Responsive Ad Slot

Hmasawnna Thar | 12 July, 2016

Tuesday, July 12, 2016

/ Published by VIRTHLI
HKI thuoitu han rawngbawlna le tawngtaipekna an zu nei
SIPUIKAWN (HMARKHAWPUI): Hmarram Kohran Inzawmkhawm (HKI) thuoituhai chun July 10, 2016 khan Sipuikawn (Hmarkhawpui) an zu sir a, HKI thiltum hrilhrietna, Pathien thu taka rawngbawlna le sawrkar building bawl meka um hai an hmatienga zo le mipui han an sawr vat thei ding ditnain tawngtaipekna hai an zu nei.



Pu Rosang V/A Chairman, Hmar khawpui inrawinain a hmun ngeia zu sirin, contractor, building bawltu, sinthawhai, Bieltu MLA hai ta dinga tawngtai pekna hun hmang a ni bakah HKI thil tum hai  mipui hai hrilhrietna an nei a. Khawtlang thuoitu, Kohran thuoituhai le mipui a tuelkhawm sinthawna sukbuoi zawnga um lo ding le an hmatienga zofel ani theina dinga thlawp le thangpui seng dingin HKI thuoituhai chun an ngen a. Public properties hrim hrim hnam hmelma anga ngai an ni hlak thu le duot taka enkawl le venghimtuhai chu mi han malsawmna an inkhum hlak zie uor takin an hril.

Hmarkhawpui (Sipuikawn) a building a then bawlzo le thenkhat bawl mek an ni a. PHC building chu bawlthat zo a nita a, Tourist Lodge building bawl zo tep a nita bakah Power Sub-­Station chu bawl tan mek a nih. – (input: Lalnunthang Songate)

Movement hi nuom ela tawpsan thei ding a ni nawh: Romeo Hmar
CCPUR: Zanikhan District Hospital, CCPur Morgue­ah Nuhmei Pawl le ATML han Mr Romeo Hmar,  Convenor, MTFD inpawlpuina an nei. Hi huna Mr Romeo Hmar in thu a hrilnaah, Tribal movement fe mek hi tuela chawlsan tumna a um naw a, nuom ela tawpsan thei ding chi khawm a ni nawh tiin a hril.

Sum­le­pai­a inchawk thei a ninaw thu hrilin Manipur Assembly Election kum 2017 a hung um dingah mipui han mani vote hlu tak sum le pai ditna leia vote zawr nawk ta lo a, Tribal mipui hai ta ding le tlangmi hai ta dinga hma la ngamtu ding hai chau vote pe dingin mipui hai a ngen.


Tuta Tribal movement ei fepui mek hi chawlsan el thei a ni tanaw a, MTFD khawmin Central level­ah a thaw thei chin a thaw a, JAC­AATB, Tribal Union le a dang dang hai khawmin mani theina zawng sengah ei thaw a nih. Hi lei hin ei movement hi inhmaw thet thuta fepui a tul naw a, damtea ei fepui a pawimaw tiin a hril bawk.

Mr Romeo Hmar le Nuhmei Pawl hai chun Police Station­ah OC, CCPur Police station khawm an inhmupui a, Tribal martyrs hai le inzawma case iengchen am a fe, progress a um am ti an indawn a,  OC chun case pending a um mek a ni thu a lo hril.

Hmun tam lema semzo
CCPUR: CHC, PHC le PHSC hnuoia khuo le veng tum tuma Long Lasting Insecticide Net (LLIN) semna chu hmun tamlema sem zo a nitah tiin Dr Liankhawjam Guite, DMO. CCPur chun a hril.   Town area hnuoia LLIN sem dingin ASHA Worker le department staff han LLIN zanikhan an laksuok tiin a hril.

NIU­-ah Asst. Professor sin a hmu
CCPUR/NEW DELHI: Nk. Rebek Lalmalsawm Khobung, d/o C. Thant Khobung of Dwarka, Delhi chun Noida International University (NIU) ah Assistant Professor (Sociology) sin a hmu thar. A sin thar hi August thla bul khin zawm a tih. A hlawtlingna ei chanchinbu chun a lawmpui hle. (Foxjournal)

Court rel angin Jail­a thun
CCPUR:  July 5, 2016 nia Khawpuibung le L.Lhangjol khaw inkar­a nuhmei kum 14 mi suollui tum bakah that a tum tia intumna le inzawma man Pauminlian Hangluah (19) s/o H. Ginlal of New Zouveng chu zanikhan Police han Chief Judicial Magistrate (CJM), CCPur hmaah an inlangtir a, Court in a rel angin zanikhan Police han Jail­ah an va thun tah. Police chun hi thua hin FIR No.l3 (7) 2016 WPS­CCP U/s 307/354/511 IPC an registered a nih.

Intensified Diarrhoea Control Fortnight
CCPUR: Mr TK. Simte, MCS, AC to DC, CCPur chun July 11, 2016, 11:00AM khan CMO Mini Conference Hall­ah Intensified Diarrhoea Control Fortnight (July 11­23, 2016) official in a hawng.


Mr T.K. Simte chun, tulai tulai boruok inthlakthleng le fur ruotui tlak leiin naupang le puitling hai lai sungkhaw (diarrhoea) a tam hle thu hrilin Medical Department hai chu tha taka hma hung la dingin a ngen.

July 20 chena result puonglang dingin
CCPUR: All Manipur Written Test Successful Candidates of Police Constable Male, 2013 chun July 10, 2016 khan KKL Complex, IB Road, CCPur­ah Joint meeting an nei a, an biel senga MLA­hai chu hma an lakpui theina dinga memorandum pek seng ding, CM le July 4, 2016 a an inbieknaah August, 2016 thla sunga result insuo dingin thu tiem sienkhawm July 20, 2016  chena result puong a ninaw  leh nuorna chi hran hran thaw tan dingin thutlukna an siem niin All Manipur Written Test Successful  Candidates of Police Constable Male­2013, CCPur branch chun July 10, 2016 khan thusuok an siem.

Cabinet in an ngaituo ding
IMPHAL: JCILPS Women Wing thuoitu han zanikhan CM O.Ibobi Sing an inhmupui a, JCILPS Convenor hlui Khomdram Ratan state sawrkarin Wanted­a a puongna chu hlip dingin an ngen. Court procedure zo a ni pha leh an thil ngen hi state Cabinet meeting in la ngaituong a tih tiin CM in thu a mi tiem tiin L. Nganbi, JCILPS Women Wing Convenor chun CM an inhmupui zova reporter­hai an hmupui huna a hril.

NEC Secretary in a hawng
IMPHAL: North Eastern Council (NEC) Fund hmanga Manipur University a hostel pahni bawlna ding lungphum zanikhan Ram Muivah, Secretary, NEC in a hawng. Manipur University ah students 3000 vel an um a, students 500 vel chau inlengna hostel a la um chu a ngaipawimaw hle leia hostel pahni bawlna dinga thang a hung lak a ni thu le NEC Secretary sin a chela inthawk a hma nekin NEC a inthawk ei state Manipur in fund tam lem a dawng thei pha thu Ram Muivah chun a hril.

District Hqrts tinah Industrial Estate
IMPHAL:  Manipur state sunga District 9 um hai laia District Headquarters tinah State sawrkar chun Industrial Estate indin a tum. Manipur chu Handloom tiengpangah ei thaw hlawk hle a, India rama handloom thawsuok 100 ah 50 chuong hi Manipur­a inthawka thawsuok a nih tiin zanita DIPR­Imphal­a press conference hunah Department of Commerce and Industries­a lukhaituhai chun an hril.

Dr L. Trinity Meitei suspended
IMPHAL: RIMS thuneitu han zanikhan Thokchom Kheroda thina le inzawmin Dr L. Trinity Meitei chu a sina intahwk a suspended. July 6, 2016 khan Thokchom Kheroda of Khurai Sajor Leikai hi a nau neina le inzawmin a thi a nih. Dr L. Trinity Meitei  a sina inthawk suspended a ni ta leiin Kheroda thina le inzawma JAC indina um chun vawisun hin a ruong lak a, an hnam dan a hrehmang an remtih. Doctor hi a sin a ngaitha taluo tia intumin Khurai mipui chun hrem an phut a nih.

Ex­-Servicemen helpline hawng
IMPHAL: Sipai pension tahai ta dingin Red Shield Division chun Station Headquarters, Leimakhong­ah Ex­Servicemen Helpline/Grievance Cell a hawng a, 24x7 sung contact numbers 8730020280 (Airtel) le 9402992662 haiah biekpaw thei ning a tih. Chun, Thawtanni a inthawk Inrinni chen, zing dar 9 a inthawk zantieng 2PM chenin Grievance Cell/Helpline ah hin mani harsatna le pawimaw hai intlun thei a nih tiin PIB, Defence Wing thusuok chun a hril.

HDFC Bank suomtu mi 4 an inpe nawk
IMPHAL: July 4, 2016 zantieng dar 5 vela HDFC Bank, Thoubal Branch suoma a umna le inzawmin Bank suomnaa thang mi 4 hai chu July 10, 2016 khan Thoubal District Police hnuoia Special Investigation Team kutah an inpe nawk. Hieng mi 4 haia inthawk hin pawisafai Rs. 25 lakh le rangkachak Rs. 20 lakh hu hmukir nawk a nih. Inpe mi 4 hai laia pakhat chu kum 17 mi, kum tlinglo a la ni a, midang 3 hai chu­ Laishram Jeyenta (24) s/o L. Manimacha of Charangpat Mayai Leikai, Nahakpam Atong @ Ramesh (21) s/o N. Nongban of Charangpat Maning Leikai le Thiyam Inaobi of Charangpat Mayai Leikai hai an nih. Jayenta le Munal hai hi VDF nia hril an nih.

PET nei hun ding
IMPHAL: Manipur Police Department hnuoia direct recruitment fe meka Follower (male) PET la thang lo hai ta dinga PET nei hun ding ruot thar nawk a nih. Jiribam, Ukhrul le Tamenglong district a candidate hai ta dingin July 13, 2016; CCPur district hai ta dingin July 14­15, 2016; Chandel le Senapati district July 16, 2016;  Imphal East district July 18& 19, 2016; Thoubal district July 20­21, 2016; Imphal West July 22, 2016 le Bisunupur district July 23, 2016 ning a tih.

KCP(MC) cadre pakhat man
IMPHAL: Imphal East District Police chun zani hmasa zingkar khan Yourabung Maning Leikai­ah  KCP(MC) cadre Telem Birjit Singh (47), s/o T Nilachandra Singh of Yorbung Maning Leikai an man a, a kuta inthawk document thenkhat mansa a nih tiin PRO Police Department thusuok chun a hril.

India le Kenya han defence, tourism, Agriculture le trade tienga thangruol dingin inremna an ziek
NAIROBI:  Zanikhan India le Kenya ramhai chun Defence, Tourism, Agriculture le Trade tienga thangruol dingin inremna an ziek. Chun, Space technology le Defence tienga a thei le a remchang ang peia inthangpuituo dingin Memorandumof Understanding (MoU) an ziek bawk. Space Technolgy le defence tieng thil haiah training, hmangruo le hydrology an inpektuo ding a nih. Agreements chi hran hran le MoU an ziek huna hin India PM Narendra Modi le Kenya President Uhuru Kenyatta hai an thang ve.

India chun Kenya ram chu power transmission project a dingin a pung tlawmin dollar maktaduoi 60 a pek ding thu, Cancer natna enkawlna khawl BHABATROM a pek ding thu, Health care system tienga a thangpui ding thu le thil dang danga a thangpui ding thu Narendra modi chun Kenya President kuoma a hril. Rambung pahni thuoituhai hin helpawlhai tukdawlna kawnga thangruol an remti ve ve bawk. Hnam le vun rawng thua inthlierhranna khawm dotlang tha an tih.

Kenya President Uhuru Kenyatta chun, India in AIDS invawihai enkawlna ding damdawi a thlawna a pek tumna, an rama quality education a hung um theina dinga a thangpuina, textile le banking tieng haia dinga dollar mataduoi 45 an puktir ding lei, an ram mi damnaw tam tak India rama hospital tum tum haia enkawl an nina thu, damdawi siemna tieng le thil dang dang haia India in a thangpuina leiin Modi kuomah an ram mipui aiawin lawmthu a hril.

Modi hin Kenya ramah a thaw ding a zo hnungin Kenya ram suoksanin New Delhi a hung suoksan ta ding a nih.

Amit Shah in July 13­ah official in NEDA a hawng ding
SHILLONG: North East Democratic Alliance (NEDA) official launch function chu July 13, 2016 khin Guwahati hmuna nei ning a ta, BJP National President Amit Shah chun NEDA hi hawng a tih, hi huna hin senior central ministers dang dang hai khawm thang an tih.

Assam Assembly Election, 2016 a BJP in hratna an chang hnung May 24, 2016 a kha BJP hmalakna le non­ Congress political parties hai thlawpnaa NEDA hi indina lo um a nih. NEDA thiltum chu India hmarsak biel (North East) a Congress party hluodawk, Assembly le Lok Sabha election hung um ding haiah Congress party thangloa regional le party dang dang hai thangruola hratna chang a, Congress thanglo sawrkarna siem a nih.

NEDA meeting hmasa tak hi June 22, 2016 khan Guwahati hmuna nei a ni a, hi huna official launching program hi July 13, 2016 nia nei dinga rel le hi huna action plan siem dinga an lo rel a nih.

Assam Cabinet minister Himanta Biswa Sarma inrawinaa NEDA meeting hmasa taka khan Mizo National Front, Peoples’ Party of Arunachal, Asom Gana Parishad, Bodoland People’s Front le  Indigenous Peoples Front of Tripura bakah Meghalaya a inthawk UDP le NPP hai khawm an thang a nih.

Jail­a intang a tlansuok
AIZAWL:  Tuolthatna thubuoi le inzawma Aizawl Central Jail­a intang mek Lalrindika (26) of West Lundar chu July 9, 2016, 8:30AM vel khan Jail­a inthawk a tlansuok. Mr Lalrindika hi Jail inhuonna bang lawnkaia Jail­a inthawka tlansuok nia hril a nih. Mr Lalrindika hi a unaupa (cousin) a kap hlum leia tukum kum bul laia kha man le Court­a a chungthu rel lai mek a nih. Ama hi mi ngo tieng, ft. 5.5 vela dung insang, a ban vawitieng panga tattoo insut, a vawitieng mitko ah ser um a nih. Police chun mankir ngei tumin hma an lak mek.

Ui le a sa zawr khap tumna
KOHIMA: Nagaland sawrkar chun an state sungah Ui (live dog) le a sa zawr khap tumin hma a lak tan. Obangla Jamir, Joint Secretary chun hi thu le inzawm hin Joint Director, Directorate of Municipal Affairs, Govt. of Nagaland chu Order insuo dingin a hril. Chun, May 3, 2016 khan A. Zanbema Ngullie, Joint Director & Head of Department, Municipal Affairs Department, Govt. of Nagaland chun a state a Municipal le Town Council haia Administrators 23 hai chu lekha a thawn a, direct­a khapna order insuo si lovin Joint Secretary lekhathawn a kilde sa. Nagaland mihai sa du tak chu Uisa a ni a, iem a hung ang ding chu! Asam state  advocate, N.M. Kapadira in Nagaland sawrkar kuomah legal notice a pek leia hi thil hi hung um pha a nih.

Arunachal Governor sin a chelsa
ITANAGAR: Arunachal Pradesh Governor, Jyoti Prasad Rajkhowa in chawl a lak leiin Tripura  Governor Tathagata Roy chun July 10, 2016 a inthawk khan Arunachal Pradesh Governor sin  khawm a chelsa tan. July 10, 2016 khan Tathagata Roy chun Raj Bhavan, Itanagar hmuna Arunachal Pradesh Governor dingin Gauhati High Court Chief Justice Ajit Singh hmaah  sesamna a nei. Hi hunsera hin Arunachal Pradesh CM Kalikho Pul, an Assembly Speaker Wanglei Lowang, Ministers,

MLAs, Civil le Police tienga officer hai an thang tawl.
Zangnadawmna Rs. 5 lakh pei pek ding
NEW DELHI: India le Pakistan inrina zula cheng civil mi, terrorist annawleh Maoist helpawlhai chetna leia thina tuok sunghai kuomah zangnadawmna Rs. 5,00,000  pei pek anni ang thovin Pakistan sipai han India ram an hung kap changa thina tuok sunghai chu zangnadawmna Rs. 5 lakh pei pek ni tang an tih tiin Union Home Minister Rajnath Singh chun a hril.Chun, hiengang thil tlung leia sin thaw thei ta lo ding hiel khawpa hliem annawleh piengsuolna tuokhai khawm sawmdawlna Rs. 5,00,000 pei pek an ni ta bawk ding thu Rajnath Singh chun a hril.

Kashmir buoina leia thi mi 23 an tling tah
SRINAGAR: Security forces han Hizbul Commander Burhan Wani an kap hlumna le inzawma Jammu and Kashmir­a protestors le security personnel hai inbeituonaa mihriem thina tuok chu 23 an tling ta a, midang 250 chuongin hliemna an tuok bawk. Zani khawm khan mipui pungkhawm han Sopore a Police station an raw bakah Pulwama hmuna air force airport khawm bei an tum nawk a, boruok a la sosang hle. July 8, 2016 zantienga inthawk khan  south Kashmir a districts 4 haia chun mobile phone service sukchawl/that a nih. Sayed Ali Shah Geelani, Mirwaiz Umer Farooq le Mohammad Yasin Malik hai thangin separatist leaders iemanizat hai chu hrentang le house arrest­a sie an nih.

J&K a buoina suok lei hin sawrkar thlungpui Central paramilitary forces (CRPF) 800 a tirlut belsa  nawk. July 9, 2016 khan security personnel 1,200 a lo tirlut ta bawk a nih.

Sudan rama sawrkar sipai hai inbeituonaah mi 272 an thi tah
JUBA:  July 8, 2016 a inthawk Sudan ram khawpui Juba hmuna sawrkar  sipai le tuta hmaa helpawl lo ni hlak hai kara inbeituona tlung leiin tuchena hin mi 272 in thina an tuok ta niin official thusuok chun a hril. President Salva Kirr’s le Vice President Riek Machar bodyguard hai kara inbeituonaa inthawka inkaptuona hi tlung nia hril a nih. President thlawptu le Vice President thlawptu hai inkara inbeituona a nih.

Kum 2013 khan Vice President Machar hin coup thaw a tum tiin President Kiir chun an tum a, sienkhawm a hnungin nikum khan inremna an siem a, hi hnung hin Unity sawrkar thara vice president hmasatak ni dingin Mr Machar hi south Sudan­ah a hung kir nawk a nih. United Nations Security Council chun an buoina hi an rang thei anga chingfel le inremna siem dingin a ngen.

VAWISUN THUPUI
Ama chun, i ritlona po po a ngaidam hlak a, I natna po po a sukdam hlak. Bohmangnaa inthawkin  i hringna chu an tlan hlak a, Zainemna le lainatnahai an khumtir hlak cheh a. ~ Sam 103: 3­4

Editorial: Thabonain hmang nawng ei tiu
Tienlai ei pi le puhai khan zu an lo dawn ve hlak ti chu an chanchin ei hriet dan a nih. Amiruokchu, tulai mihai angin zu hi thabona le suolnain an lo hmang ngai nawh ti thanghlui deu han an chanchin an hril le ziek dan haia inthawk hin thangthar han ei hriet thei. Kut, Chawngchen ni, bu le bal, sa inei ni le an hun pawimaw hmang ni haia chun zu chu lo thei lo anga an lo dawn le hmang hlak a nih. Mi huoisen le ralhrat chawimawinain Nopui an indawmtir hlak a, Lal le upa hai khawm khan mi huoisen, ralhrat le mi tlawmngaihai chu Zu Nopui an inle rawp hlak. an hmang dan hi a tha zawngin mihriem chawimawinain an hmang hlak. Tulaia ding chun trophy annawleh medal ei ti ang hi a ni awm ie. An hmang dan hi a tha leiin tienlaia tlangvalhai inelna chu Nopui (Zu Nopui dawm) hi a nih.

Chun, tienlaia ei pi le puhai khan a naranin zu an dawn ngai el nawh. Chun, zu dawnhai kha tlangval le tleirawlhai anni ngai naw a, Lal le a khawnbawlhai bakah khaw khata kum tienga mi upa deu tahai anni tlangpui. Zu hi dawn palawtah an nei ngai nawh. An hunpui annawleh an ni ropui hmang huna inpawl hlimna takin anhmang a nih. Chun, Zu inrui kha an inlau em em a, zu an dawn chang khawmin mihai hriet lo dingin an khawsa hlak. Zu kha thabonain an hmang naw hrim hrim. An lo sin thul pha khawpin zu an dawn ngai nawh. Zu leia  thabo an um ti khawm hriet a ni nawh.

Pi le pu hai hun le tulaia thangtharhai zu dawn dan chu inthlau takel a ni tah. Tulaia thangtharhai  chun zu hi thabonain ei hmang ta a nih. Zu dawn mi, mi taima em em el hmu le hriet ding an la umnawh. Zu dawn ni tin, zingkar inhma taka tho hlak hai hrim hrim an taimakna leia tho inhma an ninaw a, an zu du leia tho inhma em em el an nih. Zu kha an du el chau ni ta lovin a chakin anchak a, Zu dawn lova um thei ta lo anni leia zingkar tho inhma an nih. Hiengang mihai hi zu ngawlinvawi ei ti hai hi an nih. Zu ngawlinvawi tahai hrim hrim tha hratna le tha inthakna an nei ta naw a, an ta ding chun thabona  damdawi a ni ta hlak. Zu hi mi han inpawl hlimna le thil tangkai thawnaa an hmang lai ei ni rawi chun suolna le thabona in ei hmang ta lem hlau a nih.

Khawvel hung changkangin hma a hun sawn pei a. Lekhathiem thatna le hlutna ei hung hrietchieng ta leiin sikul kai lo naupang ei um meu ta nawh.Tribal inti inlakhawm vai tribal­hai leh chu ei kar an hla ta hle. Ei ni lai chu a rethei tak sungkuo khawmin ei nauhai sikul ei inkaitir thei seng tah ti inla ei hril suol bek bek ring a um nawh. Sikul kai thei lo hiela rethei le kutdaw em chu ei la um nawh. Sawrkar  le kohran pawl tum tum hai zar zova hiengang ngirhmuna um thei ei nih. Lekha inchuk ei ngaipawimaw seng hi lawm a um. Lawm a um lai zingin mi tamlem han ei lekha inchuk thabonain ei hmang a, hi thil hi a pawi em em el a nih. Thabona  tawk chaua lekha inchuk hi chu ei mimal, ei insung, ei khawtlang, ei ram le ei hnam ta dinga sietna nasa tak intluntu a nih. Thabona ding tawk chau a lekha inchuk hi chu bansan hmak chi a nih.

Information Technology tiengpang khawm nasa takin hma ei sawn a. Computer, Internet, Mobile phone hmang dana khawm ei duoi bik ta nawh. Information Technology tienga ei hmasawnna hi a tha a, lawm a um. Sawr tangkaina tam tak ei nei laizinga thalai han thabonaa ei hmang pha ruok hi chu a pawi a nih. Hiengang changkangnahai suolnaa hmang pha khawm ei bo bik ta nawh. Computer le mobile phone hmet le inhnelpui rawn taluo leia mani lekha inchukna a hlawsam pha khawm ei tam taluo ta a, nu le pa hai sukbeidawngtu a ni tah. Thalai han changkangna lampui hung inhawng  hi thabona ni lovin taimakna, thiemna le varnain hmang tum lem seng ei tiu.

Thenkhatin ei nu le pahai chet theina le hausakna hai thabonain ei hmang pha mek bawk. Ei hausakna thenkhat chun thabona chau ni lovin suolna le nungchang inhmangnain ei hmang pha bawk. Competitive Exam result a hung suok a, mi hausa, milien le milal nauhai  nekin mi naran sungkuo le mi rethei nau, tumruna le taimakna neia thaw hram hram hai chu hlawtlingna chang a tlangpuiin an tam lem hlak. Hi taka inthawk hin ei nu le pa hai hausakna, an inlalna le milien an nina kha thabopui thei a nizie a hung inlang chieng hlak. Ienganga thil tha le hlu khawm nei inla thabonain ei hmang chun a thatna le a hlutna inlang suok thei ngai naw nih. Thabona hi mihriemhai hmelma lien tak pakhat a nih.
Don't Miss
© all rights reserved
made with by Simon L Infimate