Aizawl, August 10, 2016, Virthli (ONP): Ruot lawk angin Mizoram sawrkar le HPC (D) inbiekna chu vawisun khan Chaltlang Tourist Lodge, Aizawl hmunah boruok muongum tak hnuoiah nei a nia, inbiek nawk hun dingin September thla sung riruong a nih.
Virthli palai kuomah HPC(D) palai haiin an hril danin vawisuna inbiekna chun boruok tha a siem pei ring a um thu an hrila, sawrkar tieng khawm an inhawng zau hle thu an hril bawk.
Vawisuna inbiekna a hin 2013 ah peace talk lo neina a agenda hai chu hrillang a nia, ADC demand chungchang thua sawrkar palaihai chun Mizo vawng ei ni leiin harsatna tamtak (technical problem) a um a nih tiin an dawna, sienkhawm HPC (D) palaihai hin silai chawlpawl hai khawm kum 20 neka tam ramhnuoiah um an ni tah lein dam taka an hung suok theina ding (peaceful exit) a pawimaw thu an hrila, chu bakah Hmar mipui khawma ram buoia um an nghawk ta leiin sawrkar chu lampui (solution) dap dingin an ngen a nih. Sawrkar palai hai khawm thei tawpa hmalak an inhuom thu an hrila, Hmar political problems chu chingfel vat an nuom thu inbiekna a hin an hril.
Inbiek nawk hun dingin September ruot a nia, hi huna hin HPC (D) palai hai chu proposal thatak hung siem dinga inhriettir an nih bawk. Ningani (11 August) zan dar 6 hin a tlangkawmna angin thlaithleng (dinner) buotsai malamin Mizoram le HPC (D) palai hai hi inbie nawk an tih.
Chun vawizan hin Mizoram Hmar Welfare Committee (Hmar Inpui, Mizoram Region) thuoitu hai le HSA, Aizawl Joint Headquarters thuoitu hai leh ei palai hai hin bufaktlangna neiin inpawl tlangna nei bawk an tih.
