JE le Viral fever thuah joint meeting an nei; JE dangna kap sunzawm ding
CCPUR: JE natna le Viral Fever inleng mek le inzawmin zanikhan CMO Office Chamber­ah Joint meeting nei a nih. Hi huna hin Dr VC Pau, DFWO/CCPur; Dr Phirthanglien Buhril, DACO/CCPur; Dr J. Son Goukham Samte, Med. Supdt, Dist. Hospital; Dr T. Pumzathang, Dist. TB Officer; Dr Liankhojam, DMO; Seiboi Mate, DPM, DHS/CCPur le Angelyn H. Vaiphei, DM/IDSP hai an thang a, DIO/DFWO, DMO le MS, Distr. Hospital han report an pek.

DIO/DFWO chun Siden, New Lamka le Bungmual haia outreach vaccination camps vawi 3­ July 20, 2016 in Siden PHSC, July 23, 2016 in New Lamka le July 25, 2016 in Bungmual haiah JE dangna damdawikap a ni thu report an pek.Zani zantieng khan Kolkata­a inthawk JE vaccination a hungtlung an beisei thu an hril bawk.

JE confirmed area haia DMO le team han Fogging an thaw bakah July 23­26, 2016 inkar sung khan MS, Dist. Hospital chun Fever Clinic (COPD) a hawng a, mi 808 en an ni a, MOPD ah mi 411 en an ni a, an renga mi en po 1219 an ni a, hieng hai lai hin JE suspect (ringhla) pakhat khawm an hmu naw niin an hril.

CCPur District­a JE natna a um ti hriet a nia inthawk Siden Village, New Lamka (G), Bungmual le District Immunization Office haia chun zani chen khan JE dangna damdawi mi 7500 kap a nitah. DIO a chun zanikhan damdawi um po kap zo a ni a, damdawi bo leiin inkap dinga fe tam tak inkap lovin an kir.

Zanikhan Kolkata­a inthawk Imphal hung phurtlung a ni a, July 28, 2016 hin an hmatiengin DIO Staff han Imphal­ah va lang an ta, hung phurtlung a ni hun huna DIO le District Hospital haiah vawisun a hin Medical Supdt. hmalaknain Counter hawngin JE dangna damdawi a um sung phawt kap ning a tih tiin Dr V.C. Pau, DFWO, CCPur chun a hril. Damdawi a bo leiin zanikhan inkap dinga fe mi tam tak an kir a nih.

DC in ni 7 sung School khar dingin a ngen
CCPUR: Japanese Encephalitis (JE) natna hri Churachandpur District­ah anleng ti hriet le hmusuok a ni ta leiin CMO, CCPur leh thangtlangin a damdawi (vaccine) lak dinga hmalak mek a nih. Hiengang natna hri paitu thokang umna hrehai chun inveng le a dangna sin thaw a ni theina dingin District Administration/CMO, CCPur kuoma report dingin DC, CCPur chun ngenna a siem.

Chun, JE natna indar lien pei  ding laka invengna dingin Schools tina lukhaituhai chu July 28, 2016 a inthawk an school­hai ni 7 sung khar dingin DC, CCPur chun ngenna le inhreittirna zanikhan an suo.

Hieng laizing hin Grace Ramthienghlim (5) d/o Jonathan of Taithu chu zani zing dar 9 khan District Hospital, CCPur phurtlung a ni a, sienkhawm damzo loin zani zingkar dar 9:30 vel khan a thi. Hi naupang hi Malaria PF niin ei thu dawngna chun a hril.

Vimala Raina H/S Headmaster RIMS­ah a thi
CCPUR: Khawsik leia RIMS, Imphal­a enkawl T. Donglianpau, Headmaster (i/c), Vimala Raina High School chu zani zingkar 7:00AM khan damzo lovin a thi. Vimala Raina High School­ah Teachers le students han zani zantieng 2:30PM in sunna hun hmangpui a ni a, hi huna hin ZEO, CCPur, DI of School CCPur Block thangin department staffs, teachers  students, guardians han sunna hun an hmang. Hi hmuna hun hmang a ni zoin New Lane, Bungmual­a a chengna inah a ruong hi phurlut a nih. Zani zan khan a ruong hi khawvarpui a ni a, July 28, 2016 hin a ruong vuiliem ning a tih.

Japanese Encephalitis (JE) a ni chu ringhla a ni a, sienkhawm JE a ni ngei ti sukchiengna a la um nawh tiin ei thu dawngna chun a hril.

Advocacy meeting on Hepatitis
CCPUR: July 28, 2016, 12:00 Noon hin CMO Mini­Conference Hall, CCPur­ah SHALOM huoihawtnain No Hep: Elimination Viral Hepatitis ti thupui hmangin Advocacy Meeting on Hepatitis um a tih. Advocacy meeting hi Dr Thangchinkhup Guite, CMO in hawngin thuhrilna hun hmang bawk a tih. Hi huna hin Dr VC Pau, DFWO/CCPur; Lalruatpuii Pachuau, Project Director, SHALOM le Dr Phirthanglien Buhril, DACO/CCPur han thuhrilna hun hmang an tih.

ZEO  in Library lekhabu ding a semdawk
CCPUR: Mr T. Goukhomang, ZEO, CCPur chun zani 11AM khan CCPur Govt. H/S campus­ah DI of Schools, Singngat Office­ah Govt. Schools 24 le Hr. Sec. School 1 haia Library lekhabu ding semdawkna a nei. Lekhabu sem zo hin ZEO, CCPur le Mr Kaikhanlian Guite, DI of School, CCPur block han RIMS a JE ringhla leia thi T. Donglianpau s/o Zamkhansut of New Lane, Bungmual, Headmaster i/c Vimala Raina H/S thi an sun thu le thina tuok sungkuo hai an sunpui thu an puong.

Hep­C Virus Screening test nei
CCPUR: Zani 9AM khan District Hospital, CCPur Blood Bank­ah  Hepatitis­ C Virus Screening Test nei a nih. Hi huna hin H. Sandeep Singh, Therapy Manager, Strides Shasun, Imphal inrawinain technician han khuo le veng tum tuma mi 31 hai thisen an enfel. Hepatitis C virus hi natna tium takel pakhat a ni leiin mipui lai awareness thalem a um theina dinga Strides Shasun, Imphal in hiengang Screening camp hi a hung buotsai niin ei thu dawngna chun a hril.

Nominate MDC han sesamna an nei ding
CCPUR: Manipur sawrkarin ADC, CCPur a MDC dinga a nominate pahni M. Chungpa Kom s/o (L)  M. Thanglosan Kom of K.K. Haotak village le Holkhojang s/o (L) Limlhun of D. Phailien han July 28, 2016, 3:00PM hin District Council Hall, Tuibuong­ah MDC dinga sesamna (oath or affirmation) nei an tih. Hi huna hin nominate MDC hai chu thang ngei dingin CEO, ADCC chun an hriettir.

July 30 in Union Railway Minister in Malom­ah Imphal Railway Station bawlna ding lungphum a phum ding
IMPHAL: July 30, 2016 khin Union Railway Minister Suresh Prabhu in Malom Bamdiar, Imphal West District­ah Imphal Railway Station bawlna ding lungphum phumna le Tamenglong District­a Kotlian hmuna India rama dinga Rel fena ding hnuoiver (tunnel) sei tak verna ding lungphum a phum ding niin official thusuok chun a hril. Hi tunnel hi Imphal­Tupul Section a um, 10.75 km zeta sei ding niin Railway official thusuok chun a hril. Jiribam ­Tupul  Section a tunnel sei tak chu 4.9km a sei a nih.

Suresh Prabhu hi ruot bika um Vuongnaa chuongin zing dar 9:30 in Tulihal Airport, Imphal hungtlung a ta, zing dar 9:30 a inthawk zing dar 10 chen Tulihal Airport Lounge­ah Manipur sawrkar palaihai leh inpawltlang an ta, hi zo zing dar 10:30 in Malom Bamdiar hmuna Imphal Railway Station bawlna ding lungphum phum a ta, hi zo hin Imphal khawpui pan a ta, Hotel Imphal­ah sunbu fain, sunbu a fak zoin Helicopter hmangin Kotlian, Tamenglong distrcit pan a ta, India rama Rel tunnel sei tak verna ding lungphum phumna nei a tih.

Tamenglong District a inthawk Imphal­ah hung kir nawk a ta, Imphal­ah zankhat riek a tih. Imphal khawpuia a cham sung hin Manipur MPs, Ministers le MLA hai inpawlpui a ta, July 31, 2016 zingkar Imphal suoksanin Tripura state khawpui pan a ta, Agartala le Bangladesh inkara Rel Service thar ding a hawng ding niin Railway official thusuok chun a hril.

Tupul­Imphal Section K. 27 chu March, 2018 chena zo fel ding niin June, 2014 khan Railway officials han an hril. Railway Board chun hi section siemna ding hin Rs. 1,397 crores an sanctioned a, tunnels 12, 15.1 km. a sei, station building 2, leilak lien 3 le leilak chin 27 a um ding ti a nih. Jiribam­Tupul Section (first phase) km. 84 a sei siemna sin a fe mek a, leilak lien 6, leilak chin 112, Road Over Bridge (ROB) 3 le Road Under Bridges (RUB) 2 a um a, hienghai laia leilak chin 52, ROBs le RUBs hai chu zo fel anni tah. Chun, tunnel 39,401 metres a sei um dingah meters 1,852 chu zo fel a ni ta bawk.

Recognised Tribal Languages 13
IMPHAL: Academic Session nawka inthawk subjects 20 chu Meetei Mayeek a sut le Class XII chenah inchuk ni tang a tih. Manipur­ah recognised Tribal languages 13 a um a, chuonghai chu Thadou­Kuki, Tangkhul, Paite, Hmar, Liangmei, Poumei, Gangte, Zou, Mao, Kabui/Rongmei, Kom, Vaiphei le Mizo anni a, Class XII chena inchuktir an nih tiin Kh. Raghumani, Director, Languages Planning & Implementation chun zanita DIPR Complex­a Press conference huna a hril.

Non­local 61 man, 11 insuo
IMPHAL: Zanikhan Sekmai­ah JCILPS thlawptu han non­local mi 61 an man nawk a, an lekha pawimaw an enfel zovin mi 11 an insuo a, mi 50 danghai chu Sekmai Police station­ah an inhlan. Non­local dangna hi July 21, 2016 a intahwka an tan ta a nih.

Dr Kalam Scholarship dawng dingin NE student 25
NEW DELHI/IMPHAL: India President hlui Dr APJ Adul Kalam thi champha vawikhatna le inzawmin Aryans Group of Colleges, Chandigarh chun Dr Kalam Memorial Reignited Scholarship scheme hnuoia Scholarship dawng ding India hmarsakbiel (NE) student mi 25 hai hming a puong. Hi Scheme hnuoia scholarship hmu dinga thlang hai chun an lekha/courses Admission 50% Aryans in a tum pek ding a nih tiin Dr Anshu Kataria, Chairman, Aryans Group of Colleges, Chandigarh chun a hril. ST, SC le OBC hai chu Admission fee hi a renga tumpek an ni ding a nih. Hieng hai ti lo mi 75 kuoma scholarship pek tum a ni bawk a, inhnikna nei hai chun Toll Free helpline No. 1800­30000­388 a indawn annawleh www.aryans.edu.in ah August 10, 2016 hma chena in register thei ni dingin ei thu dawngna chun a hril.

LS in Lokpal le Lokayukta Bill an passed
NEW DELHI:  Lok Sabha a chun zaninikhan hriltlangna um lovin Lokpal and Lokayukta (Amendment) Bill 2016 passed a nih. Bill hi hi Act a section 144 siemthatna ding a nih. Public servants han office a lut hmaa an thil nei hai le thil dang dang an peklut ngeina ding dan a nih.  Minister of state PMOs Dr Jitendra Singh chun, a sawrkarin Lokpal le Lokayukta Act hai a sukchau naw a, khau lema siem a tum a nih tiin Zero hour huna bill chungthu a hrilnaah a hril. Hi baka hin Lok Sabha chun Benami Transactions (Prohibition) Amendment Bill, 2015 zanikhan an passed bawk.

TNCC Chief dingin Chidambaram ruot el thei
CHENNAI: All India Congress Committee (AICC) chun Union Finance Minister hlui P. Chidambaram chu Tamil Nadu  Congress Committee (TNCC) President dingin a ruot el thei. Mr Chidambaram hi tulai hnaia Maharashtra­a inthawk Rajya Sabha member dinga thlangtling nawk a ni a, kum 2019­a Lok Sabha election hung um dingah BJP hneban an ni theina dingin Mr Chidambaram ang party thuoitu leader­a sie chu Congress High Command in tul le pawimaw in a hriet a nih. Election nuhnung taka Congress an thawsietna a mawphurna a ngaia EVKS Elangovan an ban hnunga TNCC hi President boa um ta an nih.

A ruolpa a kap hlum pal
CHAMPHAI: Zani hmasa khan Mizoram­a Champhai District a Khuangpha khaw mi Vanthangmawia chun an ramsuoknaah a ruolpa K. Lalmuanpuia (29), s/o (L) K. Dawngkima of Khuangpha chu a kap hlum pal a, zanikhan Khuangpha thlanmuolah a ruong vuiliem a nih. Khuangpha khaw mihai Lo ah saruol/Sangahl an lut a, an buhai an fak leia saruol le sanghal hai that dinga ramsuoka fe an ni a, Sangahl a kapnaah Vanthangmawia hin K. Lalmuanpuia hi a kap hlum pal a nih. Mi  kap hlumtu hi dan angin Police han an man a, case an siem khum.

Cabinet in GST Bill a pawmpui tah
NEW DELHI: Zanita Union Cabinet meeting chun Goods and Services (GST) amendment an pawmpui bakah Punjab­a Bhatinda hmuna Pradhan Mantri Swasthya Suraksha Yojana hnuoia super speciality hospital (AIIMS) thar indin dingin an remti bawk. Chun, National Automative testing le Research and development Infrastructure project (NATRIP) a dingin Rs. 3727 crore an pawmpui a, Nagaland­a College of Veterinary Sciences CAU, Imphal jurisdiction hnuoia um theina ding Central Agricultural University Act (CAU), 1992 amendment an pawmpui bawk.

Dr Kalam thi champha vawikhatna
RAMESWARAM: India President hlui Dr APJ Abdul Kalam thi champha vawikhatna chu zanikhan a ruong vuina Rameswaram,Tamil Nadu­ah ursun taka inser a nih. Indai ram hmun tum tum haia khawm Dr Kalam thi champha hi inser a nih. “Missile Man” le “People’s President” tia ko hlak Dr Kalam kha July 27, 2015 a  IIM, Shillong­a thu a hril laia khaw hre lova tlua thi a nih.

PM in NITI Aayog an hmupui ding
NEW DELHI: Vawisun July 28, 2016 hin PM Narendra Modi chun NITI Aayog inhmupui a ta, 15 years Vision document le development strategy chungchang hai hriltlangpui a tih. 15 years Vision Document hi kum 2017­18 a inthawka tan ding a nih. Hi thil le inzawm hin zanikhan NITI Aayog chun state tina Chief Secretary­hai inrawnpuina a hranin a lo neipui a, Vision, Strategy le action plan chungchangah an dit dan le ngaidan hai an hriltlang.

Dalits groups 30 han dodalna nei an tum
AHMEDABAD: Gujarat state pum puia Dalits hnam sunga groups 30 hai chun Dalit hnam hai  sawisakna tlung rawp dodalnain ‘Una Dalit Atyachar Ladat Samiti’ (Una Dalit Fight against Atrocities Committee) hnuoiah July 31, 2016 khin Ahmedabad hmuna  mega rally le nuorna dang dang nei an tum thu an puong. Gujarat khaw lai hmuna khawm ran thisa hai lakkhawmna sin an thaw naw ding bakah ‘Jhadu down (broom down) agitation an thaw ding thu an hril a,‘Jhadu down’ agitation hin local government bodies haia sanitation tienga thawk Dalit mi hai khawm a huom vawng ding thu Convenor Jignesh Mevani chun a hril.

Nuhmei pakhat  taksa hmun 12 in a chan dar
BHOPAL: Madhya Prades­a Shahdol district­a pasal kum 48 mi Ram Kishore Yadav chun nuhmei pakhat thatin a taksa hmun 12 velin a chan dar. Mr Ram Kishore Yadav hi Railways a thawk niin  nuhmei hi July 24, 2016 nia kha an Rel lampui bula a in hnung tienga a that le a nuhmei that taksa hi Rel lampuia a dehawn a nih. Mr Ram Kishore hi Police zani hmasa zan khan Umaria district­ah Police han an man a, zanikhan Court hmaah inlangtir a nih. Mr Ram Kishore hin nuhmei hi a suollui a, a suollui nuhmei hin Police­ah complain thaw dingin a vau leia lungsena hienganga a that le a taksa a chan dar niin Police chun an hril. Mr Yadav hi ama khata um le nuhmei khawm hi hmeithai ama khata um a nih.

Nepal­ah tuilien leiin mi 28 thi
KATHMANDU: Nepal­a chun tulaia ruosur  nasat leia tuilien le mimkei tlung leiin mi 28 in thina an tuok ta a, midang 24 an umna chin hriet lovin an lan hmang bawk. Ministry of Home Affairs thusuok in a hril danin tuilien leiin districts 10 haiah In 75 vel a sukchim leiin mithi hi tuta nek hin an la hung tam lem ring a ni thu a hril. Sansuokna le sawmdawlna sin thaw mek a nih.

Democratic Natl. Convention in Hillary presidential nomination an namdet tah
PHILADELPHIA: United States Presidential Election hung um ding le inzawma Democrats le Republican party han hun sawt tak an party candidate ding hai zawnga primary election an nei hnungin tuta sawrkarna siemtu Democratic party an party convention­ah Ms Hillary Clinton chu an party presidential candidate dingin an sukfel ta a, US major party a inthawk nuhmei presidential nomination hmu hmasa tak a la nih. Thlangtling a hung ni chun US in nuhmei President a nei hmasatak a hung ni bawk ding a nih. Ms Hillary Clinton hi US President term 2 lo chel tah Bill Clinton nuhmei a nih. Ms Hillary hin Democratic National Convention nei hunah party delegates 4,764 han thlawpna pein majority a chang a nih.

US Presidential Election hi November 8, 2016 in nei ning a ta, Republican nominee Donal Trump leh an inkhing ding a nih. Hillary hi US history­a major party ticket­a nuhmei ngir hmasa tak niin khawvel ram ropui tak United States rorelna khawl chela US commander­in­chief hung ni dingin hratna a chang pei dim ti chu khawvel mipui hai lo thlir a ni ta a, khawvel ramropui taka President ni thei ding ngirhmuna chu a um ta phawt a nih.

VAWISUN THUPUI
Hmangainain venghai a sukkhawhlo ngai nawh a, chuleiin hmangaina hi dan hraw famkimna a nih. ~ Rom 13:10

Editorial: Mihai makti a tling

Kum 16 zet el Manipur state sunga Armed Forces (Special Power) Act (AFSPA) 1958 hlip dinga ngennaa bungheia nuorna nei tah Irom Sharmila Chanu in zani hmasaa a hmalakna chawlsana Assembly Election huna Independent Candidate a ngir a tum thu a puonglang chun mihai makti a tling. A bunghei hi August 9, 2016 a inthawk a chawlsan ding  niin a hril. A thutlukna a puonglang hin Manipur le India mihai makti chau ni lovin khawvel mipuihai makti a tling a, mihai lungril a thawng hle bawk. A thutlukna a puonglang hin hril (comments) a hlaw hle a, social media haia khawm titi a suktam pha hle. Thenkhatin an sawisel a, thenkhatin awm le tha an tipui a, ngaidan an phir nasa hle. Hi thil hi a ni dan ding hrim a nih.

Irom Sharmila Chanu hmalakna hi Manipur le India mihai chau hriet ni lovin khawvel hriet a inthang luoi luoi, a hmalakna thlawp le ngaisanga state level, national level le international level hai chena award lo dawng ta a ni a, a hmalakna a chawlsan ding thu le Assembly Election­ah a ngir ding thu a hang puonglang thut el hin khawvel mihai lungril a thawng naw thei naw a nih. Mithiem le mivar, hmathlir sei le mi dawnril hai chun Sharmila thutlukna hi tha an ti dan, an ngaidan le an lo beisei ang chu a phakzo naw niin an lang. Ngirhmun insang takel, tulai tawng takin International Icon tling ta hiela hiengang thutlukna a hang siem el hi, ama le ama an thumhnuoina le an sukderena a hung ni el naw dim a nih ti ngaidan an nei tawl. Tulai tawng dan takah a thutlukna hin khawvel mihai ta dingin mix filling an neitir a ni deu tak.

India ram zalenna dinga hma lo lahai tumruna kha a phakzo naw hle ti chu hmu le hriet theiin a um. Mahatma Gandhi lungril ang kha put ve sienla chu a thiltum le a thil ngen hlawtling hma chu a bunghei hi a tawpsan ring a um nawh. Amiruokchu, hi thua hin dem le sawisel el thei ding chu niin an lang nawh. Manipur­a inthawka AFSPA hlipna dinga a hmalakna hi namen a ninaw a, ngaisang um takel a nih. AFSPA hlipna ding le dodalna dinga hmalakna kawnga chun Crusader ropui tak le ama tlukzo ding chu an la um nawh ti inla ei hril suol taluo ring a um nawh. A hnung thuoltu ding hi an la hung um nawk dim maw? Nuhmei ropui le tumru takel chu a ni tho tho a nih. Khawvel mihai beiseina le duthusam ruok chu a sukpuitling zo tanaw ding a nih. A thutlukna hi a ennawnin a thlakthleng dim ti chu mipui han an lo thlir thup a nih.

AFSPA hlipna chungchanga hin sawrkar thlungpui le state sawrkar dit dan, ngaidan le tum dan chu a la danglam chuong naw a, a khau pangngaiin a la khau zing a. Hieng laizing hin Manipur mipuihai thlawpna chu a duthusam a tlingzo naw niin an lang. Manipur mipuihai ruok chun a hmalakna hi thlawp tawkin an inngai ring a um. Amiruokchu, ama (Sharmila) ngaidana chun mipui thlawpna hi huntawk a tinaw niin a tawngbau a inthawk hin an lang. Mipui tieng thlir dan le ngaidan chun a hmalakna hi khawvela pawl tum tum hai khawmin an ngaivenin an thlawp tha tawkah an ngai. A san chu Amnesty International thangsain International Organisation tum tum hai chun a hmalakna hi an hrietpui a, tha an tipui in an thlawp ti chu award hran hran an hung inhlanna hin a sukchieng. Ngaisak hlaw lo nisienla chu award hi an hung inhlan ring a um nawh.

Khawvela la cheng ei ni a, Sharmila khawm hin sungkuo siem nuomna a nei ta leia a bu nghei hi chawlsan a, mihriem nun pangngaia um ve a tum ta khawm a ni thei. Chuleiin a thutlukna siem hi  pawnga dem le sawisel el thei ding niin an lang nawh. A mihriem kum khawm, kum 44 a ni ta a, pasal nei a, nauhai nei ve a nuom chun pasal nei hun er le nau nei thei hun laia pasal a nei chu thil tul ve a nih. Mihriem dan pangngai ngaituo chun nau a nei thei hun ding hi a sei ta nawh. A hun lai a nih tia thutlukna hi a siem el thil ni thei a nih.

Dan siemtu ni a, politics a inrawlna a hung nei pha ruok chun AFSPA hlip dinga a hmalakna hi chu a tum le beisei ang chun a hlawtling ring a um nawh. Manipur Assembly­ah members 60 an um a, chuhai laia MLA pakhat a lo hung ni thei khawma ama khat chauva a hmalakna chun umzie bek bek nei thei dingin ring a um nawh. Sharmila ngaidan chun hmalakna la nei thei an ring niin a tawngbau suoka inthawk hriet thei a nih. Kum tharah Assembly election nei ei ta, chu huna chun Independent candidate in a ngir a, a lo tling pal chun iem a la hung thaw thei ding ti chu hunin a la hung rel ding a nih.


Post a Comment

Powered by Blogger.