Responsive Ad Slot

Ngurte Road (Khuga Ring Road) mipuiin an siem; Kut rawl ve nuom haiin kut rawl thei a nih

Tuesday, August 23, 2016

/ Published by VIRTHLI
CCPUR | Aug. 23, 2016; Virthli (ONP):Churachandpur area sunga Lampui pakhat, Police station a'nthawka 6kms chauh a hla, Khuga right side a Ngurte Road (Khuga Ring Road) hi Valpakot le Khawpuibung ramri inthena a intanin Ngurte chena khuo 14 zetin an hraw a nih.

Sienkhawm sorkarin a hrietfuknaw chauh khawm ni lovin a 'THEINGHIL' tain 'hnu sawn ram' ang hlawla a ngaisak tak naw leiin two wheelers takngiel khawm tlan harsa khawpin a si tah.
Mipui beidawngin nikum (2015) khan hi lampui siemthatna dinga hma latu bik ding 'KHUGA RING ROAD DEVELOPMENT COMTT' an indina, an ni hmalakna hnuoiah mipui sum thawkhawm hmangin vel iemanizat lampui siemthatna sin hi thawh ani tah a, mi harsa te te an ni leiin sumhlawm mamaw ang a lut thei meu naw leiin Fur ruotui a hung tlak meu hin chu an inrimna le an nei ang ang an dengkhawma, thei ang tawka an siem ve hai khawm TUIHAWK SUKMAWITU ah an chang nawk el hlak.

Tukum Fur ruotui a hung tlak nawk tak leiin, Bazar kaina, office fena le School naupanghai ta ding khawma inlawn harsa khawpa a si nawk tak leiin Area mipuihai le mi inphalhai sum tlawmtie tie an inthawkhawm nawka, chu sum ringsanin zani (22 Aug) khan, Valpakot, Khawpuibung, Muolbem, Dumsau, Tuaiteng, Tuibul, Thenmuol, Ngurte, Daijang, Khuangnung le Tuikham khuohai a'nthawk In tina mi pakhatpei, mi 500 vel fekhawmin, ei lampui chu ei lampui ana, sorkar chu eini hai ei nih a, hieng lampui enkawlna sin ruok chu ei thlanglalhai fethlengin Lampui hi State Sorkar siemthat hlak a nih ti hre zing hai sienkhawm, 'thlang lalhai le thuneitu hai ngaisak ei hlaw phak si nawh a'
ti'n inthuruol takin an lampui hi an siem tha mek.


Vawisun hin Side drain siem phawt a nih a, khuo mipui le mi inphalha'n an nei ang anga an dengkhawmhai hmangin an thei ang tawk le adai zat zat Singling thawh an tum a nih.
'Hnusawn ram' ti thei ding khawpa Sorkarin a ngaisaknaw ta hnung khawma, nitin mamaw le school fe hi chu lampui a si ema tih a zuk en liem el thei hlak ni lo, an thei ang ang sum an deng khawmna khela tha tamtam an la hei seng nawkpei el hi chu lunglai ana naw thei nawh.

Hi lai area hi Assembly Constituencwn pahni in a the a, Bieltuhai chu Singat A/C, MLA Shri Ginsuanhau le Saikot A/C, MLA Shri TN Haokip (President MPCC) hai an nih a, District Councila chu Saikot ADC, MDC Shri Hrila a nih.
Report by :
Mr Gideon
Secretary
Khuga Ring Road Development Comtt.
(Valpakot to Ngurte)

"Ka unauhain tha tamtak le sum senga lampui an siemna a hin kut rawl ve ngei ka nuom ie" ti a hmangaina le lainatna share nuom dam ei lo um pal hlau chun contact no. +919612319117 an Secretary Pu Gideon Contact thei a nih.

Don't Miss
© all rights reserved
made with by Simon L Infimate