Shillong, July 31, 2016, Virthli (ONP): Evagelical Free Church of India (EFCI) Kohran chun Pathienni (July 31, 2016) zan dar 6:30PM khan EFCI General Headquarter, Shillong hmun ah Missionary Commissioning Service a nei.  Hi hun hi Rev. Simon L. Darngawn keihruoina hnuoia hmang a ni a, hun hmasa tieng Short-Term Missionary mi pakuo (9) haia inthawkin an testimony hai ngaithlakna nei a nih.

Commissioning Service hun hi Rev. Lallienvel Pakhuongte, President, EFCI in a nei a, infuina thucha tha tak tak hrilna Rev. Dr. J. Huoplien Neitham, Moderator EFCI in a nei a, EFCI Central Choir, Hebron EFCI, Shillong EFCI haia a'nthawkin hlapawl mawi tak tak le solo hai ngaithlak a ni bawk. Pathien thucha Rev. Lallienvel Pakhuongte, President, EFCI in hrilna a nei a, Rev. Lalsiemkung Khawbung, Presbytery Supdt. Meghalaya in Benediction hrilin hun a suktawp a nih.


Chanchintha palai dinga Krista hminga fesuok dinga inpe le laklut thar hai chu-
1. HK Malsawrn , 2. Zarzolien Ralsun, 3. Menso Hanse, 4. K. Lalramsan Chorei, 5. Moirangthem Ingobi Singh, 6. Oinam Pradip Kumar Singh, 7. MK. Thanglen Chothe, 8. Lallawmzuol Khawbung, 9. Lalliensang hai an ni a., anni hai baka hin Foreign Missionary ding pahni Pastor Lalsangngul Tuolor, South Korea le Yam Bahadur, Nepal hai an thangsa bawk.

EFCI kohran hin Marka 16:15 - "Khawvel popo ah fe unla thillsiemhai popo kuomah chanchintha hril ro." ti thupui a neiin chanchintha hrildarna kawng ah khawvel hmun tum tum ah hma a lak mek a nih. Ei Lalpa Isu Krista'n eini ama ringtu le hnungzuitu hai thu a mi pek laia ropui tak Marka 16:15 ang taka hieng Krista ta dinga in pe hai hi an rawngbawlna malsawma a um theina dingin ei tawngtainaa hai lo san hlak ei tiu.

Virthli (ONP) chun rawngbawltu hlawtling tak hung ni seng dingin ditsakna in sangtak ei inhlan. Lalpa'n an tul le mamaw ang peiin thuoi pei raw seh.

Post a Comment

Powered by Blogger.