PRESS RELEASE
Thlahmur 22, 2016, Churachandpur

Hmar Students Association, State Coordination Committee, Manipur chun vawisun khan Churachandpur District sunga Sawrkar office le hmunpui iemanizat kanna hun hmangin Saikawt I.T.I, Saikawt P.H.C le Saikawt SDO/BDO hai enfelna a nei.

Saikawt I.T.I hi kum 1972 lai deia indin a lo ni taa, nisienlakhawm hi building enkaina sin a tha tawknaw leiin a building hai a tawp ta hle a,office hmangruo hai khawm hlui tak takel an ni tah. Nitina inchuklaihai kaina ni zing siin a compound khawm sukfaiin a um naw a, anhuonna dai khawm hmun tamtaka a chim ral ta bawk anih.HSA in Saikawt I.T.I a kan lai hi office hour ni zing siin a sungah thawktu pakhat khawm hmudingin an umnaw bawk. Hiengang Institution pakhat, Churachandpur sunga Technical field tieng inchuk theina dinga Union Sawrkar hnuoia DGET, Ministry of Labour & Employment hnuoia indin ni si ngaitha bek beka a um hi HSA SCC,Manipur chun pawi a ti takzet a, hi Institution hi thataka a function theina dingin zirtirtu le management thawktuhai enthlakna sin thaw tang a tih.

Saikawt PHC ruokchu staff hai kuoma facility peka um enin a function tha hle a, HSA chun Saikawt PHC se vel khuoa umhaiin an hlawkpui zuolna dingin Community Health Centre a hlangkai nita sien a nuom hle.



HSA SCC chun Saikawt BDO khawm hi ni hin a kan nghal a, amiruokchu hi huna hin Chawkidar tilo chu BDO le Staff dang pakhat khawm hmuding an um nawh. Saikawt BDOa thawktuhai hi karkhata vawihni cho office an kai hlak ti khawm hrietsuok a hung ni a, sawrkar a’nthawka an hlaw bituk chu an lak zing tho a nih. Sawrkar office tangkai thei takel, a hmun le hmang inhawitak ni bawk, sawrkar a’nthawk infrastructure tha em em hung tlung si bawk, sawrkar lekhabua thawktu hming zieka um bawk si a a hmuna hmuding an umnaw hi HSA SCC, Manipur chun pawi a ti takzet.

Hienghai baka hin hun sawttak sung ngaithana nasatakel lo tuok tah, Churachandpur-Sugnu Road siemthata aumna chungthua HSA SCCM chun Muolvaiphei Village Authority le civil organisation danghai hmalakna hi inpakum a ti takzet. Hi lampui, mitamtakin nitina ani ihraw siemnaa sengso popo hi Cheng Nuoi 3 vela hisap ani a, kum tamtak sung chir le pilvutin nasatakin lo bawm ta sienkhawm Saikawt MLA le Singat MLA hai baka Dongjang, Sangaikot meua um Outer Manipur MP hai ngaithana leiin vawisun chen hin hraw hawphurum takin a la khawsa zing anih.Kilometer 28 a sei,Churachandpur-Sugnu Road hi anhmatienga siemthat ani theina dingin local representative haiin an thei ang ang an thaw a hun takzet an tah.

Hmar Students Association chun Churachandpur-Sugnu Lampui siemthatna baka, a chunga hrila umhai chungchanga State Sawrkar le local representatives hai dawnna le hmalakna nghakin enkai zing a tih.

Hmar Sudents Association aiawin,

(Lalrobul Pudaite)
Coordinator,

(Malsawmthang Ralsun)
Secretary, SCC

(Lalthanzau)
President, HSA CCPUR JHQ









Post a Comment

Powered by Blogger.