IMPHAL | August 9, 2016, Virthli (ONP): Vawisun zing dar 11 AM khan zing, Aug 10, 2016 a Mizoram-Hmar Peoples Convention (Democratic) peace talk a țhang ding HPC(D) palai dinghai chu inthlasuokna hunser Imphal hmunah nei a nih. Hi hunser a hin Hmar Christian Leaders' Forum (HCLF) aiawin Rev. Lallienthil Selate, Rev. V. Lalțanpui le Rev. Lalnghatlien Songate haiin palai dinghai hi an lu chunga kut innghatin Pathien kuoma țawngțai pekna neiin mal an sawma, an inthlasuok a nih.


Mizoram le inbiekna nei ding HPC-(D) hin Hmar hnam sunga Civil Organisation tum tum le hnam sunga mirawnkaihai țum iemanizat Consultative Meeting lo neipui tah-in, Kum 30 sung zet hnam an lo invakvaipuina chu Hmar hnam sunga Civil Organisation tum tum haiin hrietpuiin hnam ta dinga an hma lo lakna hai chu an thlawp thu le Mizoram sunga Hmar Movement fe meka HPC-(D) hmalakna an ringzo tawk thu July 16, 2016 sun khan darkar 5 sung zet Consultative Meeting an neina hmun le hunah an lo puong tah a nih. Hi huna hin Hmar Inpui Gen. Hqrs le a hnuoia mi pawl tum tum HCLF, HYA, HSA, HWA, HACS, HNU, HAA, DHWA, HKI, HMARTOB le a dang dang hai an țhang a nih.

Mizoram sawrkar le HPC(D) palaihai chun Aug. 10, 2016 sun dar 11 AM hin Tourist Lodge, Chaltlang, Aizawl-ah paece talk (inbiekna) hi an nei țan dinga ti a nih. HPC(D) palai dinga hril hai chu Lalțhalien, John H. Pulamte, Francis Songate, Thanglianchhunga, Rohringa le Lalthlamuana Hmar hai 6 ning an ta, HPC(D) palai hai hi Lalțhalien in inrawi a tih. Mizoram sawrkar Palai tienga chun Additional Secretary for Home Pu Lalbiakzama-in inrawi a ta palai 4 țhang an tih. HPC(D) palai hai hi vawisun Imphal a inthawk vuongnain Aizawl tlung an tih.

Pic: File Photo

Post a Comment

Powered by Blogger.