Thil tha lem umna ding a ni phawt chun inphahnuoi kan rin nawh: Mizoram HM

Aizawl, July 2, 2016: Mizoram home minister R Lalzirliana chun, thil tha lem umna ding a ni phawt chun Mizoram sawrkarin inphahnuoi lema thang a rin naw thu a hril. Zawlbuk group YMA bultuma Ningania Thing-sulthliah khelmuola Remna Ni lawmna a hmangpuinaah thu hrilin, Home Minister chun, "Tuta inthawka sawtnawte ah Mizoram sawrkar le HPC(D) an inbiek ding a na, hlawhtlingna ditum ei chang theina di’n Mizo mipuihai tawngtaipuina kan mamawa. Sawrkar chun mi popo leh inrem tlang taka um a nuom taka, thil tha lem um theina ding a ni chun anphahnuoi lema thang khawm a rin nawh," a tih.

Home Minister hril danin, Mizoramin kum 30 liem taa zalenna an hmu laiin a hnung hun sawtnawte ah HPC(D) demand area china chenghai chun kum li vel chau remna an chen a, harsatna le hrietthiem lo chi hran hran an nei leiin ramhnuoi tienga mi iemanizat silai leh an inbi hmanga, kum 26 sung mipuiha’n rinum an tuor tah a nih. Tuhin khawtlang thuoituhai le kohran thuoituhai  hmalaknain remna lampui dap a nih, a tih.

R Lalzirliana chun, mipuiin remna hlutzie an hrietthiem naw a ti um thu hrilin, "Zu rui buoi le mi um tha pei lo thenkhat leia veng le veng, khuo le khuo inepna a tlung hlak hi a pawi em em a, thil indiknaw lo thawtu chu hum kher tum loin, dikna hi ngai pawimaw hmasa tak hlak inla. Hieng harsatna tam tak hi ei pumpel hlak ding a nih," a ti bawk.