JAC in an bandh thaw tum an fethlengpui ding
CCPUR: Joint Action Committee Against the Killing of (L) Siaklalzawm chun zanikhan thusuok an siem a, August 10, 2016 zingkar a inthawk tiemchin um lo (indefinite) Tiddim Road Bandh an thaw tum chu an fethlengpui ding thu an ziek.

Hi JAC chun December 19, 2015 nia motor in a baw hlum (L) Mr Siaklalzawm of Kangvai thina thua an thil ngen hai thuah August 7, 2016 khan press/Media hai inhmupuiin an thil ngen hai ni 3 sunga suktpuitling pek dingin Manipur sawrkar an ngen a, sienkhawm sawrkar tiengpangin ngaisaknaw leia bandh hi fethlengpui an tum niin an thusuok chun an ziek. Bandh hin Press/Media le Medical chau a huomnaw ding niin hi JAC a Convenor Khaiminlun le Secy. K. Paul Capvung han thusuok an siema chun an ziek.

Chun, Dr N. Gyaneshore Singh that tumna le inzawma JAC indina um chun August 10, 2016 a inthawk tiemchin um lovin Bishnpur district bazar areas le Tiddim Road­ah bandh an thaw ding thu an lo puong ta bawk.

DDCMC tia thlakthleng a nih
CCPUR: Sawrkar thlungpui ditdan angin kum danga District Vigilance and Monitoring Committee ti hlak kha District Development Co­Ordination and Monitoring Committee (DDCMC) a thlakthleng a nih tiin Under Secretary (DD & PR), Govt. of Manipur, Department of Rural Development in inhriettirna a siem. DDCMC­a Chairman chu ­Lok Sabha/Rajya Sabha) a ni ding; Secretary in DC le Members in MLAs hai, State govt. a inthawk representative 1, ADC/CCPur a inthawk 1, CEO/ADCC; Project Director, DRDA le a dang dang hai an ni ding ti a nih.

HAA in Unit indinna dingin hma an lak mek
CCPUR: Tulai hin CCPur district sunga Tuithaphai laia Hmar khuo tum tum haia chun Hmar Artistes’ Association (HAA) Unit indinna hun fepui mek a ni a, HAA Gen. Hqrs thuoitu tienga inthawka thudawng danin Hmar hla le rimawi inhnikmihai chu an lo phur tawlin, an lo thlawp tha hle thu hriet a nih. Muolvaiphei, Saikawt, Khawmawi, Ramthar le Bethel Unit inthlangna dinga hmalatu ding Convenor ruotfelpui peiin, file inhlanna khawm nei zo a ni ta a, zani zan khan Khawpuibung le Muolbem ah Convenor ding an ruot fel pek nawk ding niin ei thu dawngna chun a hril.

Monitoring Cell­ah mi 111 en tah
CCPUR: CCPur district­a Japanese Encephalitis (JE) le Viral Fever inleng leia CMO office campus­a  DSU/IDSP Centre hmuna August 4, 2016 a inthawk Monitoring Cell hawng­a uma chun zani chen khan mi 111 en an ni ta a, hi laia mi 60 hai chu an thisen (blood sample) lak a ni tah. August 4&5, 2016 haia blood sample laka um 16 hai test result a hungtlung ta a, hi laia 6 hai chu result a chiengkuong naw leiin test thar a tul ding niin ei thu dawngna chun a hril a, a dang 10 hai ruok chu negative vawng a nih.

Report kim tak taka pe dingin
CCPUR: Director of Education thusuok dungzuia “Azadi 70­Yaad Karo Kurbani (Freedom Fortnight) hmang ding le inzawmin T. Goukhomang, ZEO/CCPur chun, CCPur district­a ZEO hnuoia um DI of Schools hai chu mani block sung chita mi report kim taka pe seng dingin an hriettir.

Inrukhmanga um Activa hmukir
CCPUR: Mr Lalthangkhum of Thenmuol Activa (dark grey color) MN02A­6403,  April 17, 2016, 7:00PM a inrukhmang chu zani hmasa khan Police han Terakhongsangbi hmuna Workshop pakhat­ah an va hmudawk a, Activa hi a neitu kuoma an inhlan tah.

SSPP in Puitling hai JE vaccination thaw dingin
CCPUR: Siamsinpawlpi (SSPP) GHQ chun CCPur­a JE leia thi mi 5 an tling ta bakah JE positive ringhla 12 an um ta a. JE inleng hun hi June­September a ni; kum 1­15 inkar hai JE vaccination a nita a, sienkhawm puitling hai JE vaccination thaw a la ninaw na thuah puitling hai JE Vaccination thaw dingin thuneituhai an ngen a, An ngenna hi Health Minsiter, GAD/Health & FW/CADA, Manipur kuomah an peklut ta thu an hril.

HCLF aiawin tawngtainain an inthla liem; HPC(D) palai hai Mizoram an tlung
IMPHAL: Mizoram sawrkar aiaw le Hmar Peoples Convention­Democratic (HPC­D) han August 10, 2016 nia inbiekna an neina dinga Manipur­a inthawk HPC(D) aiaw palai ding hai chu zani sun dar 11 khan Imphal hmunah Hmar Christian Leaders’ Forum (HCLF) aiawin Rev. Lallienthil Selate, Rev. V. Laltanpui le Rev. Lalnghatlien Songate han an lu chunga kut innghatin Pathien kuoma tawngtaipekna neiin an inthlaliem.

Mizoram sawrkar palai le HPC(D)palai hai hin vawisun 11AM hin Tourist Lodge, Chaltlang, Aizawl­ah peace talk nei tan an tih. Hi inbiekna ding le inzawm hin HPC(D) hmalaknain July 16, 2016 khan darkar 5 sung zet consultative meeting nei a ni a, hi huna hin Hmar Inpui  GHQ le a hnuoia  Organisation tum tum HCLF, HYA, HSA, HWA, HACS, HNU, HAA, DHWA, HKI, HMARTOB le a dang dang hai an thang a nih. HPC(D) palaihai hi Pu Lalthalien inrawinain John H. Pulamte, Francis Songate hai le Mizoram­a inthawk ­Thanglianchhunga, Rohringa le Lalthlamuana Hmar hai thang an ta, Mizoram sawrkar tieng chu mi 4, Addl. Secy. (Home) Pu Lalbiakzama inrawinain  Joint Secretary for Home Lalhriatpuia, SP, CID (SB) Rodingliana Chawngthu le OSD (Home) David H. Lalthangliana hai ning an tih.  HPC(D) aiaw­a thang ding Manipur­a inthawk Pu Lalthalien, Dr John Pulamte, Pu Francis Songate hai hi zanikhan Aizawl, Mizoram an tlung tah.(LRS Puruolte)

Irom Sharmila in bunghei a chawlsan tah; Manipur CM ni a nuom
IMPHAL: Irom Sharmila (42) chu zani 11AM khan Chief Judicial Magistrate (CJM), Imphal West, Lamkhanpau Tonsing hmaah an lang a, a bunghei chawlsan a nuom thu a hril leiin Court chun Personal Recognition (PR) Bond Rs. 10,000 in bail­in an suo a, August 23, 2016 a Court hmaa inlang nawk dingin thu a pek nawk. Kum 16 lai zet bu a nghei hnungin znita inthawk khan a bunghei a chawlsan tah. Manipur a intahwk AFSPA hlip dinga ngenna leia November, 2000 a inthawka bungheia tan ta a nih.

Irom Sharmila chun Manipur CM  a ni nuom thu, kum 2017 a Manipur Assembly Election hung um dinga hin Independent candidate in tuta CM ni lai mek O.Ibobi Singh  tlingna bielah a ngir ding thu le a tling chun AFSPA a hlip ding thu Chanchinbumihai hmaah a hril. Chun, Goa state a seilien, tuta British mi ni ta chu pasala a nei nuom thu le helpawl han nei lo dingin vau hai sienkhawm innei a nuom chun anneipui tho ding thu khawm Sharmila chun a hril.

BJP le Congress chun an party hai zawm a nuom phat chun an lo lawmlut ding thu an hril. ‘Kan party hung zawm a nuom chun hnawl ninaw nih’ tiin BJP thuoitu Kh. Joykishan chun a hril. Hiengang bawk hin MPCC President T.N. Haokip chun, ‘kan party zawm a nuom chun lawmlut kan tih tiin zanikhan a hril.

Kum 2014 Lok Sabha election lai khan AAP chun an party ticket in Inner Manipur Parliamentary Constituency a ngir dingin an lo fiel ta a, sienkhawm an fielna chu a lo hnawl pek a nih.

Civil Society Organisations tum tum hai chun MLA a ngir tumna hi ngaituo nawn nawk dingin an ngen a. Hieng laizing hin mi thenkhat chun MLA ngir a tum hi tha an ti thu an hril ve thung. Sharmila chun, thlangtling le CM ka hung ni chun AFSPA ka hlip ding a nih tiin a hril.

Sharmila hi zanikhan JNIMS­ah a hriselna enfel a ni a. Dr Laishram Deben, Director, JNIMS chun, ‘Sharmila hi a hriselna a tha a, lawn khawm lawn thei. Amiruokchu, kum 16 zet buchangrum fa ta lo a ni leiin hun iemanichen chu butui a fak la tul a tih. Chuong naw chun a phingpuiin la senawi zonaw nih tiin a hril.

Pathiennu anga mi han an mi en ka nuom naw a, mihriem pangngai anga an mi en ka nuom. Anti­Hindu tia intuma Mahatma Gandhi an that ang khan an nuom leh a mi that nuom han mi that raw hai seh. PM Modi chu tharum thaw le hmangin a hril a. Tulai khawvel changkang takah tharum hmang ei mamaw ta nawh. Ei hnampa kha tharum thawna thang lo pa a nih. Inthlier hranna um lovin, pain nauhai a enkawl angin mi enkawl (PM in) raw seh tiin Sharmila chun a hril.

Cabinet meeting nei a nih
IMPHAL: Zani 4PM a inthawk khan CM O.Ibobi Singh inrawinain Cabinet meeting nei a ni a. ILPS Bill thar draft a um thu, 10th Manipur Legislative Assembly 14th Session nei dan ding thu, Manipur Technical University Bill, 2016 chungthu, PWD le Minor Irrigation Department hnuoia thawktu thar lakna ding chungthu hai an hriltlang.

Kum 15 sunga sawrkar hmalakna
IMPHAL: Kum 15 liemta sunga Manipur state a Congress sawrkar hnuoia hmalakna le a sin thaw that hai mipui hriet thei dinga puonglang ning a tih. Hi puonglangna sin hi kum 2017 Assembly election hma ngeia thaw tum a nih tiin O.Ibobi Singh, CM, Manipur chun a hril. MYCC in zanikhan Manipur Youth Congress Committee Day an hmang a, hi huna hin CM, Dy. CM le MPCC President T.N. Haokip hai an thang.

Kum 2019 chenah khawtinah electric
IMPHAL: Manipur State Power Distribution Company Limited (MSPDCL) chun kum 2019 chen khin khawtinah electric intlungtir cawng hman a tum a, tuhin khawte 110 hai chu electric la tlungzawm lo a nih tiin R. Sudhan, Managing Director, MSPDCL chun zanita DIPR Complex, Imphal­a Press Conference huna a hril.

Security Meet an buotsai
IMPHAL:  Tulai­a Manipur phairam biel le a sevel­a IED puok le inzawmin 45­Assam Rifles chun zani hmasa khan Hanuman Top  post ah security meet an buotsai a, hi huna hin Assam Rifles Company Commander 6; 49 BSF officiating OC, 21C IRB Company le hi lai khaw tum tuma lal le khawsung thuoituhai an thang.

Sainik school Imphal in an lak ve ve
IMPHAL: Sainik School Rewa, Madhya Pradesh­a August 3­6, 2016 inkar sunga ‘Inter­Zonal Sainik School Football Championship 2016’ nei a chun Sainik School Imphal(SSI) football team­a juonior le sub­junior team han hrat tak nina an lak ve ve. SSI team hi East Zone Sainik School aiawa inkhel an nih.

Heroin grams 970 leh pasal 2 man
IMPHAL: Narcotics and Border Affairs Police han August 6, 2016 khan Md. Zakir Ahamed @ Abo (48), s/o (L) Md. Muheiyuddin of Lilong Haoreibi Mayai Leikai le Md. Abir Khan (35), s/o Md. Yakub Ali of Lilong Haoreibi Mayai Leikai hai chu an vengah heroin grams 970, Rs. 24,25,000/­ manhu leh an man niin PRO Police Department thusuok chun a hril. Aug

13 chen state sawrkar hun pek
IMPHAL:  Joint Committee on Inner Line Permit system (JCILPS) chun Protection of Manipur People’s (PMP) Bill, 2015 thlaktu ding Bill thar draft­a um chu August 13, 2016 chena mipui hmu le tiem thei dinga phawrlang dingin Manipur sawrkar chun (deadline) an pek. State sawrkarin deadline an pek chena an thil ngen a sukpuitling naw chun nuorna chi hran hran (intense forms of agitation) an thaw tan nawk ding thu le hi nuorna hin student le mipui an thangruol ding thu Bk Moirangcha, Convenor in­charge JAC chun a hril.

JD(U) in Sharmila thlawp an tum
IMPHAL: Janata Dal (United) National General Secretary Arun Kumar Sriivastava chun, Ms Sharmila in Manipur Assembly Election hung um dingah Independent candidate­a a lo ngir chun JD(U) party in thlawp a tih tiin zanikhan Imphal­a JD(U) office­ah a hril.

Ratan ‘wanted’ tag hearing Aug. 11­ah
IMPHAL: Manipur sawrkarin  JCILPS Convenor hlui Kh. Ratan Wanted­a a puongna le inzawma  petition file­a um hearing zanikhan Manipur High Court­ah nei a ni a, hi thua hearing nawk chu August 11, 2016 nia nei nawk dinga ruot a nih.

AP CM hlui Kalikho Pul inkhaihlum saa hmu
ITANAGAR: Arunachal Pradesh Chief Minister hlui Kalikho Pul (47) chu zani zingkar dar 8 vel khan  Itanagar­a a chengna insungah inkhaihlum saa hmu a nih. Kalikho Pul hi Supreme Court in Arunachal Pradesh CM a ninaa inthawk inban dinga an hriettir a inthawk chawlkhar khat vel chau a la liem a, a chengna in siemthat mek a la ni leia Chief Ministerial official residence hi la suoksan lo a nih. Pul thina san tak hriet chieng a la ninaw a, ama le ama inkhaihlum chu ni dinga ring a ni a, sienkhawm  Police chun a diary an enfel mek niin ei thu dawngna chun a hril.

Hieng laizing hin ama thlawptu pawl mipui lungsen hai chun zanikhan Deputy Chief Minister Chawna Mein le Industry and Textile Minister Tapang Taloh hai chengna in hlukhumin an suksiet bakah hi lai hmuna private motor um hai an suksiet bawk. Ama thlawptu hai chun Kalikho Pul thina thu hi tha taka suizui dingin an ngen bakah CM Pema Khandu chu inban dingin an phut a, Pul kuong (coffin) dinga hung chawi khawm mipui lungsen hin an raw bawk. Pul thi thu hrie­a CM’s bungalow­a va fe tum Minister thenkhat hai khawm anni leia Pul hi ama le ama inthat a nih tia intumin Bungalow  in luttir thei lovin iemanichen an dang.

CM hlui Nabam Tuki laka hel Congress  MLAs 12 han an thlawp leiin  Kalikho Pul hin February­July, 2016 sung khan Arunachal Pradesh CM sin  a lo chel a nih. Pul hin a nuhmei pathum hai bakah nau 5 a thisan.

India President Pranab Mukherjee; Prime Minister Narendra Modi le Congress President Sonia Gandhi hai chun Kalikho Pul thi hi an sun thu an puong a, a maksan a nuhmeihai le a nauhai an sunpui thu an puong bawk.

Pul hin ni 7 sung zet chu tukhawm puotieng mi an hmupui tanaw niin a sunghai chun an hril.

VAWISUN THUPUI
Var ka siem hlak a, inthim khawm ka siem hlak a nih; inremna ka siem hlak a, intheidana khawm ka siem hlak; kei hi Lalpa, chuong thilhai po po thaw hlaktu chu  ka nih, tiin. ­ Isai 45:7

Editorial: Mipui himna

Hungtlung ding August 15, 2016 khi India in zalenna a hmu kum 70 tlingna ding a ni tah. Mihriem nisienla chu tar, a zantieng hun hmang lai mek a ni ta ding a nih. Kum upat  thua ei ram le a mipuihai hi him ding ni inla chu him theina ding hun a ni tah. Mipui le ram himna dingin sawrkar chun sum le pai, tha le zung, ngaituona a seng rawn em em ti chu ei hriet seng. Amiruokchu, a ram mipuihai ta dingin himna tak tak a la um thei nawh. Nitin elin India ram hmun tum tum haiah helpawlhai chetna leia thina, hliemna, inthuoihmangna, insuomna le thil tha lo, suol chi tum tum hai a la tlung zing el a nih. India mipuihai ta ding chun ei ram a la zalen tawk naw a, a la him tawk naw a, a la ralmuong tawk naw bawk. Hi lei hin sawrkarin mipui himna, mipui muongna le mipui zalen theina dinga nasa nawk zuola hma a lak a tul hle.

Sawrkar um san chu a ram le a mipuihai himna ngaituo a nih. Tuta ei ngirhmuna hin chu mipui himna  hin ngaipawimaw hmasak (priority) a hlaw zo naw niin an lang. Ei ram sawrkar chun a ram le a mipui hai himna ding hi a ngaipawimaw hmasa a la tul hle a nih. Ram ropui takhai leh intekhi ding ruol chu ei ninaw a, sienkhawm ei chunga thil thanaw hungtlung thenkhat lakah hin chu invenghim thei ding ei nih. Chu ding chun mipui venghimna sin hi ei ram sawrkarin a ngaipawimaw hmasak a, top priority a pek a ngai a nih.

Ei ram, Manipur state chitereka cheng mipuihai khawm ei him chung nawh. Tulai lem hin chu nitin elin bomb puok thu, bomb puok leia mi thenkhat an hliem thu inzing uta hriet a nih. Bomb sukpuok nuomhai hin an nuomna lai lai le an nuom hun huna an sukpuok el thei nia an langna chin a um a. Hi lei hin ei state sawrkar hin mipui himna dingin venghimna sin hi ngaipawimaw zuol sienla nuom a um. Mipui himna dingin sin a thaw nawh tina  ni lovin, venghimna sin a thaw hi uluk le khau lemin thaw sienla, tuta nek hin mipui ei him lem ring a um. Hmun kilkhawra bomb puok hi chu thu dangah sie inla, khawpui laili, Police le Security force tamna hmun haia bomb a puok nawk el hlak hi chu hrietthiem a harsa deu a nih.

Mipui chuongna Bus a chen bomb phur nuom ei um el khawm hi a pawi a, sumdawngna hlawk tak khawm nisienla mipui himna ding ngaituo a ei bansan ngam nuom a um. Bus sungah bomb puok em naw sienkhawm, Bus a chuong passenger­hai chu an inzin tumna hmun le an tlung tumna hmun tlung thei lovin lamlakah intumtir le Bus dang chuongna ding an zawng a tul pha a, passenger­hai nasa takin a sukbuoiin a suk harsa pha a nih. Mipui sukbuoi le suk harsa pawiti lova sumdawnghai hi hremna inrik tak pek nihai sienla ti chu mipui dit dan ni ngei a tih. Hiengang mihai hi mipui suk harsa, suknat, sukhliem le thi theina ding thil thaw ngamhai hi chu misuol, bomb sukpuoktuhai leh angkhata ngai le hremna pek khawm an phu a nih.

Bomb sukpuoktuhai khawm hi mipui thang lova um le khawsa thei an ni nawh ti hi an hriet tlat a, pawitawk lo, civil mihai umna hmuna bomb sukpuok hi chu bansan thei ngei hai sienla nuom a um. Mipui himna an ngaipawimaw ve naw chun an ta dingin harsatna nasa tak an la suksuok ding a nih. Chu thil chu an ta ding chun inthim sa takel, iengkhawm thaw thei nawna a lo suksuok ding a nih. Silai le bomb­hai hi mihriem thi le hliem theina, tium takel nisienlakhawm mipui lungril hne theitu chu a ni nawh ti an hriet a tul.

Thil suol thaw tum ngar ngar hai chu khawvela sawrkar hrat le ropui hai khawmin an dang thei bik nawh. Amiruokchu, mipu himna an ngaipawimaw hmasak a, mipui himna dinga venghimna tiengpang an uluk leiin thil tha lo hungtlung thei tam tak an pumpel thei hlak. Khawvel um sung chu bomb puok, indo, inthat, inthuoihmang, insuom le suol chi tum tum hai hi bo naw ni a, a la hungtlung pei ding a nih. Amiruokchu, hiengang thil hai tlung thei laka mipui himna ding ngaituo a, hmalak chu sawrkar mawphurna a nih. Mipui hai himna an kutah an nghat a nih.
----------------------------
EMPLOYMENT NEWS
1. Directorate of Rural Development & Panchayati Raj, Govt. of Manipur hnuoiah Progress Assistant (PA) post 28 (ST­8); Village Level Worker (VLW) post 56 (ST­17); LDC/Assistant ­cum ­Computer Operator post 28 (ST­8); Road Muhorrir (RM) post 28 (ST­8); Driver post 28 (ST­8) le Grade IV/Peon post 56 (ST­17) temporary in a ruok. Application form 10­8­2016 a peksuok tan le 05­09­2016 chenah Directorate of RD&PR, Imphal East DC Complex, Porompat ah lak le peklut thei ning a tih.

2. Directorate of Agriculture, Govt. of Manipur hnuoiah Office Assitant­cum­Computer Operator Post 22 (ST­6); Village Extension Worker/Field Assistant post 77 (ST­23); Jeep Driver post 7 (ST­21); Primary Price Reporter post 7 (ST­2); Photographer post 1, Field man post 20 (ST­6); Lab. Attendant post 3, Mali post 3, Peon Post 23 (ST­7); Chowkidar post 17 (ST­5); Sweeper/Scavenger post 1 le Handyman post 9 (ST­2) temporary basis in a ruok. Application form le thu chieng lem chu Directorate of Agriculture, Sanjenthong, Imphal­ah 10­08­2016 a inthawka lak thei le 03­09­2016 chena peklut thei le hriet thei ning a tih.

3. Directorate of Information and Public Relations (DIPR), Govt. of Manipur hnuoiah Reporter post 6 (ST­2), Information Assistant post 4 (ST­1), Translator (Dialect) Post 6 (Hmar 1, Paite 1, Zou 1, Vaiphei 1, Liangmei 1 le Paumei 1), Stenographer (Grade­II) post 1 (unreserved)  Office Assitant post 7, Data Entry Operator post 2 (UR), Driver post 7 (ST­3); Grade­IV (Peon) post 9 (ST­3) a ruok. Hieng sin ruok apply nuom han August 17, 2016 chenin Employment Exchange, CCPur­ah hming peklut thei ning a tih.



Post a Comment

Powered by Blogger.