JE natna dona kawngah sawrkarin theitawpin hma a lak: Dr Sashi Kumar
CCPUR: Tulaia Japanese Encephalitis (JE) natna hung inlang nawk le inzawmin zani zantieng 1:30PM khan Dr Sashi Kumar, State Epidermiologist le Dr Thangchinkhup Guite, CMO, CCPur; Dr Phirthanglien Buhril, DACO le Medical tienga head of Department han CMO Office chamberah chanchinbumihai inpawlpuina an nei.
Dr Thangchinkhup Guite chun, JE natna hi natna thar a ninaw a, nikum le nikum hmasa haia khawm CCPur districtah a lo inleng ta a. Natna dang ang loin JE natna hi a sukdamna damdawi tak hmusuok a la ninaw leiin ti a um deu ti thu a ni a, sienkhawm inveng thei a nih. Hi lei hin CCPur mipui hai chu JE natna leia inlauna ding a um naw a, Medical team han a dangna dingin theitawp an suo a nih tiin a hril. Khawsik (fever) nazawng JE an ninaw a, in kawl le kieng sukfai a, Vawk kul hai fai taka sie dingin mipui hai an fui.
Dr Sashi Kumar, State Epidemiologist chun, State le District Level -ah JE natna control a ni theina dingin Medical Doctor han theitawp suoin hma nasa takin an lak zing a, JE laka invengna (dangna) damdawi Manipur sawrkar in a nei dainaw khawmin Assama inthawk laklut ning a tih tiin a hril.
Dist. Hospital Medical Supdt. chun, ei rama JE outbreak um leiin District hospital khawmin tuta inthawk sawtnawte hnungah Hospitala um damnaw hai hmang dingin impregnated mosquito net a pek ding thu, hi thila dingin Additional Director kuomah ngenna peklut a ni tah tiin a hril.
Dr V.C. Pau chun, Go Chinkhup Veng, New Lamka le Siden khuo haiah JE vaccination kapzo a nita a, DIO, CCPur chun Thawtanni a kap ding JE Vaccination Vials 100 an nei a, Vial 1 ah mi 5 kap thei a ni a, Vial 100 chun mi 500 kap a dai tina a nih tiin a hril. Routine Immunization huna JE kap tasa naupang hai ta dingin inkap thar nawk a tul naw a, sienkhawm a lan kap lo hai ruok chu kap thei a nih tiin a hril bawk.
Gospel Music night
CCPUR: Youth Department, RPC NEI huoihawtnain July 25, 2016, 7:00PM khin Saikawt Youth Club Hall, CCPurah Orphan Ministry a dingin Gospel Music Night concert puithu tak um a tih. Gospel Music Night thupui chu “ christ Our Cornerstone” ti a nih. Hlasak dinghai chu Cornerstone Music Band, The Netherlands; Mr James Pakhuongte; Mr Zawlkapthang; Miss Lalengvari Sinate; Miss Lawmnakim Hrangate; Miss Gloria Khawlhring le Cornerstone Band Jr. hai ning an tih.
JE dangna damdawi kap
CCPUR: DFWO, CCPur le District Immunization Office (DIO) thangruolin zani zingkar 6:30AM a inthawk khan New Lamka (G), CYA Roada TCYA Hallah JE natna laka invengna damdawi mi 1680 vel kap a ni bakah DIO chun zanikhan JE vengna damdawi mi 900 hai damdawi an kap bawk.
Zanikhan Imphala inthawk JE dangna damdawi 250 a hungtlung a, hienghai khawm hi hmang zo deu thaw a nih. July 25, 2016 khin Medical Department chun JE dangna damdawi a tam thei ang Imphalah va la nawk an tih. JE vengna damndawi kap lo han JE natna an invawi huna thluok a lut nuom deu a hril a nih.
JE le inzawmin District Hospital Doctor duty ruot
CCPUR: CCPur khawpui sunga Japanese Encephalitis (JE) le Viral fever inleng leiin District Hospital, CCPur chun OPD timing hunah fever treatment thawna dingin NCD Clinicah doctor duty ding a ruot.
Hi dungzui hin Medicine OPD hunah Dr Paokai (Monday); Dr Premchandra Singh (Tuesday); Dr Nirpendra (Wednesday); Dr Kim Simte (Thursday); Dr Nengkhanmang (Friday) le Dr Kim Simte (Saturday) haia duty an tih.
Chun, Paediatric consultant room Fever Clinic a duty dinga ruot hai chu Dr Ruhini (Monday); Dr Tongzakai (Tuesday); Dr M. Neison Kom (Wednesday); Dr Lalzarzolien (Thursday); Dr Ruhini (Friday) le Dr Tongzakai (Saturday) hai ning a tih.
Casualty & Trauma Centrea damnaw inrik deu hai admit theina dingin MO store le Sister i/c han a tul angin arrangement siem an tih tiin Dr J. Son Gokham Samte, MS, District Hospital chun a hril.
ADC meeting
CCPUR: July 25, 2016, 1:00PM khin ADC, CCPur hnuoia MDCs hai chun Chairman inrawinain Chairman Chamberah informal meeting nei an ta, August 1 a District Council Day hmang dan ding hriltlang an tih.
1st RPL 2016 ah Thangkhanpau Memorial FC (TMFC) in a pakhatna an lak
CCPUR: Zanikhan 1st Rengkai Premier League (RPL) 2016 football final match Thangkhanpau Memorial FC (TMFC) le Zawlbuk FC han an khel a, TMFC chun Zawlbuk FC 31 a hnein hrattak nina an lak.. TMFC chun lawmmanin Trophy, Sumfai Rs. 10,000/ le Certificate an dawng a, a pahnina Zawlbuk FC chun Trophy, Rs. 5,000/ le Certificate an dawng. RPL a thang club/team 12 hai chu Certificate in hlan vawng an nih. Huoihawttu FAST chun RPL hlawtlingna dinga sum le kawng dang danga thangpuina lo petuhai, hi match a thang club/team hai po po, Media tienga lo mihaiin hi RPL an hrietphana le lo thangpuitu Hmasawnna Thar Daily Newspaper, Online News Portal Virthli le CCPur Times hai chungah lawmthu an hrila, chun Fast hin hun sawtnawte ah Gospel Camp buotsai an tuma hi thil a ding hin TShirt rawng chi hran hran Pathien thu le inzul, thu ziek tha tak tak tulai taka design Rs. 350/ a inthawk a chungtiengin an zawr suok mek chu rawngbawl nuom hai ta dinga kawt lientak hawng a ni thu an hril bawk.
Khuollien Pu Lalramlien Darngawn chun hiengang FAST in a huoihawt chu lawmum le hmasawnna a ni thu, Khawvelin football an ngai ropui ta thu hrilin India ram khawm hma a sawn zie le India Captain khawm Mizo Jejea a ni thu a hril. Khuol inzaum Pu Thangchuoilo Vice President, HYA Rengkai Branch chun RPL inkhel a ni huna inkhelmi thiem tak tak hmu ding an um chu lawmum a ti thu, chuonglai zinga fakledawn kawnga fimkhur a ngai thu hrilin, hratna chang khawmin mi nakhel zawnga lawm le program buotsai nagilo dingin an fui a. Hrat naw hai khawm fak lo le dawn lo ding thil hrie a, fimkhur taka nun khal ding le hun nawka iengtina hnena chang thei ding am ti ngaituo lem dingin an fui bawk. Khuol Chawngpu Pu Ramnunsiem @Aren Sanate chun RPL huoihawttu FAST thil tum ball pet el niloa Gospel Camp chen le thil dang danga khawm an thangkai pei dinga a hmu thu le a lawmthu a hril a, sawrkar infuk naw thu, election hun a mipui thanglak dan an dik naw zie le mi bussiness kara um ei ni tah tiin a hril a, Rengkai khawsung ngei khawm a ni ding anga lampui le thil dang dang hai a um naw thu a hrillangsa bawk.
Cash Prizes hai hi Pu M. Gouzamang Guite, EM, ADCC in a tum a nih. Hi huna hin Nk. Jennifer Nianglawmkim, Pu Ramhluolien Khawbung le Pu Lien Shakum haiin hla mawi tak takin mipui fekhawm hai an in awi. Hi hun a hin ama taksa ngei hung inlang theinaw de sienkhawm Pu Laldawnlien Varte Gen. President, HYA GHQ chun RPL Opening Ceremony huna a lo intiem ta angin AGS, HYA GHQ fethlengin thilpek an hlan. Hi huna hin FAST member fam lo chang tah hai inzana le hrietzingna’n inkhel hmain CDSA Referee inrawinain totawka minute 1 sung tawngtaina nei a nih.
LRS Puruolte
Migrant Workers 1,000 chuong kuomah Work Permit pek ta le Labour Laws 25 hmang a nih: E. Tomba Singh
IMPHAL: Labour Department Manipur chun mi 1,000 chuonghai kuomah licences/work permit a pek tah. Work permit peka um hai hi Company lien Simplex Infrastructure, Simplex Projects, Keystone le Manipur State sunga Special Contractorhai an nih. Work permit peka um hai hi State danga intahwka hung vaihai (migrant workers/migrant labourers/non local) anni tlangpui. Migran workers/ migrant labours/nonlocal ruoitu companies of Contractorhai chunga action lak hi Labour department sin le a thuneina a ninaw a, sienkhawm work permit/licence indik lo ruoitu companies or contractorhai chungah chun action a lak thei tiin zanita DIPR, Imphal hmuna press conferenceah E. Tomba Singh, Deputy Labour Commissioner, Govt. of Manipur chun a hril.
Manipurah Labour Laws 25 hmang a ni a, chu hai lai chun, The Trade unions Act, 1926; The Children (Pledging of Labour) Act 1953; The Payment of Wages Act, 1936; The Industrial Employment (Standing Orders) Act, 1946; The Industrial Disputes Act, 1947; The Minimum Wages Act, 1948; The Bonded Labour System (Abolition) Act, 1976; The InterState Migrant Workmen (Regulation of Employment and Condition of Services) Act, 1979; The Labour (Prohibition & Regulation) Act, 1986 le The Working Journalists and Other Newspapers of Services) Act, 1955 hai an thangsa tiin E. Tomba Singh chun a hril.
AIPMT Candidatehai ta dingin Bandh inthlazal
IMPHAL: All Manipur Written Test Successful Candidates of Police Constables Male, 2013 pawl chun an bandh thaw chu All India PreMedical Test (AIPMT) candidate hai ta dingin an inthlazal thu zanita Manipur Press Club, Imphala press meet an huoihawt huna an hril. An bandh thaw ding an thul naw thu le an thil ngen sukpuitling pek anni hmakhat nuona an la sunzawm pei ding thu Laimayum Nandakishore chun a hril. Hi pawl thil ngen chu Appointment Order pek ding ti a nih. Bandh hin Water Supply, Electricity, Media, Sakhuona thil le emergency thil hai a huomsa naw ding niin an hril.
July 25 a inthawk RIMS OPD hawng nawk
IMPHAL: International Peace and Social Advancement (IPSA) le Teachers and Medical Officers Association, RIMS han inbiekremna an nei thei ta leiin OLD, RIMS khara um chu July 25, 2016 a inthawk ni dang ang bawkin hawng a ni nawk ta ding niin Chingkhei Luwangcha, President, IPSA chun zanita Keishampat, Imphala Chanchinbumihai an hmupui huna a hril.
Officers 1,953 sum hmangna an enfel
IMPHAL: Kum 200102 to 201516 inkar sung khan Officers 1,953 (1,268 Government Officers le Government Office ni lo 685) hai sum hmangna an enfel (audited) bakah State sawrkar hnuoia GroupC le GroupD thawktu 43,326 hai service books an enfel niin Y. Ichamani, Director, Local Fund Audit, Govt. of Manipur chun zanita DIPR Complex, Imphal a press conference huna a hril.
Vai 89 Sekmai PSah an peklut nawk
IMPHAL: Zani 4AM11AM inkar sung khan Dimapur a inthawka Imphal pana hung Interstate Bushai chu JCILPS hmalakna thlawptu han Sekmaiah sukchawlin, lekha pawimaw nei lo Vai (nonlocal) 89 hai chu Bus haia inthawk an intumtir a, hun iemanichen an cheltang hnungin Sekmai Police stationah an peklut nawk.
Written Test result puong
IMPHAL: State Council of Educational Research and Training (SCERT), Manipur hnuoia Accountant, Office Superintendent, Stenographer le LDC sin hai lakna dinga July 17, 2016 a Written test neia um result chu puonglang a ni ta a, result hi SCERT Dirctorate, Imphalah en thei a nih. Written Test a hlawtlinghai le GradeIV (Peon) DIET sin hai lakna dinga shorthand test/typing test/interview/Viva Voce chu July 2527, 2016 inkar sung khin Directorate of SCERT, Lamphelpatah nei ning a tih tiin Director, SCERT, Manipur chun inhriettirna a siem. Interview hi nitin 10:00AM5:00PM inkar sunga nei ni hlak a tih.
Sonia le Rahul han an vailiem
NEW DELHI: Uttar Pradesh Assembly Election hung um ding le inzawma ni 3 sung aw ding election campaign Bus yatra ‘27 Saal UP Behaal’ chu Congress President Sonia Gandhi le Congress Vice President Rahul Gandhi han zanikhan New Delhia inthawk an vailiem. Bus Yatra vailiem naa hin Uttar Pradesh Congress President Raj Babbar le UP Congress Chief Ministerial candidate Ms. Sheila Dikshit le AICC General Secretary (UP), Ghulam Nabi Azad hai khawm an thang. July 29, 2016 khin Rahul Gandhi khawmin Lucknow khawpuiah campaign hi zawm veng a ta, party workers 50,000 hai inhmupui a ta, August 2, 2016 khin Ms Sonia Gandhi chun PM Narendra Modi constituency Varanasi khawpuia road showah thang bawk a tih.
IAF vuongna inhman la hmu lo
NEW DELHI: Zani hmasaa Indian Air Force vuongna AN32 a umna chin hriet lova inhmang chu nasa taka zawng zing a ni a, hi thu ei sut chena hin hmun a ni thu hriet a la ni nawh. Hi vuongnaa hin mi 29 an chuong a, hi laia 6 a sunga thawktu, 11 hai IAF personnel le 2 hai chi Indian Army niin pakhat chu Coast Guard a nih.
Application peklut hun suksei
NEW DELHI: Academic Session 201617 sunga minority studenthai ta dinga postmatric Scholarship hnina lekha (Application form) peklut thei hun (online in) chu August 31, 2016 chena dinga suksei a nih tiin Union Minister of state for Minority Affairs (Independent Charge) Mukhtar Abbas Naqvi chun a hril. Scholarship hnina lekha la pelut lo student an la tam a, ngenna an siem dungzui le studenthai hmakhuo ngainaa application form peklut hun hi suksei a nih tiin Mukhtar Abbas Naqvi chun a hril.
PM in DelhiAgartala BG Train a vailiem ding
AGARTALA: Prime Minister Narendra Modi chun July 31, 2016 khin Delhi le Agartala inkara service ding Broad Gauge Train service New Delhia inthawk vailiem a ta, hi le inruol char hin Railway Minister Suresh Prabhu chun Agartala- Delhi broad gauge Train Agartala hmuna inthawk vailiem ve thung a tih tiin Tripura Transport minister Manik Dey chun reporters hai kuoma a hril. Vailiem ding Rel hi ‘Tripureswari Super Fast Express’ti ning a tih. Chun, Mr Prabhu in India hmarsakbiel (NE) le Bangladesh chena tlung ding Agartala Akhaura railway service thawna ding foundation lung phumna nei bawk a tih.
Corruption caseah IPS Officer man
BHUBANESWAR: Anti Corruption official hai chun IPS Officer TripuraManipur Cadre Joydeep Nayak chu zanikhan Ghaziabad hmuna an man. Mr Joydeep Nayak hi Odisha hmuna SC/ST students le Self Help Groups (SHGs) hai ta dinga computer inchuktirna ding Rs. 88 lakh sukchavainaa inrawlna neia intum a nih. Hi sum sukchavai a ni huna hin Mr Nayak hi deputationa Odisha Police hnuoia Human Rights Protection Cell (HRPC) a um a ni a, ama hi 1991 batch IPS Officer a nih. Zanikhan Uttar Pradesha Ghaziabad chief judicial magistrate court hmaah inlangtir a ni a, Court chun transit remand a phal pek. Cuttack hmuna Computer company kuomah tender thaw loin contract a pek tia intum a nih. Hi thil hi ama thlaktu in HRPC a hung chel hnunga hrietsuok a nih.
India le Bangladesh han inbiekna
NEW DELHI: India le Bangladesh hai chun Home Minister level in July 28, 2016 khin New Dlehiah inbiekna nei an tih. Hi inbieknaa Bangladesh ram palaihai chu an Home Minister Asaduzamman Khan Kamal in inrawi a tih. Bangladesh ram palaihai hi July 27, 2016 in New Delhi hungtlung an ta, ni 3 sung New Delhiah cham an tih. Hi inbieknaa hin rambung pakhni haia inthawka National Security Adviser, Home Secretary, Director General, BSF le Director General Narcotics Control Bureau hai khawm thang an tih. Home Minister level a inbiekna nuhnung tak chu New Delhiah December, 2012 khan nei a ni a, Dhaka hmuna chun January, 2013 khan nei a nih.
Kabula bomb puokah mi 61 an thi
KABUL: Zanikhan Afghanistan khawpui Kabul a mipui pungkhawmna hmuna terrorist han bomb hrat takel an sukpuok a, mi 61 an thi a, midang 207 an hliem niin ei thu dawngna chun a hril. Mipuihai hi an ram power line in a hraw dodalnaa pungkhawm an nih. Power line hi an biel sunga electric pekna ding ni lo, Turkmenistan, Uzbekistan le Tajikistan ram haia electric pekna ding a nih. Power nasa taka an mamaw le tlasam laia ramdanga Power pek dinga hmalakna chu dodala mi sangtel pungkhawma nuorna nei an nih. Hi lai hmuna pungkhawmhai hi Shiite Hazara hnam an nih. ISIS pawl chun bomb hi anni pawl sukpuok niin an hril.
----------------------------------------------------------------------------------------------------------------
VAWISUN THUPUI
Ka hratnawpui loa hratnaw tu am a um a? ka lungril sukna loa sukthluk tu am a um hlak a? Suong ding ka ni rau rau chun ka hrat nawna tieng thilhai a nih ka suong lem ding.~ 2 Korinth 11:2930
Editorial: Japanese Encephalitis
Ei state Manipur a ding khawmin Japanese Encephalitis (JE) natna hri hi natna hri thar a ninaw a, kum tin June le August thla vela ei state a natna hri hung um le hung inleng hlak, ei tuor le ei thawhla hlak natna hri a nih. Health Department, Manipur hril danin tuchena hi natna invawi hrietchienga um ta chu mi 9 an ni a, chuonghai chu Imphal West Districtah 3, Churachandpur districtah 2, Imphal East, Thoubal, Chandel le Ukhrul district haiah pakhat seng a nih. Tuchena JE natna hri invawi la um nawna district hai chu Tamenglong, Bishnupur le Senapati district hai an nih. JE natna hri hi June thla laia inthawka intan ta kha niin Health Department chun a hril. Health Department in JE natna invawi mi 9 hrietchieng nia a hril lai mek hin, ei thu dawngna dang chun mi 12 an tling ta a, naupang pakhat khawm JE natna ni dinga ringhla a damnaw pakhat a thi ta niin a hril.
Iengpo khawm nisien JE natna hri hi ei state sungah an lang ta a ni leiin mipuihai mawphurna chu JE natna hri laka inveng a nih. An veng dan tha tak chu Thokang se lova um a nih. Hi lei hin Thokang se laka inveng chu ei thaw ding makmaw a nih. Tulai hin ei ramah Thokang an tam zuol a, thokanghai hi tui le ran chi tum tum hai le inzawmna nei anni leiin mani in bul sukfai a, thokang intui theina ding tui intlingtir lo ding, mani in bulah ran vai lo ding, taksa, sil le bil hai sukfai ding, fak le dawn fimkhur ding a nih.
JE natna hri inleng leia damnaw ei um ta tlat leiin JE natna hung inlang dan hi ei hriet a pawimaw hle. Ei khawsik a, ei lu a na a, ring le taksa bung hran hran hai a hung na a, taksa a zawi ngawi ngawi a, ei thil duna a hung re chun an rang thei anga Doctor pan le rawn ngei ngei ding a nih. Amiruokchu, a chunga ei hril anga um hai po po JE natna invawi ani vawng chuong nawh ti hriet ding a nih. Tulai hi ei rama JE natna hri inleng lai a ni leiin a chunga hrillanga um hai anga ei um chun Doctor pan a, thisen test tluka tha chu um naw nih. JE natna hri inleng lei ruok hin chu ei lungril sukphawklek naw sienla nuom a um. JE natnaa damnaw ei insungah an lo um ta ruok chun a hrana sie le enkawl ding a nih.
Doctorhai chun JE natna hri hi Thokanghai laia chi khat Culex in an umtir le a sukdar niin an hril. Thokang taphawtin JE natna hri an pai naw a, a paitu bik chu Culex ti anni a, Culex a khawm chi 4 an um a, Manipur a hi natna intluntu le thedartu hai chu Culex Tritaeniorhynchus le Culex Vishnui niin an hril. Hiengang Thokanghai hi tui intlingna, a bikin bu chingna leilet tuiah an um nuom bik niin Doctor han an hril. Hi lei hin Leileta sin thawhai thokang se ding lakah an inveng fimkhur zuol a tul. Chun, leilet bul hnaia cheng mipuihai khawm hmun danga chenghai nek chun an fikhur zuol bik a tul. Thokanghai hi mihai thisen dawk ding zawnga vuong vel anni leiin that rem dan ngaituo ding a ni bawk.
Culex Thokanghai hin Vawk an se a intahwk JE natna hi an thedar thei a nih. JE natna hrik pai thokangin mi a se pha leh JE natna an invawi hlak. Ei state a JE natna hri hung intanna bulpui tak chu ei sa du em em el Vawka inthawk nia hril a nih. Chun, Bawng, Varak, Ar, Beram, Kel etc hai Thokangin an va se a inthawk khawmin JE natna hri hi Thokang han an pai thei bawk. Culex Thokangin an se taphawt natna invawi anni chuong naw a, Manipur a chun mi 301 a se hai laia pakhatin an invawi thei anga sui a nih. JE natna hi mihriem kum 15 le a hnuoitieng han an invawi nuom bik a, an vawi hi 85% ang le kum 60 chin hai lai an vawi umzat chu 15% nia hril a nih.
In bula ei ran Vai haia inthawk JE natna hi ei invawi ni takin an lang. Hi lei hin mihriem chengna bul hnaia ran vai hi chu ei bansan ngam a tul a nih. Ran vai nuomhai chu miriem cheng nawna ramah vai a himin a tha tak awm ie. Kum 1995 khan Manipurah JE natna invawi mi 200 hmusuok an ni a, a hun taka enkawl naw leiin mi 50 zetin an thipui. Kum 2010 khan JE natna invawi mi 100 hmusuok an ni a, hienghai laia 10 in an thipui. JE natna hi khawsikpui natna chikhat a ni a, thluokah a lut pha chun mihriemin an thipui hlak. Hieng a ni lei hin ngaitha chi chu a ni nawh.
CCPUR: Tulaia Japanese Encephalitis (JE) natna hung inlang nawk le inzawmin zani zantieng 1:30PM khan Dr Sashi Kumar, State Epidermiologist le Dr Thangchinkhup Guite, CMO, CCPur; Dr Phirthanglien Buhril, DACO le Medical tienga head of Department han CMO Office chamberah chanchinbumihai inpawlpuina an nei.
Dr Thangchinkhup Guite chun, JE natna hi natna thar a ninaw a, nikum le nikum hmasa haia khawm CCPur districtah a lo inleng ta a. Natna dang ang loin JE natna hi a sukdamna damdawi tak hmusuok a la ninaw leiin ti a um deu ti thu a ni a, sienkhawm inveng thei a nih. Hi lei hin CCPur mipui hai chu JE natna leia inlauna ding a um naw a, Medical team han a dangna dingin theitawp an suo a nih tiin a hril. Khawsik (fever) nazawng JE an ninaw a, in kawl le kieng sukfai a, Vawk kul hai fai taka sie dingin mipui hai an fui.
Dr Sashi Kumar, State Epidemiologist chun, State le District Level -ah JE natna control a ni theina dingin Medical Doctor han theitawp suoin hma nasa takin an lak zing a, JE laka invengna (dangna) damdawi Manipur sawrkar in a nei dainaw khawmin Assama inthawk laklut ning a tih tiin a hril.
Dist. Hospital Medical Supdt. chun, ei rama JE outbreak um leiin District hospital khawmin tuta inthawk sawtnawte hnungah Hospitala um damnaw hai hmang dingin impregnated mosquito net a pek ding thu, hi thila dingin Additional Director kuomah ngenna peklut a ni tah tiin a hril.
Dr V.C. Pau chun, Go Chinkhup Veng, New Lamka le Siden khuo haiah JE vaccination kapzo a nita a, DIO, CCPur chun Thawtanni a kap ding JE Vaccination Vials 100 an nei a, Vial 1 ah mi 5 kap thei a ni a, Vial 100 chun mi 500 kap a dai tina a nih tiin a hril. Routine Immunization huna JE kap tasa naupang hai ta dingin inkap thar nawk a tul naw a, sienkhawm a lan kap lo hai ruok chu kap thei a nih tiin a hril bawk.
Gospel Music night
CCPUR: Youth Department, RPC NEI huoihawtnain July 25, 2016, 7:00PM khin Saikawt Youth Club Hall, CCPurah Orphan Ministry a dingin Gospel Music Night concert puithu tak um a tih. Gospel Music Night thupui chu “ christ Our Cornerstone” ti a nih. Hlasak dinghai chu Cornerstone Music Band, The Netherlands; Mr James Pakhuongte; Mr Zawlkapthang; Miss Lalengvari Sinate; Miss Lawmnakim Hrangate; Miss Gloria Khawlhring le Cornerstone Band Jr. hai ning an tih.
JE dangna damdawi kap
CCPUR: DFWO, CCPur le District Immunization Office (DIO) thangruolin zani zingkar 6:30AM a inthawk khan New Lamka (G), CYA Roada TCYA Hallah JE natna laka invengna damdawi mi 1680 vel kap a ni bakah DIO chun zanikhan JE vengna damdawi mi 900 hai damdawi an kap bawk.
Zanikhan Imphala inthawk JE dangna damdawi 250 a hungtlung a, hienghai khawm hi hmang zo deu thaw a nih. July 25, 2016 khin Medical Department chun JE dangna damdawi a tam thei ang Imphalah va la nawk an tih. JE vengna damndawi kap lo han JE natna an invawi huna thluok a lut nuom deu a hril a nih.
JE le inzawmin District Hospital Doctor duty ruot
CCPUR: CCPur khawpui sunga Japanese Encephalitis (JE) le Viral fever inleng leiin District Hospital, CCPur chun OPD timing hunah fever treatment thawna dingin NCD Clinicah doctor duty ding a ruot.
Hi dungzui hin Medicine OPD hunah Dr Paokai (Monday); Dr Premchandra Singh (Tuesday); Dr Nirpendra (Wednesday); Dr Kim Simte (Thursday); Dr Nengkhanmang (Friday) le Dr Kim Simte (Saturday) haia duty an tih.
Chun, Paediatric consultant room Fever Clinic a duty dinga ruot hai chu Dr Ruhini (Monday); Dr Tongzakai (Tuesday); Dr M. Neison Kom (Wednesday); Dr Lalzarzolien (Thursday); Dr Ruhini (Friday) le Dr Tongzakai (Saturday) hai ning a tih.
Casualty & Trauma Centrea damnaw inrik deu hai admit theina dingin MO store le Sister i/c han a tul angin arrangement siem an tih tiin Dr J. Son Gokham Samte, MS, District Hospital chun a hril.
ADC meeting
CCPUR: July 25, 2016, 1:00PM khin ADC, CCPur hnuoia MDCs hai chun Chairman inrawinain Chairman Chamberah informal meeting nei an ta, August 1 a District Council Day hmang dan ding hriltlang an tih.
1st RPL 2016 ah Thangkhanpau Memorial FC (TMFC) in a pakhatna an lak
CCPUR: Zanikhan 1st Rengkai Premier League (RPL) 2016 football final match Thangkhanpau Memorial FC (TMFC) le Zawlbuk FC han an khel a, TMFC chun Zawlbuk FC 31 a hnein hrattak nina an lak.. TMFC chun lawmmanin Trophy, Sumfai Rs. 10,000/ le Certificate an dawng a, a pahnina Zawlbuk FC chun Trophy, Rs. 5,000/ le Certificate an dawng. RPL a thang club/team 12 hai chu Certificate in hlan vawng an nih. Huoihawttu FAST chun RPL hlawtlingna dinga sum le kawng dang danga thangpuina lo petuhai, hi match a thang club/team hai po po, Media tienga lo mihaiin hi RPL an hrietphana le lo thangpuitu Hmasawnna Thar Daily Newspaper, Online News Portal Virthli le CCPur Times hai chungah lawmthu an hrila, chun Fast hin hun sawtnawte ah Gospel Camp buotsai an tuma hi thil a ding hin TShirt rawng chi hran hran Pathien thu le inzul, thu ziek tha tak tak tulai taka design Rs. 350/ a inthawk a chungtiengin an zawr suok mek chu rawngbawl nuom hai ta dinga kawt lientak hawng a ni thu an hril bawk.
Khuollien Pu Lalramlien Darngawn chun hiengang FAST in a huoihawt chu lawmum le hmasawnna a ni thu, Khawvelin football an ngai ropui ta thu hrilin India ram khawm hma a sawn zie le India Captain khawm Mizo Jejea a ni thu a hril. Khuol inzaum Pu Thangchuoilo Vice President, HYA Rengkai Branch chun RPL inkhel a ni huna inkhelmi thiem tak tak hmu ding an um chu lawmum a ti thu, chuonglai zinga fakledawn kawnga fimkhur a ngai thu hrilin, hratna chang khawmin mi nakhel zawnga lawm le program buotsai nagilo dingin an fui a. Hrat naw hai khawm fak lo le dawn lo ding thil hrie a, fimkhur taka nun khal ding le hun nawka iengtina hnena chang thei ding am ti ngaituo lem dingin an fui bawk. Khuol Chawngpu Pu Ramnunsiem @Aren Sanate chun RPL huoihawttu FAST thil tum ball pet el niloa Gospel Camp chen le thil dang danga khawm an thangkai pei dinga a hmu thu le a lawmthu a hril a, sawrkar infuk naw thu, election hun a mipui thanglak dan an dik naw zie le mi bussiness kara um ei ni tah tiin a hril a, Rengkai khawsung ngei khawm a ni ding anga lampui le thil dang dang hai a um naw thu a hrillangsa bawk.
Cash Prizes hai hi Pu M. Gouzamang Guite, EM, ADCC in a tum a nih. Hi huna hin Nk. Jennifer Nianglawmkim, Pu Ramhluolien Khawbung le Pu Lien Shakum haiin hla mawi tak takin mipui fekhawm hai an in awi. Hi hun a hin ama taksa ngei hung inlang theinaw de sienkhawm Pu Laldawnlien Varte Gen. President, HYA GHQ chun RPL Opening Ceremony huna a lo intiem ta angin AGS, HYA GHQ fethlengin thilpek an hlan. Hi huna hin FAST member fam lo chang tah hai inzana le hrietzingna’n inkhel hmain CDSA Referee inrawinain totawka minute 1 sung tawngtaina nei a nih.
LRS Puruolte
Migrant Workers 1,000 chuong kuomah Work Permit pek ta le Labour Laws 25 hmang a nih: E. Tomba Singh
IMPHAL: Labour Department Manipur chun mi 1,000 chuonghai kuomah licences/work permit a pek tah. Work permit peka um hai hi Company lien Simplex Infrastructure, Simplex Projects, Keystone le Manipur State sunga Special Contractorhai an nih. Work permit peka um hai hi State danga intahwka hung vaihai (migrant workers/migrant labourers/non local) anni tlangpui. Migran workers/ migrant labours/nonlocal ruoitu companies of Contractorhai chunga action lak hi Labour department sin le a thuneina a ninaw a, sienkhawm work permit/licence indik lo ruoitu companies or contractorhai chungah chun action a lak thei tiin zanita DIPR, Imphal hmuna press conferenceah E. Tomba Singh, Deputy Labour Commissioner, Govt. of Manipur chun a hril.
Manipurah Labour Laws 25 hmang a ni a, chu hai lai chun, The Trade unions Act, 1926; The Children (Pledging of Labour) Act 1953; The Payment of Wages Act, 1936; The Industrial Employment (Standing Orders) Act, 1946; The Industrial Disputes Act, 1947; The Minimum Wages Act, 1948; The Bonded Labour System (Abolition) Act, 1976; The InterState Migrant Workmen (Regulation of Employment and Condition of Services) Act, 1979; The Labour (Prohibition & Regulation) Act, 1986 le The Working Journalists and Other Newspapers of Services) Act, 1955 hai an thangsa tiin E. Tomba Singh chun a hril.
AIPMT Candidatehai ta dingin Bandh inthlazal
IMPHAL: All Manipur Written Test Successful Candidates of Police Constables Male, 2013 pawl chun an bandh thaw chu All India PreMedical Test (AIPMT) candidate hai ta dingin an inthlazal thu zanita Manipur Press Club, Imphala press meet an huoihawt huna an hril. An bandh thaw ding an thul naw thu le an thil ngen sukpuitling pek anni hmakhat nuona an la sunzawm pei ding thu Laimayum Nandakishore chun a hril. Hi pawl thil ngen chu Appointment Order pek ding ti a nih. Bandh hin Water Supply, Electricity, Media, Sakhuona thil le emergency thil hai a huomsa naw ding niin an hril.
July 25 a inthawk RIMS OPD hawng nawk
IMPHAL: International Peace and Social Advancement (IPSA) le Teachers and Medical Officers Association, RIMS han inbiekremna an nei thei ta leiin OLD, RIMS khara um chu July 25, 2016 a inthawk ni dang ang bawkin hawng a ni nawk ta ding niin Chingkhei Luwangcha, President, IPSA chun zanita Keishampat, Imphala Chanchinbumihai an hmupui huna a hril.
Officers 1,953 sum hmangna an enfel
IMPHAL: Kum 200102 to 201516 inkar sung khan Officers 1,953 (1,268 Government Officers le Government Office ni lo 685) hai sum hmangna an enfel (audited) bakah State sawrkar hnuoia GroupC le GroupD thawktu 43,326 hai service books an enfel niin Y. Ichamani, Director, Local Fund Audit, Govt. of Manipur chun zanita DIPR Complex, Imphal a press conference huna a hril.
Vai 89 Sekmai PSah an peklut nawk
IMPHAL: Zani 4AM11AM inkar sung khan Dimapur a inthawka Imphal pana hung Interstate Bushai chu JCILPS hmalakna thlawptu han Sekmaiah sukchawlin, lekha pawimaw nei lo Vai (nonlocal) 89 hai chu Bus haia inthawk an intumtir a, hun iemanichen an cheltang hnungin Sekmai Police stationah an peklut nawk.
Written Test result puong
IMPHAL: State Council of Educational Research and Training (SCERT), Manipur hnuoia Accountant, Office Superintendent, Stenographer le LDC sin hai lakna dinga July 17, 2016 a Written test neia um result chu puonglang a ni ta a, result hi SCERT Dirctorate, Imphalah en thei a nih. Written Test a hlawtlinghai le GradeIV (Peon) DIET sin hai lakna dinga shorthand test/typing test/interview/Viva Voce chu July 2527, 2016 inkar sung khin Directorate of SCERT, Lamphelpatah nei ning a tih tiin Director, SCERT, Manipur chun inhriettirna a siem. Interview hi nitin 10:00AM5:00PM inkar sunga nei ni hlak a tih.
Sonia le Rahul han an vailiem
NEW DELHI: Uttar Pradesh Assembly Election hung um ding le inzawma ni 3 sung aw ding election campaign Bus yatra ‘27 Saal UP Behaal’ chu Congress President Sonia Gandhi le Congress Vice President Rahul Gandhi han zanikhan New Delhia inthawk an vailiem. Bus Yatra vailiem naa hin Uttar Pradesh Congress President Raj Babbar le UP Congress Chief Ministerial candidate Ms. Sheila Dikshit le AICC General Secretary (UP), Ghulam Nabi Azad hai khawm an thang. July 29, 2016 khin Rahul Gandhi khawmin Lucknow khawpuiah campaign hi zawm veng a ta, party workers 50,000 hai inhmupui a ta, August 2, 2016 khin Ms Sonia Gandhi chun PM Narendra Modi constituency Varanasi khawpuia road showah thang bawk a tih.
IAF vuongna inhman la hmu lo
NEW DELHI: Zani hmasaa Indian Air Force vuongna AN32 a umna chin hriet lova inhmang chu nasa taka zawng zing a ni a, hi thu ei sut chena hin hmun a ni thu hriet a la ni nawh. Hi vuongnaa hin mi 29 an chuong a, hi laia 6 a sunga thawktu, 11 hai IAF personnel le 2 hai chi Indian Army niin pakhat chu Coast Guard a nih.
Application peklut hun suksei
NEW DELHI: Academic Session 201617 sunga minority studenthai ta dinga postmatric Scholarship hnina lekha (Application form) peklut thei hun (online in) chu August 31, 2016 chena dinga suksei a nih tiin Union Minister of state for Minority Affairs (Independent Charge) Mukhtar Abbas Naqvi chun a hril. Scholarship hnina lekha la pelut lo student an la tam a, ngenna an siem dungzui le studenthai hmakhuo ngainaa application form peklut hun hi suksei a nih tiin Mukhtar Abbas Naqvi chun a hril.
PM in DelhiAgartala BG Train a vailiem ding
AGARTALA: Prime Minister Narendra Modi chun July 31, 2016 khin Delhi le Agartala inkara service ding Broad Gauge Train service New Delhia inthawk vailiem a ta, hi le inruol char hin Railway Minister Suresh Prabhu chun Agartala- Delhi broad gauge Train Agartala hmuna inthawk vailiem ve thung a tih tiin Tripura Transport minister Manik Dey chun reporters hai kuoma a hril. Vailiem ding Rel hi ‘Tripureswari Super Fast Express’ti ning a tih. Chun, Mr Prabhu in India hmarsakbiel (NE) le Bangladesh chena tlung ding Agartala Akhaura railway service thawna ding foundation lung phumna nei bawk a tih.
Corruption caseah IPS Officer man
BHUBANESWAR: Anti Corruption official hai chun IPS Officer TripuraManipur Cadre Joydeep Nayak chu zanikhan Ghaziabad hmuna an man. Mr Joydeep Nayak hi Odisha hmuna SC/ST students le Self Help Groups (SHGs) hai ta dinga computer inchuktirna ding Rs. 88 lakh sukchavainaa inrawlna neia intum a nih. Hi sum sukchavai a ni huna hin Mr Nayak hi deputationa Odisha Police hnuoia Human Rights Protection Cell (HRPC) a um a ni a, ama hi 1991 batch IPS Officer a nih. Zanikhan Uttar Pradesha Ghaziabad chief judicial magistrate court hmaah inlangtir a ni a, Court chun transit remand a phal pek. Cuttack hmuna Computer company kuomah tender thaw loin contract a pek tia intum a nih. Hi thil hi ama thlaktu in HRPC a hung chel hnunga hrietsuok a nih.
India le Bangladesh han inbiekna
NEW DELHI: India le Bangladesh hai chun Home Minister level in July 28, 2016 khin New Dlehiah inbiekna nei an tih. Hi inbieknaa Bangladesh ram palaihai chu an Home Minister Asaduzamman Khan Kamal in inrawi a tih. Bangladesh ram palaihai hi July 27, 2016 in New Delhi hungtlung an ta, ni 3 sung New Delhiah cham an tih. Hi inbieknaa hin rambung pakhni haia inthawka National Security Adviser, Home Secretary, Director General, BSF le Director General Narcotics Control Bureau hai khawm thang an tih. Home Minister level a inbiekna nuhnung tak chu New Delhiah December, 2012 khan nei a ni a, Dhaka hmuna chun January, 2013 khan nei a nih.
Kabula bomb puokah mi 61 an thi
KABUL: Zanikhan Afghanistan khawpui Kabul a mipui pungkhawmna hmuna terrorist han bomb hrat takel an sukpuok a, mi 61 an thi a, midang 207 an hliem niin ei thu dawngna chun a hril. Mipuihai hi an ram power line in a hraw dodalnaa pungkhawm an nih. Power line hi an biel sunga electric pekna ding ni lo, Turkmenistan, Uzbekistan le Tajikistan ram haia electric pekna ding a nih. Power nasa taka an mamaw le tlasam laia ramdanga Power pek dinga hmalakna chu dodala mi sangtel pungkhawma nuorna nei an nih. Hi lai hmuna pungkhawmhai hi Shiite Hazara hnam an nih. ISIS pawl chun bomb hi anni pawl sukpuok niin an hril.
----------------------------------------------------------------------------------------------------------------
VAWISUN THUPUI
Ka hratnawpui loa hratnaw tu am a um a? ka lungril sukna loa sukthluk tu am a um hlak a? Suong ding ka ni rau rau chun ka hrat nawna tieng thilhai a nih ka suong lem ding.~ 2 Korinth 11:2930
Editorial: Japanese Encephalitis
Ei state Manipur a ding khawmin Japanese Encephalitis (JE) natna hri hi natna hri thar a ninaw a, kum tin June le August thla vela ei state a natna hri hung um le hung inleng hlak, ei tuor le ei thawhla hlak natna hri a nih. Health Department, Manipur hril danin tuchena hi natna invawi hrietchienga um ta chu mi 9 an ni a, chuonghai chu Imphal West Districtah 3, Churachandpur districtah 2, Imphal East, Thoubal, Chandel le Ukhrul district haiah pakhat seng a nih. Tuchena JE natna hri invawi la um nawna district hai chu Tamenglong, Bishnupur le Senapati district hai an nih. JE natna hri hi June thla laia inthawka intan ta kha niin Health Department chun a hril. Health Department in JE natna invawi mi 9 hrietchieng nia a hril lai mek hin, ei thu dawngna dang chun mi 12 an tling ta a, naupang pakhat khawm JE natna ni dinga ringhla a damnaw pakhat a thi ta niin a hril.
Iengpo khawm nisien JE natna hri hi ei state sungah an lang ta a ni leiin mipuihai mawphurna chu JE natna hri laka inveng a nih. An veng dan tha tak chu Thokang se lova um a nih. Hi lei hin Thokang se laka inveng chu ei thaw ding makmaw a nih. Tulai hin ei ramah Thokang an tam zuol a, thokanghai hi tui le ran chi tum tum hai le inzawmna nei anni leiin mani in bul sukfai a, thokang intui theina ding tui intlingtir lo ding, mani in bulah ran vai lo ding, taksa, sil le bil hai sukfai ding, fak le dawn fimkhur ding a nih.
JE natna hri inleng leia damnaw ei um ta tlat leiin JE natna hung inlang dan hi ei hriet a pawimaw hle. Ei khawsik a, ei lu a na a, ring le taksa bung hran hran hai a hung na a, taksa a zawi ngawi ngawi a, ei thil duna a hung re chun an rang thei anga Doctor pan le rawn ngei ngei ding a nih. Amiruokchu, a chunga ei hril anga um hai po po JE natna invawi ani vawng chuong nawh ti hriet ding a nih. Tulai hi ei rama JE natna hri inleng lai a ni leiin a chunga hrillanga um hai anga ei um chun Doctor pan a, thisen test tluka tha chu um naw nih. JE natna hri inleng lei ruok hin chu ei lungril sukphawklek naw sienla nuom a um. JE natnaa damnaw ei insungah an lo um ta ruok chun a hrana sie le enkawl ding a nih.
Doctorhai chun JE natna hri hi Thokanghai laia chi khat Culex in an umtir le a sukdar niin an hril. Thokang taphawtin JE natna hri an pai naw a, a paitu bik chu Culex ti anni a, Culex a khawm chi 4 an um a, Manipur a hi natna intluntu le thedartu hai chu Culex Tritaeniorhynchus le Culex Vishnui niin an hril. Hiengang Thokanghai hi tui intlingna, a bikin bu chingna leilet tuiah an um nuom bik niin Doctor han an hril. Hi lei hin Leileta sin thawhai thokang se ding lakah an inveng fimkhur zuol a tul. Chun, leilet bul hnaia cheng mipuihai khawm hmun danga chenghai nek chun an fikhur zuol bik a tul. Thokanghai hi mihai thisen dawk ding zawnga vuong vel anni leiin that rem dan ngaituo ding a ni bawk.
Culex Thokanghai hin Vawk an se a intahwk JE natna hi an thedar thei a nih. JE natna hrik pai thokangin mi a se pha leh JE natna an invawi hlak. Ei state a JE natna hri hung intanna bulpui tak chu ei sa du em em el Vawka inthawk nia hril a nih. Chun, Bawng, Varak, Ar, Beram, Kel etc hai Thokangin an va se a inthawk khawmin JE natna hri hi Thokang han an pai thei bawk. Culex Thokangin an se taphawt natna invawi anni chuong naw a, Manipur a chun mi 301 a se hai laia pakhatin an invawi thei anga sui a nih. JE natna hi mihriem kum 15 le a hnuoitieng han an invawi nuom bik a, an vawi hi 85% ang le kum 60 chin hai lai an vawi umzat chu 15% nia hril a nih.
In bula ei ran Vai haia inthawk JE natna hi ei invawi ni takin an lang. Hi lei hin mihriem chengna bul hnaia ran vai hi chu ei bansan ngam a tul a nih. Ran vai nuomhai chu miriem cheng nawna ramah vai a himin a tha tak awm ie. Kum 1995 khan Manipurah JE natna invawi mi 200 hmusuok an ni a, a hun taka enkawl naw leiin mi 50 zetin an thipui. Kum 2010 khan JE natna invawi mi 100 hmusuok an ni a, hienghai laia 10 in an thipui. JE natna hi khawsikpui natna chikhat a ni a, thluokah a lut pha chun mihriemin an thipui hlak. Hieng a ni lei hin ngaitha chi chu a ni nawh.
