Hmarkhawlien, July 1, 2016, Virthli (ONP): Assam Chief Minister Sarbananda Sonowal chun zanikhan Barak Valley sir in, Silchar hmunah district dang dang hieng Cachar, Karimganj, Hailakandi, Dima Hasao, Karbi Anglong le Hamren DCs le SPs hai issue dang dang le inzawmin hohlimpuina a nei. Hi huna hin Pu Sarbananda Sonowal chun Barak Valley a lampui hai chu thla 3 sung ngeia siemtha vawng dingin PWD chu order a peka, thla 3 hnunga inspection thaw dingin a hung sir nawk ding thu a hril a nih.


Pu Bula Hmar, Convenor, Barak Valley Hmar People Bharatiya Janata Party hmalakna in Pu Sarbananda Sonowal in Brak Valley a hung sir hi remchang lo inchawin Cachar a Hmarnauhai harsatna chitum tum hai lo intlun a nih. Pu Bula Hmar inrawina hnuoia Hnam thuoitu thenkhat haiin Pu Sarbananda Sonowal hi Silchar Circuit House hmuna zani zantieng khan an inhmupuia, hi huna hin Cachar a Hmarkhuo electric meivar tlungnawna hai le lamlien la tlung nawna khuo hai PMGSY hnuoia siem dan ding hai an hriltlang.

Hi an inhmupui huna hin Cachar a Hmar hai harsatna chidang dang hai le inzawmin Memorandum an peka, Hmar Hnanglukhum Hmarpuonte-a khit ngei chu an inkhumtir bawk a nih. An memorandum pek hi Guwahati tienga bawzui dingin Pu Sarbananda Sonowal le Pu Rajdeep Roy, General Secretary, Assam BJP hai chun an hrila, an thei ang anga lo thangpui dingin an ti bawk a nih.

Cachar a Hmar hai ST an la ninaw thu le inzawma Hmar Inpui in Barak Valley Hmar People Bharatiya Janata Party hai sawrkara a bawzuitu le hmalatu dinga a ruot angin hi chungthu a khawm hin hma an lak mek bawk a nih.

Post a Comment

Powered by Blogger.