Responsive Ad Slot

Delhi le a sevela Hmar inchuklai haiin Freshers Meet an hmang

Sunday, September 4, 2016

/ Published by Unknown
New Delhi, September 4, 2016, Virthli (ONP): Zani (September 3, 2016) khan Hmar Students Association, Joint Headquarters, Delhi huoihawtna hnuoiah Samaj Sadan, R.K. Puram Sector – 4, New Delhi-ah Delhi khawpui le a sevela khawsa inchûklai haiin, Delhi khawpuia lût tharhai lawmlûtna hun ropui tak el, ‘The 31st Freshers’ Social Meet’ an hmang. Tukum hin Delhi khawpuia inchuk le sinthaw dinga thlangtla thar mi 80 chuong an um. Hi hun hi Pu H.K. Kawllienthang, Deputy Secretary, Ministry of Road Transport & Highway, Government of India in khuollien ni’n a uop.


Hi hun hi sun dar 12 a tan ni’n hun hni a the a ni a. Hunkhatna hih Tv. Khamrosang Buhril le Nk. Elohim Buhril haiin hnesaw takin an keihruoi a. Pastor Lalsiesang Zote in tawngtaina neiin hun hmang tan a nih. Tv. Japhet Vuonrohlun Darngawn, President, HSA Delhi in lawmlutna thucha a hril a. Khuollienin thucha ropui tak el a hril bawk.

Nk. Melody Varte, Education Secretary, HSA Delhi’n Delhi khawpuia college zawm thar hai tadingin infuina le an hriet dinga pawimaw tam tak el a hril zovah, Tv. Zonunmawia Pachuau le Nk. Priscilla Varte haiin hmeltharhai lawmlutna le inhmelhriettirna hun hlimum tak hmang a nih. Pastor Lalditsak Inbuon in hmeltharhai tadinga tawngtaipekna a nei zawm nghal a. Nk. Lalhlimum Joute in hmeltharhai aiin lawmthu a hril bawk.

Hmelthar hai infuina thucha, Pu L B Tuolte, Deputy Secretary, Ministry of Water Resources, Government of India in tangkai le hlu tak el a hril a. Pu Hrangthangvung, Chairman, Delhi Hmar Welfare Association a inthawkin thucha ropui tak el a hril bawk. Pu Hrangthangvung in DHWA a inthlungkhawm Delhi Hmar mipui hai ngirhmun pawimaw hle thu le DHWA thuchawi, tlawmngaina le inpumkhatna hai hi ei hnam tadinga a pawimaw zie hai a hril bakah, ei society sungah pawl tam taluo ei sietpui zie le Delhi khawpuia chuh inpumkhata ngir tlat a tul zuol thuhai uor takin a hril.

Pastor James C Ruolngul-in tawngtaia ruoi inhlanna a nei zovin mipui fe khawm haiin vawksa le bawngsa chartang inhnik tawk taka suong hme-in ruoi kil tlang a nih.

Ruoi kil zovah, hun hnina hmang tan nawk nghal a ni a. Hun hnina hih Tv. Dennies Lallienzuol le Nk. Lalremthar Pulamte haiin hnesaw takin an keihruoi a. Nk. Thelma Ramthienghlim, Secretary, HSA Delhi a inthawkin report ngaithlak a ni a, lawmthu hrilna a nei nghal bawk.

Hi huna hin Miss le Mr. Freshers’ hai thlangna nei a ni a. Nk. Lalhlimum Joute le Tv. Samuel Lalsuokung hai thlang an nih.

The 31st Freshers’ Social Meet hmang hun sung hin, hun karlakah hlasakthiem tak tak el, nunghak le tlangval haiin mipui fekhawm hai zaiin an inawi thlei hne hle bawk a nih.

HSA Delhi chun kum 2015-16 session sunga inchuklai thaw tha bik hai kuomah chawimawina ropui tak el an hlan a. Chuong chawimawina dawnghai hming chuh a hnuoia hin tarlang a nih. Chu khelah, tukum kum bul tienga free coaching a buotsaia hlaw nei lova inchuktirtu sin thawtu: Pu Lalhmingthang Songate, Tv. Joyful Z Khawzawl, Pu Immanuel Khawbung, Pu Abraham L Pangamte, Pu Rohminglien Songate hai kuomah chawimawina an hlan bawk.

Dit khawp lo takin, zan dar 8 le chanve chen hun hmang a ni hnungah, Pro-Pastor Steven Zarzolien Infimate’n tawngtaina neiin hun khar a nih.

Inchuklai thaw tha bik, chawimawina dawnghai:

Master's Degree

1 . Melody Lalengmawi Varte
Sociology, Jawaharlal Nehru University.

Bachelor's Degree

Female
1. Sari Lalrammawi Joute. Pol SC. (University of Delhi)
2. Adiel Lalrihlimum
Pol Sc. (University of Delhi)
3. Geneth Ngurremsiem
Pol Sc. (University of Delhi)
4. Lynda Lalthangmawi
Pol Sc. (University Of Delhi)
5. Esther Lalringzo
Life Sciences (University of Delhi)

Male
University of Delhi-
1. Khamrosang Buhril
History
2. H. Aron Josia
Political Sc.
3. Alpha R Chhangte
History
4. Ephraim Lalditsak
Mathematics


Class -XII ( Higher Secondary Examination)
1. Joshua Lalsandam
Humanities, CBSE
2.Jasper Khawpuimawi
Humanities, CBSE
3. Paul Lalremruot Pakhuongte
Science, CBSE
4. Rozarlien Khawbung
Humanities, CBSE


CLASS -X  (Senior Secondary Examination)

1. Christ Rohluolien Keivom, ICSE
2. Christopher Lalbuonsang Inbuon, CBSE.
3. Daniel R Hmar, CBSE











































































































































































































































































































































































































































































































































































































































































































































Don't Miss
© all rights reserved
made with by Simon L Infimate