"Hnam sawr theia um ve hi ka nuom..." -James A Songate APS
Assam Police Service a inziekkai leh hohlimna (An Interview with James A. Songate APS)
- LRS Puruolte, Spl. Correspondent, HT Daily

Hello James, Chibai! "I hlawtlingna kan lawmpui tak zet che. Ei Pathien-in i hma thuoi pei raw se che."


BIODATA
Hming: James A. Songate
Pa hming: Late Songlienthang Songate
Nu hming: Hrangneikim Neitham

Unau zat le Unauhai inchuk chin/thawkna:
Unau pariet kan nih. U Zaneitling, Zarzokim, Lalruotlien, Joseph Lalringum, Juliet Lalthasang, Lalramhlun le Alfred Vanjerusalemthar. Ka u Zaneitling hin Class VIII a pass a. Zarzokim hi Air Hostess a ni a. Lalruotlien hin Class VIII a pass ve. Juliet Lalthasang hin Labour Dept. ah Clerk sin a thaw a. Joseph Lalringum hi Police Constable a nih. Lalramhlun hin Class XII a zo a. Alfred Vanjerusalemthar hi Class XII inchuklai a nih.

Inchukna tienga seilienna hmun - School/College/University le inchuk chen/Certificate neia inchuk suok tah po hai:
Edith Douglas School, Hmarkhawlien; South Point School, Rengkai; St Edmunds College, Shillong; Gauhati University, Guwahati le Assam University, Silchar ah lekha ka lo inchuk ve.

Inchukna tieng chu Class X South Point School, Rengkai, Churachandpur ah ka zo a. Class XI (Sc) a inthawk TDC (History Hons), St Edmunds College ah ka zo. MA (History) Gauhati University ah ka zo. Chu zova PhD Research Methodology Exam Assam University hnuoia ka pass bawk. TDC (History Hons) hi Second Class in ka pass.

Sinthawna le umna khuo:
Tuhin Asstt Employment Officer sin chelin Muolhoi, Haflong ah ka khawsa.

Ama hi nuhmei nei tah a ni a, a nuhmei hming chu Lalsiempui Pakhumate Muolhoi, NC Hills mi a nih. Naupasal pahni a neia, an hminghai chu Daniel Lalsanhim Songate le Joshua Lalrawngbawl Songate an nih.

Q. APS in ziekkai ta si chun i zawm hun ah iengang rank am ning i ta?
James - APS Jr Grade hai hi Probationary DSP in an tan hlak a. Chun District HQ ah DSP an ti a. Subdivision ah SDPO an ti bawk. Guwahati Metro City ah ACP in an thang a. Battalion ah Asstt. Commandant in an thang bawk. Kum kuo vel hnungin Addl. SP an kai thei a. Chu zova SP an ni hlak.

Q. Tuta tuma Assam a APS in ziek kai hma hin i lo exam ta hlak am? Competitive Exam hrim hrim ah i lo thang ta hlak am?
James - Tuta hma khan UPSC le APSC Exam vawitam ka lo pek tah. A tawp chen ka lo hlawtling naw hun a tam lem.

Q. Assam Public Service Commission conduct-naa Competitive Exam ah Assam Police Services (APS) inziek kai kha i hlawtlingna thuruk imi hril ding?
James - Pathienin mi taima le mi teirei hai a hriet zing hlak ti hi ka thupui a nih.

Q. Rank iengzatna am i ni a?
James - Combined Competitive Exam (Mains) Results 2014 a APS List ah 45th ka nih.

Q. Assam ah Record/History i la hung siem ngei ring a um a. APS kher hi i thlang/i ni nuom nasan iem a ni a?
James - Assam Rama APS hai hin thuneina an nei insang em em a. Dawl attu a inthawka rickshawpu, zirtirtu a inthawka mi hausapa chenin an ti a. State sunga Army, CRPF, Assam Rifles, etc nekin buoina neuneuah thuneina an nei lien bawk. Hmar tam tak hi Police le buoi zing zing ei ni a. Bau khat bau hnia mani hnam chanpui hai lo thangpui ve kha ka thil nuom zawng a nih. Chuleiin exam nuhnungtaka khan APS hi ka preference in ka lo ziek a nih. APS hai hi kum 12-14 years hnungah SP an la kai thei a nih.

Q. APS i hmu hi i duthusam a ni am? Sin dang i la beisei tho am?
James - Vawisuna ka thil inziektling hi ka duthusam an ta ie.

Q. Exam lai le Result suok ni, khang lai huna i um dan dam i mi hril nuom am? (Nanga inthawka entawn chi tam tak inchuklai mek ha'n nei an tih).
James - Exam ni hma karkhat vel hi revision hunin ka hmang hlak. Results vawi thum vel nghak lai khan ka tense thei el. Amiruokchu, vel li, nga,... sawm le ti met khan chu ngaiin ka nei a. Ka cool el tah. Tuta ka tling hi chu ka ziek pei leia Pathien malsawmna niin ka hriet. Ka duthusam chu a nih. Ka zuk hlim rak chuong nawh.

Q. I chin laia inthawkin i "aim in life" iem a ni hlak a?
James - Motor lusen nei hi High School ka kai laia ka thil tum a nih. Thuneina chikhat chela Hmar hnam damna ding sin thaw hi ka hung tum ta pei a nih. Vai, Meitei, Paite, Kuki, etc laia inti Hmar deuva inticham kha ka nuom zawng a lo nih. Hnam dang le inruolthat ding khawma inticham lala Hmar hai hi ei um a tul. Eini mi sukduda kha thil pawi a nih.

Q. Tuta APS in ziek kai ruol hin mi iengzat am in inziek kai a? Tlangmi (e.g. - Hmar mi) iengzat am in inziekkai/tling thei a?
James - Hmar tak tak le tui pawllo chu pahni kan nih. Nk Phyllis Hrangchal in ACS an ziektling ve. Lekhathiem le mi tlawmngai thei tak a nih. Hnam in ama hi ei sawr hle ding a nih.

Q. HSA ah inhmangin President khawm i la ni a, an leh tuta HSA hmun tum tuma um hai hmalak dan hai hi tha tawkin i hriet am?
James - Vawisuna HSA GHQ le HSA JHQ thuoitu a tam lem hin politics an inhnel ve a. HSA hmingin sum le pai, contracts, ieng ieng member dam an hnawt bawk. Hihi thil pawi a nih. Career guidance, Career Test, Debate, Quiz, Extempore, Slogan, Essay writing le application and memorandum writing competition hi huoihawt thei seng ta inla nuom a um. HSA Statistical Report 2016 le HSA Year Book 2016 hai khawm kumtin tlangzar hlak inla ka nuom. HSA unit hai hi sukhrat phawt ngai a tih. Chun thuoitu dynamic le innovative deu thlang hlak ei tiu. Kumtinin HSA Planner induong bawk ei tiu.

Q. Nunghak hai hriet nuom zawng Vacancy a la um am? ti a ni laiin nang chu Vacancy a um ta naw sa a ni a. Sienkhawm, Inchuklai le ngaizawng nei uor hi a tha am? Thaw chi a ni am ti indawnna hi mi dawn pek la nuom a um? Iem i ngaidan?
James - Ngaizawng chu nei ding a nih. Inchukna le ei sinzawngna ah mi thangpuitu ni hai sien nuom a um. Amiruokchu hnam dang ngaizawng lo a tha. HSA hin hnam dang ngaizawng khap sienla. HSA membership chen hlip pek raw seh. Hnam dang chu ei inruoltha pui ding hai an nih.

Q. Lekha tiemna'n darkar iengzat am hun i hmang hlak a?
James - Lekha tiem hun bik ka nei nawh. Ka nuom hun hunah ka tiem hlak.

Q. Hobby/Hobbies dam hi iem a ni a?
James - Newspapers a thu tha nia ka ingai hai ka chepthlak hlak a. Chuong hai chu topic wise in files sunga ka sietha hlak. Exam le inzawmin ka tangkai pui leiin ka hobby a n'el.

Q. Sakhuona le Politics hi an kal am? Iem i ngaidan?
James - Politics a mi untak Pu Gandhiji in kum 1920 khan sakhuona le politics keikawp tumin Khilafat Movement a lo tan a. A hlawsam der ti a hretu ei nih. Mi indik em em Pu Nehruji le sakhuo mi taluo Pu Mukherjee hai khawma politics hi an lel hle. Politics hi a um naw chun khawvel a cheng le a tunga lawn a harsa hle. Amiruokchu, sakhuona le politics hmetkawpa khawtlang le hnam tha taka thuoi thei mihriem chu Hmar lai ei la um nawh. Kei khawm kan tiemsa.

Q. I hlawtling lawmna huna hai khan ngenna mihaia inthawk iemanizat i dawnga, khang hai kha sukpuitling ngei i tum ring a um a. A iengtak kham i sin i zawm hunah i hmalakna hmasatak ding ning a ta?
James - "U James, APSC Exam dan kalhmang mi hril ve raw aw" ti le "James, hnam ta dinga bel theiin um raw aw" ti hai hi mi ngainatu le ruol le pai hai tawngbau ka i hriet rawn tak an nih. Ani ngei, kum sawmpathum sunga competitive exam ka i ziek leia personal experiences le exam tips iemanizat mi hai share ve ka nuom hlak a. APSC Coaching Centre Hmar mi haiin an hawng pha mi hmang tangkai ve thei hai sien ka nuom. Ka notes hlui hai GS, History, Education, Sociology, Political Science, English hai hi lekhabu la siem ka nuom. Pakhat pahniin an lo hlawk pui khawma ka lawm tho tho. Hnam sawr theia um ve hi ka nuom.

Q. I thawkna ding hmun i hriet ta am? La training zo phawt a hriet chauh ding? Khawlai hmun am i training ding a na?
James – Dergaon Police Training Centre, Assam ah training phawt kan tih. NEPA le NPA ah training an sunzawm hlak. Appointment kan hmu pha thil um dan ding chieng chau a tih.

Q. Inchuklai le sin zawng mek hai incha nuom deu dam i nei am?
James – Inchuklai hai le sin zawnga competitive exam petu haiin harsatna le beidawngna tam tak mi hriet lovin ei pai hlak a. Khawvel a mi hlawtling hai khawma hi ram hi an hung nerthleng ve a nih. Taima taka Pathien rawn zinga inchuktu le sin zawngtuhai Pathienin a theinghil ngai nawh ti hriezing ei tiu.

Q. Tulaia khawvel i phursuok information technology le inzawmin social media hmang dan thu ah ngaidan iengang am i lo nei ve a?
James - Facebook le Whatsapp hi question siemna hmun le answer zawngna hmunin ei hmang thei a. Google ah pdf form in inchukna le sin zawngna a ei tangkaipui thei notes ei hmu thei bawk. Hun bi nekin Facebook, Whatsapp le Google Seach Engine hmang ei tiu. e-education hi ei khawvel a ni tah. Lekhabu tha tak tak e-books form in Internet ah hmu thei a nih. Amiruokchu, print out kha a pawimaw. Library style of learning hi ka lan awn lem met. Hmetkawp thiem a tul a. Inchuk ding ei la hau.

(Pu James, I hun hlutak i mi pek a, kan lawm taluo che. Pathien in i hma thuoi pei raw se che. Mihai tadinga malsawmna hung ni pei rawh. Lo tawngtai pui kan ti che. -LRS Puruolte).

Chat Conversation End

*** *** *** ***
Belsap:
Pu James A Songate hi Founding Headmaster, Covenant High School, Hmarkhawlien, Cachar; Asstt Professor, Dept of History, RS Girls' College, Karimganj; Excise Inspector, Hailakandi, Lakhipur, Sadiya, Tinsukia; Asst. Employment Officer, Dima Hasao hai a lo chel ta hlak a. Gazetted officer sin vawi thum a hmu tah a nih.

APSC hnuoiah kum 5 a lo service ta a. Hi hih sawm peiin APS a zawm hin kum 5 experience nei ang a ni ding a nih. Hieng a ni leiin hma hun ditum tak, a neka insâng lem la hmu pei dingin hunțha a nei a nih. Ama hi tuhin HSA, JHQ Barak Valley a President ni lai a nih.

Post a Comment

Powered by Blogger.