Aug. 15 chena dingin Bandh an hlip phawt
CCPUR: Mr (L) Siaklalzawm (40) s/o Mr Thiankhogen of Kangvai thina le inzawma indin JAC in August 10, 2016 zingkar dar 4 a inthawk tiemchin um lova Tiddim Road Bandh an thaw chu  SDPO/CCPur le Bishnupur Moirang O.C. hai thanga zani zantieng 2:00PM a Kangvai Inpi a inbiekna an nei huna August 15, 2016 chena an thil ngen hai sukpuitling dinga an inbiekrem leiin  August 15, 2016 zanril chena dingin an Bandh thaw an hlip phawt thu zanita JAC Against the Killing of (L) Siaklalzawm in thusuok an siema chun an zieklang. Band thlawptu hai chunga lawmthu an hril bawk.

National Deworming Day
CCPUR: District Health Society (DHS), CCPur huoihawtnain August 11, 2016, 11:00AM hin CMO Mini Conference Hall­ah Launching­cum­Orientation on Implementation of National Deworming Day, 2016 hmang ning a ta, Mr Lunminthang Haokip, IAS, DC, CCPur chun khuolliena thangin National Deworming Day hi hawng a tih. Hi huna hin DC, CCPur le CMO han National Deworming day chungthu hril an tih. Naupang kum 19 le a hnuotieng hai fak ding Albendazole tablet IP 400mg School tum tuma sem ding mum 148800 (box 12) semdawk dinga sie a nitah.

DMO­in in report le doctor pan nghal dingin
CCPUR: JE le Viral Fever  leia CMO Office campus­a IDS/ISDP Centre­a Monitoring Cell hawng a chun August 6&8, 2016 a blood sample laka um hai lai JE  positive 2 an um nia hril a ni a. Hi thua hin zani hmasa zan khan Dr Liankhojam Guite, DMO & Dist. Surveillance Officer chun JE positive hmu thar hai umna Elim Veng, N. Lamka le Zion Veng, N. Lamka hai an umna hmunah va kanin an biekpui a, an in bul le vel hai tha taka sukfai dingin an hriettir. Chun, DMO hin mi 2 hai hi zanikhan Malaria Office­ah inhmupuiin, Malaria Office chun thil umdan tha takin a hrilpui a, tuta hnung damnawna le um inhawinawna an tuok chun anni kuoma inhriettir nghal ding le Doctor pan nghal dingin an hril.

Prepaid box 1170 activate tah
CCPUR: MSPDCL, CCPur chun zani chen khan CCPur khawpui sunga Electric pre­paid meter box 14,000 an inbuk ta a, hi laia 11700 an activate tah.

Police in an man nawk
CCPUR:  Police a inthawk ei thu dawngnain a hril danin Konthoujam Joy Kumar Singh @ Athingba (26) s/o K. Ibopishak of Ithai Dam Makhong, Bishnupur Dist. Moirang Police station­a inthawk case lasawngin FIR No.5 (1) 2006 PBG­PS U/S 302 IPC, 20 UA(P) A.Act & 3 of explosive Substances Act hnuoiah an man nawn nawk (re­arrest). Zani hmasa khan Parbung Police han JMIC, CCPur hmaah an inlangtir a, Court chun August 12, 2016 chen Police Custody­a um phawt dingin a rel.

DRDA Documentary
CCPUR:  August 13, 2016, 11:00AM khin DTC Hall, Tuibong­ah  DRDA Documentary tlangzarna um a tih. Hi huna hin  J.C. Ramthanga, Principal Secretary (RD&PR), GoM khuollienin thang a ta,  Brig. Ajay Kumar, 27 Sector chu Guest of honour in thang a tih. Thingkangphai KTP Choir, CCPur le Miss Lawmnakim han hlas sak an tih.

MSPDCL in motor thar
CCPUR:  MSPDCL (Electrict Dept.), CCPur Division chun an sinthawnaa hmang ding Xenon pick­up motor thar an nei a, zani zingkar khan Rev. Thangjakap Chongloi, ECA Youth Director in Pathien kuoma tawngtainain an hlan. Motor hin MSPDCL, Imphal in MSPDCL revenue division 14 hai kuoma pakhat senga a pek a nih.

Inremna zawngin Mizoram sarwkar le HPC(D) palai han inbiekna an nei tan; September thlaah inbiekna sunzawm ding
AIZAWL: Inremna zawngin Mizoram sawrkar le HPC(D) palai hai chun zani sun dar 11 a inthawk khan Tourist Lodge, Chaltlang, Aizawl­ah inbiekna an nei tan a, inbiekna hi zani 3:45 PM chen khan an nei. Boruok tha tak hnuoiah inbiekna hi nei a ni a, September, 2016 thlaa inbiekna sunzawm nawk an remti ve ve. Inbiek nawkna ni, hun le hmun ding ruok chu hi hnunga la ruot dingin an sie niin ei thu dawngna chun a hril.

Mizoram sawrkar tieng palai thuoitu Lalbiakzama, Additional Secretary (Home), Government of Mizoram chun, inbieknaa thang palai group hni hai chun, inremna tluontling a hung um ngei theina dingin inbiekna hi an ulukin an titak ve ve tiin a hril.

HPC(D) tiengpang palaihai thuoitu Lalthalien chun, an thil ngen chu an thlakthleng naw a, a la pangngai zing a nih ti Mizoram sawrkar palaihai a hril. HPC(D) thil ngen chu India Constitution Sixth Schedule hnuoia Autonomous District Council a nih.

Zanita ei hung zieklang ta angin HPC(D)  tieng palaihai chu Lalthalien (leader), John H. Pulamte, Francis Songate, Thanglianchhunga, Rohringa le Lalthlamuana Hmar hai an nih. Mizoram sawrkar tienga palaihai chu Lalbiakzama, Additional Secretary (Home), Lalhriatpuia, Joint Secretary (Home); Rodingliana Chawngthu, SP, CID (SB) le David H. Lalthangliana, Officer on Special Duty (home) hai an nih.

Independence Day boycott le total shutdown
IMPHAL: United National Liberation Front of WESEA (UNLFW), Coordination Committee (CorCom), Manipur, Garo National Liberation  Army (GNLA) le Hynniewtrep National Liberation Council (HNLC) hai chun August 15, 2016 a India Independence Day hmang ding an boycott­na le inzawmin August 15, 2016 zingkar dar 1 a inthawk zantieng dar 6 chen NE biel pumpui huopin total shutdown an thaw ding thu hieng pawl palihai hin Joint statement siemin an puong. Total Shutdown hin essential& humanitarian services thilhai chu huomsa naw nih tiin an hril.

Nuclear Power Plant hawng
NEW DELHI/MOSCOW: Tamil Nadu State a Russia thangpuinaa indin Kudankulam Nuclear Plant/Project  Unit­I, Power 1000MW pesuok thei chu zanikhan Video Conferencing hmangin New Delhi le Moscow haia inthawk India PM Narendra Modi le Russia President Vladimir Putin han an hawng. Hi thil thawna hi Tamil Nadu CM J. Jayalalitha khawmin Chennai khawpuia inthawk a lo zawm ve. Hi project hi November 1998 laia India PM Rajiv Gandhi le Soviet President Mikhail Gorbhachev han inremna (pact) an lo ziek tasa anga la sunzawm pei a nih.

Commission for ST Act member dingin Dr John Pulamte
IMPHAL: T. Panmei, Commissioner (Tribal Affairs and Hills), Govt. of Manipur in August 8, 2016 nia  Order an suo dungzuiin Dr John H. Pulamte chu Manipur State Commission for Schedule Tribe Act 2014 member dinga ruot ve a nih. Order dungzuia hi Commission a Chairman dingin R.H. Gonmei, IAS (Retd) ruot a ni a, Members dinga ruot hai chu Dr Simson Sareo le Dr John H. Pulamte hai an nih. An hlaw, allowances le service hun chu Manipur State Commission for Schedule Tribes (Salaries, Allowance, and other service of Chairperson and Members) Rules, 2015 dungzui ning a tih. Chairman le Members dinga ruota an umna hi Order insuo a nia inthawk hmang nghal a nih.

Hmun pahniah bomb a puok nawk
IMPHAL: Zanikhan Manipur state sunga hmun hran hran, pahniah bomb (IEDs) a puok nawk. Zani 9AM vel khan Lamlai Police Station huop sung, Imphal East district­a BSF Sentry post bul, Maphou  Dam­ah bomb a puok a, Tinoy (7), d/o Sagoulang Singsit of Maphou Village chu bomb hlekin a deng hliem a, Christian Hospital, Dewlahland, Imphal panpui a nih.

Chun, zani ma 12:45PM vel khan Leishang Hiden Canal, Manipur University main Gate (East) a inthawka metres 300 vela hlaah bomb a puok a, mihriem thi le hliem ruok chu an um nawh. Bomb puokna hi Imphal West, Singjamei PS huomsung a nih.

Sawrkar rama In bawl hai thiek
IMPHAL: Langol Reserve Forest, Sadar West Range sunga phalna nei lova In le dawr bawla um hai chu zanikhan  State sawrkar thupek dungzuiin Forest Department Officials le Police team thangruolin thiek a nih. Tu khawm hin thiek lo tam tak a la um a, sawrkarin order an suo chun thiek sunzawm pei la ning a tih tiin Forest Department thusuok chun a hril.

Report a um chun an bawzui hlak
IMPHAL: Report a um chun ieng Department le ienganga Officer lien khawm nihai sienla Vigilance Commission Manipur chun an suizui pei hlak tiin R.K. Mema, SP, Vigilance chun zanita DIPR, Imphal­a Press Conference­ah a hril. Reprot ding  neihai chun hung report unla, report petu hming thu thup tlat ning a tih tiin R.K. Memo chun a hril bawk.

NH­ah Economic Blockade
IMPHAL: August 15, 2016 chena Manipur sawrkarin kum 2013 a Police Constable (Male) lakna result a puonglang naw chun August 16, 2016 zanrila inthawk August 23, 2016 zanril chen National Highway­ah Economic Blockade an thaw tum thu All Manipur Written Test Successful Candidates of  Police Constables a an Secretary L. Nandakishor Sharma chun thusuok (Press Release) a siem.

Assam MEE result suokah eini mi 6 an tling
GUWHATI:  Assam­a Dibrugarh University huoihawtna hnuoia MBBS le BDS inchuk ding lakna dinga Assam Medical Entrance Exam (MEE), 2016 result puong a ni ta a, hlawtlingna chang hai lai eini mi 6 an thang. Hlawtlingna chang hai chu­ Nk. Elim Lalnunhlim Hmar d/o Lalropieng Hmar, Leiri, NC Hills  rank 1 ST(H) ; Nk. Judith Lalhmingmawi, rank ­3 ST(H); Nk. Grace Hrangate rank 13 ST(H); Tv. John Lalhrietfel Zate s/o H.N. Sanga, Hmarkhawlien rank 21 ST(H); Tv. Lalrothar Neingaite, s/o Lalropieng Hmar, Leiri, NC Hills rank 26 ST(H) le Nk. Rose Ramlienkim d/o Hlunsang Darngawn, Hmarkhawlien rank 38 ST(H) hai an nih.

Rela inthawk Rs. 5.78 crore inruk hmang
CHENNAI: August 9, 2016 khan Salem, Tamil Nadu a inthawk Relin pawisa note thalo (soiled currencies) Rs. 342 crore zet Chennai tlung dinga phur a ni a, rukru han Rel chungtieng ver kuoin an rawk a, Rs. 5.78 crore zet an inrukhmang. Hieng pawisa note tha lohai hi RBI, Chennai a peklut dinga phur a nih. Rs. 342 crore hi boxes 226 sunga thun le phur a ni a, boxes 226 laia boxes 4 hai chu hawng saa hmu a nih. Hi thil hi August 10, 2016 zing dar 3:55 vela Chennai­a Egmore Railway station tlungpui a ni hnunga hmu le hrietsuok chau a nih tiin Police chun an hril.

Naupang 1051 an sansuok tah
ODISHA: July 25, 2016­a inthawk Women and Child Development Department le thangruola Crime Branch in Operation Muskan­2 first phase neia state sung hmun hran hran an dapnaah naupang inhmang 1051 an sansuok ta niin Special DG Crime Branch BK Sharma chun a hril. Second phase  a chun Odisha state puotieng Andhra Pradesh, Maharashtra, New Delhi, Jharkhand, Tamil Nadu le  Bihar hai thangin states 10 haiah Police team tir ning an ta, second phase hi August, 2014 chena thaw ning a tih tiin Mr BK Sharma chun a hril. Supreme Court thupek dungzuia naupang inhmang hai zawngsuokna dinga Odisha Police han thlakhat sung aw “Operation Muskan’ hi kum tin phase hniin kum 2015 a inthawka an lo nei tan ta a nih. Nikuma Operation Muscan­I huna khan Odisha Police han state sung le puotieng­ah naupang 900 lai an lo sansuok ta  a nih.

PM in BJP headquarter bawlna ding lungphumna
NEW DELHI: PM Narendra Modi chun August 18, 2016 khin New Delhi­ah BJP Hqrts bawlna ding lungphumna nei a tih. BJP headquarters building hi sawng 7­a insang ding le office room 30 nei ding a nih. Party tum tum headquarters building laia an sang(sawng) tak a ni ding a nih. Party dang hieng RJD, AIADMK, JDU le TMC hai headquarters building chu sawng hni le sawng thuma insang an nih. BJP headquarters building  hi party dang dang hai headquarter umna Deen Dayal Upadhyay Marg hmuna bawl ding a nih. Tuhin BJP HQ office chu 10 Ashoka Road­a um a ni a, an building thar hi kum 2019 a zo ding le  Rs. 8 crore vel seng dinga riruong a nih.

Kum 2 sung In nuoi 2 chuong bawl
NEW DELHI: Kum 2 liemta sung khan India rama state tum tum haiah Jawaharlal Nehru National Urban Renewal Mission (JNNURM), Rajiv Awas Yojana (RAY) le Pradhan Mantri Awas Yojana Urban (PMAY­U) schemes hai hnuoiah In nuoi 2 chuong bawl a nih tiin Minister of State for Housing and Urban Poverty Alleviation Rao Inderjit Singh chun zanikhan question hour hunah Lok Sabha hmuna a hril.

Kum 2 liemta sung khan implementing agencies han JNNURM, RAY, PMAY­U hnuoiah In 2,23,814 an bawl niin minister chun a hril. JNNURM le RAY hnuoia In 13, 86,761 bawlna ding sanctioned a ni a, hi lai hin In 10,60,899 bawlzo a ni a, June 25, 2015­a PMAY­U ‘Housing For All’ mission tan a nia inthawk In 8,54,386 bawlna ding sanction a nita a, In 1,770 bawlzo a ni ta a, PMAY­U hnuoia Credit Linked Subsidy Schemes a In 8,004 bawlna ding sum sanction a ni ta bawk tiin a hril.

Bangladesh MP hlui  thi dinga a chungthu rel
DHAKA: Bangladesh­a Special Tribunal Court chun Parliament member (MP) hloui Sakhawat Hossain chu thi dingin a chungthu a rel bakah midang 7 hai chu damsung lungin intang dingin  an chungthu a rel. Kum1971 a Pakistan le indo huna mi tam tak that an nina le inzawma thi dinga a chungthu hi Court in a rel a nih. Mr Hossain hi Jamaat­i­Islami party (JI) party a mi a ni a, thil tlung huna  khan JI- a student wing Islami Chhatra Sangha central Committee member a lo nih.

VAWISUN THUPUI
Varna tamtak umnaa chun lungngaina tamtak a um veh a; Hrietna insukpungtu khawm chun lungngaina an sukpung bawk a  nih. ­Thuhriltu 1:18

Editorial: Tosan el chi ninaw nih

August 9, 2016 a Chief Minister O.Ibobi Singh inrawina hnuoia State Cabinet meeting chun Inner Line Permit (ILP) movement hrat taka fe mek chu an ngaipawimaw leiin hmalak dan ding an hriltlang niin Government Spokesman M. Okendro Singh chun a hril a. ILP chungchang hin Manipur mipuihai ta dingin harsatna nasa tak an tlun ta leiin state sawrkarin a ngaipawimaw hle a tul hrim a nih. ILP hi ei dit naw le ei hnawl a ninaw a. Nisienlakhawm ILP chungchanga Manipur Assembly in August 31, 2015 a Bills 3 a pasi, Manipur tlangmi han  ei ditnaw leia ILP chungchang hi la fel thei lova phaimi le tlangmi hai khawma ei la buoipui  luoi luoi el a nih. ILP chungchang hi ei chingfel vat leh ei harsatna hung inkieng a ta, ei chingfel vat naw leh ei thawhla hle ding a nih. Hi lei hin nuom inla, nuom naw inla ILP chungchang hi ei buoipui a, ei chingfel vat a tul a nih.

Protection of Manipur Peoples (PMP) Bill, 2015 thlakthlengna dingin Manipur mipui ngenna angin Manipur sawrkar chun “The Manipur Regulation of Non ­Local People Bill, 2016 an duong nawk a.Bill thar induonga um hi siem that tul um hai siem that a, belsa tul um hai belsa zoah Manipur Assembly Session  hung um dinga hin state sawrkar chun pasi dinga putlut dingin riruong a siem a nih. Zani hmasaa State Cabinet meeting chun 10th Maniupr Legislative Asembly 14th Session chu September 2, 2016 a inthawka tan dingin rawtna an siem a, hi rawtna hi Governor khawma a pawmpui ngei ring a um.

State Government spokesman M. Okendro chun, Manipur puotienga inthawka hung lut hai enzuitu ding le Manipur mipuhai humhimna dingin Bill thar, “The Manipur Regulation of Non­Local People Bill, 2016” induong a ni a, hi Bill hi Assembly Session hung um huna putlut ning a tih. Hi Draft Bill copy hi state cabinet meeting chun chipchier takin an hriltlang a The Manipur Regulation of non­Local People Bill, 2016 original draft copy chu mipuihai lo tiem le enfel thei dingin state Government website­ah upload ning a ta, sawrkarin August 24, 2016 chena mipuihai ngaidan, dit dan le rawtna siem hai pelut dinga ngen ning an ta, chu hai chu chipchier tak le chik taka enfel  ning a ta, belsa tul a um leh belsa a, pei tul a um leh pei dingin Cabinet meeting in a rel tiin a hril.

Hi  Bill chungchanga state sawrkar hmalakna le rawtna siem hi thiltha le thil awm niin an lang. Hi lei hin a hun laia ngaiven chu tlangmi le phaimihai ta dinga thiltha le thil thaw dan ding niin an lang. Sawiselna ei nei khawma sawisel theina hun hawng, belsa le pei ei nei nuom khawma belsa le pei dinga ngenna siem thei hun state sarwkarin hun a hawng hi ngaitha chi ninaw nih. Sawisel thei hun, belsa thei hun le pei thei huna iengkhawm hril der loa  ei tosan tawk tawk chun a thiemnaw chu mipui ei ni ta ding a nih. Bills 3 pasina ding thua hin chu tlangmi han sawrkar le MLA hai chau intum thei ni tanaw ni haia, mipui tiengpang khawmin mawphurna ei nei ta ding a nih.

ILP chungchanga movement hung suok hi ei turhla hle ta a, tosan mei mei chi chu niin an lang nawh. A bikin Manipur tribal han hril ding, rawtna le sawisel nuom ei nei a ni chun legal le constitutional expert­hai rawna hma ei lak a tul. Phaimihai le tlangmihai dit le pawmtlang thei ding tia Bill draft nia hril hi an dik chie am ti enfel chu mipui mawphurna a nih. Sawiselna a um si naw chun, state sawrkar ta ding chun Bill thar hi pasi dinga Assembly Session a putlut nawk el chu an ta dinga lampui umsun a nih.

Zohnathlakhai lem hi chu hril hun dinga hril ngai lo, hrilna hmun dinga hril ngai lo, sawisel huna sawisel ngam ngai lo, a hun inkhel hnunga hril hlak le chier inhruoi hlak ei ni tlangpui tawl. Hi thil hi theida inlakhawm ei mizie a ni tlat. Chier lungawi hi ei thaw thei tawk le ei thiem zawng a nih. State sawrkar thiltum le rawtna hi a pawnga dang el thei le tosan chi ninaw nih. Hril ding le thaw ding ei nei chun Bill thar draft chungchanga hin tosan el neka hma ei lak a tha lem ring a um.



Post a Comment

Powered by Blogger.