VTI Accreditation hmu lawmthu hrilna hun hmang
CCPUR: Management Committee, CCPur huoihawtnain zanikhan Vocational Training Institute (VTI) Auditorium,  Muolhlum Rengkai hmunah  SCVT, Manipur­a inthawk VTI, a project of RPC­NEI in  Recognition/Accreditation a hmu lawmna le Pathien kuoma lawmthu hrilna hun hmang a nih. Hi huna hin RPC sunga Secretaries, Department head le H. Doungel, Coordinator, NYK hai khawm thangin infuina le hmalak pei dan ding thurawn tha tak tak hai an hril.

Certificate Pathien kuoma inhlanna le lawmthu hrilna RPC senior Pastor Rev. Damkhawlienin a nei a. RPC Secretaries Rev. Dr V. Lalnghakthang, Rev. Edwin Darsanglur, Rev. Saithanglur le Rev. Ros Infimate han VTI in recognition a hmu chu an lawmpui thu le hmatieng peia tuta neka tha le hlawtlingna ditum tak hmu le dawng pei dinga an ditsakna thu hai thu an hrilna huna an hril tawl.

Pu H. Doungel chun, Youth le inzawma sin thaw a ni ve naah, thalai hai ta dinga hiengang skill training theina a um chu lawmum a ti thu hrilin hmatieng peiah personality development le inzawm khawma training huoihawt pei dinga a ditsak thu a hril.

VTI Coordinator Laltanvel chun, vawisuna VTI recognition lawmna el khelah VTI kum 10 a tling lawmna khawm a ni sa thu report a pek huna ahril a. VTI CCPur centre a hin  kum 2006 a inthawk thalai 1111 an lo graduate ta thu, hi laia 63% chun fak hmu phanaa an hmang ta thu, SCVT recognition a hmu hi National level ninaw sienkhawm a certificate a issue ruok chu National Level­a valid a ni thu le hiengang recognition hi CCPur­ah a dang an la um naw bakah Manipur­a dingin VTI chu private Vocational Training Institute recognised umsun la nia a hriet thu le National level­a training provider a la hung ni vat a beisei thu a hril.
 
VTI Rengkai, Muolhlum hin tuchena DIC, DTO le NYK CCPur haia inthawk Recognition/ affiliation a lo nei ta a, NYK CCPUR le CCpur District Magistrate a inthawk Appreciation Certificate khawm an lo hmu ta a nih.

MHJU Day Senapati­ah
IMPHAL:  Manipur Hill Journalists’ Union (MHJU) 32nd Anniversary Foundation  Day Celebration, 2016 chu September 7, 2016, 11:30AM a inthawk khin DRDA Hall, Senapati, Manipur hmuna hmang ning a tih. Khuollienin M.L. Markson, Chairman, ADC, SEnapati thang a ta, Guest of Honour in Meghachandra Kongbam, Director, DIPR, Govt. of Manipur thang a tih.

Rukru han KVK Office an rawk
CCPUR:  September 4, 2016, 2­3AM inkar khan rukru han Pearsonmun­a KVK Office an rawk a, Account­cum­Administration Section­a thil tum tum an inrukhmang. Thil inruk hmanga um hai lai Computer Monitor (flat)  CPU, UPS, Battery 2, Stablizer 1, Laser Printer 1, Xerox stabilizer 2, UPS­ 62 1V ­1, UPS ZEB­U725­ 2 a thang.

Sitam tuilienin leilet a suksiet
CCPUR: August 31, 2016  khan ruotui tam leiin Senvawn­a inthawka km. 11 vela hla Sitam khuoa tui nasa takin a lien a, tuilien hin Leilet iemanizat a suksiet niin Pu Lalropieng, Chairman, Senvawn Village Authority a inthawk ei thu dawngna chun a hril.  Senvawn Village Authority chun September 3, 2016 khan tuilienin Leilet a suksiet hai hi a hmuna an va enfel a, sawrkar thuneituhai kuoma intlun an tum. Tuilienin leilet a suksiet hai an tuorpui thu VA Chairman chun a hril bawk.


Chun, zani zantieng khan Senvawn, Ruonglevaisuo bielah ruo nasa takin a sur a, Tek tlain Pu Buonthangvung, s/o Mana Sinate of Senvon, an Veranda­a inthung chu a deng fuk a, khaw hrelovin a um niin ei thu dawngna chun a hril. (@ WhatsApp)

School tum tumin Teachers’ Day an hmang
CCPUR: Kum tin India ramah September 5 Teachers’ Day­a hmang a ni hlak angin zanikhan India ram pumpuiah Teachers’ Day hmang a ni a. Churachandpur khawpui sunga School tum tum hai khawmin  zanikhan Teachers’ Day hmangin, an hotu hai kuoma ditsakna thilpek an inhlan tawl. New Lamka JB Upper Primary School a khawm CT Lian, bieltu MDC inrawinain Teachers’ Day hi hmang a nih. School thenkhat chun class lak sukbuoi lovin assembly huna Teachers’ Day hi an hmang zo. CT Lian, MDC chun, student hai inchuktirna kawngah teachers hai chu a hma neka nasa lema hma la dingin an fui.

Hieng laizing hin CCPur khawpui sunga private/Mission school thenkhat chun a hranpa taka Teachers’ Day hi hmang lovin chawl an puong thung.

Orthotic Therapy Unit hawngna
CCPUR: September 6, 2016, 10:30AM hin Mercy Home, P. Kamdou Veng, Tuibong, CCPur­ah Mercy Home le CCPur District Disabled Union (CDDU) huoihawtnain Orthotic Therapy  hawngna um a tih. Hi huna hin Mr Langkhanpau Guite, Chairman, ADCC in hawng a ta, Rev. Fr. Mathew Mundoly, Parish Priest, St. Mary’s Parish, Tuibong in malsawm tawngtaina nei a tih.

Manipur Assembly in Bills 3 a passed; Assembly Session tiemchin um lova khar
IMPHAL: Zanikhan Manipur Assembly chun lungruol takin Government Bills 3, The Manipur Technical University Bill, 2016; The Dhanamanjuri University Bill, 2016 le The Manipur State Higher Education Council Bill, 2016 hai an passed. Manipur Technical University hi State Consolidated Fund a inthawka indin, interim arrangement a dingin ex­officio Vice Chancellor khawm lak tah, kum 2016­17 a academic  session  khawm tan tah, temporary Campus in State Academy of Training, Takyelpat hmang, hi University a hin B.Tech Courses (Civil, Electrical, Computer, Electronics le Mechanical) hai inchuk thei, Streams 5 haia ding hin Assistant Professors 5 le regular Registrar hai lak a ni ta a, regular Vice Chancellor ding lak vat ni tang a tih tiin Education Minister Dr Kh. Ratankumar Singh chun zanikhan Assembly an hriettir.

Chun, Dhanamanjuri University hi Ministry of Human Resource Development, Government of India hnuoia Rashtriya Uchchattar Shiksha Abhiyan (RUSA) Scheme  a indin ding a nih. Hi Scheme hi Universities 200 in an ngen a, 5 thlangsuok hmasa tak hai laia thang a nih. Kum tin students 7000­7500 graduate an um a, hienghai laia students 1240 chauin Manipur University­ah seat an chang thei hlak a, hi University thar hi indin a ni pha chun Master Degree inchuk nuom student han an sawr tangkai hle ding a nih. Chun, Maniur State Higher  Education Council Bill, 2016 hi Kerala State Model anga siem tum a nih tiin Dr Kh. Ratankumar chun zanikhan Manipur Assembly an hriettir.

Keisamthong A/C MLA, L. Ibomcha Singh le Thongju A/C MLA Th. Biswajit Singh han zanikhan National Food Security  Act (NFSA), 2013 le kum 2013 a Police Constables lakna DPC cancelled a nina thu haiah Calling Attention pahni Assembly Session­ah an putlut. Dy. CM le Home Minister Gaikhangam hai chun, thil indiknaw a um leia hi DPC hi cancelled a ni thu Inpui an hriettir.

CM, O.Ibobi Singh chun Manipur mihai humhimna ding Bill ka sawrkar chun Inpuiah putlut ngei a tum a, a la remchang naw leia la putlut lo a nih. Manipur phaimi le tlangmi han an pawm thei ve ve ding ngaituo a ni a, chuongang Bill chu a um pha pha Special Assembly Session ko a Bill chu putlut le pasi tum ngei a ni thu zanikhan Inpui an hriettir.

10th Manipur Legislative Assembly 14th Session hi September 2, 2016 a inthawka inthung tan a ni a, hi Session sung hin Presentaion of Committee reprot, Resolution on Rectification of Amendment Constitution hai pek le thaw a ni bakah MLA han starred questions 10 le unstarred questions 5 an siem.

Zanikhan tuta tuma Assembly Session chu hun tiemchin um loa khar a ni tah.

Inchuktirtu 10 hai kuomah Award
IMPHAL: Zanikhan Manipur Film Development Corporation (MFDC) Stadium, Imphal­ah Department of Education huoihawtnain Teachers’ Day hmang a nih. Hi huna hin CM O.Ibobi Singh khuollienin a thang a, Dy CM Gaikhangam Guest of honour le Education minister Dr Kh. Ratankumar functional president in an thang.

CM chun inchuktirtu sin thaw tha zuol mi 10 hai kuomah State Teachers Award, 2016 an hlan bakah Aided School Graduate Teachers 31, Primary Teachers 98, LDCs 4 le Chowkidar 1 hai kuomah Appointment Letters an hlan tawl.

BJP Workers le JCILPS Volunteer­hai an dang
IMPHAL: Zanikhan BJP Workers le JCILPS Volunteers han Manipur Assembly Session va khekkhum le va sukbuoi an tum a, sienkhawm Police han Assembly Complex tlung thei lovin lamlakah an lo dangchat. Mipui hnawtdarna dingin Police han Tear Gas le Mock bombs hai an kap khum. Manipur Assembly Complex le a se vel km. 1 biel sungah sawrkarin Curfew zam sienkhawm mipui han pawisa lovin nerthleng an tum a, sienkhawm an hlawsam a nih.

Inspector le sin dang dang
IMPHAL:  Registrar of Cooperative Societies, Govt. of Manipur hnuoiah temporary basis in Inspector Post 80 (ST­38,OBC (M) 8 & MP­3), UR­31, PWD­2);Office Assistant­cum­Computer Operator post 3 (ST­1 & UR­2) le Driver post 1 a ruok. Hieng sin ruok hai hi employment Exchange fethelgna apply ding ti a nih. Application form chu Sept. 10, 2016 a inthawk Registrar of Cooperative Societies, Manipur Office, Imphal­ah lak tan thei ning a tih tiin Registrar, Cooperative Societies, Manipur chun inhriettirna a siem.

HPC(D) in Charter of Demands an pek
AIZAWL: September 4, 2016 khan HPC(D) chun Mizoram sawrkar kuomah points 5 umna Charter of Demands chu an peklut ta niin  HPC(D) palaihai thuoitu Lalthalien chun a hril. Inbiek nawk huna HPC(D) thuoituhai inbieknaah an thang ve ding le dingnaw thu tuchen hin hriet a la ni nawh. Mizoram sawrkar chun tuchen hin thang dinga ngenna a la nei nawh tiin Lalthalien chun a hril.

Hieng laizing hin HPC(D) in an thil ngen Autonomous District Council (ADC) hran hi sunzawm peihai sienlakhawm pek ninaw nihai tiin September 4, 2016 khan Mizoram Home Minister R. Lalzirliana chun a hril nawn nawk. Mizoram sawrkar le HPC(D) inbiekna hi September thla lailung annawleh September thla tawp tienga nei nawk dinga ti a nih. Inbiekna hi August 10, 2016 khan Chaltlang Tourist Lodge, Aizawl­a tan a nih.

Dr Patel in RBI Governor sin a chel tan
MUMBAI: Dr Urjit Patel chun zanikhan Reserve Bank of India (RBI) Governor 24­na ni dingin RBI Governor sin a chel tan. RBI Governor ni lai mek Raghuram Rajan hun (term) chu zani hmasa khan a tawp ta a, hi le inzawma ruot a ni anga Dr Urjit hin RBI Governor sin a hung chel tan a nih. Dr Urjit hin kum 2013 a inthawk khan RBI Deputy Governor a chel tan a, RBI Governor sin a chel tan hi September 4, 2016 a inthawk tiem tan ning a tih.

Dr Patel hi Yale University­a Ph.D Economic zo le University of Oxford­a M.Phil zo a ni bawk a, B.Sc chu University of London a inthawka zo a ni bawk. Kum 1998­2001 inkar sung khan Ministry of Finance (Department of Economic Affairs) ah consultant a lo ni ta bakah International Monetary Fund (IMF) a khawm lo thawk ta a nih.

Assam CM in NIT Silchar library a hawng
SILCHAR: Assam Chief Minister Sarbananda Sonowal chun zanikhan Silchar­a National Institute of Technology (NIT) hmunah world class library ‘Bharat Ratn Dr A P J Abdul Kalam Learning Resource Centre’a hawng. Hi Library hi University of Illinois, USA thangpuinaa indin a ni a, hiengang technology le infrastructure a tulai tak hmanga hawng hi India hmarsakbiela ding chun a pakhatna a la nih. Hi thila ding hin NIT Silchar chun Rs. 28 crores vel zet a seng phak a hril a nih. Mr Sarbananda Sonowal hin Assam University, Silchar Medical College and Hospital le Cachar Cancer Institute hai thangruola huoihawt program haia thangin start up India campaign hnuoiah NIT Silchar hmuna start up Centre a hawng bawk.

President in Teachers 346 kuomah award
NEW DELHI: Teachers’ Day le inzawmin President Pranab Mukherjee chun zanikhan President chun zanikhan New Delhi hmuna Teachers sin thaw tha zuol mi 346 hai kuomah National Teachers Award an hlan tawl.  President hin zanikhan students hai inpawlpuina a nei a, Class XI le XII inchuklai 80 vel an thang. Hi huna hin President chun Indian political history, India in Indepdence a hmua inthawk tuchena hmasawnna um hai le thu dang dang student hai an chuktir.

Teachers’ Day le inzawma President chun, teacher han naupang hai thiemna le an hringnun keihruoinaa an inpekna hietzingna dinga Teachers’ Day hmang a ni thu Teachers’ Day thucha a hrilnaa a hril a. Inchukna kalphung tha nei hi vantlang nunphung tha neina dinga lungphum a ni thu, teacher tha hai chu inchukna tha nei theina dinga lungpawimaw tak an ni thu le Teachers hai chu technology le thiemna hung insang pei hai hmang tangkai dingin an fui bawk.

VAWISUN THUPUI
Hnuoi ro rel dingin a hung ding a ni sih a. Khawvel hi feltakin ro relpek a ta; Thlierbik nei loin mi tin ro chu rel a tih.  ~ Sam 98:9

Editorial: Teachers’ Day thawlawm

Zanikhan India ram pumpuiah Teacher’s Day ropui takin Schools le Colleges haiah hmang a ni a. Teachers’ Day hmang dan ruok chu an ang nawh. School thenkhat chun Teachers’Day hi hmang lovin Teachers’ Day  chu chawl (holiday) in an hmang a, School thenkhat ruok chun Teachers’ Day hi a ropui thei ang patawpin an hmang ve thung. A dan indik taka chun teachers’ Day hi chawl (holiday) puong ding chi niin an lang naw a, hmang ve ngei chi niin an lang. India sawrkar khawmin hi ni hi a ngaipawimaw a, inchuktirtu lawmman dawngtlaka a ngaihai kuomah National le State level­in Award an hlan hlak. Inchuktirtuhai hi mihriem hmangtlak le puitlingna semtu an ni leiin chawimawina le lawmman hai hi an sin thaw tha bikhai kuoma pek hi a awm a, an phu hlie hlie a nih.

Ni dang ang lo takin Manipur sawrkar chun Teachers’ Day hi inchuknain haiah chawlin a puong tlat el. Chawl a puongna san tha tak a um ngei ning a tih. Ring dan chun tulaia Manipur boruok le inzawma a puong a ni ngei ring a um. Student­hai hi pawl tum tum han movement an neina haiah an sawngtawlawi a, phaw takin an hmang hlak. Hi lei hin inchuklaihai hin ei inrawlnawna ding chen chen haiah ei inrawl hlak am ti hi ei ngaituo chet chet a tul a nih. Manipur a chun inchuklaihai hin ei ramri (border line) pelin thil ei thaw hlak niin an lang. Hi lei hin pawl chi tum tum haiin an thil ngen  le nawr le inzawma movement an neina hai laka inthawk ei insiekieng a tul a nih.

Inchuktirtuhai pawimawnahai, an ropuinahai, an hlutnahai, inza an umnahai le mihriem sertu an ni dan hai ei hriet  bel tlang hle ta a. Hi ni besan hin National Foundation of Teachers Welfare ta dingin pawisa thawlawm dinga target siem a ni hlak. Hi target dinga pawisa khawn hin bituk zat le phutlui a nei ruok chu a thieng naw a, mi han an ngamtawk an pek chu lawm taka pawm le lak ding a nih. Hi thila sum hmusuokhai hi a hmangna ding indik taka hmang a ni chun a tha a, hmang suol a ni ruok chun indiklo taka sum khawnna, corruption intanna a ni thei. Inchuklaihai ta dinga lungril thanaw  siem theitu a ni leiin teachers’ Day le inzawma badge zawrna kawnga hin thuneituhai ei fimkhur takzet nuom a um.

School thenkhat chun teachers’ Day le inzawm hin student­hai teachers’ Day thawlawmin pawisa fai an inthawkhawm tir hlak a, hi thil hi thiltha nia an lang laiin thiltha pa tak a ni am ti ruok chu ngaituo chet chet a tul hle. Students han an ngam le tha titawk an khawnkhawm a, an teacher­hai thilthlawnpek (gift) an pek chu a pawi naw ie. Amiruokchu, private school thenkhatin teachers’ day thawlawm a hran lieua an khawn hi chu thiltha tak niin anlang nawh. Churachandpur District sunga ngei khawm private school thenkhat chun teachers’ day thawlawmin student pakhatah Rs. 50/­ (a pawl inhnuoi tieng) le a pawl insang tienghai Rs. 200/­ pei damin an khawn nia hril a nih. Hieng zat lawm lawm teachers’ day thawlawm khawn hi chu a taluo deu a nih. Hi thil hi thudik a ni le ninaw ei DC sap le ZEO sap han enfel hai sienla, thudik a lo ni chun hiengang private school­hai hi zilna pe ngei hai sienla nuom a um.

Bituk zat a lo um a ni khawma a tam takah Rs. 5­10 hi a la awm tawk hle. Private school­hai hi students hau tak tak, a nei tlawm tak khawma sangkhat vel nei an ni tawl firfer a. Inchuktirtuhai Gift an lo pek nuom a ni khawma a mawi tawk le a awm  thei tawk inchawkna ding chu Rs. 5­10 a khawm hin a daitawk hle. Thingpui, fak thei inhnik le changkang thaw hi a tul tak a ni nawh. Student­hai ngirhmun an chen naw a, thenkhat hausa deu le thenkhat rethei em em el, nitina fakfawm zawng an nih ti hi private school neitu han an hriet a tul a nih.

Pawisafai thawkhawm ding a lo ni khawmin a awmtawk a um. Pawisafai tam tak inthawkhawmtir a, an teacher­hai inchawimawitirna anawleh gift mantam le hlu inpektirna hin nakie peia student­hai lungril a la hung suksiet pha  inlau um takel a nih. Corruption/bribe intanna bul a ni pal hlau lem chun sietna bulpui a ni ding a nih. A pawimaw tak chu students han an teacher­hai pawimawna le ropuina an hrietchieng hi a nih. Inchuklai han an inchuktirtuhai ditsakna le inzana hi iengchen am an neia ti hi inkhina pawimaw tak a nih. Teachers’ Day Sept. 5 chau ni lova students han ienglai khawma teachers’day hmang thei dinga student hai sersuok hi a pawimaw lem a nih.


Post a Comment

Powered by Blogger.