Shillong, July 30, 2016, Virthli (ONP): Vawisun khan Hmar Students' Association (HSA), Joint Headquarters, Shillong chun EFCI Centennial Hall, Demthring, Shillong hmuna Food Fest phuisui takin an buotsai. Hi Food Fest a hin Hmar hme chi dang dang buotsai a siem ani a, mi 400 bawr vel in an fak a nih. Hi huna hin Hmar inchuklai hai, Nu le pa, Shillonga hnam hminga pawl um a thuoituhai, Kohran thuoituhai le hnam dang danga inthawka student leaders hai khawmin Hmar hme inhnik tawk taka buotsai le siem chu an hung fak ve a nih.
Hi Food Fest thiltum tak chu HSA Shillong JHQ in programme lien tak tak el hieng Freshers Meet, Sports le kumthara HSA Shillong kum 60 (Diamond Jubilee) lawmna ding haia a tlawm-a zawng sum tieng alo sawk zangkhai theina ding ti beiseia buotsai ani bakah hnam dang hai laia Hmar hme chidang dang hai suklar tumna malam ani bawk a nih.
Hi Food Fest huna hin Lottery/Lucky Draw buotsai ani a, lawmman tha tawk tak tak an siem hai chu Anu Rani, Angela le Alfred Khurbi haiin an man a nih.
HSA Shillong JHQ chun hi hun ngaipawimaw taka hung thangtu hai le mi tlawmngaihai chungah a lawm hle a nih.
