Responsive Ad Slot

HPC(D) palai hai Aizawl tlung

Tuesday, August 9, 2016

/ Published by VIRTHLI
Aizawl, 9 August, 2016, Virthli (ONP): Mizoram sawrkar leh inbiek dinga hung HPC (D) palaihai chun vawisun khan Aizawl an hung tlunga, Aizawl an hung tlung le inruol hin central jail ah HPC (D) Army Chief Lalropui Famhoite le mi dang jail intang hai chu Central jail, Tanhril-ah inhmupuiin hohlimna an nei pui.

HPC(D) palai hai hi Pu Lalthalien in inrawiin an rengin mi 6 anni a, Mizoram le Manipur anthawkin mi pathum ve ve thlang an nih. Mizoram sawrkar le inbiekna dinga hin silai chawipawl (armed cadre) hai chu tukhawm palai dinga ruot an ni nawa, palai dinga thlanga um hai hi civilian vawng niin hnam thuoitu le inchuklai pawl thuoitu dam an nih. HPC (D) palai dinga thlanga umhai chu Pu Lalthalien (Manipur), Hmar Inpui president hlui Dr John Pulamte (Manipur), Pu Francis Songate (Manipur), Hmar Students’ Association Assembly Speaker Pu Lalthlamuana Hmar (Mizoram), Pu Thanglianchhunga (Mizoram) le Pu Rohringa (Mizoram) hai an nih.

Inbiekna hi hung tlung ding August ni 10 (Nilaini) hin Chaltlang Tourist Lodge, Aizawl-ah nei tan ning a ta chawhma dar 11 anthawkin tan ning a tih. Sawrkar tieng hi Home department a Additional Secretary Lalbiakzama in inrawi a ta, palai danghai chu Joint Secretary for Home Lalhriatpuia, SP, CID (SB) Rodingliana Chawngthu le OSD (Home) David H. Lalthangliana hai ning an tih.

Mizoram sawrkar le HPC(D) hai inbiekna hi 2013 khan Suspension of Operation pawtsei ding le dingnaw chungchangah thu inhmu theinaw leiin a lo thlawl tah a nih.



Mizoram sawrkar le HPC (D) inbiekna hi Virthli-ah thei ang anga update tum a nih.


Don't Miss
© all rights reserved
made with by Simon L Infimate