YMA Lamka Branch Jubile nipui ni hmang
CCPUR: July 7, 2016 a inthawka Hmuia Veng, YMA Hall­a YMA Lamka Branch kum 60 tling Diamond Jubilee lawmna a nipui ni tak zanikhan hmang a nih. Hi huna hin Chief Guest (Khuallian) in JC. Ramthanga, IAS, Principal Secy. govt. of Manipur le Lungmuana, IAS, Principal Secy. govt. of Manipur hai an thang a, Jubilee Pa in Lalbiakzuala, President, Central YMA a thang.

Hall Programme hmang hmain Chief Guest­a thang JC Ramthanga chun YMA Campus ah Diamond Jubilee lundaw a hawng a, hi zo hin amain hma thuoiin Jubilee dar vaw dinga thlangsuok mi 60 han Jubilee darkhuong vuokna an nei.


Hall programme hmang huna B. Lalramsanga, Ex­Secy. YMA Lamka Branch inrawinain YMA member lo thi ta hai sunna hun hmang a ni a, Lungmuana, IAS in Diamond Jubilee Souvenir tlangzarna a nei a, mikhuollien hai le YMA thuoitu han thuhrilna hun an hmang bawk.

Chun, Sports Sub­Committee inrawinain lawmman semna nei a ni bakah zantieng Jubilee ruoi hlim takin an kiltlang.

HSLC Compartmental Exam
CCPUR: HSLC Private Centre Committee enkainain zanikhan Ebenezer Academy, N. Lamka­ah HSLC (Class X) Compartmental Exam, 2016 nie a ni a, ZEO/CCPur chun Exam Centre hi a kan bakah emergency thila hmang dingin Medical Department chun Ambulance hmang thei dingin an inthut bawk. Compartmental Exam hi Maths, English, Science, Social Science, Home Science, Meitei Mayek le Higher Mathematics subject haia nei a ni a, regular candidates 396 lai mi 2 an absent a, external candidates 17 hai chu an exam seng.

Tipaimukh MLA in a workers hai
CCPUR:  July 9, 2016, 11:00AM hin Quarter No.2/Type­VII (CP), Lamphel, Imphal hmunah Tipaimukh MLA Dr Chaltonlien Amo hai nupa chun fielbik mi thenkhat hai inpawlpuina le thlaithleng awtpuina nei an tih. Hi huna hin kum 2012 a Tipaimukh A/C MLA dinga thlangtling a nia inthawk kum 4 lo liemta sunga biel sunga hmalakna le sin lo thaw ta ennawnna le hmatienga hmalak pei dan ding hai hriltlangna nei an tih.

HNA in a suizui zing
CCPUR: July 5, 2016 a Pu Lalthangsang Intoate chunga nunrawng taka kut thlaktuhai chu HNA’n ngun takin a suizui zing a, inpuonga ngaidam inhni a, ngaidam an ninaw chun an chungah HNA chun action a nat thei ang takin lang a tih. Chun, vangduoi takin kan President in mi lo boral san ta sienlakhawm HNA chu bo naw ni a, hmatieng pan peiin hnam damna sin chu hrat takin a fepui sunzawm pei ding a nih tiin July 8, 2016 a Japhet CC Mawia, Secretary, Information, HNA in press release a siema chun a zieklang.

Workshop an nei
CCPUR: CCPur District Teachers’ Association (CDCTA) huoihawtnain zani 11AM khan Synod Hall, IB Road, CCPur­ah”One Day Workshop on New Pension Benefit Scheme” nei a nih. S. Zamkhanpau, Headmaster in tawngtainaa program a hawng zoin CDCTA President Tualkhanlal in thuhrilna hun a hmang a, SBI/Pearsonmun staff hai resource person in an thang a, CDCTA members 100 chuong an thang.

CHC Parbung hmangruo thar hai an enfel
PARBUNG: Hmarram Kohran Inzawmkhawm pawl (HKI) chun July 3, 2016 khan CHC Parbung hmuna Organisation dang dang hai le fein CHC Parbung in hmangruo thar a nei hai a hmuna an enfel. Pathien kuoma tawngtaia lawmthu hrilna hun an hmang.CHC thawktu hai chun HKI thuoituhai hi hmangruo thar hai inentirna an nei a, MO i/c Dr Mary Joy chu tulna leia Tuithaphai tieng a um leiin hi huna hin lo umnaw sienkhawm HKI­OB hai chun Dr Mary Joy chungah lawmthu an hril bakah hiengang thil inthut a ni theina dinga hmalatu hai chunga lawmthu an hril a, hmatieng peia hi neka tha le changkang lem nei pei dingin thawktu hai chu ditsakna an inhlan. Hieng hmangruo thar hai hi a tul huna a hmangtu indik tak han an hmang bakah  tul rak loa pedawk lo ding le  mipui hai chu hieng thil hai suksetu nil ova a venghimtu ni seng dingin mipui hai an ngen. (Lalnunthang Songate)

Towel le Dettol sem
CCPUR: Mr Kaikhanlian Guite, Nodal Officer, Mid­Day Meal &DI of School, CCPur chun zani sun dar 11:00 khan CCPur Govt. H/S­ah ZEO le ADC/CCPur hnuoia Mid­Day Meal dawn Schools 462 hai  kuomah Towel le Dettol a sem. Zanita la lo Schools han July 11, 2016 chenin lak thei ning a tih.

Dist. level Science Exhibition le Maths Competition nei
CCPUR:  July 8, 2016, 9AM khan Vimala Raina High School, CCPur­ah SSA/CCPur district huoihawtnain District Level  Science Exhibition le Mathematics Competition, 2016 nei a nih. Science Exhibition hi ‘Water Harvesting’ ti thupui hmanga nei le Mathematics competition hi ‘Mathematics Daily’ ti thupui hmanga nei a ni a, zantieng 1PM khan lawmman semna nei nghal a nih.



Lawmman semna huna hin Chief Guest in T. Goukhomang, ZEO, CCPur le functional president inLalthanzam Infimate, MCS, BO HQ, DC Office, CCPur a thang. Chief Guest chun, Govt. School­a kai student han Science le Mathematics tiengpangah hma an sawn lem theina dinga competition hi buotsai a ni thu, tukuma mi hi Govt. student hai ta ding chaua buotsai a ni thu, Govt. school student han private school hai inelpui (compete) theina dingin  tumruna le titakna nei le hotu le nu le pa hai thu inza a pawimaw thu a hril. SSA le RMSA hnuoia trained le experience tha tak nei teacher hai enkaina hnuoia um an ni leiin student hai chu inngaise loa nasa taka thang la dingin an fui.

Functional President chun, student hai hmasawnna dinga department in hiengang competition a buotsai chu lawmum a ti thu hrilin, student hai chu nasa taka lekha inchuk ding le co­curricular activities tieng khawm ngaisak dingin an fui.

Science competition­a 1st L. Lamsuanpau Ngaihte of Vimala Raina H/S; 2nd Chingmuankim of Phungkhothang Govt. H/S; 3rd Angeli Kumar of Tuibuong Govt.t H/S hai niin lawmmanin  Rs. 1000 + gold Medal + Certificate; Rs.800 + Silver Medal + Certificate le Rs.500 + Bronze Medal + Certificate inhlan an nih.

Mathematics­ah 1st in Letminlun Haokip of INA H/S; 2nd Chingroumawi of Phungkhothang govt H/S le 3rd in Thanggoulal of Tuibuong Jr H/S hai niin lawman Rs.1000 + Gold Medal + Certificate; Rs. 800 + Silver Medal + Certificate le Rs.600 + Bronze Medal + Certificate  inhlan an nih.

Jail­a thun an ni tah
CCPUR: June 29, 2016, 8PM vela Khawmawi leilak laia Lalbabu Gupta (34) of B. Vengnuom hmang lai Honda Activa a thu le hla lova lakpek a nina le inzawma man Seiminlal Haokip @ Lalboi Haokip (25) s/o Seimang Haokip of Laijang village chu zanikhan Police han CJM, CCPur hmaah an inlangtir a, Court rel angin Jail­a thun a ni tah. Police chun hi thua hin FIR No.34 (6) 2016 CCP­PS U/S 397/34 IPC an registered a nih.

Awareness on POCSCO Act nei
CCPUR:  National Commission for Protection of Child Rights (NCPCR), Manipur Commission for Protection of Child Rights (MCPCR) le Manipur State Legal Services Authority (MASLSA) huoihawtnain Dist. Training Hall ah “One Day Dist. Level Awareness Program on Protection of Children From Sexual Offences (POCSO) Act, Child Labour (Prohibition and Regulation) Act. & Juvenile Justice (Care and Protection of Children) Act.  nei a nih. Hi huna hin S.Sarat Kumar Sharma, Chairperson, MCPCR; L.Mangkhogin Haokip, IPS, SP/CCpur;Letkho Kipgen, CJM/CCPur; Kim Shoute, Dist. & Sessions Judge, CCPur han thuhrilna hun an hmang a, Technical Session ah Bobby Singh, Consultant, MCPCR; Sangboi Gangte, MPS, SDPO/Thanlon; K.Pradipkumar, Member MCPCR; S.Shyamcharan Singh, Member MCPCR; Binobala Nongmeikapam, Dy Director, (WP) SW le  Kh. Rajlakshimi Devi, Member ,MCPCR hai resource person in an thang.

India le South Africa ram han Terrorist hai donaah thangtlang pei an remtih;
agreement 4 an ziek
PRETORIA:  Africa rambung 4 hai sir dinga inzin suok le tuta South Africa­a cham mek PM Narendra Modi le South Africa President Jacob Zuma hai chun zanikhan South Africa khawpui Pretoria hmunah inbiekna an nei a, hi huna hin an ram pahni hai thawtlangna ding agreement 4 an ziek. Hi baka hin India le South Africa ram hai chun terrorist hai dona kawngah thangruol pei dingin an remti niin meeting an nei zova joint Press Conference huna PM Modi chun a hril. South Africa le India han thawtlangna ding agreement an ziek hai chu­ Information and Communication Technology, Toursim, Grassroot Innovation le Art and Culture tienga thawtlangna ding hai a nih.

PM Narendra Modi chun, India le South Africa ram han leilung hausakna chodawkna kawnga le damdawi le chemical tiengpanga sumdawngna le insumdawng tawnna an suklien pei ding  thu; khawvel ngirhmun thlak danglam dingin hieng rambung pahni hai hin IBSA le BRICS nasa taka an hmang tangkai ding thu; Goa­a BRICS Summit hunah South Africa President Jacob Zuma chu a hung thang ngei a beisei thu a hril a. India in NSG member ni tuma hma a lak mek naa South Africa in India a thlawpna thuah lawmum a ti thu hrilin, South Africa  inzin a, Nelson Mandela le Mahatma Gandhi hai inzana pe theia a um chu lawmum a ti hle thu PM Narendra Modi chun a hril bawk.

Joint press Conference an nei zo hin PM Modi chun South Africa Deputy President H.E. Cyrill Ramphosa khawm an hmupui a. Zani zantieng khan Johannesburg­a Constitution Hill le Nelson Mandela foundation a va sir bakah zani zan 10PM khan Johannesburg hmuna India mi um hai hmaah thuhrilna a nei a, hi zo hin South Africa suoksanin Durban a pan nawk tah. PM hin Mozambique, South Africa, Tanzania le Kenya ram hai sir dinga July 6, 2016 kha India ram suok san a ni a, tuhin Mozambique le South Africa hai a sir zo ta a nih.

Cabinet meeting nei a nih
IMPHAL: Zani zantieng 3PM a inthawk khan CM’s Secretariat, Imphal­a Cabinet Hall­ah CM O.Ibobi Singh inrawinain State Cabinet meeting nei a ni a, agendas 10 an hriltlang. Agendas an hriltlang hai chu,14 FC hnuoia Family Court indin ding; Manipur Judicial Academy bawlna ding ram direct a inchawk ding; High Court of  Manipur a contract basis a Court Managers 3 hai sawr zawm pei ding; Agriculture Department sin lak khapna (ban) inthlazal ding; Social Welfare Department a Direct sin  lak khapna inthlazal ding; Sericulture  Dept. a direct recruitment khapna inthlazal ding; Rural Development & Panchayati Raj Dept hnuoia Block thar 28 haiah sin chi hran hran post 523 lak ding, Forest & Environment Department hnuoia direct recruitment khapna inthlazal ding; Corporation Department le Loktak Downstream Hydroelectricity project hnuoia direct recruitment thaw khapna inthlazal ding tihai a thang.

Cabinet meeting chun June 24, 2016 nia Nungrie village, Thoubal district­a thil tlunga thina tuok Md Arif Khan sunghai kuomah zangnadawmna Rs. 5 lakh pek dingin a rel bakah Tamenglong district­a Tousang village­a Loktak Downstream Hydrolectric project thaw mek zona dingin budget siem belsa ding, kum 1999 a NHPC le agreement zieka um ennawn dingin an rel niin Govt. spokesperson M. Okendro chun a hril.

MPSC (Prelims) Result puong
IMPHAL: Manipur Public Service Commission (MPSC) huoihawtna hnuoia MCS, MPS, SDC, MSS/SO le Election Officers hai lakna dinga Manipur Civil Services Combined Competitive (Preliminary) Examination, 2016 July 3, 2016 nia neia um result chu zanikhan puong a ni tah. Result hi MPSC notice board le MPSC website­ah en thei ning a tih.

Preliminary Exam­a hlawtlingna chang hai chu Mains Exam­a thang thei ding hai chun July 14, 2016 a intahwk khin www.empsconline.gov.in­ah online in application peklut thei ning a tih. Main Exam hi September 4, 2016 in nei ning a tih.

IMC Mayor le Dy. Mayor hai lawmpuina
IMPHAL: Zanikhan Congress party chun Congress Bhavan, Imphal­ah Imphal Municipal Corporation (IMC) a Mayor le Deputy Mayor  a thlang thar hai lawmpuina an nei. Hi huna hin CM O.Ibobi Singh, Dy. CM Gaikhangam le MPCC President T.N. Haokip han thu an hril tawl. Sawrkar thlungpuia inthawka fund hung ding nghak el lovin IMC enkawlna dingin sum hmu theina ei dap a tul a, chu ding chun thangruol seng ei tiu tiin O.Ibobi Singh in ngenna a siem. Manipur mipui han Congress party an la ringzo tawk a, hi lei hin IMC election a khawm mipui han Congress chu sawrakrna siem thei dingin an vote tling nawk a nih tiin Gaikhangam chun hi huna thu a hrilnaah a hril.

PET a la thang lohai ta dingin
IMPHAL: Manipur Police Department hnuoia Police Constable (Male/Civil) lakna ding le inzawma Physical Efficiency Test (PET) la thang lo hai ta dingin PET nei hun ding la siem nawk a nih. Imphal West, Imphal East, Bishnupur le Thoubal district a chenghai ta dingin July 9, 2016 le Imphal West, Imphal East, Jiribam, Bishnupur, Thoubal, CCPur, Chandel, Tamenglong, Ukhrul & Senapati district hai ta dingin July 10, 2016 ruot a nih. PET hi zing dar 8 ah tan ni hlak a ta, hi thil hin Supplementary candidate­hai khawm a huomsa a nih.

BJP Manipur Office Bearer thar hai
IMPHAL: Zani 3PM khan BJP Manipur State Unit a Office Bearer thar hai hming puonglangna BJP Manipur Head Office­ah nei a nih. Vice President in mi 4­ M. Asnikumar Singh; V. Hangkhanlian, M. Hemanta le Adim Panmei hai ruot an nih. State General Secretary dingin mi 2 euot an ni a, chuonghai chu N. Nimbus le Th. Biswajit hai an nih. Treasurer in Robin Blackie ruot a nih. State Secretaries in L. Susindro @ Yaima, Manibabu Sharma, O. Males le Kulka Devi hai ruot an nih. Morcha President in P.Somorjit­ BJYM; N. Sumatibala­Mahila le Kh. Nebakumar­Kishan hai ruot an nih.

State sawrkarin Banks 16
IMPHAL: Kum 2016­17 sunga SPSU, SLAS, Local Bodies le a dang dang haia sumdawngna le sum sielut theina dingin State sawrkar chun Banks 16 a ruot a, chuonghai chu Bank of Maharashtra, Central Bank of India, HDFC Bank, Industrial Development Bank of India, Punjab National Bank, State Bank of India, Syndicate Bank, United Bank of India, Manipur Rural Bank, Imphal  Urban Cooperative Bank Ltdl, Manipur Cooperative Bank Ltd. Moirang Primary Cooperative Bank le Manipur  Women Cooperative Bank hai an nih.

Rs. 3969.57 crore hmangna UC la peklut lo
IMPHAL: Kum 2008­09 to 2014­15 inkar sunga project chi hran hran thawnaa sum hmangna (Utilisation Certificate ­UC) chu tuchen hin peklut thei lovin a la um. Sum hmangrala um hi Rs. 3969.57 crore zet a nih. Utilization Certificate peklut thei lova a um leiin project thar thaw tan thei lovin a um pha nia hril a nih. Utilization Certificate la pelut thei lo Department­hai chu, Tribal & Hills  Affairs, RD & PR, Planning, Health Services, Education (S), Education (U), Power, MAHUD, Commerce & Industries, DIPR, Art & Culture, General Administration Department, Development of Tribals & Other Backward Classes, Commerce & Industries Department, Town Planning, Excise, Police le Youth Affairs & Sports hai niin ei thu dawngna chun a hril.

Mihriem thisa ru hmu a nih
IMPHAL: Zani hmas khan Farung Village, Ukhrul district­ah mithi ru hmu a ni a, Shangshak Police han an va lak a, en thei dingin JNIMS morgue­ah sie a nih.

Truck le Auto inbawah naupang 1 a thi
IMPHAL:  July 7, 2016 zan dar 9:30 vel khan Uchiwa Mayang Imphal­ah Tata Truck MN03I­0337 le Autorickshaw  MN01Y an inbaw a, Autorickshaw a chuong Md. Ismat Khan (6) s/o Md. TAjuddin of Yairipok Santhel Makha Leikai na takin a hliem a, RIMS panpui a ni a, sienkhawm damzo lovin a thi.

SC in suizui dingin a rel
NEW DELHI: Manipur state a Army le Security Forces han inkaptuona tehlema mi an kap hlum hai chungchang chu suizui dingin zanikhan a rel. Kum 2000­2011 inkar sung khan Manipur state sunga hmun hran hran haiah inkaptuona tehlemah mi 1528 kap hlum anni a hril a nih. Army le Security Forces han Armed Forces (Special Power) Act um leiin an nuom dan dana mi kap hlum theina dingin thuneina an nei nawh tiin Supreme Court chun a hril.

Maha CM in a ministry a suklien
MUMBAI:  Maharashtra Chief Minister Devendra Fadnavis chun zanikhan mithar 10 lalut le minister ni lai pakhat cabinet a hlangkai in a ministry a suklien. Minister dinga laklut thar hai hin  Vidhan Bhavan –ah Maharashtra Governor Ch. Vidyasagar Rao hmaah sesamna an nei. Minister dinga sesamna hai laia 6 chu Cabinet ministers  le mi 5 hai chu minister of statate dinga sesamna nei an nih. Hi huna hin Chief Minister Devendra Fadnavis le minister dang dang hai khawm an thang. Cabinet minister a laklut laia 5 chu BJP le pakhat chu an  thangruolpui Rashtriya Samaj Paksha niin minister of state a laklut hai lai hin BJP 2, Shiv Sena 2 le Swabhimimani Shetkari Sanghatna party a mi 1 an thang. Tuhin Maharashtra cabinet chu mi 39 an tling tah.

UK in nuhmei Prime Minister a nei ding
LONDON: United Kingdom/Britain chun kum 25 chuong liemtaa Margaret Thatcher hnunga  a hmasatakna dingin David Cameron thlakthlengtu dingin nuhmei Prime Minister an nei ding a nih. British PM hung ni thei dinga hril hai chu Conservative party­a inthawk Home Secretary Theresa May (59) le Energy Minister Andrea Leadsom (53) hai an nih. Zani hmasaa conservative party han an PM ding thua vote an lakna second round an nei huna May chun votes 199 a hmu a, Leadsom in votes 84 hmuin Michael Gove chun vote 46 a hmu a, Gove chu PM ngirhmun inchuna dinga hin a tlingzo tanaw (eliminated) a nih.

May le Leadsom chun final round­a dingin campaign an nei tan mek. Final round­a vote lakna result hi September 9, 2016 khin puong ni dinga hril a nih. British nuhmei Prime Minister hmasa tak Margaret Thatcher khan kum 1979­1990 inkar sung British Prime Minister sin a lo chel a nih.

Brexit referundum nei huna mi tamlemin EU a inthawk suok dawk tha ti zawnga vote an pek leia David Cameron PM a ninaa inthawk an ban leia British PM thar ding hi thlang a hung tul a nih.

VAWISUN THUPUI
Chun, ama chun, “Aw Lalpa, lunginsen naw la, vawikhat bek hang hril nawk ka tih; chutaka chun sawm bak i hmu el rawi mawi,” a ta. Chun, ama chun, “Sawm lei khawm chun sukbohmang naw ning,” a tih a.   ­ Genesis 18:32

Editorial: State sawrkarin venghimna priority pe sienla

Khawvela rambung tum tum a sawrkarhai chun inremna, muongna le himna an dit thu an puonglang ur ur seng a. Inremna, muongna le himna chu a um thei tak tak chuong nawh. Khawvel rambung tum tum hai inzawmkhawmna United Nations Organisation (UNO) khawmin khawvelah inremna, muongna le himna a um theina dingin meeting a ko a, rambung tina lukhaituhai an thang a, inremna, muongna le himna aum an dit thu le hmalak tlang dingin ro an rel hlak. Amiruokchu, an ram sengah ankir le tlung nawk hunah ralthuom tha le tium siemna  tiengpangah an inel nawk hlak. Defence budget khawm an ngaipawimaw a, budget an induong huna defence budget chu a tam pawl tak a ni hlak. Hi lei hin khawvel chun muongna le himna chu a hlat tiel tiel el a ni hi!

Khawvel pumpuia sawrkar ropui taka ngai, venghimna tiengpanga khawm a uluk taka hril USA khawmin a ram mipuihai a venghim hne chuong nawh. An ramah inthatna, inthuoihmangna, insuom le inrawkna hai khawm a tlung zing hlak. An rama silai zalen taka zawr le inchawk theina chun ngaimaw a hung hlaw tan mek. Hi zalenna hin an rama himna a suksiet in a sukderthawng pha niin an lang. Terrorists han 9/11 a New York khawpuia World Trade Centre an suksieta inthawk khan US sawrkar chu an ram le a mipuihai venghimna tiengpangah thang a lak nasa zuol leiin tuchen hin khangang em sietna kha a tuok ta nawh.

Ram ropui leh chun inkhaikhin ruol chu ei ninaw a, nisienlakhawm ei chunga thil tha lo tlung thenkhat hi chu ei inthlada le ngaisam lei niin an lang. Ei rama Bank um hai khawm ei venghim zo naw chun a ram mipui le an thil ngeihai venghim lem chu a teu naw hle. Hi lei hin ei state sawrkar chun venghimna tiengpang hi priority a pek a tul hle a nih. Sawrkar um san chu ram le mipui le an thil neihai venghim hi a nih. Tulaia Manipur a Venghimna ngirhmun hi a tha tawk naw a nih ti chu ei thil tuok haia inthawk hin hriet theiin a um. Hi lei hin mipui himna hi ngaipawimaw a tul hle a nih.

July 4, 2016 zantieng dar 5 vela HDFC Bank, Thoubal Branch suoma a um dan dam kha state sawrkar ta ding chun inzak a um a, muolphona a nih. Silai chawi lo han bank an rawkin an suom thei elna san chu venghimna a khau tawk naw el chau ni lovin venghimna sin kha inthlada le ngaitha a ni lei a nih. Hmun kilkhawr khawm ni lo, Thoubal town area sunga suomhmanghai an chet ngam elna san kha security lapsed lei a nih. Chemte annawleh chemtuma Bank suom theia a la um hi chu inzak a um a, state danghai mi hriet ding khawma a ninaw taluo deu ta a nih. A tulai naw taluo a, nuizat a um lem rak a nih. Pawisa le rangkachak hlak an la hei lak rawn nawk hrep nghal a. State police hai fel hai sienla chu hi bank suomnaa thanghai hi man rip le an thil lak hai khawm hmukir nawk vawng hun a ni tah.

Ei State sawrkarin venghimna tiengpang an thlada leiin a mipuihai hringna a derthawng pha a nih ti chu tulai hnai ela suspension of Operation (SoO) zieknaa thang, Manipur a helpawl group hran hran pathum haia an hotu lulawkhai that theia an um hi a nih. Venghimna thain khau tawk sienla chu hiengang inthatna hai hi pumpel thei a ni ring a um. Chun, State Police force hai hi Intelligence tiengpang khawm an hrat naw a, an sinah an failed let der ti theina chin a um.

Khawvel umsung chun indo, inthat, inthuoihmang, insuom, inrawk tihai hi chu bo ta naw ni a, tlung rawp a ta, a la tlung pei ding a nih. Nisienlakhawm hiengang thil ditum lo tlung thei lakah hin inveng thei a nih. State sawrkar chun venghimna tieng priority a pek phawt chun hiengang thil ditum lo tlung ding thenkhat chu dang le pumpel a hung ni thei ding a nih. Ram le mipui himna ding chun sum le pai, tha le zung iengzat khawm nisienla sawrkarin a sengngam ding a nih. Chu chu sawrkar mawphurna lieu lieu, a thaw ding makmaw a nih.

Post a Comment

Powered by Blogger.