet khawmuol hrelo (coma)­a a um hnungin Ayurvedic physician PA Baiju (46) chu zani hmasa zingkar khan Paipra hmuna a chengna Inah a thi. P.A. Baiju hin Iduki district­a Bison Valley­a government ayurvedic dispensary hmuna medical officer sin a thaw lai January, 2007 a kha a damdawi siem hi a ensin a nih.

Ei thu dawngnain a hril danin ama va pan tu nupui pakhat chu a damsawi siem `kashaayam’ (ayurvedic concoction) hi  fak dingin a lo pek a, hi damdawi a fak lei hin khaw hre lovin a um a, amiruokchu vangneia siemin a damsuok a. Hi thu hi ama an van tlun hunah a damdawi chu a kuoma hung chawi dinga hrilin, a him a nih ti finfie na dinga  amain a fak sin leia khaw hre lova tlu le  chu taka inthawk khawmuol hre lova um sawng ta nia hril a nih.

Chikungunya leiin mi 5 an thi tah
NEW DELHI: Tulai hin Delhi khawpui le a se velah Khawsikpui natna chikhat Chikungunya natna hri an leng­a, hi natna hri lei hin mi 5 an thi tah. Hi natna hi thokanga intahwka intan le kai natna hri tho a nih. Dengue natna hri lei khawmin mi 10 an thi tah. Hi natna hri inlengna thua hin Centre­a BJP le Delhi­a Aam Aadmi Party sawrkar hai pahni chu a mawphurtu ni ve vein an intumtuo.

VAWISUN THUPUI
Lalpa chun rorelna fel a ngaina sih a, A mi inthienghai chu a fesan ngai nawh a, Kumkhuoha dinga vawngthatin an um hlak a, Mi rilo thlahai ruok chu sukbohmangin um an tih. ­ Sam 37:28

Editorial: Ei ram ngirhmun hi

Ei ram, Manipur state ngirhmun hi kiltina inthawka ei hang en vang vang chun a ngirhmun hi a thanaw hle. Sum le pai ngirhmun, law and order ngirhmun, fak le dawn ngirhmun hai lem hi chu a thanaw zuol niin anlang. Hi lei hin ei ram ngirhmun hi ram thuoitu le roreltu han lungrille ti takzeta an ngaituo a, hma an lak a tul a nih. Sawrkarna chel mektu le sawrkar thar chel tuma hma latu political party tum tum hai khawma ei ram ngirhmun thanaw takel hi siem that ngei tuma thang an lak ve nuom a um. Election politics ringawt chun ei ram ngirhmun that nawna hi siem that thei ni ngai naw nih. Lungril le titakzeta ram, hnam le mipui hmangaina neia hma an lak nuom a um. Chuong a ninaw chun ei ram hmabak ding hi an thim hle niin an lang.

Ei state sawrkarin sum le pai ngirhmun a that tawknaw leiin sawrkar thawktuhai hlaw khawm pek harsa a ti hle. Central Sponsored Scheme hnuoia enkawl Development thenkhat hnuoia thawktuhai lem chun an hlaw thla tam tak an lak ta nawh. Hlaw em pek thei lova a um el hi chu thil indiklo le fello a um lei a ni ring a um. Sawrkar sum an rek leiin ni dang ang lo takin thlatin sawrkar chun sum peksuok khar (ban) hun a nei nawk ta tlat el. Overdraft ngirhmuna ei um lai ang deu khan state sawrkar chun hlaw siem theina ding le hlaw pek theina dingin thlatin order an suozie ta a nih. Tuta thla khawm hin ban order an suo nawk vat ta ring a um.

Hiengang khawpa state sawrkarin sum harsatna a tuok zing lai hin ei state Vaibelsie tel sengna ding Department tum tumah sin ruok chi hran hran lakna ding Order an suo a, Interview/DPC a huoihawt mek.  Sin ruok tam tak a hung um hi lawm a um a, sin nei lo tam takin sin an hmu pha ding a nih. Lawm a um le inruolin an hlaw ding hi tha takin a pek thei dim ti chu ngaituo um takel a nih. Assembly Election a hnai a, sum zawngna dinga thaw a ni dim ti chu mi tam tak ngaituonaah a um a nih. Iengkhawm nisienla, tuta sawrkar fe mek chun harsatna a tuok pha naw el thei a, sawrkar thar hung um ding ruok chun a thawhla hle ring a um.

Sum le pai ngirhmun el chau ni lovin ei state a law & Order ngirhmun chu a tha tawk nawh ti chu ei hriet seng. Tuta ngirhmun anga a fe pei chun Assembly election hi zalen le tluong takin ei nei thei ding am ti hi ngaituo um takel a nih. Sawrkar thawktu, election duty a fe ding hai ta ding khawmin Assembly election hung um ding hi hawphur um takel a nih. Thei nisienla chu election duty hi awl an nuom seng ring a um. A bikin tlangram, hmun kilkhawr deua elctio duty a fe dinghai ta ding lem chun hawphur a um zuol. Hi lei hin election a duty lawmman siema um hlak khawm suktam lem ni thei sienla thiltha tak ning a tih. Election huna hin sawrkar neka thunei lem hi an um hlak a, hi thil hi ei rama election huoihawt (conduct) harsatna tak pakhat a hung ni hlak.

Tuta tuma Assembly election hung um dinga hin, political party tum tum hai chun ei rama fak le dawn (economic) ngirhmun that nawzie an hril  thei vawng ring a um. Amiruokchu, a siem that dan ding hi an ngaituo dim chu maw? A siem that dan ding ngaituoin lo induong hai sienla khawm a tak takin an sukpuitling zo dim maw? Mipui ta ding khawma hi thil hi ngaitha chi a ninaw a, uluk taka ngaituo chet chet chi a nih.

Tuta sawrkarna cheltu hin an term tawp ding tepa khawm hin inrenna tiengpang thil an hril thu ei la hriet hri naw a, election huna chun inren taka sum hmang an tum thu an la hung hril el thei. Ram rethei tak, leibat hau em em hin a sem tieng an inhrilhmu vawng a; Nei nei mang lovin sem dur dur hi uor a, hi thil hi mipui han ei inhnikpui nia an hreit lei a ni ring a um.  A man bo le a thlawna thil sem le pawisa sem hi a thapa tak an nawh. Hi lei hin mipui tiengpang khawmin a sem tiengpang hi inhnikpui  naw inla, ei ram ngirhmun hi hrie a, ei ram ngirhmun siem tha a, dawmsang theitu ding tiengpang hi inhnik lem ei tiu.

Don't Miss
© all rights reserved
made with by Simon L Infimate