BJP Office hawngna le lawmpuina prog: Pawl khatin dang an tum
CCPUR: Vawisun (July 21, 2016), 10:30AM hin (L) Ngurdinglien building, Light House Lane, Churachandpur­ah Churachandpur district BJP Office hawngna le thuoitu thara ruot hai lawmpuina (felicitation) programme nei ning a tih. Churachandpur District BJP Office hi K. Bhabananda Singh, President, BJP Manipur Pradesh in hawng a ta, Pathien kuoma inhlanna Rev. Dousuanthang, MELC in nei a tih. HI programe a hin Th. Chaoba, Convenor, BJP Election Management Committee, Manipur; V. Hangkhanlian, Vice President, BJP Manipur Pradesh le thuoitu dang dang hai thang an tih. Hi programe hi July 20, 2016 a nei dinga ti a ni a, sienkhawm bandh um leiin vawisun (21­7­2016) a nei lem dinga sawn a nih. Mi tuelkhawm hi programme a thang dingin ngaina taka fiel ei nih.

Hieng laizing hin, BJP CCPur President hlui Mr Lhunkhojang Haokip inrawinain senior District BJP member han zani zantieng 2:30PM khan BJP Office, Hmarveng­ah tuolsung chanchinbu reporter hai an inhmupui a, State BJP President le thuoitu hai hrietpuinain CCPur District sungah BJP member/party/pawl pahni han inbiekremna an nei hma chu BJP in Hmarveng­a an office ti lo Office hawng thei a ninaw ding thu Mr Lhunkhojang Haokip chun a hril.

CCPur District­a party sunga pawl pahnia  umna thubuoi chingfel a ninaw chun BJP Office thar hawng ding hi Sr. BJP member hai chun thei  tawp in dang an tih. Vawisun khawm Kangvai area a Tiddim Road junction haia volunteer sie an nih tiin a hril a, vawisuna program hmang ding hi dodal an ta, thil ditumlo a tlung chun District BJP le State BJP in maw phur an tih tiin Mr Lhunkhojang Haokip chun a hril.

Sinlung Sermei le Highland Musings tlangzarna
CCPUR:  July 22, 2016, 6PM­7PM inkar sung khin LIfe Cafe, Rengkai­ah Hmar Literary Circle (HLC) buotsai Sinlung Sermei le Highland Musings tlangzar ning a tih. Sinlung Sermei hi Prof. Laldena Intoate, Retired Professor le Senior Fellow, Indian Council of Social Science Research in tlangzar a ta, Highland Musings hi PU Isaac Pakhuongte, Principal, Sielmat Christian Hr. Sec. School in tlangzar a tih.

Manager in a kaisang
CCPUR:  Miss Jessie Lalhmingmawi Pakhuongte d/o Pu Lalrinlien Pakhuongte, Nehru Marg, CCPur  Union Bank, New Delhi a Assistant Manager sin chel lai chu zanikhan Manager in a kaisang. A kaisangna hi ei chanchinbu chun a lawmpui hle.

Phungkhothang Govt. H/S­ah  Uniform sem
CCPUR:  Mr Kaikhanlian Guite, DI of Schools, CCPur Block chun zani 12:30PM khan Phungkhothang Govt. High School­ah student hai kuomah Free school Uniform a sem. Govt. School­a kai student hai chu an hamthat zie hrilin student hai chu an lekha inchuknaa nasa taka thang la dingin Mr Kaikhanlian Guite chun an fui tawl. Zanita school uniform dawng hi students 530 vel an nih.

CMO rawiin joint meeting nei
CCPUR:  Zani zantieng 2:00PM khan CMO, CCPur inrawinain a Office chamber­ah DFWO, Medical Supdt. Dist. Hospital, TB Officer le District Malaria Officer han joint meeting an nei. Hi huna hin  tulai fur ruotui hung tlak le inzawma viral fever tam chungthu an hriltlang a, mipui hai chu mani  chengna in bul le vel hai bakah mani Vawk vaina hmun hai fai taka sie ding le Khawsik (fever) an um chun an rang thei anga Health Centre/Doctor pan dingin mipui hai an inhriettir.

National Highway Sugnu Lampui siemna sunzawm  
CCPUR: National Highway Sugnu road Muolvaiphei khaw sung lampui siemna chu sunzawm zing a ni a, lampui siemna sin hi ni 6 sung thaw a ni taa, tuchena hin lampui siemthatna dinga sum seng Rs. 1.20 lakh vel a tling tah. Zanikhan Single Balu pha a ni ta leiin motor chin hai khawm tha taka an tlan thei ta beisei a ni a, Muolvaiphei khaw mipui chun lampui pangngai anga a that hma chu siem sunzawm pei an tum niin VA hai chun an hril. Chun, July 21, 2016 hin lampui siemthatna dingin hi lampuia inlawn motor hai kuoma batch lo zawr an tum.

Hienglaizing hin zanikhan Maj. S.Sreekant, Bravo Company Commander, 7th AR Khengjang Station­a um hai chun Chanchinbua an lo hmu leiin iem thaw thei an nei ti a hmuna enfelna an hung nei a, sinthaw hai thingpui dawnna dingin Rs. 2000 an pek bakah Headquarters tienga inthawk thaw thei an nei am an hung enkai ding thu an hril.

Lampui siemna hi Hmar Inpui President Pu Joseph Lalrothang, Pu Hrila, MDC; Upa Laldawnlien Varte, President HYA GHQ hai khawma a hmuna an lo va enfel ta bakah Pu N. Guite, EE/PWD CCPur division le Pu S. Samzalian EE­II PWD hai khawmin anlo va enfel ta a, lampui siemthatnaa hmang dingin Rs. 11,000/­ VA hai kutah an lo pek ta bakah HWA Muolvaiphei Unit khawmin zanikhan Rs. 10,000/­ Muolvaiphei VA kuta an pek. Anni baka hin mimal le Institution ang khawmin thangpuina pek a nih.

Sielmat EFCI Nuhmei Pawl in bazar
CCPUR: Sielmat EFCI Nuhmei pawl chun Church Building project a dingin July 23, 2016 (Inrinni) khin Sielmat kawtsuoah Market siem an tih. Hi huna hin secondhand thuomhnaw bakah Bawngsa chartang le hmepawk hai zawr an tih. Mitin rawngbawlnaa ngaia va dawr dingin Sielmat EFCI Nuhmei Pawl chun fielna an siem.

Awareness on JE­cum­JE Vaccination
CCPUR: District Health Society, CCPur huoihawtnain zani 11AM khan Siden khuoah One Day Awareness Campaign on JE­cum­JE Vaccination prog. hmang a nih. Hi huna hin Dr Belamy in Japanese Encephalitis (JE) natna laka inveng dan ding hrilhrietna a nei a, Nurses le Medical team han JE damdawi kapna an nei bawk. Zantieng 2PM chen khan mi 250 hai JE dangna damdawi kap a nih.

K. Upendra Singh ruong a hungtlung
IMPHAL:  July 18, 2016 a Bihar state a Aurangabad District sunga Dumari Nala hmuna CRPF le Maoist helpawlhai inkaptuonaa thi CRPF Head Constable K. Upendra Singh, s/o K. Maniyaima of Heirok Part­II Maning Leikai ruong chu Tulihal Airport, Imphal a hungtlung. Sunna hunserah Dy. CM Gaikhangam, Rural Devpt. & Panchayati  Raj Minister M. Okendro Singh, DGP L.M. Khaute le Principal Secretary (Home), Dr J. Suresh Babu hai an thang. Sunna husner zoah a ruong hi an in tieng panpui a nih.

September­ah Thoubal Project hawng ding
IMPHAL:  Thoubal Multipurpose Project thawna sin chu zo fel ang a ni ta a, tuta la bak chu hi Dam chung black topping thaw chau a ni tah. Hungtlung ding September, 2016 khin hawng ni tang a tih tiin G. Robindro Sharma, Chief Engineer, Irrigation & Flood Control Department (IFCD) chun zanita DIPR Complex, Imphal­a Press Conference huna a hril. Hi Dam siemna dinga sum hmang dinga riruong chu Rs. 1694.27 crore (Revised estimate cost) a nih tiin a hril bawk.

Cable TV Digitization Workshop
IMPHAL: Zanikhan Ministry of Information & Broadcasting, Govt. of India huoihawtnain Hotel Classic Grande, Chingmeirong, Imphal­ah Cable TV Digitization Workshop nei a nih. Hi workshop hi NE biel pumpui huopa Nodal Officer­hai ta dinga huoihawt a ni a, sienkhawm Manipur le Nagaland a mihai chau an thang. Cable TV Digitization hi Phase ­IV a the a ni a, Phase­IV na hi December 31, 2016 (deadline) chen ding a nih. Manipur chu phase ­IV naa thang a nih.

Kum 10 sungin 4376.139 Km siemthat
IMPHAL: Kum 10 liemta sung khan Public Works Department (PWD), Manipur chun lamlien 4376.139 km. a sei siemthain a suklien tiin zanita DIPR Complex, Imphal­a Press Conference huna M. Lokendro Singh, Chief Engineer, Manipur chun a hril.

College Lecturer inkhai hlum sain
IMPHAL: CI College, Bishnupur a Associate Professor sin chel lai le All Manipur Table Tennis Association­a Executive member Phanjoubam Ramesh Chandra (55)  of Wangkhei Meihoubam Leikai chu July 19, 2016 zantieng dar 4 vel khan All Manipur Table Tennis Association Office, D.M. College campus a Ceiling Fan­ah inkhaihlum saa hmu a nih. A thi dan hi ringhla a ni leiin Police han an suizui mek. Forensic Team khawma a ruong lakthlak a ni hmain thil umdan a hmuna an va enfel.

Admit Card lak thei ding
IMPHAL: June 12, 2016­July `16, 2016 inkar sunga Manipur Rifles a Rifleman sin lakna ding le inzawma MPTC, Pangei­a Physical Efficiency Test (PET) neia um a hlawtlinghai chu mani thlalak passport size copy 2 chawia 2nd Manipur Rifles Ground, Imphal Pavilion a in report le Written Test  a thangna ding Admit Card 9AM­-4PM inkar sunga va la dingin Chairman, DPC for Direct Recruitment of Rifleman (MR), 2016 chun inhriettirna a siem. CCPur, Chandel, Senapati,  Tamenglong le Ukhrul district haia inthawka candidate hai ta dingin Admit Card lak hun hi July 22, & 23, 2016 a ni a. Thoubal le Bishnupur district hai ta dingin July 26, 2016 le Candidate danghai ta dingin July 26, 2016 haia Admit Card hi lak thei ning a tih.

Bawng vun inhlip thuin Parliament-ah inselbuoina an tlun; UP BJP Vice President ban
NEW DELHI: July 11, 2016 a Gujarat State sunga Una Bawng thisa vun inhlipna le inzawma Dalit mi 4 nunrawng tak le hmusit taka mipui hmaa sawisak le vuok an nina thu chun zanikhan Parliament (Lok Sabha le Rajya Sabha) haiah sawrkarna cheltu le Selkaltu Pawl member­hai lai inselna nasa tak an tlun a, Inpui pahnihai chu rorel hlei thei lova vel tam sukchawl an nih. Congress TMC, BJD le Left parties han Question hour laia hi thu hi hriltlang an phut a, sienkhawm Lok Sabha Speaker Ms Sumitra Mahajan le Rajya Sabha Chairman Md. Hamid Ansari han Zerou Hour a hriltlang ni raw seh tia an remtinaw leia inselna nasa tak le inkhek khumna hai chen a tlung a nih.

Union Home Minister Rajnath Singh chun hi thil tlunga inrawl mi 9 man anni ta bakah hi thil tlung le inzawma an sin thaw ding thaw lo a intum Police Officers 4 an sin haia inthawk suspended anni ta a, vuok le sawisak hrepa um Dalit mi 4 hai khawm sawmdawlna Rs. 1,00,000 seng pek ning an tih tiin zanikhan Lok Sabha hmuna a hril.

Uttar Pradesh BJP Vice President Daya Shankar Singh in Bahujan Samaj Party (BSP) thuoitu lu tak Mayawati hi “Nawchizawr neka thanaw lem a nih” tia tawngbau a nei khumna thu chun hril a hlaw hle a, BJP khawma hi tawngbau hi tha an tinaw leiin zanikhan Dayashankar Singh chu BJP Uttar Pradesh Vice President a ninaa inthawk an ban. Inpui pahni haia khawm hi thu hin dem le sawisel a hlaw hle.

LS­ah Bills 2 le RS­ah Bill 1 passed
NEW DELHI: Zani hmasa zan khan Lok Sabha chun Bills pahni, The Indian Medical Council (Amendment) Bill, 2016 le The Dentists (Amendment) Bill, 2016 hai a passed a, Rajya Sabha in The Child Labour (Prohibition and Regulation) Amendment Bill, 2016 a passed. IMC le Dentists Bill hai dungzui hin kum thara inthawk MBBS le BDS inchuk ding thlangsuokna dingah National Eligibility­cum­Entrance Test (NEET) hmang tan a ni ta ding a nih. Child Labor Bill dungzui hin kum 14 le a hnuoitieng hai chu, insung thil le inzawm a ni ngawt naw chun sin inthawtir annawleh thawkna pek khap le phallo a nita ding a nih.

Lok Sabha­ah IITs 6 le ISM indinna ding bill
NEW DELHI: Lok Sabha a chun IIT Act hnuoia IITs 6 le Indian School of Mines (ISM), Dhanbad indinna ding Bill zanikhan Human Resource Development minister Prakash Javadekar in a phar. Hi baka hin Mr Javadekar chun National Institutes of Technolgy, Science Education and Research (Amendment) Bill, 2016 khawm zanikhan Lok Sabha­ah a phar bawk. Hi bill hi National Institutes of Technology, Science Education and Research Act of 2007 siemthat le Andhra Pradesh­a NIT indinna ding a nih.

Pema Khandu in hratna a chang
ITANAGAR:  Arunachal Pradesh Governor Tathagata Roy in Assembly­a majority a command le command­naw inentir dinga an hriettir angin Arunachal Pradesh CM Pema Khandu zanikhan  Assembly­ah majority a command le command­naw an entir a, Congress MLA 44 le Independent MLA 2 han ama thlawp zawnga vote pein hratna a chang. Ama kal zawngin Opposition BJP MLA 11 han vote an pek.

India in NPT sign naw nih: Sushma Swaraj
NEW DELHI: External Affairs Minister Ms Sushma Swaraj chun, New Delhi in Non Proliferation Treaty (NPT) sign naw nih tiin zanita Lok Sabha hmuna indawnna dawnin a hril. Omdoa om Nuclear Suppliers Group (NSG) member ni tuma hma a lak meknaah China in India chu NPT signatory a ninaw leiin NSG member ni theinaw nih tia a dodal tlat le inzawma indawnna dawna Ms Sushma Swaraj in a hril a nih. China in a dodal hi a ni ding hrim a nih tiin a hril. India in NSG member ni a tumna hi member rambung tamlem chun an thlawp ta a, tuhin China le rambung thenkhat chauin an dodal ta a nih.

Nikum khan NGOs 10,000 foreign aid suktawp
NEW DELHI: Foreign Contributions Regulation Act an bawsiet le zawmnaw leiin kum 4 liemta sung khan India rama NGOs 14,222 hai chu ramdang sum (foreign funding) an hmu suktawp pek a ni a, hi laia NGOs 10,020 hai chu kum 2015 sunga kha suktawp pek an nih tiin minister of state for Home Kiren Rijiju chun ziekin zanikhan Lok Sabha an hreittir. Tukum sung chu NGO pakhat chau foreign sum dawng suktawp pek a la nih tiin a hril.

VAWISUN THUPUI
Mi tin an chunga roreltuhai thu thuin um raw se. Pathien thu loin tukhawm roreltu an um ngai si nawh a; roreltua umhai chu Pathien ruot an nih. ­ Rom 13:1

Editorial: Boruok pawrche

Mihriem hriselna dinga pawimaw em em hai laia pakhat chu boruok thienghlim a nih. Boruokah  natna hri chi tum tum an leng vel leiin ei hriselna dingin boruok thienghlim ei mamaw a, hi lei hin boruok thienghlim ei nei a, ei hiplut thei zing dan ding ei ngaipawimaw hle a tul a nih. Kum 30 vel  liemtaa Churachandpur town boruok le tulai boruok chu nasa takin anthlau ta a nih. Hi thil hi Global Warming lei chau ni lovin changkangna le hmasawnna hai hung rasuok ve pakhat a nih. Mihriem, inlirthei le khawl chi tum tum ei hmasawnna leiin a hung pung pei a, ei boruok hi a hung pawrche pei a, hmasawnna le changkangna hai leh inzawmna nei anni ve tlat leiin ei khawpui boruok hi tuta neka nasa lemin a la hung pawrche pei ding a nih. Hi lei hin boruok pawrche zuol pei ding ei suknep a tul a, chu ding chun sawrkar le mipui ei thangruol that a tul a nih.

Khawpui lienhai ang hiel khawpin ei khawpui boruok hi la pawrche ve naw sienkhawm tuta anga control tum lova a fe pei chun ei khawpui boruok hi tuorhla um khawpin a la hung pawrche ve ding a nih ti chu a chieng sa a nih. Hi lei hin boruok pawrche hi dang hmak thei naw inlakhawm a suknep le boruok thienghlim ei nei theina dinga hma ei lak chu makmawa ei thaw ding a nih. Ei khawpui sunga boruok sukpawrchetu tak chu inlirthei khu, Cement khu, motor workshop khu le thil rawna khu an la ni deu tak. Hi lei hin sawrkar tienga thuneitu han inlirthei hlui taluo hi chu khawpui sunga tlan theina permit pe tanaw hai sienla, motor workshop le cement dawrhai po po hi khawpui puotieng insawndawk tir hai sienla nuom a um hle.

Khawpui sung boruok sukpawrche theitu dang  thenkhat hai chu ran that, boruok sukpawrche thei ding dawr siem le hmunhnawk pei fimkhur lo hai hi an nih. Sa hi ei du seng a, a bova um thei lo, ei nitin fak le dawna ei hmang pawimaw an nih. Sa hi du hlein ei nitin fak le dawnah pawimaw le mamaw nisienkhawm a sawngbawl danah ei fimkhur hle a tul. Sa zawrhai hrim hrimin ran thatna hmun le sa zawrna hmun hi a hran ve ve a an nei hi a tul a nih. Hi lei hin Arsa zawrhai thangsain ran thatna hmun hi chu khawpui puotieng sie nisienla, sa zawr ruok chu khawpui sunga khawm phal nisienla thiltha tak a hung ni ring a um. Khawpui sunga ran that hin khawpui sung boruok rim a suksiet el chau ni lovin khawpui sung nasa takin a suktawp a nih.

Ei state sawrkar chun khawpui sung boruok pawrche enkaitu ding le control­tu dingin Manipur Pollution Control Board (MPCB) hlaw nei le thuneina neiin an din a. Amiruokchu, MPCB hin an sin le mawphurna hi an ngaisak nawin an thaw ngai bek naw leiin mipui hriet an hlaw naw hle. Hi lei hin ei state sawrkar hin MPCB hi a sin ding le a mawphurna thaw ngei dingin hung tuoi thar sienla nuom a um. MPCB hin khawpui sunga hmunhnawk sawngbawl dan, hospital, medical clinic le Nursing Home hran hran thli le hmunnawk sawngbawl dan, inlirthei khu le khu dang dang sawngbawl dan ding enfelin hma hung la tan sienla mipui lawm hleng an tih. Mipui tiengpang khawmin MPCB hmalakna chu thlawpin mani thangpui thei dan danin lo thangpui inla nuom a um, chu chu khuo le tui tha hai mawphurna a nih.

A bikin Hospital, clinic le Nursing Home thli le hmunhnawk sawngbawl dana hin MPCB hin rawtna le remruotna hung siem sienla, dan um sa khau takin hung hmang sienla nuom a um. Hospital, Clinic le Nursing Home hai hmunhnawk tam tak hi chu a dehawnna pangngaia pei chi ni lo, a rawa raw hmang chi le a phuma phum hmang chi an nih. Dan ang chun hiengang damdawi in khum 50 chin  umna Hospital, Clinic le Nursing Home hai chun hmunhnawk rawna Incinerator an nei ding ti a nih. Amiruokchu, ei state Manipur a chun hi thil hi zui le hmang ve a la ninaw niin an lang. Ei state sawrkar hin a thaw ding a la thaw lo hi a tam hle.

Hieng damdawiin chi hran hran hai hmunhnawk (bio­hazardous) hai hi tuchen hin hmunhnawk dehawnna pangngaiah a la pei zing a. A bikin damdawiin hmunhnawk thenkhat hi chu natna hrik kawltu anni leiin a dehawnna kawngah hin fimkhur a ngai zuol. Thuneituhai khawmin mipui himna ngaituo a, a peihmang annawleh a hrehmangna kawngah hin an fimkhur a, an ngaipawimaw hle a tul takzet a nih. Tuta ei hmunhnawk dehawn dan ang hin chu ei vadunghai hi a thienghim naw chau ni lovin mipui ta dingin a him naw a, tium ni thei dingin an lang. Hmunhnawk dehawnna le boruok pawrche kawnga ei hmalak dan hi ei siem that chu a tul a nih.

Post a Comment

Powered by Blogger.