Nominated MDC han sesamna an nei
CCPUR: Manipur sawrkarin ADC, CCPur hnuoia MDC dinga a hung nominate 2­ M. Chungpa Kom s/o (L)  M. Thanglosan Kom of K.K. Haotak village le Holkhojang s/o (L)  Limlhun of D. Phailien  hai chun zani zantieng 3:00PM khan District Council Hall, CCPur­ah Mr Lunminthang Haokip, IAS, DC, CCPur hmaah MDC dinga sesamna an nei a, Mr Langkhanpau Guite, Chairman, ADCC in tawngtaipekna a nei. Chairman in tawngtaipekna a nei zoin  Vice Chariman, ADCC Pu Lal Hossan  inrawinain member mi 2 hai Puon insiltirna an nei a, CEO/ADCC in par inhlanna a nei.


Hi hun hmang a ni hma zani zantieng khan ADC, CCPur Chairman motor thar ding Scorpio motor chu Pastor Kamzamuan Guite, GBC, Delhi in tawngtainain an hlan bawk.

Job Card ni 18 sin thawna ding
CCPUR: Executive Director, DRDA, CCPur chun  MGNREGS 2016­17, 1st phase­a block iemanizat­ah Job Card ni 18 sin thawna ding a sanction. Claim proposal pelut hmasa sa kuomah sum hi sanction niin ei thu dawngna chun a hril. Ni 18 sin thawna ding sanction na hai chu Lamka Block­ah khuo 60, Thanlon Block­ah khuo 46, Singngat Block­ah khuo 96 an nih.

PHC/CHC haia khawm kap dingin
CCPUR: Tulai CCPur district sunga JE le Viral Fever inleng mek le inawma District Hospital, CCPur­a JE vengna damdawi kapna counter siema um chu HSA CCPur Jt. Hqrts chun lawmum an ti a.  Amiruokchu, damdawi kap inkap nuom mihriem an tam leia inkapna a fe hrat thei nawna thuah  District sunga PHC/CHC haia khawm damdawi inkap a ni theina dinga lampui dap dingin thuneituhai an ngen. Student hai hmakhuo ngaina leia DC in Schools hai ni 7 sung chawl puong dinga ngenna a siem chu lawmum an ti a, natna laka ei him theina dingin mitin fak le dawn fimkhur ding le khawlaia a hawng a dara thil zawr hai fak insum dingin mitin an ngen.

I­ Day Peace Ground ­a hmang ding
CCPUR: Zani zantieng 1:00PM khan  Mr Lunminthang Haokip, DC, CCPur inrawinain DC Office­a BRGF Resource Centre­ah  District Level Coordination Committee (DLCC) meeting nei a nih. Hi huna hin August 15, 2016 nia India Independence Day hmang dan ding an hriltlang. Tukum  district level Independence Day chu Tuibuong Peace Ground­ah hmang dingin DLCC Meeting chun an rel. Main Gate, Tuibuong Forest Gate, Police Station tuol le Khawmawi ah Welcome Gate siem dingin an rel. Chun, CMO, CCPur hin CCPur khawpui sunga JE le viral fever inleng mek chungthuah report a pek bawk.

Mi 1 jail a thun, 2 bail­a insuo
CCPUR: July 23, 2016 zan dar 8 vela 26­Assam Rifles han Tangpijol­Likhai khuo inkara Meihawl phur motor an dapnaa ralthuom le an man mi 3 hai chu Court hmaa inlangtir an ni a, Court chun mana um hai laia  Kamlalmuan @ KL Muan s/o Enkhanthang of Ngathal  chu Jail­a thun dingin a rel a, midang pahni ­Enkhanmang (46) s/o (late) Thanghuatkam of Nghathal le Hauvanglian (26) s/o Khanpau of  Vengnuam, New Lamka hai chu bail in an suo. Hieng mi pathum hai hi 5.56MM Auto MA­2 MK­II khat, 5.56MM MA­3 MK­II 2; 5.56MM magazine 1; 5.56MM magazine (round 20  capacity) magazine 1 le 5.56MM (30 round capacity) magazine 4 le man an nih.

Advocacy on Hepatitits prog hmang
CCPUR:  Zaninikhan CMO Conference Hall, CCPur­ah  “No Hep, Elimination of viral Hepatitis” ti thupuia hmangin DAPCU le partner NGOs han Advocacy Meeting on Hapatitits program an hmang. Prog. hi Dr Thangchinkhup Guite, CMO, CCPur in a hawng. Hi huna hin Dr. Phirthanglien Buhril, DACO, CCPur chun “Importance of screening and treatment of Hepatitis for PWID” ti thupui hmangin le Ms. Lalruatpuii Pachuau, Project Director, SHALOM chun “Brief Highlight on the Scenario of Hepatitis Prevalence among PWID in CCPur” ti thupui hmangin thu a  hril.


Dr Phirthanglien Buhril chun, Hepatitis C hi ‘silent killer’ ti khawma ko le hriet a ni thu hrilin  natna dang  hai angin an rang naw thu a hril. Tukhawmin Hepatitis C virus invawi nawng ka tih ei ti thei naw leiin mipui lai awareness nasa lema thaw tul a ti thu a hril bawk.

State health official han an hung enfel
CCPUR: Dr O. Ibomcha Singh, Director Health Services, Manipur inrawinain Dr H. Ranjit, Additional Director; Dr P. Shyam Sunder Singh, Additional Director; Dr Shashi Kumar, Additional Director; Dr Gojendra, SNO; DR NandaKishore, Immunization le Rajiv, SPN hai chu zanikhan CCPur­ah hungin District Hospital an enfel.

Health Officials hung hai chun Medical Supdt. District Hospital office­ah Hospital thuneitu hai inhmupuiin JE le Viral Fever inleng mek chungthua hmalak dan ding an hriltlang. Director hin JE dangna damdawi thahnemtawk tak a hung phur a nih.

Mass Cleanliness Drive
CCPUR:  July 28, 2016 nia  SDOs/BDOs/POs le DRDA Staff han  joint meeting neia an lo rel angin, CCPur khawpui sunga JE natna hri an leng mek le inzawmin Churachandpur khawpui sung le a se vel ( Lamka, Tuibong, Samulamlan, Saikawt le Kangvai Block) huom sung haia July 29, 2016 hin Cleanliness Drive thaw ning a tih tiin DC, CCPur chun zanikhan Circular an suo. Hi le inzawm hin Blocks le Village Authorities tin hai chu mani khuo le biel huom sung chita Nulla hai sukfaina sin thaw a, DC, CCPur kuoma report pe dingin an hriettir.

Damdawi inkap nuom mi an tam hle
CCPUR: DFWO, CCPur, Medical Supdt le Dist. Immunization Staff hai hmalaknain zanikhan DIO Office le District Hospital campus­a Counter pahni haiah JE dangna damdawi kapna sunzawm a nih.  Damdawi inkap nuom mipui an tam hle a, mipui innekbuoi ding vengnain VDF le Police an duty hiel. JE dangna damdawi Vials 2000 zani hmasa khan Kolkata­a inthawk Imphal hung phurtlung hai chu DIO staff han an va lak a, zani zantieng khan an hung phurtlung. July 29, 2016 hin JE dangna damdawi kap sunzawm ning a tih.

Hmar Cable ngei zawm nuom chun
CCPUR: Khawvel changkang pei le inruolin Cable television hai po po digitize (Digital Cable TV) vawng dingin India sawrkar in hma a lak a. Hi le inzawm hin CCPur District a Cable Operator  hai khawmin Digitalized thaw tanin cable latu han Rs. 2000/2500 senga Set Top box inchawin an hmang tan mek. Cable po po digitize thaw dinga dateline sawrkarin a siem chu tawp ta sienkhawm eini tlangram kilkhawr (rural area) haia ding ngenna um angin hun la suksei a nih.

Ei hnam  thil le tawng  hmasawn lem theina ding beiseiin Hmar mi ngeiin Digital  Cable Network thaw tumin hma lak mek a ni a, Company hai khawm inbiekpui fel zo a ni ta a, October, 2016 vela tan hman beisei a ni a, Local news a tam thei ang tak, ei area le khuoa thil tlung hai a hun  huna update pei tum  a ni bawk. Hmar Cable ngei zawm seng ei la nuom ding leiin chu huna Set Top Box  mana pawisa seng nawn a tul nawna dingin  tulaia Set Top Box hi lo lan chaw lo a, lo la nghak fan fan dingin Digital Cable thaw tumtu chun ngenna a siem. Cable tan a ni huna Set top Box nei tasa kha hmang thei a ninaw ding leiin. Thu chieng lem hre nuom han contact No. 9615166293 ah ngaiven thei ning a tih.

Essay comp. phase 3­na  nei hun sawn
CCPUR: ATML hmalakna hnuoia Essay Writing Competition  nei meka a phase hnina chu zo a ni ta a. A phase thumna College tina buotsai dinga ti chu JE natna inleng mek le inzawma DC ngenna anga School hai chawl puong a ni leiin nei hun ding hril thei a la ninaw a, sienkhawm College Authority hai remchang dungzuiin a hun ding siem thar ning a tih tiin ATML chun zanikhan inhriettirna a siem a, Competition­ah Class XI le XII hai ngaipawimawa thang seng dingin an ngen bawk.

KSO in DIO chunga action la dingin
CCPUR: KSO, CCPur chun DC Office­a District Information Officer (DIO) Ganeshore thla 2 sung office kai ta lo chu  office inkaitir dingin an phut a, a kai naw chun a chunga action la dingin an ngen. JE thuah District Hospital chau ni lovin CHC, PHC, PHSC centre hai  khawm kap a ni theina dinga District Administration le CMO hai an ngen.

NITI Aayog meeting nei; Parliament­ah thil man kaisang thu hriltlang
NEW DELHI: Zanikhan PM Narendra Modi inrawinain New Delhi­ah NITI Aayog Meeting nei a nih.  NITI Aayog  a Chairman chu Narendra Modi a ni a, Vice Chairman chu Arvind Panagariya a nih. Hi meeting a hin Panagariya le member­ hai an thang a, hmatieng kum 15 la hung dinga India ram hmathlir le hmalak dan ding chungchang an hriltlang. NITI Aayog a hin mithiem filawr le miril tamlem laklut an tul a nih tiin Arvind Panagariya chun a hril. Prime Minister Narendra Modi chun, India ram hmasawn peina ding le retheina sukbona dinga hmun pawimaw tak cheltu le khaltu chu Technology a nih tiin a hril. Kum 15 la hungtlung ding (2030 chenah) India  ram lampui hraw ding chu kum 15 la hung um dinga India hmathlira hin a thangsa vawng a nih tiin Modi chun a hril bawk.

Zanikhan Parliament (Lok Sabha le Rajya Sabha) ah thil man kaisang thu  member han an hriltlang. Sawrkarna cheltu le selkaltu tieng member hai chu hi thua hin an insel nasa hle. AICC Vice President Rahul Gandhi chun PM Modi chu thil man kaisang thuah nasa takin a sawisel a. Modi chu Election huna a thutiemhai sukpuitling lo le  theinghil ta; thil man kaisang hrim hrim ngaisak lo le hril khawm hril ri ngai ta lo a nih tiin an tum. Election  huna khan chu thil man a sukhnuoi ding thu a hril a, sienkhawm power a hung chel a, a hriet fuk ta nawh. Kum 2014 a Tomato kg. 1 ah  Rs. 18 chu tuhin Rs. 55 ani ta a, Urad le Tur Dal Rs. 70 & 75 ni hlak kha tuhin kg. 1 ah Rs. 160 le Rs. 180 a hung ni ta tiin Rahul chun a hril. Kum 2014 a LS Election a khan Modiji chun, “Chowkidar in mi siem ro” a ti a, sienkhawm a hmu ngeiah dal inru an hung um a, Chowkidar chun a tosan el, milien an tah. Chowkidar sin hi Congress kutah sie dingin maksan raw seh tiin Rahul chun a hril. Hi huna hin Modi ruok chu Inpuiah a um nawh.

NCW Chairperson a hung inzin
IMPHAL: National Commission for Women (NCW)  Chairperson Rekha Sharma chu Imphal­ah a hung inzin a, hi Commission member Lalitabi in a hung zui. Zanita Imphal­a thu a hrilnaa chun, nuhmeihai politics­a an lut ve a pawimaw thu, Manipur State Commission  for Women sukhrat a tul thu, Manipur State Commission for Women a hrat thei nawna san chu a thatna hriet a ninaw lei a ni a, hi thua hin inhrilhrietna (awareness) ei la tlasam a nih tiin a hril. Manipur CM khawm kan hmupui ta a, hi Commission hi a thei ang anga thangpui an pei thu a mi hril tiin Rekha Sharma chun a hril. Anganwadi Workers and Helpers Union, Manipur chun an sin suknghet ding le hlaw sukpung (worker hlaw Rs. 15,000/­pm le Helper hlaw Rs. 8,000/­pm) dingin Memorandum an lo pek.


Bill thar siem tha an ti tlang
IMPHAL: Naional Research Centre (NRC), Manipur huoihawtna hnuoia “5­Day Public Dialogue on”  PRotection of Indigenous People of Manipur People ti thupui hmanga Manipur University­a neia um chu zanikhan zo a lo ni tah. Public Dialogue­a thanghai chun Manipur tuolsung mi indik takhai venghimna dinga Bill tahr siem le State Assembly hung um dinga  pasi tha an ti tlang. Zanita  hi Dialogue­a thu hriltuhai lai Manipur CM hlui Radhabinod Koijom khawm a thang.

Manipur­ah Gram Panchayat 161
IMPHAL: Manipur phairam biel huop sungah Gram Panchayats 161 a um a, tha takin sin an thaw seng, RGPSA/RGSY hnuoiah Block thar 28 hawng belsa a ni a, tuhin a rengin Blocks 69 a um ta a, Gram Panchayat Ghar thar  khawm 17 bawl a ni a, Gram Panchayat Ghar pakhat bawlnain Rs. 15 lakh pei hmang a nih tiin Dr K. Shyamsunder, Director, Rural Development & Panchayati Raj, Manipur chun zanita DIPR Complex, Imphal­a press Conference huna a hril.

Mi 5210 training an pek tah
IMPHAL: Kum 2006 a inthawk khan Manipur a khawm Relief and Disaster Management Department indin tan a ni a, tuchen hin sietrup tlung huna inveng dan ding thuah mi 5210 hai training pek an ni ta a, hienghai lai hin NCC, ASHA, Nursing  students, Police le District Level Officers hai an thangsa tiin Jason A. Shimray, SEcretary, Relief & Disaster Management Department, Govt. of Manipur chun zanita DIPR Complex, Imphal hmuna press Conference huna a hril.

Thingkak phunna le Medical camp
IMPHAL: Red Shield Division hnuoia Noney Battalion, Loktak Brigade chun zanikhan World Nature Conservation Day le inzawmin an battalion Hqrts, Noney­ah thingkak 100 an phun. Chun, Red Shield division chun Old Nungnang Tamenglong district­ah July 27, 2016 khan Free Medical Camp an buotsai a, damnaw 158 an en a, a thlawnin damdawi an pek.

India Ngamantu 77 han India an hung pan
NEW DELHI: Sri Lanka sawrkarin India Ngamantu a hrentang a hung insuo mi 77 hai chun zanikhan India ram an hung pan tah. Hieng Ngamantu 77 hai hi Sri Lanka Navy han international maritime boundary line­ah Indian Coast Guard hai kutah an hung inhlan a, zani zantieng khan Karaikal lawngchawlhmun hung thuoitlung an nih.

Rawat in minister 2 lalutin  ministry a suklien
DEHRADUN: Uttarakhand Chief Minister Harish Rawat chun minister pahni lalut in zanikhan a Cabinet a suklien. Minister a laklut thar hai chu Vikasnagar A/C MLA Nav Prabhat le Badrinath A/C MLA Rajendra Bhandari hai an ni a, zani ma khan Raj Bhawan­ah an Governor Krishna Kant Paul hmaah minister dinga sesamna an nei. Minister­a laklut thar hai le hin Uttarakhand Assembly a chun Chief Minsiter Rawat thangin minister 12 an um tah.

Gas thalo hiplut leiin mi 3 an thi
HARDOI: Uttar Pradesh­a Behta Gokul area­a chun zanikhan sungkuo pakhata mi 3 hai chu boruok thalo an hiplut leiin an thi. Well hlui pakhat sungah Kel a tlalut a, chu sansuok tuma Well sunga an zu lut huna boruok thalo an hiplut leia thi an nih tiin Police thusuok chun a hril. Mithi hai chu  hi khuoa Postmaster Ram Ratan Prajapati (55) le a nau pasal pahni  Manoj (25) le  Mr Prajapati unaupa  Balakram (45) hai an nih.

Aadhar compulsory a ni nawh: Naidu
NEW DELHI: Information and Broadcasting Minister M. Venkaiah Naidu chun, sawrkar thlungpui hnuoia Direct Transfer Benefit Schemes dawng theina dingin Aadhar Card lo thei lo (compulsory) a ni nawh tiin zanikhan Rajya Sabha hmuna a hril. Sawrkar thlungpuiin Pension, Scholarship le  hamthatna dang dang dawng theina dingin sawrkar thlungpuiin Aadhar Card lo thei lo dingin a siem tia oppsition han sawiselna an siem dawnletnaa hi thu hi Mr Naidu in a hril a nih. India mi po po han Aadhar an nei kim vawng hma chun lo thei lo (compulsory) a hmang ninaw nih, Aadhar le inzawma  harsatna hran hran um mek hi sawrkar in a hriet a, chingfel tumin hma a lak mek tiin  Mr Naidu chun a hril.

India­ Bangladesh Home minister level talks
NEW DELHI:  India le Pakistan hai chun zanikhan New Delhi hmuna Home minister level talks a vawilina an nei. Hi huna hin  ramria venghimna sukhrat zuol dan ding an hriltlang a. Land Boundary Agreement  ennawnna, security le border managment le an zawmpui thu pawimaw dang dang hai hriltlang a nih. India tieng chu National Security  Advisor, Union Home Secretary le Ministry of External Affairs a officers, BSF, Narcotic Control Bureau, Coast Guard le official dang dang hai an thang a. Bangladesh tieng chu Home minister Asaduzzaman Khan in a hung inrawi. Terrorist dona kawngah hrat lema thangtlang  an remtih.

Peshawar­ah Smartphone nekin silai an man lem
DARRA ADAMKHEL: Pakistan­a Peshawar khawpui bul laia Darra Adamkhel town a chun  Smartphones hai nekin silai man a tlawm lem nia hril a nih. Darra Adamkhel hi Peshawar khawpuia inthawk km. 35 vela hla  a ni a, suomhmang, drugs a sumdawngtu le suolna dang dang nasatna hmun  a ni a. Hi hmuna hin thil iengkim, motor inruksa le University degree lem hai khawm inchawk thei dingin a um vawng nia hril a ni bawk.

Hi lai hmun hi Mujahideen han Soviet ram dona dinga Afghanistan rama inthawk ralthuom tawllutna hmuna an hmang le a hnunga Pakistani Taliban han inkulna hmun taka an hung hmang tah a ni a, kum 2009 a  Polish engineer Piotr Stanczak a ringa an tanbawng na hmun a nih.

America rama FBI a SWAT team hai hmang lar em em Turkish le Bulgarian siem MP5 submachine guns ang chara  hi lai hmuna siemthiem Khitab Gul in a siem silai hai chu Rs. 7,000/­ (one year guarantee) chaua inchawk dingin a um  bakah AK­47 le AK­56 entawna siem Kalashnikov silai hai khawm Rs. 8,500  a inchawk thei dingin a um. Kum 10 chuong liemta sung khan hiengang silai a siem hai hi 10,000 chuong a zawr suok ta niin Gul chun a hril a, tuchen hin a tha nawh tia sawiselna a la dawng naw niin a hril.

VAWISUN THUPUI
Chuleiin, in taksa nuomzawng ang in zawmna dingin, in taksa thi theia chun suolnain ro rel naw raw se.  Rom 6:12

Editorial: Namnul ei ching hi

Thil hrim hrim hi, a hun tak le a hmun takah, thaw dan dinga ei inhril, ei inchuk le ei hriet ang thlapa thaw hi harsa ei ti em em. Hi hi thuawina ei tlasam le thil namnul ei ching lei niin an lang. Doctor ei pan a, doctor in damdawi fak ding a mi pek el bakah a fak dan ding, a fak hun ding, fak lo ding le dawn lo ding hai khawm a mi hril a. Ni 2/3 vel chu Doctor in thaw dinga a mi hril angin ei thaw a, nisienlakhawm ei damnawna a hung zie um deu a, Doctor mi hril angin damdawi ei fak zui ta naw a, nghei dinga a ti hai khawm nghei ta lovin ei hung fakin ei hung dawn nawk a, dam fel lovin ei um a, ei natna hri bawkin a mi hung man nawk hlak. Ei hriselna ngirhmun a hung derthawng a, natna inrik tak ei tuor nawk huna Doctor ti dan angin damdawi ei fak nawk, nghei ding a tihai ei nghei nawk hlak. Hi thil hi namnul ei chingleia ei tuok hlak a nih.

Thil namnul mei meina hi ei nun dan le khawsak dan hran hranah an lang tam hle. Mania nei ve tum si lova thil haw ching dam, mi thil nei van tawmpui dam, Chanchinbu le insung hmangruo chite te, a man tam khawm ni lo, thim chenin  in bulhai ta haw ei ching a, a thakkir ruok chu ei hriet fuk nawk ta ngai mang nawh. Hieng thil khawmhi thil namnul ei ching leia um a nih. Thil hi namnul mei mei ngai naw inla chu pansak le panthlang hai  thil hi haw rawp ngai nawng ei tih. Vawikhat vangkhat chu thil um thei ngai a nih. Rawp rawp a ni pha ruok chun mihai nghawk kaina a nih.

Inza naw lei ni chie si lo, inpawisak naw lei ni lem si lo, ienglei tak am a ni ding inmawl biek le inmawl ko khawm hi  thangtharhai lai ei ching deu deu. Mani neka upa lem, ei u ding, ei pa ding, ei pu ding, ei ni ding, ei rang ding ngei ngei hai khawm an nina ding anga ko lovin ei va mawl biek hlak. Hi thil hi tulaia ei ching tha lo takel, ei bansan  le sim ngei ngei dinga ditum a nih. Hi thil hin inngainatna le inhmangaina ding a sukbo thei. Nu le pa hai chun mani nauhai hi mihai ko dan ding hi ei hril tawl seng ring a um. Amiruokchu, ei nauhai hin ei thu hril le inchuktirna hai hi an ngaitha le an namnul leia hiengang inmawl ko le inmawl biek tihai hi ei chingzawngsak niin an lang. Hi thil hi bansan le sim ngei ngei chi a nih.

Thilpek dawngtu ni le  mihai thangpuina dit hle siin, nei ve sun sun peklet ve amani, mani thei ve zawnga thangpuina pek ve mani tum lovin ei namnul zo nawk mei mei hlak. Mi tawngtai pektuhai khawm an ta dinga tawngtaina inhlan let ve ei theinghil rawp hlak. A ho mei mei, nimeimei raw seh, a pawi nawh, a tul nawh, ka ngaisang nawh dam ei ti ta mei mei hlak. Hi thil hi iengdang lei a ni nawh. Thil ngaipawimaw neka namnul mei mei lungril ei put lei a ni hlak. Ngaipawimaw inla chu mei mei ti hmang ngai nawng ei tih. Mani mi, mani sunghai le mani ruol hai anni lei ela thil namnul khawm hi ei ching hlak a, mipuitling ei ninawna suklangtu a nih. Mipuitling le varhai chun hiengang hin thil namnul an ching ngai nawh.

Hun thuah khawm, sana ei bun thei seng hnunga khawm hin, a hun takah thil thaw, a hunbi taka tlung le a hun ruot ang taka hun hmang ti hai khawm hi harsa ei la ti a, Manipur a um ei na, Manipur time an nawm ei la ti pei a, hun hmang dik ei tum chuong nawh. Bu fak hun, zal hun, mi in a leng hun le a dang dang hai khawm ei la namnul hle. Thil namnul ei ching taluo lei hin ei changkang ding ang le ei inthanglien thei ding ang khawmin changkangin ei inthanglien thei naw pha niin an lang. Mi thenkhatin hiengang hunbi an siem le hmang hlak khawm namnul ei ching leiin ngaipawimaw le inzana chang ei hriet nawh.

Churachandpur ah Japanese Encephalitis natna hri an leng ti ei hriet. Thipui thei natna a nih ti khawm ei hriet. Amiruokchu, iengmalo a ngaiin ei namnul a, hi natna leia  thina tuok ei hang um meu chu  ei tithawng a, thaw thei bek bek nei lovin ei invir vel a, School­hai chen ei khar pha ta a nih. A tira inthawka ngaimaw ding kha ei namnul leiin ei reng a ramin ei buoi pha ta a nih. An vengna damdawi hlak ei mamaw le dittawk a um si naw leiin state danga mi ei lan cha fawm a, hi natna hri inleng le inzawma sawrkar hmalakna hi a vel vuol a sawt taluo deu niin anlang.A hma hmaa khar ta ding School hai khawm an hnuk hnung le thil a ni ding ang ang a nizo hnungin ei khar a, se lut hnunga sedai khar an tipo ei thaw rek an ta hi! Better late than never’ an ti an nawm. Iengkhawm thaw lo nek chun iemani bek thaw chu la tha tho tho naw nim. Thil hi namnul mei mei bansan ta inla nuom a um.

Post a Comment

Powered by Blogger.