MHJU Day hlawtling taka hmangzo; 
MHJU Day­cum­Election Tamenglong­ah nei dinga rel a nih
SENAPATI:  Manipur Hill Journalists’ Union (MHJU)  Day a vawi 32­na chu Sept. 7, 2016 khan DRDA Hall, Senapati hmuna hlawtling taka hmangzo a nih. Hi huna hin M.L. Markson, Chairman, ADC, Senapati khuollien, Meghachandra Kongbam, Director, Information and Public Relations(IPR), Govt.of Manipur le Col. Ajay Kumar, Public Relation Officer (PRO),  Defence Wing, Imphal Special Guest in an thang tawl. Lalrawngbawl Hmar, Deputy Director, IPR, CCPur, Chandel, Ukhrul, Tamenglong le Senapati Distrcit a inthawka Journalist­hai le Sobapati, Correspondent, Asom Tribune han hi Day hmang  hi an uop ve.



M.L. Markson chun, Manipur­a tribal­hai thangruol, inpumkhata um le tribal­hai rights humhim dinga thanglak a pawimawzie, ei thangruol naw chun muongna le inremna a um theinaw ding thu hai uor takin a hril. Manipur a tribal­hai rights hi ei ni rawiin ei humhal naw chun midang han mi humhal pek naw ni hai. Ei rights ei humhim theina dingin regional party sukhrat a tul ti thu hai a hril bawk.

Chanchinbu lien, sap­tawnga suokhai hi khawpuia chenghai ta ding chun a thain a tangkai a. Tribal tawnga suok nitin Chanchinbuhai hi tlangram bielah an pawimawin an tangkai hle a, mipuihai thil chi tum tum hril hretu bakah India le khawvela nitina thil tlunghai thedar a, mipuihai hriltu an nih. Hi lei hin dialect/vernacular Newspaper­hai sin thaw le mawphurna hi a lien hle a nih. Tlangram biela Journalist­hai Journalism tienga an hrietna sukpungna dingin Ukhrul le Senapati haiah 7 days basic course in News reporting buotsai ning a tih. Manipur a ding chun hi thil hi a hmasa takna ding a la nih tiin hi huna Meghachandra Kongbam in thu a hril huna a hril. Chun, DIPR chun hill districts 2 haiah Information and Public Relation Festival huoihawt a tum niin a hril bawk.

Programme hmangzo hin khawp le tlai taka bufak tlangna nei a nih. Hi zo hin MHJU thuoitu han meeting annei a, MHJU Day a vawi 33­na le MHJU thuoitu thar dinghai thlangna chu September 7, 2017 ah Tamenglong­a nei dingin an rel.

Lok Adalat le Traffic Mobile Court
CCPUR: National Legal Services Authority le Manipur State Legal Services Authority enkaina hnuoiah Churachandpur District Legal Services Authority chun September 10, 2016, 11AM a inthawk khin Chief Judicial Magistrate Court, CCPur hmunah ‘One Day Lok Adalat’ buotsai an ta, hi ni ma hin CCPur khawpui sung hmun hran hran haiah Traffic Mobile Court buotsai an tih.

Lok Adalat nei huna thubuoi dang dang, hming, pa, nu, address thua thubuoi relfel ding nei han Sept. 10, 2016, 12:00Noon chenin Chairman/Secretary, CCPur Legal Services Authority, (CJM, CCPur) inhmupui thei ning a tih.

Chun, Traffic Mobile Court hmun hran hrana nei dinga hin Traffic Rule and Motor Vehicle Act  bawsietu hai chu man le fine inchawitir pei ning an tih. Mipui himna ding ditna leia hi thil hi thaw tum a nih tiin Secy, Dist. Legal Services Authority, CCPur chun inhriettirna a siem. Motor khaltu (2 wheeler) helmet khum lo, tax pe lo, motor lekha nei lo le Licence nei lo hai chu man le fine inchawitir pei an ni ding a nih.

Town sungah an hung innghat nawk tah
CCPUR: JACAATB in Tribal Unity Day August 31, 2016 nia hmang ding leia shutdown an thaw leia Imphal le CCPur kara service passenger phurtu Bus le Winger hai hun iemanichen zet Town sunga an hung innghatnaw hnungin Sept. 7, 2016 a inthawk khan New Bazar­a parking hmunah an hung innghat nawk tah.

Pulser Bike inruk 
CCPUR: September 7, 2016 zan dar 7 vel khan Mr Kamlianding of Vengnuam, N. Lamka hmang lai Pulser 200NS (Red color) MN02B­1502, Engine No. JLZCEF11844, Chasis no. MN0236FZ0ECF2065, Ngathal khuoa lampui sira an nghat chu tu ti hrietlo rukru han an inruk a, motor neitu hin Police­ah report a pek.

One Day market an thaw ding
CCPUR:  Tuithaphai Presbytery Nuhmei Pawl, ICI chun September 10, 2016 (Inrinni) , 6:30AM a inthawk hin Lighthouse Lane­ah Pathien rama rawngbawlna dingin “One Day Market” thawng an tih. Hi huna hin Sahro, Sa, Thingpui, Secondhand le thil dang dang zawr an tih. Pathien rawngbawlnaa ngaia an bazar siem hi va dawr seng dingin ICI Tuithaphai Presbytery Nuhmei Pawl chun ngenna le fielna an siem.

Sub­Dealers han K.Oil lak thei 
CCPUR: CCPur District sunga  Khawnvartui (Kerosine Oil) Sub­Dealers hai ta dingin September, 2016 quota chu a hnuoia S.K. Oil Dealers haia inthawk Sub­Dealer Identity Card  chawiin mani quota ding Khawvartui lak thei  ni tang a tih. 55­Parbung in M/s Pudaite Traders; 55­Thanlon in M/s Paite; 57­Henglep in  M/s Z.T. & Co; 58­CCPur in M/s JHK Agency & ZT & CO; 59­Saikawt in M/s Pudaite Traders le 60­Singngat in M/s JHK Agency ah la thei an tih.

PMSMAscheme Sept. 9 a inthawk tan ding
CCPUR: Dr VC Pau Tonsing, DFWO inrawinain zani hmasa khan CMO Office Chamber­ah  Central Government Scheme thar Pradhan Mantri Surakshit Matritva Abhiyan (PMSMA) hlawtling taka hmang le thaw a ni thei dan ding thu hriltlang a ni a. Hi huna hin Imphal­a inthawk Dr. Heena Seran, state Nodal Officer, Maternal Health hai bakah PHC tum tuma MO in­charge hai le CCPur district sunga Accredited Private Hospitals 4 ­ Sielmat Christian Hospital, Lamka Nursing Home, Nazareth Nursing Home le  Peoples Health Foundation haia inthawk  palai hai an thang tawl.

PMSMA hi nuhmei naupai  lai hai Anti­Natal Check up tha taka thawna ding le hrisel  taka naute an hung piengsuok theina dinga hmalakna tiengpang a ni a,  June 9, 2016 a kha PM Narendra Modi in a lo hawng ta a ni a, Manipur a chun August 8, 2016 khan Health Minister K. Korungthang in tan thei dingin a lo hawng ta bawk a nih. PMSMA thiltum tak chu nuhmei naupai hai hriselna sukthat, Maternal Mortality Rate sukhnuoi, a pawimaw anga nuhmei naupai hai Counseling pek ding ti hai a nih. Hi dungzui hin Accredited Private Clinic hmun haiah thlatin ni 9  zatin  nuhmei naupai han Free Check­up dawng thei an ta,  CCPur District a chun September 9, 2016 hin hmang tan ni dingin ei thu dawngna chun a hril.

Summary Revision thuah training tan
CCPUR: Election Commission of India (ECI) thupek dungzuia DEO/DC, CCPur in inhriettirna an suo dungzuiin Electroral Roll Special Summary Revision ding le inzawmin zani 10AM a inthawk zantieng 5PM chen khan District Training Centre, Tuibong, CCPur hmunah BLO Supervisors, Booth Level Officers le Political parties tina Booth Level Agents han training an nei tan.
Zani 10AM­1PM sung khan 58­CCPur le 59­Saikawt A/C sunga mi han training an nei a, SDO, CCPur in training a pek. Sept. 9, 2016, 10AM­1PM sung hin 60­Singngat, 55­Tipaimukh han training nei nawk an ta, 2:00PM­5:00PM sungin 56­Thanlon le 57­Henglep sunga mi han training nei nawk an tih.

Electoral Roll Revision huna hin Electoral Roll­a la um lo a thar thunlutna ding Form 6; Hming peihmang (deletion) a dingin  Form 7;  Roll a hming/record indiklo hai sukdina dingin Form­8 len umna hmun insawn (transfer/transposition) a dingin Form 8A hai hmang ning a tih.

August thla sung naute 222 an pieng
CCPUR:  August, 2016 thla sung khan District Hospital, CCPur a chun naute pieng thar 222 an um a, OPD a damnaw inen 18,375 an um a, Blood Bank­ah thisen Unit 53 a um. Natna dang dang leia OPD a inen damnaw 17,776 an um a, hi lai hin naute thla 1 hnuoitieng (neonate) 237, naupai Anti­Natal checkup thaw 308 an um bawk. Naute pieng thar 222 hin pasalte 106 le nuhmeite 116 an um. Hi laia 2 chu atdawk le  nau inphir pieng pakhat an um  a, hmun danga enkawl dinga refer 2 an um.

August thla sung hin naute pieng hnunga thi umnaw hai sienkhawm a thisaa pieng (still birth) 2 an um a, nau nei leia thi an um naw a, naupai mi 237 admit an nih.  Children Ward tum tumah naupang 244 (pasal 122 le nuhmei 99) admit anni a, hi laia 221 in August thla tawp chen khan Hospital an suoksan ta a, naupang 4 chu damzo lovin an thi a,  naupang 10 hmun danga enkawl dinga refer an nih.

Chun August thla sungin Ward­ah mi 8 an thi a, Surgical ward­ah damnaw 138 (pasal 78 le nuhmei 60) admit an ni a, mi 9 Imphal tieng refer an nih. Surgical ward­a enkawl August thla sung thina tuok an um nawh.

August thla tawp chena Blood bank­a thisen Unit 53 um  lai hin­  A+ Unit 16, B+ Unit 2, AB Unit 14 le O Unit 22 a um; Mi tlawmngai han hi hun sunga thisen anpek chu Unit 106 a tling a, damnaw hai kuomah Unit 121 pek an nih.

JCILPS in Sept. 21 chen hun an pek
IMPHAL: JCILPS chun Sept. 21, 2016 chena State Assembly Special Session neia Bill thar putlut le pasi dingin hun an pek. Hi hun tiemchin sunga an thil ngen sukpuitling a ninaw chun nuorna chi hran hran hrat takin an thaw ding niin B.K. Moirangcha, Convenor, JCILPS chun a hril.

Khomdram Ratan bail­a insuo
IMPHAL: JCILPS Convenor hlui Khomdram Ratan chu Session Judge, Imphal West M. Manojkumar chun zanikhan Bail in an suo. BAil­a a suokna ding hin PR bond Rs. 1,00,000/­, surety Rs. 1,00,000/­ le  JMIC, Imphal West­I ah Rs. 20,000/­ peklut ding ti a nih. JMIC, Imphal West­I phalna lovin Manipur a suoksan ding a ni nawh tiin Court thusuok chun a hril bawk.

Document neilo mi 35 Police kutah
IMPHAL: JCILPS chun non­local hai zawngsuokna sin an la sunzawm zing a, zanikhan JCILPS thlawptu  hai bakah volunteers le tuolsung meira paibis le club members han NH­1 a inlawn motor hai Pheidinga hmuna an dap a, document mumal tak neilo  mi 35 an man a, Sekmai Police station­ah an peklut. Thla hmasa khawm khan document mumal neilo mi 500 vel motor a inthawk keidawkin Police kuta an lo inhlan ta bawk a nih.

Attorney General in a hnawl
IMPHAL: Manipur­a Extra­judicial killings 1,500 neka tam chungthu rel le sui dinga National Human Rights Commission in ngenna a siem chu Attorney General Mukul Rohtagi chun a hnawl. Hi  chungthu suizuina hin Army tiengpangah thil suksiet thei a nei ding niin Rohtagi chun a hril. Hi chungchanga hearing chu October 26, 2016 a nei nawk dinga ti a nih.

Theitui bottles tam tak raw
IMPHAL:  Coca­Cola le Sprite theitui, BSR Enterprises, M.G. Avenue, Imphal a inthawka bottles tam tak mana um, expiry date inziekna thaisieta um hai chu zani hmasa khan AMSU le NSU volunteers han an raw. Hieng theitui zawrtu le expiry date thaisetu hai chi Sept. 15, 2016 chena an kutah an inpe naw chun Manipur­ah Coca­Cola products an ban ding niin Manjit Sarangthem, General Secretary, AMSU chun a hril.

PS thar 8 le Out post thar 8
IMPHAL: Sept. 6, 2016 a State Cabinet meeting chun Police Station thar 8 le Police Out Post thar 8 hawng belsa ding; Fire Sub­Station thar 7 hawng belsa ding; Manipur Fire Services hnuoiah Post thar 126 lak belsa ding; Economics and Statistics Department hnuoia Contract basis a thawk Investigators 73 hai sin suknghet ding, MPSC fe thlenga Assistant Directors 4 lak ding le Contract basis a thawk ding Data Entry Operators 2 hai sin suknghet ding le Kendriya Vidyalaya indin le bawlna ding Tamenglong ah ram inchawk ding tihai an rel niin RD & Panchayati Raj Minister bakah State Govt. Spokesperson M. Okendro Singh in Cabinet meeting zova Chanchinbumihai an hmupui huna a hril. Police Station thar 8 hawng belsa ding lai hin CCPur district sungah Kangvai, Behiang le Sagang hai a thangsa.

Sept. 21 ah ECI team an hung inzin ding
IMPHAL: 11th Manipur Legislative Assembly Election hung um ding le inzawma State sawrkar insingsat dan a hmuna hung enfel dingin Election Commission of India (ECI) team chuni 2 sung cham dingin Imphal hungtlung an ta, a hran sengin Chief Secretary, CEO, Nodal Officers, DGP, Political parties le DEOs, EROs le SPs hai inhmupui an ta, State Election Management Plan, Security Plan, Communication Plan, District Level Action Plan hai hriltlangpui an tih tiin Vivek Kumar Dewagan in zani hmasaa Old Secretariat, Imphal Conference Hall­a Chanchinbumihaian hmupui huna a hril. Manipur a Assembly Constitutencies 60 haia Draft Electoral Roll chu 07­09­2016 a insuo a ni ta a, final eletoral Roll chu January 2, 2017 a insuo ning a tih tiin Vivek Kumar Dewagan chun a hril.  Draft Electoral Roll a vote umzat chu 18,07,843 a ni a, 2016 final electoral roll a voter umzat chu 18,26,962 a ni a, a umzie chu voter umzat hi a tla hnuoi tina a nih tiin a hril.

Veterinary Graduates 300 chuong
IMPHAL:  Manipur Public Service Commission (MPSC) fe thleng le rules and regulations indik tak hmanga Veterinary Officer sin la hlak dingin All Manipur Unemployed Veterinary Doctors Association (AMUVDA) chun Manipur sawrkar thuneituhai an ngen. Manipur­ah sin la nei lo Veterinary Graduates (B.V. Sc.) 300 chuong an um niin Dr Menalsh Laishram, Member, AMUVDA chun zani hmasaa Manipur Press Club, Imphal­a Chanchinbumihai an hmupui huna a hril.

GST Bill­ah President in zanikhan suoi a thaw tah
NEW DELHI: Zanikhan India President Pranab Mukherjee chun Goods and Services (GST) Bill­ah suoi a thaw tah. GST hi Narendra Modi PM nina le BJP thuoina hnuoia NDA sawrkar chun April, 2017 a inthawka hmang hman dinga a riruong a nih. GST hi indirect tax lak dan thar ding, Central le State Tax, hieng Value Aded Tax (VAT), Excise duty, Service Tax, Central Sales Tax,Additional Customs le Special Additional Customs duty hai a huomsa vawng ding a nih.

GST Bill hi August 8, 2016 a Parliament in a passed, State tina an pawmpui dinga thawn dar a ni a. GST Bill hi dan a hung ni theina dingin India rama States 29 um hai laia a zatve bekin an pawmpui hmasa a tul a. States 17 han an pawmpui hnunga President hin GST Bill­a suoi a thaw ta a nih. Arunachal Pradesh Assembly chun zanikhan a pawmpui belsa nawk leiin tuchena hin India rama states 29 um hai laia Assemblies 19 han GST hi an  pawmpui ta a nih. GST Bill pawmpui hmas tak chu Assam State a nih. GST Bill pawmpui ta state hai lai hin Assam, Bihar, Jharkhand, Chhattisgarh, Himachal Pradesh, Gujarat, Madhya Pradesh, Delhi, Nagaland, Maharashtra, Haryana, Sikkim, Mizoram, Telangana, Goa, Odisha, Rajasthan le Manipur   state hai an thang.

Nuhmei 2 nunrawng taka that
AIZAWL:  Sept. 7, 2016 zan khan Saiha District, Mizoram huop sunga Chhuarlung khaw mi, nuhmei pahnihai chu nunrawng taka that an nih. Elizabeth (28) chu lo tu sungah a thisaa hmu a ni a, a ruong hi saruoka sie, a kuthai pheihnungkira khit, a ringru a tliek a, a taksa bung hran hranah hliemna huhma hmu theiin a  um a, a lu chu leidara inkhum a nih. Chun, tu tuolah nupui kum 60 mi vel, Sidney chu a luah vuok hlimena nuhma tam tak hmu a nih. Hieng nuhmei pahnihai hi suollui ni dinga ring an nih. In tieng an inlawi naw leiin zanah a khaw mi han an va zawng a, chu taka a thisaa an va hmu a nih.

Darkar 24 sunga FIR upload dingin
NEW DELHI: Sept. 7, 2016 khan Supreme Court chun states le Union Territories tina Police hai chu FIR hrim hrim darkar 24 sung ngeia upload dingin an hriettir. Mizoram le Sikkim haiah internet a that naw leiin FIR upload hun ding hi darkar 72 a suksiet pek an nih. Hi thil hi Police hmalakna sukhrat le siem that ditna leia thaw dinga ti a nih.

Irom Sharmila Film siem tum
MUMBAI:  Manipur a Civil Rights le Political activist, Iron Lady tia ko hlak Irom Sharmila film siem tum a ni a. Hi film a Irom Sharmila Chanu lem inchang dingin Actress Taapsee Pannu (29) chun contract a signed ta nia hril a nih. Taapsee Pannu film thar tak “Pink” chu Sept. 16, 2016 a tlangzar dinga ti a nih. Hi film Director chu Aniruddha Roy Chowdhary, Rashmi Sharma le Shoojit Sarcar han an produced a nih.

Tukum sung lum leiin AP­ah mi 723 an thi tah
HYDERABAD: Andhra Pradesh­a chun tukum thla 4 vel liemta sung khan boruok lum taluo tuorzo lovin mi 723 zetin thina an tuok ta niin  Deputy Chief Minister N. China Rajappa chun zanikhan TDP member Modugula Venugopalla Reddy le member dang hai indawnna dawnin Assembly­ah a hril. Lum leia thi hai laia 238  hai chu  Chittoor district a thi an ni a, 134 hai chu East Godavari le 115 hai chu Vizianagaram hmuna thi an nih tiin Mr Rajappa chun a hril.

Kum 2015 khan boruok lum tuorzo lova thi 1369 an um a, kum 2014 in 448 le 2013 khan 861 an um niin Rajappa chun a hril.

VAWISUN THUPUI
Pasiein a koin ama chun sanhim a ta, Mi rimsi thangpuitu neinaw khawm chu sanhim a tih. Mi rimsi le pasiehai chu lunginsiet a ta, Pasiehai hringna chu sandam a tih.  ~Sam 72: 12­13

Editorial: Draft Electoral Roll ngaipawimaw hun a nih

Ei hriet seng angin Election hi chu thil danghai ang a ni nawh. A pakhatna chau umzie nei le a hlawtling an ni hlak. Pahnina le pathumna han umzie a nei ngai nawh. MLA tlingna ding chun Vote hmu tam le vote nei tam a tul. Electoral Roll a hming chuong naw hai chu vote nei lo le dan ang tak chun vote thlak thei lo an nih. Hieng a ni lei hin MLA tlingna ding le MLA hauna ding chun vote nei  tam a tul a. Vote nei tamna dinga hmalak hun a ni leiin ram le hnam thuoitu han ngaipawimaw zuolhai sienla nuom a um. Mani mihai MLA tling tam hai sienla ei ti chun a hun laia buoipui ngei ngei ding a nih. A hun inkhel le liem hnunga chun umzie bo a ni hlak.

Vote nei hi election hun lai chau a tul le pawimaw a ninaw a, sawrkar sin zawngna, lekha inchukna le sawrkar thil chi tum tum thawna haia tul le pawimaw a ni leiin vote nei thei dinga ei kum a tling ta chun Electoral Roll­ah ei hming zieklut ve ngei ngei ding a nih. Vote ei ti hivote thlak huna chau ngaipawimaw ding a ni nawh. Manipur mi annawleh India mi ei ni chun ei nei ngei ngei ding a nih.Vote neinaw han harsatna antuok rawp hlak.A bikin Zohnathlakhai lai Hmar mi han vote nei chungthu hi ei ngaitha zuolniin an lang. HI lei hin Hnar hnam sunga khawtlang thuoituhai, ram le hnam thuoituhai le election­a ngir ding han ngaipawimaw ngei ngei hai sienla nuom a um.


India khuo le tui ei ni chun vote thlak le vote nei hi ei mawphurna le ei thaw ding ngei ngei (duty) a nih. Khawvela cheng ei la ni leiin election le vote thlak hi ngaitha thei ding ei ni nawh. Inthlang rama cheng le um ei ni leiin ei ram dan chu ei zui ngei ding a nih. Ei ram dan ei zui naw chun dan bawsie ei ni ding a nih. Kristien sakhuo zuitu le piengtharhai chu dan bawsie lo dinga hril le inchuktir el chau ni lovin thupek ei nih. Ei Pathien thupek ei zawmnaw chun  misuol ei ni ding tina a nih. Inthlangnaa ngirhai an thienghlim naw lei ela thienghlim naw ding ei ni nawh ti hi hriet tlat ding a nih.

Manipur  Assembly election nawk ding a hnai ta a. Hi election a ngir ve nuomhai chu an inpuocha tan mek a. Election le inzawmin meeting le bu faktlang ti ri hai khawm Manipur phairam le tlangram biel haiah hriet theiin a um tah. Manipur phairam biela chun election dinga insingsatna hi a boruok a lum tan ta hle. Candidate ding dit dan thuah  ngaidan inkal lei dam a insuolna chen a tlung tan tah. Hmun pakhata lem chun candidate tum mi pahniin ruoi an the a, an thlawptuhai chu an inkhingtuo  nasa hle a. An inseltuo a, a tawpah an insuo a, bu khawm fa tha hlei thei lovin an um pha. Election hun ding khawm puong a ni hma election ding leia insuoltuona a tlung chun election huna lem chun boruok a sosang nasa hle ring a um. Hieng a ni lei hin Assembly Election hung um ding hi hawphur um takel a nih.

Manipur Assembly election ding hi state sawrkar le Election Commission of India hai khawma an ngaipawimaw leiin tluong taka election nei a ni theina dingin hma anlak tan ta  anih. Assembly Election ding le inzawmin full Election Commission of India team chu September 21, 2016 hin Chief Election Commissioner rawiin Imphal­ah an hung inzin ding a nih. Election Commission of India (ECI) team hin CEO, Manipur, Nodal Officer, Chief Secretary, Director General of Police le Political Party­hai inhmupui an ta, election dinga hmalak dan, law and Order chungthu hai hriltlang an tih.

Manipur Assembly seats 60 umnaa draft Electoral Roll chu September 7, 2016 khan insuo a ni tah. Draft Electoral Roll hi DC/DEO le SDO/AERO tin office haia en thei a ni tah. Sukdik, siemthat, sawisel ding nei le electoral roll a hming zieklut thar nuomhai ta dingin October 7, 2016 chenin thaw thei ning a tih. January 1, 2016 chena kum 18 tling tahai chen Electoral Roll a hin hming zieklut belsa thei a ni ding a nih. Hi thil hi thil pawimaw takel a ni leiin mimal, nu le pa, khawtlang thuoitu le ram le hnam thuoitu le inthlangnaa ngir tum hai po po chun ngaipawimaw hle ding a nih. Tu hi a hun lai a nih.

Post a Comment

Powered by Blogger.