Thlaram (Sept.) 25 - Changer (Oct.) 1, 2016; Virthli | Editorial:

Mani inhril mawi…, Mani inhrietchieng a pawimaw...

"Mani inhriechieng taphawtin midang an sawisel ngai nawh" ti a ni ang hrimin mani inhriechiengtu chun mi dang a sawisel a sawisel ngai nawh. Mihai sawisel ching, mi chier pei tam tak chu mani inhrietchieng tawk naw lei a ni rawp hlak.

Mani inhrietchieng hi a pawimaw em em, chuchu mitinin ei mamaw tak khawm a nih. Chun, abikin mi insuk inlar nuom, inti hotu em em, mani le mani inhril sathau nuom mi hai hin chapo takin midang sawiselin mani thil thaw vek suklar, suklang le hrillang an nuom em em hlak. Thil awm hrim a lo ni khawmin midang suklar, suklang le hrillang pek hi a mawilem a, mi puitling nundan ding khawm a nih. Ei Pi-le-pu hai thuvar in "Mani inpak le Sakhi ngal ah iengkhawm a kawp nawh," an i lo ti hlak kha an dik tak zet. A ruktein hiengang chingmi hai hi mihai nuizat bur an ni rawp hlak.

Ei Pathien thu hring, Bible a ngei khawm "Mâni inhrilmawi chun inpâk a hlaw si nawh a, Lalpain a hrilmawi chun inpâk a hlaw lem hlak." (II Kor. 10:18, II Kor. 3:1/BSI) ti ei hmu a nih. Mani iengangin inhril mawiin, mani vek inpak inla khawm a taka hmutu le hrietu a/an um zing tho si a. Mani le mani in enfie rawp hi mihriemhai hin ei nitin nun a hin ei thaw ding tak chu a ni lem.

Ei damsung tawite a hin Mani inhrietchieng a pawimaw tak zet. Chu ding chun hma la sau sau ei tiu. Midang ei hrilsiet amani an chanchin a sie zawnga ei hril ei hril hin ei siemdik el thei chuong ngai si naw a. Sawisel el loin an um dan dit naw ei nei a ni khawmin siemdik le umzie nei dingin anni kuomah hril pei hlak inla nuom a um. Kawkbo a inhram, umhmun kuonga sawisel le chierna hai hin hmasawnna le changkangna ei ti hih intlun ngai naw nih, ti hi hriet tlat bawk ei tiu. Mani ngei khawmin hma lak a, a taka nunpui a ngai a nih ti hrie tlat ding a nih.

Midanghai ei sawisel ding chun Mani inhrietchieng phawt a pawimaw... Midanghai ei sawisel el nekin lunginsietna le hmangaina hai leh umdan ding hmaisan a ngei inhril hi thawdan ding lem a nih. Chuchu Kristien hai umdan ding tak khawm niin a'nlang. Mani inhrietchieng a pawimaw...


Post a Comment

Powered by Blogger.