Saikawt Sub­­Division thua thil tul hai sukfel zo a ni tah:SSDC
CCPUR: April 24, 2016 nia Manipur CM O.Ibobi Singh in Saikawt hmuna Saikawt Sub­Divisional Office Complex a lo hawng tah, tuchena hi Sub­Divisional Office la function loa um le inzawmin Saikawt Sub­Division Demand Committee (SSDDC) chun hma an lak zawm pei a, thil tul le pawimaw hai khawm zofel le verification hai khawm thaw zo a nitah tiin SSDDC Chairman Pu Timothy Z Zote a inthawk ei thu dawngna chun a hril.

June 8, 2016 nia Deputy Commissioner, CCPur lekha No. DC(CCP) Estt­Admn./2015/184 fethlenga Commissioner (Revenue) Govt. of Manipur kuoma lekha pek chu July 15, 2015 khan ngaisak a hlaw naw leiin Secretariat ah nuorna SSDC in nuorna a tan ding thu intlun a ni a. Hi thu hi Department chun a lo ngaipawimaw leiin hi ni veka Gazette a suok nawna san a hril a. Chu taka chun Moirang Mantak, tuta Saikawt SDO le inruola file fe Samulamlan SDO huom sunga khuo pakhat chu Tribal khuo a ni chie le ni chie naw hrietchieng a tul leia pending a um a ni thu SSDC thuoituhai a hril a. Hi le inzawm hin DC CCPur in Verification hung thaw sien tia thurawn a siemin DC, CCPur ta dingin Urgent letter No. 30/3/2015­R hmangin Under Secretary, Revenue, Govt. of Manipur chun Chairman, SSDC a hung inchawitir   nghal a.

Hi lekha hi DC, CCPur kuoma pek nghal le,DC, CCPur khawmin verification khawm a thaw zo ta a,  Revenue­ah  peklut a ni zo pha Verirfication expert han enfel an ta, sawiselna dang a um tanaw chun concern minister kuomah pek ning a ta, concern minister in remtina a lo ziek hun hunah Revenue Department­ah thawn nawk a a ta, chu zoah Gazette insuo a hung ni thei ta ding a nih tiin SSDC Chairman chun biel mipui hai hriet dingin a puong. Tawngtaina le sum le paia thangpuina petu hai  chunga Committee chun lawmthu hril nghal bawk.

Sirdena nekchepna,  hmusitna le  kawng tum tuma inlang zing hi Committee chun a theinghil naw a, a bikin lampui (Sugnu Road) Development le a dang dang ngaisak ei ni nawna khawm a hmu zing bawk. A thaw thei sinaw leiin, ‘Lalpa, Saikawt SDO biel huom sung hmangaitu le lunginsietttu ding MLA iengtik am i mi pek ding”? ti chu an dawnna a nih tiin SSDC Chairman chun a hril a. Harsatna ei tuoka inthawk mipui han ngaituona thar le sei tak ei nei a nuom thu a hril bawk.

HLC in lekhabu pahni a ruolin an tlangzar
CCPUR: July 22, 2016, 6:30PM khan Life Cafe, Rengkai Road JJ Plaza, CCPur hmunah Facebook group Hmar Literature Circle chun lekhabu pahni “SINLUNG SERMEI le HIGHLAND MUSINGS”  hai hai tlangzarna an nei. Sinlung Sermei lekhabu hi Prof. Laldena Intoate, Retired Professor le Senior Fellow, Indian Council of Social Science Research nilai in a tlangzar a, Highland Musings ti lekhabu chu Pu Isaac Pakhuongte, Principal, Sielmat Christian Higher Secondary School in a tlangzar.

Hi huna hin Pu Joseph Lalrothang President, HI GHQ; Pi Zosangkim Pudaite, HLS; Pi JL Sawmi President, HWA GHQ; Pu Timothy Z. Zote Editor, Manmasi Digest Magazine haia inthawk thuhril tawi ngaithlak a ni  bakah Nk. Lorinda Varte le Pu James Pakhuongte haiin fekhawm hlain an inawi.
Hun hawng tawngtaina chu Rev. Benjamin Shakum in a nei a, hunkhar malsawm tawngtaina chu Upa Darliensung haiin an nei.

HLC chun HLS lan tuma indin an naw thu le HLC thil tum chu Hmar tawng suk hmasawn a ni thu hai an hril a. Thuhrilna hun hmangtuhai khawmin HLC chu inpakum an ti thu, hmatienga hai tawng sukhmasawntu hung ni pei dinga an ditsakna inhlanin, hienganga ziek le print ngeia lekhabu a siem chu tawng le hnam damna dinga pawimaw tak a ni thuhai uor takin an hril tawl. Lekhabu hai hi ISBN No. nei le insitumlo tak a ni a Rs. 250/­ peia pakhat a zawr a nih. A copy dit le zawr sawng nuom hai chun LRS Puruolte 9856261702 ah ngaiven thei a nih.

Aids& appliances sem ding
CCPUR: People Advance in Social Service (PASS) huoihawtnain July 29, 2016, 11:00AM khin  Bliss Island School campus, New Mata hmunah Disabled hai ta dingin  Aids & Appliances semna um a ta, hi huna hin thlangsuok hai kuomah hmangruo sem ning a tih. Aids and Appliances semna hi Mr Lunminthang Haokip, IAS, DC, CCPur in khuolliena thangin hawng a tih.

Disabled persons hnina la pelut lo hai ta dingin  Disabled Certificates le Passport thlalak 2 chawiin July 23, 2016 chen khin PASS Office, New Mata hmunah hnina peklut thei a la ni thu Secy. PASS chun a hril.

HSA thuoitu han ITI, PHC le SDO/BDO hai an va enfel
CCPUR: HSA State Coordination Committee, Manipur chun HSA CCPur Jt. Hqrts thuoitu haileh thangruolin July 22, 2016 khan Saikawt ITI, Saikawt PHC le Saikawt SDO/BDO hai kanin an va enfel. Kum 1972 a indin tah, building enkai that a ninaw leia a that tawknaw le a tawp zie, hmangruo um hai khawm hlui tak tak an nizie; nitina inchuklaihai kai sia compound sukfai ngailo a ni zie bakah an huonna dai hai khawm hmun tam taka a chim ti an va hmu a, office hour ni sia ITI sunga thawktu pakhat khawm hmu ding an umnaw thu zanita thusuok an siemah an zieklang a. Hiengang institution pawimaw, Union sawrkar hnuoia DGET, Ministry of Labour & Employment hnuoia indin ni sia ngaitha a ni hi HSA SCC, Manipur chun pawi a ti a, tha taka a function theina dingin HSA chun a enthlak zing ta ding thu HSA thusuok chun a hril.

Saikawt PHC chu facility peka um hai khawm tha takin a function a, a se vela cheng han an hlawkpui zuol theina dingin Community Health Centre a hlangkai nita sien an nuom thu an hril.

Saikawt BDO chu Chowkidar ti lo thawktu le kai dang pakhat khawm an um naw a, thla tina hlaw la zing tho siin karkhata vawihni chau office an kai hlak ti an va hmusuok a, sawrkara inthawk infrastructure tha em em tlung  si, thawktu hming zieka um hai hmu ding an umnaw chu HSA SCC, Manipur chun pawi a ti thu; CCPur­Sugnu road siemthatnaa Muolvaiphei VA le civil organisation  danghai hmalaknaa lawmum an ti thu, lampui siemthatnaa cheng nuoi 3 vel seng taa hisap a ni thu hrilin Saikawt MLA le Singngat MLA hai bakah Dongjang, Sangaikot meua um Outer Manipur MP in a ngaitha lei a ni thu hrilin local representative han a thei anga hma an lak vat tul an ti thu hai an thusuok a chun hrilin state sawrkar le representative hai a inthawk an hmalakna nghak mek a nih tiin an hril.

Zogam Hoihnu Open football Tourney
CCPUR: July 25, 2016, 11:30AM khin PT Sports Complex, CCPur­ah Zogam Hoihnu Open Football Tournament opening ceremony um a tih. Hi huna hin  Chief Guest in Mary Tombing, President, Indira Gandhi Institute of Post Graduate Education & Research Centre; Mr K. Ngulkhanthang, Joint Director, (Hort & Soil Cons), Manipur le CL John, Headmaster, Gandhi Memorial High School, Molnom West hai thang an ta, Guest of Honour in  H. Tonglian, Special Contractor le Functional President in Pumshong Hangshing, President, NLYC thang a tih.

1st Rengkai Premier League 2016 Final
CCPUR : 1st Rengkai Premier League 2016 Closing Ceremony ­cum­ Final Match Programme chu July 23, 2016 ;1:30 PM hin Rengkai Playground, CCPur hmun puithu taka hmang ning a ta, 3:00 PM in 1st RPL Final Football Match TMFC v/s Zawlbuk FC in inkhel an tih. Chief Guest in Pu Lalramlien Darngawn, Guest of Honour in Pu Thangchuoilo (Vice President, HYA Rengkai Branch), Functional President in Pu Ramnunsiem @Aren Sanate hai thang an tih.

Hi huna thang ding le inkhel en dingin FAST chun mitin an fiel. Rengkai Premier League thiltum chu “Rejuvenating Rengkhawpui Football”ti a ni a, hi RPL hi FAST in RACC leh thangruola an organise a nih. RPL a hin club/team 12 an suok a, Rengkai khawpuotienga inthawk khawmin player suongum le inlar tak tak an inkhel ve a nih. Football ngaisangna le a hlutna tlangmi hai lai a hung pung hrat hle.

DIC in machine tum tum
CCPUR:  Entrepreneur tiengpanga inhnik mimal le SHGs  hai ta dingin theory chau nil ova practical a inchuk theina dingin DIC, CCPur Office chun machine iemanizat zet an nei tah. Machine an nei hai lai  Lemon Grass herna  ding installation zo a nita a, machine dang hai chu installation thaw zo a la ni nawh.

Sin an zawm tan
CCPUR: Manipur State Power Distribution Company Ltd. hnuoia lak thar H. Thanghinlun, Dy. Manager (Elect); P. Thongkholian, Asst. Manager (Elect) le Thangminlien Haokip, Asst. Manager (Elect) han zanikhan Bijang­a Electricity Department Office­ah an sin ding an hung zawm.

JE vengna damdawi kap
CCPUR:  District Immunization Office (DIO), CCPur a chun Japanese Encephalitis (JE) natna laka invengna damdawi kap a ni a, damdawi inkap nuom mi an tam hle. Zani zantieng 2PM chen khan mi 280 vel JE vengna damdawi kap an nih.

DLCC meeting
CCPUR: July 28, 2016, 1:00PM khin DC, CCPur inrawinain DC Office­a BRGF Resource Centre­ah  District Level Coordination Committee (DLCC) meeting um a ta, District Level Officers (DLOs) hai thang an tih. Hi huna hin August 15, 2016 nia India Independence Day hmang dan ding hriltlang an tih.

Bandh an thlawp ding thu an puong
CCPUR:  All Manipur Written Test Successful Candidate of Police Constable (AMWTSC) Male­2013, CCPur Branch chun zani 11:00AM khan KKL Complex, Hq. Veng, CCPur­ah meeting an nei a. July 23, 2016  zanril­a inthawk July 24, 2016 zanril chen AMWTSM in darkar 24 sung Bandh thaw an tum chu an thlawp thu an puong.

Bandh hin Medical, Water Supply, Electricity, Press/Media, Religious function le emergency thil hai  a huomsa naw ding thu an hril.

IT Sector­ah Manipur chu NE bielah hma thuoitu a nih: P.K. Singh
IMPHAL: Information Technology (IT) Sector­ah Manipur chun nasa takin hma a sawn a, IT Sector­a chun Manipur chu NE bielah hmathuoitu a ni a, Video Conferencing thaw nuom lo um a ni khawma buoipui pek thei an ni ta tiin zanita DIPR Complex, Imphal­a press conference huna P.K. Singh, Commissioner, IT, Manipur chun a hril. Assam leh tekhi chun Manipur chu State chin nisienlakhawm Manipur chu IT tiengpangah thiemna a nei insang a, IT Sector­a chu Manipur chu a chunghnung lem a, IT Park khawm a nei ta a, India hmarsak biela IT park nei hmasa tak  le a umsun chu Manipur a nih tiin N. Deven, Additional Director, IT, Manipur chun P.K. Singh  thuhril hi thlawpin press conference a hin a hril ve.

IT Department, Manipur hmalakna chi tum tum hai laia thenkhat chu, kum 2004 in STPI Imphal Centre indin a nita a, IT Professionals 40 in an enkawl mek. IIIT Manipur indin le July, 2015 a inthawk Computer Science le Electronics & Communication haiah academic session tan a lo ni der tah. DIGIGAL INDIA PROJECT hnuoiah State Data Centre (SDC) indin le 24x7 sung sin a thaw tah. Common Servive Centre (CSC), http://manipur.gov.in thangsain websites hran hran hawng a ni ta bawk. Single network a State Office po po thlungzawm dinga State Wide Area Network indin dinga buoipui mek a ni a, District Hqs. tin le Block HQ 17 hai leh thlungzawm zo der a ni ta a, tuhin EE­District Project buoipui mek a ni a, zo a ni pha chun online in Birth & Death Certificate ,OBC/ SC/ ST Certificate, Income Certificate, Domicile/Residential Certificate etc hailak thei a hung ni ding a nih tiin N. Deven chun a hril bawk.

Manipur Jail­ah intanng 678
IMPHAL: Manipur­a Jail um, a bikin Manipur Central Jail, Imphal le Manipur Central Jail, Sajiwa hai chu tuta hun le inmila siem that mek le lungin intanghai khawm tha taka enkawl an nih. Hieng Central Jail pahni hai hi nuhmei 200 thangsain mi 770 um theina dinga bawl anni a, tuhin intang mi 678 an um a, hienghai lai hin Manipur puotieng mi 200 an thang a, intang pakhat lem chu Saudi Arabia mi a nih. Churachandpur le Chandel haiah District Jail a um bakah Jiribam­ah Sub­Jail pakhat a um a, sienkhawm an tang ding huntawk an um naw leiin hmang lova  um an nih tiin zanita DIPR Complex, Imphal­a press Conference hunah P. Doungel, Addl. DGP (Prisons) chun ahril.

Scholarship a ding Rs. 7 crore sanction nawk ding
IMPHAL: Pu S. Minlianthang Vaiphei, IAS, Director, Tribal Affairs  Hills and SC chun, Scholarship la hmu lo student hai ta dingin sawrkar thlungpuiin Rs.7 crore a hung sanction nawk ding thu zanita KSO/TSA CCPur thuoitu han an van hmupui huna a hril. Sum a hung tlung pha student hai account­ah thunlut seng a ni ding thu  Pu S. Minlianthang Vaiphei chun a hril bawk.

DESAM in bandh thaw lo dingin
IMPHAL: July 24, 2016 khin Imphak khawpui sunga Exam Centre 10 haiah Candidates 5,000 velin All India Pre­Medical Test (AIPMT)/National Eligibility­cum­Entrance Test (NEET)­II an nei ding a ni a. Hi test a thang dinghai hmakhuo ngainain hi test le inruola bandh thaw tumhai chu an bandh thaw tum thul dingin Democratic Students Alliance of Manipur (DESAM) chun ngenna an siem. All Manipur Written Test Successful candidates of Police Constable Male­2013 pawl chun July 23, 2016 zanrila inthawk July 24, 2016 zanril chen Bandh thaw an tum thu zani hmasa khan an puonglang a nih.

July 26 a hearing nei dingin
IMPHAL: JCILPS Convenor hlui Kh. Ratan Wanter a puong a nina thua Kh. Ratan in Manipur High Court­ah hlip dinga hnina a siemna thua final hearing chu July 26, 2016 a nei dingin Manipur High Court Division Bench chun zanikhan a ruot. Hi case le inzawma hearing hmasa tak chu July 19, 2016 khan nei a nih.

Bank Account­ah Aadhar Number
IMPHAL: Tribal Students, Post Matric le Pre­Matric Scholarship hnihai chu an Account Number haiah an Aadhar Card number­hai zieklang sa ngei dingin Directorate of Tribal Affairs, Hills and Scheduled Tribes chun zanikhan inhriettirna an suo. Hi thil thaw lo hai chu an Scholarship peksuok an ninaw ding niin hi Directorate thusuok chun a hril.

JCILPS pawlin Vai 147 an man nawk
IMPHAL: Zanikhan Sekmai Nongthombam hmuna Dimapur a inthawka Imphal pana hung Bus­hai chu JCILPS pawlin an lo sukchawl a, Vai (Non­Local) 124, lekha pawimaw nei kim lo hai chu Bus a inthawk intumtirin an man a, Sekmai Police station­ah an inhlan niin ei thu dawngna chun a hril.

Student 3 khaw hre lovin an tlu
IMPHAL: Zani 1PM vel khan T.T. Higher Secondary School Students han Manpur­ah ILPS hmang ni raw seh tia rally neihai chu Police han hnawtdar tumin an va bei a, Mock bomb an kap khum leia ti le inlauin student 3 khaw hre lovin an tlu a, thenkhat na rak lovin an hliem. Khaw hre lova tlu hai hi RIMS panpui an nih.

Mi 29 chuongna IAF vuongnaAN32 an hmang
NEW DELHI: Indian Air Force (IAF) vuongna AN­32, mi 29 chuongna zanita Tambaram air base, Chennai­a inthawka vuongsuok chu a umna chin hriet lovin an hmang. Hi vuongna hi zani zing dar 8 a Port Blair pana vuongsuok niin zani 11:20 a kha tlung le tum dinga ti a nih. Vuongnaa chuong hai laia a tamlem chu service personnel an ni a, Air Force, Navy le Coast Guard han zawngna sin an thaw mek.

Adhoc teacher hai hlaw 100% a sukpung
SHILLING:  Meghalaya sawrkar chun a state sunga Adhoc­a thawk secondary le higher secondary  Teachers 3,212 hai hlaw chu 100 percent­a sukpung dingin a remtih. Adhoc teacher hai hlaw sukpungna hi notification insuo a nia inthawk hmang tan nghal dinga ti a nih. Hi dungzui hin  Secondary level a adhoc teacher han thlakhata Rs. 10,000 an lak hlak chu Rs. 20,000 hung la tang an ta, Higher Secondary level thawktu han Rs. 12,000 an lak hlak chu  Rs. 24,000 an hung lak ta ding a nih tiin Commissioner and Secretary, Education Department, DP Wahlang chun a hril.

ED in Hooda case an siem khum
NEW DELHI: Enforcement Directorate (ED) chun sum chawkchawrawinaa intumna le inzawmin Haryana Chief Minister hlui Bhupinder Singh Hooda le Associated Journal Limited, National Herald newspaper publisher chungah case an siem. Panchkula hmuna Associated Journal kuoma indiklo taka ram pek a ni huna khan Mr Hooda hi Haryana Urban Development Authority (HUDA) Chairman a nih.

Rel passenger hai ta dingin insurance
NEW DELHI: Indian Railways chun September, 2016 a inthawk khin Rela chuong (passenger) hai ta dingin voluntary passenger insurance scheme tan a tum. Hi dungzui hin Rel­a chuong han sietna tlung leia thina annawleh hliemna tuok pal thila Rs. 10 lakh chen (insurance sum) an hmu theina dingin ticket pakhat peiah Rs. 10 le a chungtieng an peksa ding a nih. Amiruokchu, thaw ngei ngei ding tina a ninaw, a nuom nuom thaw ding (voluntary) a nih. Hi insurance scheme hi pilot basis in online­a booking passenger hai lai tan phawt ning a ta, counter­a ticket inchaw passenger hai kuoma khawm la thaw pei ni dingin ei thu dawngna chun a hril.

Zu thalo dawn leia thi sunghai Rs. 5 lakh seng
LUCKNOW: Uttar Pradesh­a Zu thalo dawn leia mihriem thina tuok chu 44 an tling tah. Uttar Pradesh Chief Minister Akhilesh Yadav chun zu thalo dawn leia thi mi 44 sunghai kuomah zangnadawmna Rs. 5 lakh seng pek dingin a puong. Uttar Pradesh­a Etah Aligang area hmuna Zu thalo dawn leia mi tam takin thina an tuokna le inzawm hin mawphurtu hai chunga action na tak la dingin Mr Akhilesh Yadav chun thuneitu hai an hriettir bawk. Tuchena hin Police chun mi 1,621 an man ta bakah Zu thalo litres 36,121 an man tah.

VAWISUN THUPUI
Hmangaina chu a dawthei a, ngil a nei a, hmangainain a itthik nawh a; hmangaina ama le ama an pak ngai nawh a, a uong nawh a. ­1 Korinth 13:4

Editorial: Sin zawnghai harsatna

Manipur sawrkarin sin lak khapna (ban) a hung hlip a inthawk Manipur sawrkar hnuoia Department hran hran hai chun an Department hnuoia sin ruok chi tum tumlakna dingin inhriettirna an hung insuo ur ur a. Chuong sin ruok hai lakna ding chun Written Exam le Viva Voce hai a fe mek a. Hi thil hi Manipur sawrkar hnuoia sin zawnghai ta ding chun thil lawmum takel a nih. Lawm a um laizingin sin ruok um, interview hun le result insuona chungchang Department tum tum han Notification annawleh information an insuo dan chungchanga hin fel zo nawna a um a, a bikin tlangram district a chenghai ta dingin harsatna namen lo an tlun.

Employment Notification insuo a um hai hin Manipur tlangram district haia Employment Exchange office­hai a hun takah a tlungkim ngai naw leiin sin ruok um thenkhat tlangmi han an hni ve hman ngai nawh. Sin ruok um thenkhat lem hin chu tlangram district hai a tlung ngainaw niin an lang. Tlangmi han hieng sin ruok um thu hi an hriet ve lo khawm a bo bik nawh. Chun, sin ruok um hni thei hun sung hi a tawi taluo a, tlangram kilkhawra cheng sin zawnghai chun an apply hman ngai nawh. Hi lei hin sin ruok um apply thei hun sung hi suksei nisienla nuom a um. Sin zawngna chungchanga hin application form hi District Headquarters tinah lak thei dingin um sienla, exam fee khawm pek thei le Admit Card khawm lak thei ni hlak sienla chu sin zawnghai ta dingin a varzang pha ngei ring a um. Application form le exam fee Imphal kher khera pek ngai le Imphal kher khera Admit Card va lak ngai khawm hi sin zawnghai ta dinga harsatna siemtu a nih.

Manipur sawrkar hnuoia sin ruok um thu, interview hun le interview result  hai hi Imphal Chanchinbu haia chau insuo dinga pek anni hlak a. Imphal Chanchinbu hi mitin lakzo a ni sinaw leiin a bik takin tlangmi sin zawnghai ta dingin harsatna nasa tak an tlun hlak. Hieng a ni lei hin sin ruok um chungchang le interviews hun hai khawm hi tlangram district a um Chanchinbu haia khawm thuneitu  le mawphurtu han insuo hlak hai sienla chu thil tha tak, tlangmi sin zawnghai ta ding chun information chieng taka hriet theina a hung ni ding a nih. Hi thil hi Department tinin hung ngaipawimawhai sienla nuom a um.

Sin zawnghai ta dinga harsatna lien tak intluntu chu Bandh hi a nih. Hi lei hin bandh thaw hai hrim hrim hin exam hun le interview hun le intuok buoi ding hin bandh hi thaw ngainaw hai sienla nuom a um. Chuong a ninaw khawma exam le interview a thang dinghai ta ding khawma bandh hi inthlazal annawleh inhuomsatir ni ngainaw sienla nuom a um. Ei state sunga bandh le economic blockae um ngun taluo leiin sawrkar a sin hmu ding ei thalai tam takin hmu lovin sawrkar sin an chan pha ta a nih. Hi thil hi Manipur mipuihai ta ding chun vangduoina nasa tak le sin channa a nih. Hi lei hin bandh le economic blockade tihai hi chu ei state mipuihai ta ding chun inhmangna le inthanglienna ding daltu lien takel a nih.

Manipur a sin zawng, a bikin tribal­hai  ta dinga harsatna chi tum tum tlung hai hi a hrila hril le ziek seng ding chi a ni nawh. Tribal MLAs le Minister­hai hlak ei boycott bakah hiengang thu hi an lungril ngaituonaah a um ve ngai naw a, hi chungchang hi hril khawm an hril ri ngai nawh. Hiengang hi an ngirhmun a ni leiin tribal mi, sawrkara sin zawnghai ta ding chun a beidawngthlak hle a nih. Hi lei hin hi kawnga hin ATSUM hin thang hung la sa ngei sienla nuom a um. Tribal mi, sawrkar sin zawng han thangpuitu ding le an harsatna hai state sawrkara intlun pektu ding an mamaw takzet a nih.

State sawrkara sin zawnghai chau an  harsain an buoi naw a. Sawrkar thlungpui hnuoia Competititve  Exam­a thanghai khawmin harsatna nasa tak an tuok mek. Staff Selection Commission hnuoia exam laia question leak leia harsatna, result puong a ni hnunga technical error leia result kansel nawk, question leak lei chau a re­exam ni ta lovin exam­ah thil indiklo a um leia re­exam ti dam hi a tam taluo tah. Chun, Online a exam khawm hi ei state­ah internet a tha tawk naw leiin ei state­a inthawka candidate­hai ta ding chun vangduoina a nih. Hiengang thu hai khawm hi ATSUM in hma hung la sienla nuom a um ngei el.


Post a Comment

Powered by Blogger.