PMUY thuah Dy. Manager IOC Gas Agency hai an hmupui
CCPUR: Nuhmei kum 18 le a chungtieng le Hmeithai han Free LPG/Gas connection an dawng theina ding Pradhan Mantri Ujjawala Yojana (PMUY) Scheme May, 2016 a hawng a ni le inzawma CCPur District­a khawm tha taka sukpuitling a ni theina dingin Stephen Chinkhanson Guite, Dy. Manager, IOC chu zanikhan CCPur a hung inzin a. DC Office Chamber­ah Mr Lunminthang Haokip, DC, CCPur; DSO/CCPur; GO/HQ le CCPur District sunga Gas Agency Manager/Proprietor hai meeting a neipui.



Mr Chinkhanson Guite chun, SECC (Social Economic & Cash Census), 2011 hnuoia registered le BPL card holder nuhmei le hmeithai kum 18 le a chungtieng hai LPG Free Connection thaw pek ding chungthu hrilin; Gas stove le Cylinder hai mimal­a inchawk tul ding a ni thu a hril a. Sawrkarin a thlawna a pek ding chu Rs. 1000­1500 inkar (value) a ni thu a hril.

Hi scheme hnuoia hin India sawrkar chun kum 3 sungin nuhmei le hmeithai khawsak harsa zuol mi vaibelsie 5 hai kuomah LPG Free connection a pek dinga ti a ni thu a hril a, hi scheme tha taka sukpuitling a ni theina dingin District Administration office khawmin tha taka thlawp le thangpui dingin a ngen.

July thla sung motor 110 registered
CCPUR: District Transport Office (DTO), CCPur chun July, 2016 thla sung khan motor hran hran 110 an registered a, hi lai hin Truck 2, Van 7, Car 9, Jeep 5, Autorickshaw 11, Two­wheelers 76  a thang. April­July 2016 inkar sunga motor tum tum registration thaw zat chu 455 a tling phak a, hi lai hin Truck 31, Van 14, Car 45, Jeep 13, Autorickshaw 28, Two­wheelers 323 le others 1 a thang.

Chun, July 2016 thla sung khan DTO, CCPur in revenue Rs.9,90,916/­ an hmu a, April­July 2016  inkar sunga Revenue an hmusuok chu Rs.29,05,135/­ a tling phak.

Belladonna­200 Damdawi um po sem zo
CCPUR: JE natna laka invengna ding Project Belladonna­200 damdawi chu zanikhan DFWO Office­a Counter pathum haia sem a ni a. Damdawi dit an tam hle a, a um po zanikhan semzo a nih .  Belladonna­200 hi zani hmasaa Dr K. Lokendro Singh, Director, AYUSH, Govt. of Manipur in a hawng a nih. Hi damdawi hi zingkar phing ruok huna fak ding a ni a, kum 0­1 inkar han nikhatah mum 1 ni 3 sung fak ding; kum 1­15 inkar han ni khatah mum hni, ni 3 sung; kum 5­15 inkar han ni khatah mum 3, ni 3 sung fak ding le kum 15 le a chungtieng han nikhatah mum 4, ni 3 sung fak ding a nih.

Monitoring Cell­ah damnaw en tan
CCPUR: Japanese Encephalitis (JE) le Viral Fever inleng leia CMO Office campus­a Disease Surveillance Unit/Integrated Disease Surveillance Program Centre­a Monitoring Cell hawng thara um a chun zanikhan Dr O. Jotinkumar Singh in damnaw a en tan a, zanikhan damnaw 28 en an ni a, hi laia ringhla deu mi 5 hai thisen (blood sample) lak a ni a, enfel dingin Imphal tieng thawn ning a tih. Hi hmuna hin JE le Viral Fever a damnaw hai inentir thei zing ning a ta, ringhla deu hai chu enfel dingin an thisen lak pei a ni ding a nih.


Pavanglai training thul
CCPUR: August 6, 2016 a Lamka ICI Biekina Presbytery Pavanglai Training nei dinga ti chu remchangnawna a um leia thul a nih tiin Secretary, Presbytery Pavanglai chun inhriettirna a siem.

EFCI Sielmat nuhmei pawl in market
CCPUR: Sielmat EFCI Nuhmei Pawl chun August 6, 2016 (Inrinni) zingkara inthawk hin Biekin  bawlna dingin Sielmat kawtsuo le Sielmat Christian Hospital bul lai bazar siem an tih. Hi huna hin Secondhand thuomhnaw le Thingpui le Bei zawr ning a tih. Pathien rama rawngbawlnaa ngaia va dawr seng dingin Sielmat EFCI nuhmei Pawl chun fielna an siem.

Monitoring Cell­ah damnaw en tan
CCPUR: Japanese Encephalitis (JE) le Viral Fever inleng leia CMO Office campus­a Disease Surveillance Unit/Integrated Disease Surveillance Program Centre­a Monitoring Cell hawng thara um a chun zanikhan Dr O. Jotinkumar Singh in damnaw a en tan a, zanikhan damnaw 28 en an ni a, hi laia ringhla deu mi 5 hai thisen (blood sample) lak  a ni a, enfel dingin Imphal tieng thawn ning a tih. Hi hmuna hin JE le Viral Fever a damnaw hai inentir thei zing ning a ta, ringhla deu hai chu enfel dingin an thisen lak pei a ni ding a nih.

Group Guiter Classes thang thei
CCPUR: Guiter per thiem nuom hai ta dingin Group Guiter Classes buotsai a ni ding a ni a, Guiter per thiem nuom, inhnikna nei hai chun August 5­8, 2016 inkar sungin Bethel Shelter, Rengkai, JJ Plaza building, Life Cafe building sawng hnuoiah Registration thaw thei le chanchin kimchang lem indawn le kan thei ning a tih. Instructor ding chu Joshua Songate ning a tih. Orientation August 9, 2016 in um a tih. Fee Rs. 150/­ ning a ta, time: 4­5PM inkar ning a tih.

Manipur-ah Homeopathy Medical College indin dingin State Cabinet meeting in a rel
IMPHAL: Zani 3:00PM a inthawk khan Chief Minister’s Secretariat Conference Hall, Imphal­ah CM O.Ibobi Singh inrawinain State Cabinet meeting nei a ni a, agenda chi tum tum an hriltlang.

Zanita State Cabinet meeting chun Manipur­ah Homeopathy Medical College indin dingin an rel. Chun, ANM/FHW Training School, Churachandpur chu GNM School­a hlangkai ding, Jawaharlal Nehru Institute of Medical Sciences (JNIMS), Porompat­ah subject 6 haia Post Graduate Courses hawng ding le inzawmin post Creation le appointments siem ding; JNIMS a thawk ding Post 7 lak ding; Medical Department a engagement a thawk Sister Tutors pahnihai sin suknghet ding le College of  Nursing a Staff Nurse chu Tutor a hlangkai ding tihai an rel niin ei thu dawngna chun a hril.

State Cabinet meeting a hin Smart City Mission sin thawna kawnga hmalatu dingin Imphal Smart City Limited indin ding, Memorandum of Agreement ziek ding, Lamdeng a Solid Waste Management Plant PPP model hnuoia sie ding, Lilong a Pallel le Wangjing to Khudengthabi via Heirok National Highway­hai suklien ding, Yaithabi Loukol, Thoubal District­ah National Sports University indinna ding ram inbiekpuina neia direct a inchawk ding ti le thu dang dang hai an hriltlang sa bawk.

Chun, State Cabinet meeting chun Manipur­a Police Station hran hran a VDF sin thawhai chu an sin thaw thei hun sung kum khat dang, April 1, 2016 a inthawk March, 2017 chen suksei nawk dingin a rel.

Indira Park suklien ding
IMPHAL: Damnaw khum 50 um theina ding Jiribam Hospital building thangsain Planning and Development Authority (PDA) chun building tum tum a bawl mek a, Indira Park khawm suklien tum a nih. Tuta Indira Park hi 3096 Sq. metre a lien a ni a, hi park sulienna ding hin ram 2714 sq. metre pek belsa a nih tiin L. Kesho Singh, EE, Div.I, PDA, Prasanta Wahengbam, EE, Div­II, PDA le  T.L. Muan, EE, Div­II, PDA hai chun zanita DIPR Complex, Imphal­a Press Conference huna an hril.

Polytechnics 8 indin belsa ding
IMPHAL: Manipur­ah Government Polytechnic pakhat chau a um a, chu chu Imphal West District a Government Polytechnic hi a nih. Tuhin State sawrkar chun Goverment Polytechnic thar 8 indin a tum a, hieng Polytechnic­hai hi tuta a la um nawna distric Headquarters pariet haiah indin ning a tih tiin Mutum Ibomcha Singh, Controller of Technical Education, Manipur chun zanita DIPR Complex, Imphal­a Press Conference huna a hril.

Manipur Police 2 thangin drugs leh mi 3 man
IMPHAL: Zanikhan Beltola, Guwahati, Asam­ah Manipur Police 2 thangsain mi 3, Manglemjao Singh, Inao Singh le Seibom Raym, Manipur mi vawng hai chu Assam Police han Drugs thahnemtawk tak leh anman niin ei thu dawngna chun a hril.

Khuolzinmi an pung pei
IMPHAL: Kum tinin Manipur puotieng mi Manipur­a hung inzin hi an pung pei a, kum 2011­12 khan Manipur puotieng mi 602 chau an hung inzin a, kum 2015­16 ruok khan chu khuolzinmi 3012 zet an hung a nih tiin Nidhi Mani Tripathi, Secretary (Tourism), Govt. of Manipur chun zanita DIPR Imphal a Press Conference huna a hril.

An bandh thaw tum an thul
IMPHAL: Oinam Nagar Panchayat  huop sunga National Food Security Act (NFSA) hnuoia beneficiary Card la dawng lo hai le DSO, W. Deben Singh han August 3, 2016 khan Oinam NP Office­ah meeting an nei a, inbiekremna an nei thei leiin August 5, 2016 nia Tiddim Road Bandh thaw an tum chu an thul ta niin O. Hemanta, Bandh thaw tumtuhai laia an thuoitu chun a hril. An inbiekremna dungzui chun NFSA  Card an nei hmapo chu ni danga bufai an dawng pangngai pek ning an ta, hi hun sung hin an Card ding chu siem le sem ding ti a nih.

Manipur CEO thar ding ruot
IMPHAL: Election Commission of India (ECI) chun Chief Electoral Officer (CEO) thar dingin Vivek Kumar  Dewagan, IAS, tuta Commissioner, Commerce and Industries, Govt. of Manipur chu a hung ruot. ECI chun, sin dang chelsa lova CEO sin chau a chel chu a dit dan le tha ti dan a nih. Vivek Kumar Dewagan hi 1993 batch IAS Officer a nih. CEO, Manipur sin hi tuhin Chief Secretary O. Nabakishore in a chelsa a nih. Manipur sawrkarin Order an suo hun huna CEO sin hi Vivek Kumar Dewaganin a chel ding ti a nih.

Mizoram le HPC (D) inbiekna August 10-ah
AIZAWL: Zanikhan Mizoram Home Minister R. Lalzirliana  inrawinain Home Department, Mizoram le Police Department, Mizoram a senior officials han inbiekna an nei a, Mizoram sawrkar le HPC(D)  palaihai inbiekna dinga modalities chungthu an hriltlang. Mizoram sawrkar le HPC(D) palaihai  chun August 10, 2016 khin Aizawlah inbiekna nei tan an ta, Mzioram sawrkar tienga palai 4 hai chu Lalbiakzama, Additional Secretary (Home), Govt. of Mizoram in inrawi a ta, HPC(D) tiengpang palai 6 thang an tih tiin R. Lalzirliana chun a hril.

Cocaine Rs. 17.8 crore manhu le Nigeria mi man
MAHARAJGANJ: Zanikhan India le Nepal ramri­a Sonauli hmuna Nigeria mi nuhmei pakhat Veneeta (36) chu inruithei Cocaine kg. 3.5, Rs. 17.8 crore vel mahu ding leh Police han an man niin NIA Inspector, Chandra Sekhar Azad chun a hril. NDPS Act hnuoia case siem khum a nih.

Khuo 8,360 hai electric  pek hman tum
NEW DELHI:  Tuta kum fe mek (current fiscal year) sung hin India rama electric la tlung lona khuo tum tum 8,360 hai electric meivar pek hman tum a nih tiin Power Minister Piyush Goyal chun question hour hunah zanikhan Lok Sabha an hriettir. April 1, 2015 chen khan India rama electric  meivar la tlung lona khuo 18,452 a um a, hi laia khuo 9126 hai chu July 31, 2016 chen khan electric meivar pek an la ni naw thu a hril bawk.

CMG Chairman thar dingin DK Pathak
NEW DELHI: Border Security Force (BSF) Director General hlui D.K.Pathak chu Naga ceasefire   panel ( Ceasefire Monitoring Group­ CMG) Chairman thar dinga ruot a nih. Mr Pathak hi 1979 batch IPS Officer, Assam­Meghalaya cadre a ni a, tukum February thlaa kha BSF Director General­a inthawka pension a nih. A sin hi kum khat sung ning a tih tiin Union Home Ministry thusuok chun a hril. CMG  Chairman sin hi Lt. Gen. (retd) NK Singh in a chel a ni a, a term hi June 30, 2016 khan a tawp ta a nih. Tuta hmaa CMG Chairman hai chu Army officer vawng an la ni a, tuta tum hi Police Officer CMG Chairman dinga ruotna hmasa tak a la nih.

Heroin Rs. 4,95,000 manhu an man
AIZAWL: Central YMA hnuoia inruithei dotu pawl SRS le CID Crime hnuoia Special Narcotic PS staff hai chun August 2, 2016, 6:30PM khan Durtlang­ah Heroin Rs. 4,95,000 manhu ding chu a neitu  Ngaihliana of Tiankhawmawi, Myanmar leh an man. Heroin hi Durtlang Leitan a inthawk Aizawl Theological College fena lampui­a an man a ni a, NDPS Act hnuoiah case siem a nih.

Science 3rd topper man; Rs. 5 lakh a pek thu a hril
PATNA: Bihar Intermediate Examination, 2016 topper scam le inzawmin Science stream­a 3rd rank holder Rahul Kumar chu zani hmasa khan Patna Police­a Special Investigation Team (SIT) han  Azampur village­ah an va man. Mr Rahul Kumar hi Bishun Rai College, Bihar a in exam a nih. Thu indawnna nei a ni hunah 3rd rank a ni theina dingin thamna Rs. 5 lakh a pek niin an puong tiin STI member le City Superintendent of Police Chandan Kushwaha chun a hril. Topper scam a hin mi 4 chunga FIR file a ni a, midang hai chu Shalini Rai, Saurav Sresth le Ruby Rai hai an ni a, Ruby Rai khawm man a nita a, Shalini Rai le Saurav Sresth hai ruok chu man an la ni nawh.

Bihar topper scam le inzawm hin BSEB chairman hlui Lalkeshwar Prasad Singh, a nuhmei le ex­MLA Usha Sinha, Vishun Roy college secretary­cum principal Bachha Rai hai bakah dozen 3 chuong mi man an ni tah. Ruby Rai TV channel in interview a nei huna Political Science chu ‘Prodikal science” tia a lam (pronounce) bakah Political science umzie chu thlaisuong dan inchukna tia a hril leia topper scam hi hung indawk a nih.

Jadonang Memorial Football Tour.
IMPHAL: Zeliangrong Football Association (ZFA) chun November 1, 2016 a inthawk THAU Sports Complex, Thangmeiband, Imphal­ah 10th Jadonang Memorial Football Tournament, 2016 huoihawt an tum. Winner team in lawmmanin Rs, 1,00,000, runner­up in Rs. 50,000 le Third place in Rs. 25,000 dawng an tih. August 16, 2016 a inthawk Rs. 500 pein Entry form ZFA Head Office, Kakhulong, Paona Bazar ah lak tan thei le Registration fee Rs. 3,000/­  ning a tih. Entry form peklut theina hun nuhnung tak Sept. 30, 2016 ning a tih. Best  player, Best keeper le highest Scorer lawmman in Rs. 10,000, Rs. 5,000 le Cup pek ni bawk an tih tiin ZFA thusuok chun a hril.

Mizoram IAS hmasa tak a thi
AIZAWL: Mizorama a inthawk IAS hmasa tak J.L. Rema chu zani hmasa zan khan tar natna in kum 91 mi niin Shillong­ah a thi a, vawisun hin a ruong Chanmari, Aizawla­a a In phurtlung ning a ta, Chanmari tlanmuolah vui ning a tih. J.L. Rema hi kum 1958 a IAS hmu, Assam cadre pek, Assam state a Jt. Secretary sin a chel lai, kum 1968 a  Pathien kona hrie a, IAS le a sina inthawka inban a, Baptist kohrana rawngbawl, saprama Bible inchuk zo, a hnunga Reverend hung ni ta pei a nih. A unauhai laia anlar tak chu Mizoram MP ni laizing C.L. Ruala a nih.

Motor Vehicle (Amendment) Bill 2016 a pawmpui
NEW DELHI: Union Cabinet meeting chun zanikhan Motor Vehicle (Amendment) Bill 2016 a pawmpui. Hi Bill hi India rama motor eksiden laka him lemna ding niin traffic rule bawsetu hai   khau le na lema hremna pekna ding a nih. Hi dan hnuoia hin naupang kum tling loa motor khal, inrui puma motor khal le Licence nei lova motor khal mana um hai chu hremna nalem pek an ni ding a nih. Chun, motor in mi a rawt hnunga a tlansan (hit­and­run case) hai kuoma compensation Rs. 25,000 pek hlak chu Rs. 2 lakh a sukpung a ni a, a case izirin Rs. 10 lakh chen pek ding ti a nih. Insurance boa motor khal hai Rs. 2,000 chen fine/ jail intang thei; Helmet boa motor khal hai an license suspend ding ti le inrui puma motor khal hai Rs. 10,000 chen fine inchawitir ding ti hai a nih. Reports dungzuiin India rama motor eksiden vawi nuoi 5 tlung ziea hisap le hieng eksiden haia hin mihriem 1.5 lakh velin an thi pha zie a hisap a nih.

Rajnath  Delhi a hungtlung nawk tah
NEW DELHI:  Union Home Minister Rajnath Singh chu Islamabad a inthawk dam takin New Delhi a hungtlung nawk tah. Zanikhan PM Modi an hmupui a, an zinna le inzawmin report a pek. Rajnath Singh hi Islamabad khawpuia SAARC Home Ministers Conference­a thang a nih. Conference­a thu a hrilnaa chun,“Terrorist tha le suol an um bik nawh, terrorist­hai inthiemnaw mei mei hi a huntawk nawh, terrorist­hai hi Pakistan in a thlawp hlak” ti thu hai a zu hril a. Pakistan chun a lawmnaw ning a tih, TV haia khawm a thu hril lai hi a suklang nawh.

VAWISUN THUPUI
Nangni a rorelnahai anga thawtu, hnuoi chunga zainem po pohai, Lalpa chu zawng ro; felna chu zawng unla, zainemna chu zawng ro; Lalpa lunginsenna  nia chun thupa in um theina dingin.  ­ Zephania 2:3

Editorial: AYUSH Hospital

India rama State lien tum tum le  khawpuilien haia chun  Hospital le Medical College a zatel an nei tawl a, an ram mipuihai an vangnei hle. A bikin Cancer Hospital, Heart Hospital, Kidney hospital le a dang dang an nei hi an vangnei zuol bikna a nih. Imphal khawpui ti lo Manipur a District Headquaters dang haia chun hiengang hospital hranpa hi a um naw leiin Cancer, Lung, Kal, chuop le a dang dang natna ei invawi changin sum seng a tam a, a che thei deu le a hausa han hieng hospital tha hai hi pan thei hai sienkhawm, a mipui tam lem, mi rethei han ei pan ve thei naw leiin ei thipui el hlak a nih. Mi hausa le a che thei deu han khawpui liena hospital tha an pan thei leiin an rengin dampui vawng kher nawhai sienkhawm a then a zarin an dampui hlak. Hi thil hi mi retheihai neka mi hausahai hamthatna le vangneina a nih.

Ei ram, a bikin Churachandpur District chun Hospital tam lem, Hospital tha le changkang ei mamaw em em a. State sawrkarin ei district sungah District Hospital, Community Health Centre, Primary Health Centre le Primary Health Sub­Centre hai hawng sienkhawm District mipui mamaw ang doctor thiem le hmangruo a hung sie thei zing naw leiin Cancer a damnawhai, thin, kal, chuop le lung tha lo hai chun vai rama hospital tha hai ei pan a la tul zing a, sum le pai thilah harsatna nasa tak ei tuok pha hlak. Hiengang hospital tha hi ei mamawna a lien em em leiin ei district a private hospital/clinic neituhai hin a neka nasaa thang lain, hospital lienle tha lem; hmangruo tha umna hospital/clinic changkang hung indin hai sienla chu mipui lawm hleng an tih.

Chun, Churachandpur town sunga hin thisen, zun le ek test­na private clinic thahnemtawk tak a um ta a. Amiruokchu, an hmangruo le an khawl hai that tawknaw lei am annawleh an thawktuhai thiem tawknaw lei, thisen, zun le ek test a um result hi Doctor hai dit ang le an duthusam a tlingzo ngainaw leiin Babina Diagnostic, Imphal pan lem dingin doctor han an damnaw enkawlhai thurawn an pek  nawn rawp el ta a nih. Hi taka inthawk hin  Hospital chau ni lovin Churachandpur District mipuihai chun thisen, zun le ek test­na laboratory centre thalem, khawl tha lem, Laboratory technician tha lem ei mamawzie chieng takin a hung inlang. Mamaw hi ei la hau hle a nih.

Mamaw ei hau hle laia Dr K. Lokendro Singh, Director, AYUSH, Manipur in August 3, 2016 nia District Hospital, CCPur hmuna Japanese Encephalitis (JE) natna hri dalna damdawi “Project Belladonna­200” a hawng huna thu a hril huna khan, damnaw khum 50 um theina Muolvaiphei­ah AYUSH Hospital hawng vat a ni ta ding thu a hril a. Hi thu hi Churachandpur District mipuihai ta ding chun chanchin­tha le thu lawmum a tling takzet el a nih. Hi Hospital hi hawng a hung ni pha chun damnawhai chau ni lovin AYUSH Department, Govt. of Manipur hnuoia thawktuhai le a district mipuihai ta dingin tangkaina a hung siem pha ding a nih. Chun, mi thenkhatin sin hmuna le fakzawngna lampuiin an hung nei thei pha bawk ding a nih.

AYUSH Hospital indin a ni pha chun, AYUSH  hospital bul le a se vel chu nasa takin hung hlung a ta, inhmun le ram man hai khawm a let tam takin hung kaisang pha ding a nih. Hospital puitling a hung ni ta ding an leiin a pantu le hi hospital a thawktu hung tam pei an ta, AYUSH Hospital bul le a se vel chu sumdawngna hmunpui a la hung ni ngei ding a nih. Hi lai hmuna hin Pharmacy, dawr, hotel le a dang dang hawng le siem nuom an chuin an la hung inchu ding a nih. AYUSH Hospital hi tulaia ding chun thil tangkai tak, damnaw beidawng tam takhai dampui a ni leiin hawng vat  a ni theina dingin thuneituhai khawmin thang hung la nasa nawk zuolhai sienla nuom a um.

AYUSH Hospital building bawlna ding lungphum chu tuta kum fe mek sunga phum hman le AYUSH Hospital bawlna ding hmun chu Bethesda School of Nursing, Muolvaiphei huongsung ni dingin Dr K. Lokendro Singh chun a hril. Ei district in Hospital dang pakhat ei nei belsa ding hi CCPur district mipuihai vangneina le hamthat bikna a nih. Hill district dang haia hiengang hospital hawng tumna a um thu ei la hriet nawh. Hi lei hin ei vangnei chungchuong bik a nih. Manipur Health & Family Welfare Minister hlui, Phungzathang Tonsing in District Hospital, CCPur Medical College a hlangkai tum a ni thu a hril dam kha a takin hung puitling ngei sienla nuom a um ngei el. Politicians han hi thil hi hung bawzui peihai sienla nuom a um hle el.

Post a Comment

Powered by Blogger.